A yofrenda ix chamnac yetbꞌeyum
21
A junel,
ayecꞌ Jesús dꞌa yamaqꞌuil templo.
Van yilani chajtil syutej ebꞌ bꞌeyum yacꞌanem yofrenda dꞌa yol jun chalabꞌ ofrenda.
Lucas 21.1-28
2 Ix yilani ix cꞌoch jun ix chamnac yetbꞌeyum te mebꞌaꞌ.
Ix yacꞌanem chabꞌ cotac tumin ix dꞌa yool.
3 Yuj chiꞌ,
ix yalan Jesús chiꞌ dꞌa ebꞌ ayecꞌ taꞌ yedꞌoc:
—Val yel sval dꞌayex,
a jun ix te mebꞌaꞌ tic,
ecꞌalto yic ix,
ix yacꞌ dꞌa yichan̈ ebꞌ ix laj yacꞌ yicoꞌ.
4 Ay ebꞌ axon̈ej sobreal stumin syacꞌaꞌ.
Axo ix mebꞌaꞌ tic,
jantacn̈ej jabꞌ stumin ix ayeqꞌui ix yaqꞌuem ix yofrendaoc.
Man̈xalaj tas ix can dꞌa ix,
xchi dꞌa ebꞌ.
A juntzan̈ yechel yic lajvubꞌ cꞌual
5 Ay juntzan̈ ebꞌ van yalani to te vachꞌ yilji stemplo Dios,
vachꞌ yaj yedꞌ juntzan̈ qꞌuen qꞌueen latzꞌbꞌabꞌiloch dꞌay yedꞌ juntzan̈ tastac siaj dꞌay.
Yuj chiꞌ ix yal Jesús dꞌa ebꞌ:
6 —A juntzan̈ van eyilan tic,
ay jun tiempoal ol lajvoquel smasanil.
Man̈xalaj junoc qꞌuen latzꞌbꞌabꞌilqꞌue tic ol can dꞌa yibꞌan̈ qꞌuen yetqꞌueenal,
xchi Jesús dꞌa ebꞌ.
7 Yuj chiꞌ ix scꞌanbꞌej ebꞌ dꞌay:
—Ach co Cꞌaybꞌumal,
¿bꞌaqꞌuin̈ ol ujoc juntzan̈ chiꞌ?
¿Tas val yechel ol schꞌox Dios,
ayic toxo ol ujoc jun chiꞌ?
xchi ebꞌ dꞌay.
8 Yuj chiꞌ ix yalan dꞌa ebꞌ:
—Tzeyil val e bꞌa yic man̈ ol ex acꞌjoc musansatil,
yujto tzijtum ebꞌ ol javoc,
ol yesanel in bꞌi ebꞌ.
Ol yalan ebꞌ:
A in tic Cristo in,
xcham ebꞌ.
Ol yalanpax ebꞌ:
Axo val sja stiempoal tic,
xcham ebꞌ.
Man̈ ex bꞌat qꞌuelan dꞌa ebꞌ.
9 Ayic ol eyabꞌan specal yoch nivac oval,
axo yacꞌanpax oval ebꞌ comon anima yedꞌ ebꞌ yajal,
man̈ ex te xivoc,
yujto a juntzan̈ chiꞌ yovalil ol bꞌabꞌlaj ujoc,
palta man̈oclaj dꞌa jun ratoal chiꞌ ol lajvoquel yolyibꞌan̈qꞌuinal tic,
xchi Jesús chiꞌ dꞌa ebꞌ.
10 Ix yalanpaxi:
—Ol och oval dꞌa scal juntzan̈ nivac nación.
11 Ay juntzan̈ nivac quixcabꞌ ol laj ecꞌoc.
Ol laj javoc vejel,
ol laj yamchaj juntzan̈ anima yuj nivac ilya dꞌa junjun chon̈abꞌ.
Axo dꞌa satchaan̈,
tzijtum tas ol laj schꞌox sbꞌa.
Ay pax juntzan̈ nivac yechel ol schꞌox sbꞌa dꞌa satchaan̈,
ol te xivpax ebꞌ anima yuj juntzan̈ chiꞌ.
12 Palta ayic manto ujoc juntzan̈ chiꞌ,
ay ebꞌ ol ex yamanoc,
ol yacꞌ chucal ebꞌ dꞌayex.
Yujto in cꞌaybꞌum ex,
yuj chiꞌ ol laj ex yicꞌbꞌat ebꞌ dꞌa yoltac spatil culto yic ol yacꞌanoch ebꞌ dꞌa eyibꞌan̈.
Ol ex yacꞌoch ebꞌ dꞌa preso,
ol ex yicꞌbꞌat ebꞌ dꞌa yichan̈ ebꞌ vin̈ rey yedꞌ ebꞌ vin̈ yajal.
13 Yuj juntzan̈ tas ol acꞌjococh dꞌa eyibꞌan̈ chiꞌ ol yal eyalanel vabꞌixal dꞌa yichan̈ ebꞌ vin̈ yajal chiꞌ.
14 Man̈ e bꞌabꞌlaj naej yuj tas ol eyutej e colan e bꞌa dꞌa ebꞌ,
15 yujto a in ol in bꞌo eyalaꞌ.
Ol vacꞌ e jelanil dꞌa tas ol eyalaꞌ.
Yuj chiꞌ malaj ebꞌ ajcꞌool ol yal spacan dꞌayex.
Malaj junoc ebꞌ ol tzacꞌvan sjelanil dꞌayex icha e jelanil ol vacꞌaꞌ.
16 Palta a ex tic,
a e mam e nun,
ebꞌ eyucꞌtac,
ebꞌ e cꞌabꞌ eyoc yedꞌ ebꞌ eyamigo,
ol meltzaj och ebꞌ ajcꞌolal dꞌayex.
Ay ex ol ex smilcham ebꞌ.
17 Axo masanil ebꞌ anima ay dꞌa yolyibꞌan̈qꞌuinal tic,
ol och ebꞌ ajcꞌolal dꞌayex,
yujto ayoch e pensar dꞌayin.
18 Palta man̈ ol ex satel-laj,
man̈ val junoc xil e jolom ol satbꞌatoc.
19 Tato tecꞌan tzeyutej e bꞌa,
ol eyacꞌ ganar e chaan e qꞌuinal dꞌa val yel.
20 Ayic ol eyilani to oybꞌilxoqꞌue Jerusalén yuj ebꞌ soldado,
nachajocabꞌel eyuuj to van slajviel jun chon̈abꞌ chiꞌ.
21 Axo ebꞌ ayecꞌ dꞌa yol yic Judea tic,
bꞌatocabꞌcan ebꞌ elelal dꞌa tzalquixtac.
A ebꞌ ayecꞌ dꞌa chon̈abꞌ Jerusalén tic,
bꞌatocabꞌ pax ebꞌ elelal.
Axo ebꞌ aybꞌat dꞌa smunlajel,
man̈xoocabꞌ ochta ebꞌ dꞌa yol chon̈abꞌ tic,
22 yujto a val dꞌa jun tiempoal chiꞌ,
ol ja jun nivan yaelal yuj yoval scꞌool Dios.
Ato taꞌ ol elcꞌoch jantac tas tzꞌibꞌabꞌilcan dꞌa Slolonel Dios.
23 Obꞌiltac ebꞌ ix yabꞌix dꞌa jun tiempoal chiꞌ yedꞌ ebꞌ ix vanto schuni yuneꞌ,
yujto nivan yaelal ol ja dꞌa yibꞌan̈ ebꞌ anima dꞌa juntzan̈ lugar tic.
Ol yacꞌcot yoval scꞌool Dios dꞌa yibꞌan̈ ebꞌ quetisraelal.
24 Nan̈al ebꞌ ol cham yuj jun oval chiꞌ.
Axo nan̈alxo ebꞌ,
ol bꞌatcan ebꞌ preso dꞌa chꞌoc chon̈abꞌil.
Axo ebꞌ chꞌoc chon̈abꞌil chiꞌ ol ixtan Jerusalén tic,
masanto ol lajvoc stiempoal yacꞌan yajalil ebꞌ,
icha yalnaccan Dios.
Sjaubꞌal Jesús dꞌa schaelal
25 Ay pax juntzan̈ yechel ol schꞌox sbꞌa dꞌa cꞌu,
dꞌa qꞌuen uj yedꞌ dꞌa qꞌuen cꞌanal.
Axo juntzan̈ nación,
ol laj somchaj ebꞌ yuj xivelal,
yujto ol cꞌan̈ sqꞌue vaan aꞌ mar,
ol cꞌan̈ pax yemxi pon̈naj aꞌ.
26 Ol laj te xiv ebꞌ anima ayic ol snaan ebꞌ tas ol ujoc dꞌa jun yolyibꞌan̈qꞌuinal tic,
yujto ol tzicubꞌtan̈aj pax juntzan̈ yipal dꞌa satchaan̈.
27 Ichato chiꞌ ol yilan ebꞌ to a in Acꞌbꞌil in cot yuj Dios voch animail tic,
ol in emul dꞌa scal asun yedꞌ jantac in poder yedꞌ in nivan tziquiquial.
28 Ayic ol syamanoch yuji juntzan̈ chiꞌ,
tzex tzalaji,
tzex qꞌue qꞌuelan,
yujto toxo ol ex colchajeloc,
xchi Jesús chiꞌ dꞌa ebꞌ.
29 Ix lajvi chiꞌ,
ix yalan jun abꞌix tic dꞌa ebꞌ:
—Tzeyilnabꞌ teꞌ higo,
ma juntzan̈xo te teꞌ slaj cꞌajbꞌanel xiil.
Lucas 21.29-38
30 Ayic tzeyilani to vanxo svolanxi teꞌ scꞌabꞌ,
snachajel eyuuj to vanxo sja stiempoal n̈abꞌilqꞌuinal.
31 An̈ejtonaꞌ juntzan̈ sval tic,
ayic ol eyilan sja juntzan̈ chiꞌ,
nachajocabꞌel eyuuj to toxo ol vachꞌ och Dios Yajalil.
32 Val yel sval dꞌayex,
masanil juntzan̈ tas sval tic ol ujoc ayic manto satel-laj juntzan̈ anima tic.
33 A satchaan̈ yedꞌ yolyibꞌan̈qꞌuinal tic,
ol lajvoqueloc,
palta a in lolonel,
malaj bꞌaqꞌuin̈ ol lajvoqueloc.
34 Tzeyil val e bꞌa.
Man̈ eyacꞌ pitbꞌoc e bꞌa yuj pecꞌal,
yuj uqꞌuel an̈,
ma yuj juntzan̈xo tas bꞌaj tzeyacꞌoch e pensar.
Ta maay,
ayic ol ja jun cꞌual chiꞌ,
man̈ listaoc eyaji.
35 Icha tzꞌaj yem junoc yaal,
icha chiꞌ ol aj sja jun cꞌual chiꞌ dꞌa yibꞌan̈ ebꞌ anima smasanil dꞌa yolyibꞌan̈qꞌuinal tic.
36 Yuj chiꞌ lista tzeyutej e bꞌa.
Lesalvan̈ec dꞌa masanil tiempo yic vachꞌ tecꞌan eyaji.
Yuj chiꞌ ol yal eyel dꞌa tas dꞌin̈an sjavi,
yic pax man̈ ol ex qꞌuixvoc eyoch dꞌa vichan̈ a in Acꞌbꞌil in cot yuj Dios voch animail tic,
xchi Jesús dꞌa ebꞌ.