A Sbꞌabꞌel Carta San Pablo
DꞌA EBꞌ AJ CORINTO
Tzꞌel yich scarta vin̈aj Pablo
1
A in Pablo in tic,
avtabꞌil in och schecabꞌoc Cristo Jesús,
yujto icha chiꞌ ix el dꞌa scꞌol Dios dꞌa vibꞌan̈.
A in yedꞌ vin̈ cucꞌtac Sóstenes
2 sco tzꞌibꞌejbꞌat jun co carta tic dꞌayex yiglesia exxo Dios dꞌa chon̈abꞌ Corinto.
Yic exxo Dios,
yujto junxon̈ej eyaj yedꞌ Cristo Jesús,
yujto a Dios avtannac ex och yicoc yedꞌ jantacn̈ej ebꞌ syal sbꞌa dꞌa Cajal Jesucristo dꞌa junjun chon̈abꞌ.
A Jesucristo,
Yajal yaj dꞌayon̈ yedꞌ ebꞌ.
3 In gana,
a co Mam Dios yedꞌ Cajal Jesucristo tzꞌacꞌan svachꞌcꞌolal dꞌayex,
syacꞌanpax sjuncꞌolal dꞌayex taꞌ.
Vachꞌcꞌolal sco cha yuj Jesucristo
4 Masanil tiempo svacꞌ yuj diosal dꞌa Dios eyuuj,
yujto schꞌoxnacxo svachꞌcꞌolal dꞌayex yuj Cristo Jesús.
5 Man̈ jantacoc svachꞌcꞌolal Dios syacꞌ dꞌayex,
yujto junxon̈ej eyaj yedꞌ Cristo.
Yuj chiꞌ tzꞌacan ix nachajel eyuuj tas ix yacꞌ Dios chiꞌ dꞌayex.
An̈ejtonaꞌ tzꞌacan ix yacꞌ eyalel masanil juntzan̈ chiꞌ.
6 A dꞌa e cal ix checlajelta yabꞌixal Cristo,
to yel.
7 A ticnaic,
van e tan̈van jun cꞌual ayic ol jax Cajal Jesucristo.
Axo Dios tzꞌacan syutej yacꞌan masanil yic dꞌayex.
8 Aꞌ ol acꞌan stecꞌanil e pensar masanto ol ja slajvubꞌ cꞌual,
yic vachꞌ ayic ol jax Cajal Jesucristo chiꞌ,
malaj jabꞌoc e paltail dꞌa yichan̈.
9 A Dios tzꞌeln̈ejcꞌoch tas syalaꞌ.
Aꞌ ix on̈ avtanoch yicoc,
yic ay calan quic yedꞌ Yuninal,
aton Cajal Jesucristo.
Ay ebꞌ sgana spojel sbꞌa
10 Ex vucꞌtac ex vanabꞌ,
tzin tevi dꞌayex dꞌa sbꞌi Cajal Jesucristo chiꞌ to junxon̈ej tzeyutej e pensar e masanil taꞌ.
Man̈ e comon pojej e bꞌa.
Jun lajann̈ej tzeyutej e pensar,
jun lajann̈ej tzeyutej pax e naan masanil tastac.
11 Ex vucꞌtac ex vanabꞌ,
svalbꞌat juntzan̈ tic dꞌayex,
yujto a ebꞌ yic ix Cloé ix alan dꞌayin to van spitzvi oval dꞌa e cal taꞌ.
12 Syalelcꞌochi to chꞌocchꞌoc van eyalan junjun ex.
Yujto ay ex van eyalan icha tic:
Yic in vin̈aj Pablo,
xe chi.
Ay ex pax tzeyalaꞌ:
A in tic yic in vin̈aj Apolos,
xe chi.
Ay ex pax tzeyalaꞌ:
Yic in vin̈aj Pedro,
xe chi.
Ay ex pax tzeyalaꞌ:
Yic in Cristo,
xe chi.
13 Palta ¿tom cha ox macan̈ yaj Cristo chiꞌ tze naꞌa?
A in Pablo in tic,
¿tom tze naꞌa to a in chamnac in dꞌa teꞌ culus eyuuj?
¿Tom a dꞌa in bꞌi a in Pablo in tic ix ex acꞌji bautizar?
14 Yuj val dios,
yujto an̈ej vin̈aj Crispo yedꞌ vin̈aj Gayo vacꞌnac bautizar taꞌ,
man̈ tzijtumoc ex vacꞌnac bautizar.
15 Yuj chiꞌ,
max yal-laj eyalani to a dꞌa in bꞌi acꞌbꞌil ex bautizar.
16 A...
an̈ejtonaꞌ vacꞌnac pax bautizar vin̈aj Estéfanas yedꞌ ebꞌ yal yuninal.
Tzin naꞌa,
tecan man̈xa val ebꞌ vacꞌnac bautizar taꞌ.
17 Man̈ yujoc vacꞌan bautizar ix yacꞌ vopisio Cristo,
palta yuj valanel vachꞌ abꞌix yic colnabꞌil.
Man̈ jelanoc svutej in bꞌa yic svalanel vachꞌ abꞌix tic,
yic vachꞌ a schamel Cristo dꞌa teꞌ culus,
an̈ej te nivan yelcꞌoch dꞌa ebꞌ tzꞌabꞌani.
Ayoch spoder Dios dꞌa Cristo
18 A yabꞌixal schamel Cristo dꞌa teꞌ culus,
malaj yelcꞌoch dꞌa yichan̈ ebꞌ anima van sateqꞌui.
Palta a on̈ van on̈ scolanel tic,
spoder Dios yaj yabꞌixal tic dꞌayon̈.
19 Yujto syalcan icha tic dꞌa Slolonel Dios Tzꞌibꞌabꞌilcani:
A ebꞌ jelan,
ol in satel sjelanil ebꞌ chiꞌ.
Axo ebꞌ ay spensar,
ol vacꞌ somchajel ebꞌ,
xchicani.
20 Yuj chiꞌ,
malaj vachꞌ yoch ebꞌ jelan yedꞌ ebꞌ cꞌaybꞌum.
Malaj pax vachꞌ yoch ebꞌ jelan syutej scolan sbꞌa,
yujto a Dios ix chꞌoxani to a jun jelanil yic yolyibꞌan̈qꞌuinal tic,
malaj jabꞌoc yelcꞌochi.
21 Yujto yuj sjelanil Dios ix snacani to a ebꞌ yic yolyibꞌan̈qꞌuinal tic,
man̈ yujoc sjelanil ebꞌ syal yojtacanel Dios chiꞌ ebꞌ.
Palta ix el dꞌa scꞌool Dios chiꞌ to a yuj jun abꞌix scalel tic tzon̈ colchaji,
tato scacꞌoch dꞌa co cꞌool,
vachꞌchom a dꞌa ebꞌ anima malaj yelcꞌoch jun abꞌix tic.
22 A ebꞌ israel,
snibꞌej ebꞌ syil juntzan̈ smilagro Dios.
Axo ebꞌ griego,
an̈ej sjelanil ebꞌ tzecꞌ sayeqꞌui.
23 Palta a on̈xo pax tic,
scalel yabꞌixal Cristo,
chajtil ix aj scham dꞌa teꞌ culus.
A ebꞌ israel chiꞌ,
ton̈ej somchaj scꞌool ebꞌ yuuj.
Axo ebꞌ man̈ israeloc,
quistalil yaj jun abꞌix tic dꞌa ebꞌ.
24 Palta a on̈xo pax tic,
ix on̈ yavtejoch Dios yicoc.
Yuj chiꞌ,
vachꞌchom israel on̈,
mato man̈ on̈ israeloc,
cojtac to a Dios ayoch spoder dꞌa Cristo,
ay pax och sjelanil dꞌay.
25 Yujto a Dios acꞌannaccot Cristo yic schami,
axo snaan ebꞌ anima to ichato malaj spensar Dios chiꞌ,
malaj pax spoder snaan ebꞌ.
Palta ix checlajeli to ecꞌto sjelanil dꞌa yichan̈ ebꞌ smasanil,
ecꞌto pax spoder.
26 Ex vucꞌtac ex vanabꞌ,
a on̈ mach on̈ tzon̈ yavtejoch Dios yicoc,
yovalil snachajel jun tic cuuj to a ebꞌ syavtejoch yicoc,
jayvan̈n̈ej ebꞌ ay tas yojtac dꞌa yichan̈ ebꞌ yetanimail.
Jayvan̈n̈ej ebꞌ yajal,
jayvan̈n̈ej pax ebꞌ ay yelcꞌoch dꞌa yichan̈ ebꞌ yetanimail syavtejoch yicoc.
27 Yujto a ebꞌ malaj val tas yojtac dꞌa yichan̈ ebꞌ yetanimail,
a ebꞌ ix sicꞌchaan̈ Dios,
yic vachꞌ axo ebꞌ jelan sqꞌuixvicanel ebꞌ.
A ebꞌ malaj yelcꞌoch dꞌa yichan̈ ebꞌ yetanimail,
a ebꞌ ix sicꞌchaan̈,
yic vachꞌ axo ebꞌ ay yelcꞌochi,
sqꞌuixvipaxcanel ebꞌ.
28 A Dios sicꞌanpaxchaan̈ ebꞌ malaj vachꞌ yoch dꞌa yichan̈ ebꞌ anima yedꞌ ebꞌ paticabꞌilcanel yuj ebꞌ,
aton ebꞌ malaj yelcꞌochi.
Icha chiꞌ syutej Dios schꞌoxani to a juntzan̈ tas ay yelcꞌoch dꞌa yichan̈ ebꞌ anima,
malaj jabꞌoc yelcꞌoch dꞌa yichan̈ Dios chiꞌ.
29 Yuj chiꞌ malaj junoc mach syal yicꞌanchaan̈ sbꞌa dꞌa yichan̈ Dios.
30 Palta Aꞌ ix on̈ acꞌanoch yicoc Cristo Jesús.
Aton sjelanil Cristo chiꞌ syacꞌ dꞌayon̈.
Yuuj syalaꞌ to vachꞌ on̈ dꞌa yichan̈,
tzon̈ yacꞌanpax och yicoc.
An̈ejtonaꞌ yuj Cristo chiꞌ,
colchajnac on̈xo eli.
31 Tzꞌibꞌyajcan dꞌa Slolonel Dios icha tic:
Tato ay mach sgana syacꞌoch junoc tas yipoc scꞌool,
más am vachꞌ tato an̈ej Dios Cajal syacꞌoch yipoc scꞌool,
xchicani.