A ebꞌ vin̈ sayjinac tas syutej syaman Jesús
22
Van sja stiempoal qꞌuin̈ yic snachajcoti tas aj yelnaccot ebꞌ israel dꞌa Egipto,
aton yic svaan ixim pan ebꞌ malaj yich.
Lucas 22.1-38
2 Axo ebꞌ vin̈ sat sacerdote yedꞌ ebꞌ vin̈ cꞌaybꞌum dꞌa ley Moisés ix sayan modo tas ol aj smilancham Jesús ebꞌ vin̈ dꞌa cꞌubꞌeltac,
yujto xiv ebꞌ vin̈ dꞌa ebꞌ anima.
3 Ay jun vin̈ scuch Judas,
vin̈ aj Queriot.
Yetbꞌeyum sbꞌa vin̈ yedꞌ ebꞌ vin̈ uxluchvan̈ scꞌaybꞌum Jesús,
palta a vin̈ Satanás ix och dꞌa vin̈.
4 Yuj chiꞌ ix bꞌat vin̈ scꞌumej ebꞌ vin̈ sat sacerdote yedꞌ ebꞌ vin̈ yajal yaj dꞌa ebꞌ vin̈ stan̈van stemplo Dios.
Ix yalan vin̈ tas ol yutoc yacꞌanoch Jesús dꞌa yol scꞌabꞌ ebꞌ vin̈.
5 Yuj chiꞌ te vachꞌ ix yabꞌ ebꞌ vin̈.
Ix yacꞌan strato ebꞌ vin̈ yedꞌ vin̈ dꞌa jantac tumin ol yacꞌ ebꞌ vin̈ dꞌa vin̈.
6 Yuj chiꞌ ix schaan yabꞌ vin̈ tas ix yal ebꞌ vin̈.
Ix och ijan vin̈ sayani tas syutej vin̈ yacꞌanoch Jesús chiꞌ dꞌa yol scꞌabꞌ ebꞌ vin̈ dꞌa elcꞌaltac.
A Santa Cena
7 Ix cꞌoch scꞌual svaan ixim pan ebꞌ,
aton ixim malaj yich ayemi,
yic smiljipaxcham nocꞌ calnel yic snaancot ebꞌ tas aj yelnaccot ebꞌ dꞌa Egipto.
8 Axo Jesús ix checanbꞌat vin̈aj Pedro yedꞌ vin̈aj Juan,
ix yalani:
—Ixiquec,
bꞌat bꞌoec tas ol cabꞌlej dꞌa jun qꞌuin̈ tic,
xchi dꞌa ebꞌ vin̈.
9 —¿Bꞌajtil a gana sco bꞌoꞌo?
xchi ebꞌ vin̈ dꞌay.
10 —Ayic ol ex cꞌoch dꞌa yol chon̈abꞌ,
ay jun vin̈ ol ilchajel eyuuj,
cuchbꞌil jun chꞌubꞌ a aꞌ yuj vin̈.
Tzex och tzacꞌan yuj vin̈,
masanto tzex cꞌoch yedꞌ vin̈ dꞌa spat.
11 Ol eyalan dꞌa vin̈ aj pat chi:
Icha tic ix aj yalancot co Cꞌaybꞌumal dꞌayach:
¿Bꞌajtil ay jun a cuarto bꞌaj ol in va yedꞌ ebꞌ vin̈ in cꞌaybꞌum yic sco naancot tas aj yelnaccot ebꞌ co mam quicham dꞌa Egipto?
xchicoti,
xe chi dꞌa vin̈.
12 Axo vin̈ ol chꞌoxan jun nivan cuarto dꞌayex dꞌa jun chaan̈.
Listaxo yaji.
Axo taꞌ ol e bꞌo tas ol cabꞌlej chiꞌ,
xchi Jesús dꞌa ebꞌ vin̈.
13 Ix lajvi chiꞌ,
ix bꞌat ebꞌ vin̈.
Axo ix cꞌoch ebꞌ vin̈,
ix yilan ebꞌ vin̈ to ix elcꞌoch icha ix aj yalan Jesús chiꞌ.
Yuj chiꞌ ataꞌ ix sbꞌo ebꞌ vin̈ tas ol yabꞌlej dꞌa jun qꞌuin̈ chiꞌ.
14 Ayic ix cꞌoch yorail,
ix cꞌoch Jesús yedꞌ juntzan̈xo ebꞌ vin̈ scꞌaybꞌum,
ix och oyan ebꞌ vin̈ vael dꞌa spatic teꞌ mexa.
15 Ix yalan Jesús dꞌa ebꞌ vin̈:
—Toxon nabꞌil vuuj to in gana tzin va eyedꞌoc dꞌa jun qꞌuin̈ tic,
yacbꞌan manto in chamoc.
16 Sval dꞌayex,
man̈xa bꞌaqꞌuin̈ ol in va dꞌa jun qꞌuin̈ tic,
masanto ol och junelxo ayic ol vachꞌ och Dios Yajalil,
xchi dꞌa ebꞌ vin̈.
17 Ix lajvi chiꞌ,
ix yicꞌanqꞌue vaan jun vaso.
Ix yacꞌan yuj diosal dꞌa Dios yuuj.
Ix yalanxi dꞌa ebꞌ vin̈:
—Chaec jun tic.
Mol uqꞌuejec.
18 Yujto sval dꞌayex,
man̈xalaj bꞌaqꞌuin̈ ol vucꞌ yal uva tic,
masanto ol vachꞌ och Dios Yajalil,
xchi dꞌa ebꞌ vin̈.
19 Ix lajvi chiꞌ,
ix yicꞌanqꞌue van jun ixim pan.
Ix yacꞌan yuj diosal dꞌa Dios yuj ixim.
Ix xepanbꞌat ixim dꞌa ebꞌ vin̈.
Ix yalani:
—A jun tic,
aton in nivanil tic ol acꞌjoc eyuuj.
Vaec ixim.
Tze cꞌulejn̈ej jun tic,
yic tzin e naancoti,
xchi dꞌa ebꞌ vin̈.
20 Icha pax chiꞌ ix yutej junxo vaso ayic toxo ix lajvi sva ebꞌ,
ix yalani:
—A jun ay dꞌa yol jun vaso tic schꞌoxanel jun schabꞌil strato Dios toto ix bꞌoi.
Yuj in chiqꞌuil ol el eyuuj ol elcꞌoch jun trato chiꞌ.
21 Palta a vin̈ ol in acꞌanoch dꞌa yol scꞌabꞌ ebꞌ ol in milanchamoc,
ayecꞌ vin̈ vedꞌ dꞌa jun mexa tic.
22 A in Acꞌbꞌil in cot yuj Dios voch animail tic,
yovalil ol in paxoc,
ichataxon yaj sbꞌocani.
Palta a val vin̈ ol in acꞌanoch dꞌa yol scꞌabꞌ chamel chiꞌ,
te chuc yic vin̈,
xchi Jesús dꞌa ebꞌ vin̈.
23 Yuj chiꞌ ix yal-lan yabꞌ junjun ebꞌ vin̈,
¿mach on̈taxlaj ol cacꞌoch dꞌa yol scꞌabꞌ chamel chiꞌ?
xchi ebꞌ vin̈.
Mach junoc ecꞌal yelcꞌochi
24 Ix lajvi chiꞌ,
ix laj stelan sbꞌa ebꞌ scꞌaybꞌum yuj mach junoc ebꞌ ecꞌal yelcꞌochi.
25 Axo Jesús ix alan dꞌa ebꞌ:
—A ebꞌ rey dꞌa junjun nación,
yajal ton yaj ebꞌ.
Yedꞌ ebꞌ yajal,
vachꞌ ebꞌ yalan ebꞌ anima.
26 A exxo tic,
man̈ eyutoc e bꞌa icha ebꞌ chiꞌ.
Tato ay junoc mach dꞌa e cal tic ecꞌal yelcꞌochi,
yicꞌocabꞌemta sbꞌa icha junoc unin.
An̈ejtonaꞌ tato ay junoc yajal yaj dꞌa e cal,
ichaocabꞌ junoc checabꞌ syutej sbꞌa.
27 Qꞌuinaloc tzꞌoch junoc nivan vael.
¿Mach junoc más nivan yelcꞌoch tze naꞌa?
¿Am jun cꞌojanem van svaꞌi,
mato a jun van yacꞌan servil?
Aton jun cꞌojanem van sva chiꞌ más nivan yelcꞌochi,
palta a in tic ayinecꞌ dꞌa e cal icha junoc tzꞌacꞌan servil.
28 A ex tic,
ix e tecꞌbꞌej e bꞌa eyecꞌ vedꞌoc ayic ix ja juntzan̈ yaelal dꞌa vibꞌan̈.
29 Yuj chiꞌ,
icha in yutej co Mam Dios in yacꞌanoch yajalil,
icha chiꞌ ol ex vutej pax ex vacꞌanoch yajalil.
30 Yuj chiꞌ ol yal e va vedꞌ dꞌa jun in mexa bꞌaj ay in och yajalil chiꞌ.
An̈ejtonaꞌ ol ex em cꞌojjabꞌ dꞌa junjunoc e cꞌojnubꞌ.
Axo eyoch chiꞌ yajalil dꞌa ebꞌ lajchaveꞌ macan̈ quetisraelal,
xchi Jesús dꞌa ebꞌ scꞌaybꞌum chiꞌ.
Yalnaccan Jesús to ol yiqꞌuel vin̈aj Pedro dꞌa yibꞌan̈
31 Ix yalanpax Jesús:
—Ach Simón,
ina ix scꞌan spermiso vin̈ Satanás dꞌa Dios,
yujto snibꞌej vin̈ tzex yacꞌ proval icha tzꞌaj ixim trigo schayaji.*
32 Palta ix in tevi val dꞌa Dios uuj,
yic max iqꞌuel a cꞌool dꞌay.
A ach tic,
ayic ol meltzajxoc och a pensar dꞌayin,
tzacꞌ stecꞌanil ebꞌ ucꞌtac,
xchi Jesús.
33 Yuj chiꞌ ix yalan vin̈aj Simón chiꞌ:
—Mamin,
bꞌecan in cꞌol in bꞌat edꞌ dꞌa preso,
vachꞌchom tzin cham edꞌoc,
xchi vin̈.
34 —Pedro,
sval dꞌayach,
ayic manto ocꞌ nocꞌ caxlan̈ dꞌa jun acꞌval tic,
oxel ol iqꞌuel dꞌa ibꞌan̈ to man̈ in ojtacoc,
xchi Jesús chiꞌ dꞌa vin̈.
35 Ix yalanxi Jesús dꞌa ebꞌ scꞌaybꞌum:
—Tze nacoti,
ayic ex in checannacbꞌat junel,
maj eyicꞌ e moral,
maj eyicꞌ e tumin,
maj eyicꞌpaxbꞌat e xan̈abꞌ.
¿Tom ay tas yacꞌnac palta dꞌayex taꞌ?
xchi dꞌa ebꞌ.
—Maay,
malaj tasi,
xchi ebꞌ.
36 Axo ticnaic,
mach ex ay e moral,
e tumin,
tzeyicꞌbꞌat eyedꞌoc.
Mach ex malaj eyespada,
tze chon̈el e chumpa,
tze manan eyicoꞌ.
37 Yujto sval dꞌayex,
yovalil ol elcꞌoch dꞌa vibꞌan̈ icha tzꞌibꞌabꞌilcan dꞌa Slolonel Dios,
bꞌaj syalcan icha tic:
Icha tzꞌutaj ebꞌ anima chuc,
icha chiꞌ ix utaj vin̈,
xchi.
Jantacn̈ej vabꞌixal tzꞌibꞌabꞌilcan dꞌa Slolonel Dios chiꞌ,
yovalil ol ujoquelcꞌochi,
xchi Jesús dꞌa ebꞌ.
38 Yuj chiꞌ ix yal ebꞌ scꞌaybꞌum chiꞌ dꞌay:
—Mamin,
ina chabꞌ qꞌuen espada tic,
xchi ebꞌ dꞌay.
—Yechelxo chiꞌ,
xchi Jesús dꞌa ebꞌ.
Ix yacꞌ lesal Jesús dꞌa Getsemaní
39 Ix lajvi chiꞌ,
ix elta Jesús dꞌa yol jun pat bꞌaj ix va ebꞌ chiꞌ,
ix bꞌat dꞌa tzalan Olivo ichataxon smodo.
Ix och pax tzacꞌan ebꞌ scꞌaybꞌum yuuj.
Lucas 22.39-71
—Lesalvan̈ec,
yic man̈ ol ex acꞌjoc proval,
xchi dꞌa ebꞌ.
41 Ix lajvi chiꞌ,
ix sbꞌesanel sbꞌa dꞌa stzꞌey ebꞌ.
Icha am snajatil sbꞌat junoc jul-labꞌ,
icha chiꞌ ix bꞌati.
Axo taꞌ ix em cuman,
ix lesalvi.
42 Ix yalan icha tic:
—Mamin,
tato a gana,
iqꞌuel jun yaelal tic dꞌa vibꞌan̈,
palta man̈oc icha in gana,
palta ichaocabꞌ val a gana,
xchi.
43 Ix lajvi chiꞌ,
ix schꞌoxan sbꞌa jun ángel ix cot dꞌa satchaan̈.
Ix ul yacꞌan stecꞌanil.
44 Ix te och pitzꞌan dꞌa spixan.
Yuj chiꞌ yelcꞌolal ix lesalvi.
Axo yalil tzꞌem dꞌa sat luum,
calan yaj yedꞌ chicꞌ,
icha val yem tzꞌuj yem dꞌa sat luum chiꞌ.
45 Ix lajvi slesalvi,
ix meltzajxicot bꞌaj aycan ebꞌ scꞌaybꞌum chiꞌ.
Axo ix cꞌoch dꞌa ebꞌ,
vaynacbꞌat ebꞌ,
yujto ix te och pitzꞌan cuselal dꞌa spixan ebꞌ.
46 Yuj chiꞌ,
ix yalan dꞌa ebꞌ:
—¿Tas yuj tzex te vayi?
Qꞌuean̈ec vaan,
lesalvan̈ec,
yic vachꞌ man̈ ol ex meltzaj dꞌa e patic ayic ol ex acꞌjoc proval,
xchi dꞌa ebꞌ.
Yamchajnac Jesús
47 Vanto slolon Jesús chiꞌ,
ix cꞌoch ebꞌ tzijtumal anima.
Axo vin̈aj Judas,
yetbꞌeyum sbꞌa yedꞌ ebꞌ uxluchvan̈ scꞌaybꞌum Jesús chiꞌ,
a vin̈ bꞌabꞌel scꞌoch yuj ebꞌ.
Ix snitzanbꞌat sbꞌa vin̈ stzꞌubꞌ stiꞌ Jesús chiꞌ.
48 Axo Jesús chiꞌ ix alan dꞌa vin̈:
—Judas,
¿tom icha tic tzꞌaj in acꞌanoch dꞌa yol scꞌabꞌ chamel a in Acꞌbꞌil in cot yuj Dios voch animail tic?
xchi.
49 Axo ebꞌ ayecꞌ yedꞌ Jesús chiꞌ,
ayic ix yilan ebꞌ tas van sja dꞌa yibꞌan̈ ix scꞌanbꞌan ebꞌ dꞌay:
—Mamin,
¿tzam yal co xican ebꞌ dꞌa qꞌuen espada tic?
xchi ebꞌ dꞌay.
50 Val dꞌa jun rato chiꞌ,
ay jun vin̈ dꞌa scal ebꞌ scꞌaybꞌum Jesús chiꞌ ix tzepanel schiquin jun vin̈ schecabꞌ vin̈ sat sacerdote dꞌa svachꞌ.
51 Axo Jesús ix alan dꞌa ebꞌ:
—Actejec,
cꞌocbꞌilxo chiꞌ,
xchi dꞌa ebꞌ.
Axo Jesús ix yaman schiquin vin̈ chiꞌ,
yedꞌn̈ej chiꞌ ix ochxicani.
52 A ebꞌ vin̈ sat sacerdote,
ebꞌ vin̈ yajal yaj dꞌa stemplo Dios yedꞌ ebꞌ vin̈ ichamtac vinac ay yopisio,
ix cꞌoch ebꞌ vin̈ syam Jesús chiꞌ.
Yuj chiꞌ ix yal Jesús chiꞌ dꞌa ebꞌ vin̈:
—¿Tas vaj tzeyilaꞌ?
¿Tom cuchbꞌum in dꞌa ebꞌ scꞌulan chucal yuj chiꞌ tzex ja dꞌayin yedꞌ qꞌuen espada yedꞌ te teꞌ?
53 Ayinn̈ej ecꞌ eyedꞌ dꞌa yamaqꞌuil stemplo Dios dꞌa junjun cꞌu,
palta maj in eyamaꞌ.
Palta ato ticnaic yorail e cꞌulan jun tic yedꞌ yipalil vin̈ aj qꞌuicꞌalqꞌuinal,
xchi dꞌa ebꞌ vin̈.
Ix yiqꞌuel vin̈aj Pedro dꞌa yibꞌan̈
54 Ix lajvi chiꞌ,
ix yamji Jesús yuj ebꞌ vin̈.
Ix yicꞌanbꞌat ebꞌ vin̈ dꞌa spat vin̈ sat sacerdote chiꞌ.
Axo vin̈aj Pedro,
najat tzacꞌanto sbꞌat vin̈ yuuj.
55 Axo dꞌa yamaqꞌuil tiꞌ pat chiꞌ ix yacꞌoch jun cꞌacꞌ ebꞌ vin̈.
Ix och oyan ebꞌ vin̈ dꞌa stiꞌ teꞌ,
ix em cꞌojan ebꞌ vin̈.
Ix em cꞌojan pax vin̈aj Pedro chiꞌ dꞌa scal ebꞌ vin̈.
56 Axo jun ix criada,
ayic ix yilan ix to cꞌojanem vin̈aj Pedro chiꞌ dꞌa stiꞌ teꞌ cꞌacꞌ chiꞌ,
ix och qꞌuelan ix dꞌa vin̈,
ix yalan ix:
—A jun vin̈ tic,
yetbꞌeyum sbꞌa vin̈ yedꞌ Jesús tic,
xchi ix.
57 Axo vin̈,
elan̈chamel ix yiqꞌuel vin̈ dꞌa yibꞌan̈,
ix yalan vin̈:
—Ach ix,
man̈ vojtacoc jun vin̈ tzal chiꞌ,
xchi vin̈ dꞌa ix.
58 Junanto rato chiꞌ,
ay junxo ix och qꞌuelan dꞌa vin̈,
ix yalani:
—A ach tic,
etbꞌeyum a bꞌa yedꞌ ebꞌ,
xchi dꞌa vin̈aj Pedro chiꞌ.
—Val yel maay,
man̈ vetbꞌeyumoclaj in bꞌa yedꞌ ebꞌ,
xchi vin̈.
59 Ay am tom junoc hora chiꞌ,
yelcꞌolal ix yal junxo vin̈:
—Val yel a jun vin̈ tic,
yetbꞌeyum sbꞌa vin̈ yedꞌoc,
yujto aj Galilea ebꞌ,
xchi vin̈.
60 —Toton maay,
man̈ vojtacoc juntzan̈ tzal chiꞌ,
xchi vin̈aj Pedro chiꞌ dꞌa vin̈.
Ayic vanto yalan juntzan̈ chiꞌ vin̈ ix ocꞌ nocꞌ caxlan̈.
61 Ix cot qꞌueleloc Jesús Cajal chiꞌ dꞌa vin̈.
Yuj chiꞌ ix snacot vin̈ tas ix yalcan Jesús.
Ichaton tic ix yutej yalancan dꞌa vin̈:
Ayic manto ocꞌ nocꞌ caxlan̈ dꞌa jun acꞌval tic,
oxel ol iqꞌuel dꞌa ibꞌan̈ to man̈ in ojtacoclaj,
xchi dꞌa vin̈.
62 Yuj chiꞌ ix sbꞌeselta sbꞌa vin̈ dꞌa scal ebꞌ.
Ix te ocꞌ val vin̈ sicꞌlabꞌil.
Ix bꞌuchji Jesús yuj ebꞌ
63 Axo ebꞌ stan̈vumal Jesús ix och ijan ebꞌ sbꞌuchvaj dꞌay.
Ix laj smacꞌan pax ebꞌ.
64 Ix smacan sat ebꞌ.
Ix stzꞌitanbꞌat stiꞌ ebꞌ.
Ix lajvi chiꞌ,
ix scꞌanbꞌan ebꞌ dꞌay:
—Al dꞌayon̈ mach tzach macꞌani,
xchi ebꞌ dꞌay.
65 Man̈ jantacoc tas ix yal ebꞌ dꞌay yic sbꞌuchvaj ebꞌ dꞌay.
Ix cꞌoch Jesús dꞌa yichan̈ vin̈ sat yajal
66 Axo ix sacbꞌi,
ix smolbꞌan sbꞌa ebꞌ ichamtac vinac ay yopisio dꞌa scal ebꞌ israel,
ebꞌ vin̈ sat sacerdote yedꞌ ebꞌ vin̈ cꞌaybꞌum dꞌa ley Moisés.
Ix yicꞌanbꞌat Jesús ebꞌ vin̈ dꞌa yichan̈ vin̈ sat yajal.
Axo taꞌ ix scꞌanbꞌej ebꞌ vin̈ dꞌay:
67 —Al dꞌayon̈,
¿tom a ach tic Cristo ach?
xchi ebꞌ vin̈ dꞌay.
—Nabꞌan̈ej sval dꞌayex,
¿tom ol e cha eyabꞌ dꞌayin?
68 Tato a in tzin cꞌanbꞌej junoc tas dꞌayex,
¿tom ol eyal dꞌayin?
¿Tom ol in eyaqꞌuel dꞌa libre?
69 Palta a in Acꞌbꞌil in cot yuj Dios voch animail tic,
a ticnaic ol in cꞌochcan cꞌojan dꞌa svachꞌ cꞌabꞌ Dios,
aton jun masanil tas syal yuuj,
xchi Jesús dꞌa ebꞌ vin̈.
70 Masanil ebꞌ vin̈ ix cꞌanbꞌan dꞌay:
—¿Tom Yuninal ach Dios jun?
xchi ebꞌ vin̈ dꞌay.
—A in ton tic Yuninal in,
icha tzeyal chiꞌ,
xchi dꞌa ebꞌ vin̈.
71 Yuj chiꞌ ix yal ebꞌ vin̈.
—¿Tasto tzꞌoch testigo cuuj?
Yujto a on̈ val lacꞌan ix cabꞌ yalan vin̈,
xchi ebꞌ vin̈.