Yalnaccan Jesús yuj stemplo Dios
13
Ayic van yelta Jesús dꞌa yamaqꞌuil stemplo Dios,
ix yalan jun scꞌaybꞌum dꞌay:
—Mamin,
inai te nivac juntzan̈ qꞌuen qꞌueen tic.
Te nivac pax juntzan̈ pat tic,
xchi dꞌay.
Marcos 13.1-27
2 Palta ix yalan Jesús dꞌay:
—¿Tzam il juntzan̈ nivac pat tic?
Sval dꞌayach,
a juntzan̈ qꞌuen qꞌueen latzꞌbꞌilqꞌue tic,
man̈xo junoc ol can dꞌa yibꞌan̈ qꞌuen yetqꞌuenal.
Ol ecjoquel qꞌuen dꞌa yedꞌtal smasanil,
xchi dꞌay.
A juntzan̈ yechel yic lajvubꞌ cꞌual
3 Ix lajvi chiꞌ,
ix bꞌat ebꞌ dꞌa tzalan Olivo,
dꞌa yichan̈bꞌat stemplo Dios.
Ataꞌ ix em cꞌojan Jesús.
Axo vin̈aj Pedro,
vin̈aj Jacobo,
vin̈aj Juan yedꞌ vin̈aj Andrés,
schꞌocoj ebꞌ vin̈ ayecꞌ yedꞌoc.
Ix scꞌanbꞌan ebꞌ vin̈ dꞌay:
4 —Co gana tzal dꞌayon̈ ¿bꞌaqꞌuin̈ ol ujoc juntzan̈ ix al chiꞌ?
¿Tas junoc yechel ol schꞌox Dios,
ayic toxo val ol javoc juntzan̈ chiꞌ?
xchi ebꞌ vin̈ dꞌay.
5 Yuj chiꞌ ix yalan Jesús dꞌa ebꞌ vin̈:
—Tzeyil val e bꞌa yic malaj junoc mach ol ex acꞌan musansatil.
6 Yujto tzijtum ebꞌ ol javoc,
ol yesanel in bꞌi ebꞌ.
Axo ol yalan ebꞌ icha tic:
A in ton tic Cristo in,
xcham ebꞌ.
Tzijtum anima ol yacꞌ musansatil ebꞌ.
7 Ol eyabꞌ yoch juntzan̈ nivac oval.
Ol eyabꞌanpax specal juntzan̈xo oval ijan ol ochoc.
Palta man̈ ex xivoc,
yujto yovalil icha chiꞌ ol ujoc.
Palta manto slajvubꞌoclaj yolyibꞌan̈qꞌuinal tic.
8 Yujto ay juntzan̈ nivac chon̈abꞌ ol yacꞌ oval yedꞌ juntzan̈xo nivac chon̈abꞌ.
Ol laj yacꞌan oval ebꞌ yajal yedꞌ ebꞌ yetyajalil.
Jantac bꞌaj ol ecꞌ nivac quixcabꞌ.
Ol javoc nivac vejel dꞌa yibꞌan̈ ebꞌ anima.
A juntzan̈ chiꞌ,
bꞌabꞌel yaelal.
Ayto juntzan̈xo ol javoc.
9 Palta a ex tic,
te lista tzeyutej e bꞌa,
yujto ol ex acꞌjococh dꞌa yol scꞌabꞌ ebꞌ vin̈ yajal.
Ol laj ex smacꞌ ebꞌ dꞌa yoltac spatil culto.
Ol laj ex yicꞌanbꞌat ebꞌ dꞌa yichan̈ ebꞌ vin̈ yajal yedꞌ dꞌa yichan̈ ebꞌ vin̈ rey,
yujto ayoch e pensar dꞌayin.
Icha chiꞌ ol ex ajoc,
yic ol yal eyalanel vabꞌixal dꞌa ebꞌ.
10 Yovalil ol bꞌabꞌlaj aljoquel jun abꞌix yic colnabꞌil tic dꞌa junjun chon̈abꞌ,
ichato chiꞌ ol ja slajvubꞌal.
11 Ol ex icꞌjocbꞌat dꞌa yichan̈ ebꞌ vin̈ yajal.
Palta man̈ ex och ilcꞌolal yuj tas ol eyalaꞌ.
Yujto a juntzan̈ lolonel ol acꞌjoc dꞌayex yuj Yespíritu Dios dꞌa jun rato chiꞌ,
a ol eyalaꞌ.
Yujto man̈oc ex ol ex lolonoc,
palta a Yespíritu Dios ol lolonoc.
12 A ebꞌ yucꞌtac sbꞌa,
ol yacꞌlajoch sbꞌa ebꞌ dꞌa yol scꞌabꞌ chamel.
Icha chiꞌ ol yutoc pax sbꞌa ebꞌ mamabꞌil dꞌa ebꞌ yuninal.
A ebꞌ uninabꞌil,
ay ebꞌ ol yacꞌ oval yedꞌ smam,
ol yacꞌanoch ebꞌ dꞌa yol scꞌabꞌ chamel.
13 Ol chichonoch scꞌool masanil anima dꞌayex,
yujto ayoch e pensar dꞌayin.
Palta a ebꞌ ol acꞌan techajoc masanto schami,
aton ebꞌ chiꞌ ol colchajoc.
14 Ayic ol eyilan vin̈ ajcꞌol sjuanel masanil tastac bꞌaj man̈ smojoc yajeqꞌui,
nachajocabꞌ el eyuuj.
A ebꞌ ayecꞌ dꞌa Judea,
bꞌatocabꞌ ebꞌ elelal dꞌa tzalquixtac.
15 Ay ebꞌ ayqꞌue dꞌa span̈anil yibꞌan̈ spat,
man̈xoocabꞌ emta ebꞌ yiqꞌuelta junoc tas dꞌa yol spat chiꞌ,
ayic sbꞌat ebꞌ elelal.
16 Yedꞌ ebꞌ aybꞌat dꞌa smunlajel,
man̈xoocabꞌ ul yicꞌ spichul ebꞌ bꞌaj aycani.
17 A dꞌa jun tiempoal chiꞌ,
te chuc yic ebꞌ ix yabꞌix yedꞌ ebꞌ ix vanto schuni yuneꞌ ayic ol bꞌat ebꞌ elelal.
18 Cꞌanec dꞌa Dios yic man̈oc dꞌa stiempoal n̈abꞌil qꞌuinal ol ex bꞌat elelal.
19 Yujto a jun nivan yaelal ol ja dꞌa jun tiempoal chiꞌ,
manta bꞌaj ix yacꞌ icha chiꞌ yictax ix sbꞌoan yolyibꞌan̈qꞌuinal tic Dios.
An̈ej jun chiꞌ,
man̈xa bꞌaqꞌuin̈ pax ol yacꞌxi icha chiꞌ.
20 Tato man̈ ol scꞌochlitej yoc jun yaelal chiꞌ Dios Cajal,
malaj am junoc mach ol colchajcanel dꞌa yol scꞌabꞌ chamel,
palta yuj ebꞌ sicꞌbꞌilxoel yuuj,
ol scꞌochlitej.
21 Tato ay ebꞌ ol alan icha tic dꞌayex:
Ina yajecꞌ Cristo dꞌa tic,
mato,
ina yajecꞌ dꞌa chiꞌ,
ta xchi ebꞌ,
man̈ e cha eyabꞌi.
22 Yujto ay ebꞌ ol pitzvoc chaan̈,
ol laj yalanoch sbꞌa ebꞌ Cristoal.
Ay pax ebꞌ ol yaloch sbꞌa schecabꞌoc Dios.
Ol schꞌox juntzan̈ yechel ebꞌ yedꞌ juntzan̈ milagro,
yic somchajel ebꞌ anima yuj ebꞌ.
Ijan val ay ebꞌ sicꞌbꞌilxoel yuj Dios ol yacꞌ ganar ebꞌ sjuanel spensar.
23 Palta a ex tic,
te lista tzeyutej e bꞌa.
Ayocto svalancan juntzan̈ tic smasanil dꞌayex.
A tas ol aj sjavi Jesús dꞌa schaelal
24 Palta a dꞌa jun tiempoal chiꞌ,
ayic ol lajvoquecꞌ jun nivan yaelal chiꞌ,
a cꞌu ol qꞌuicꞌbꞌoqueloc,
axo qꞌuen uj,
man̈xo ol yacꞌlaj yoc qꞌueen.
25 Axo qꞌuen cꞌanal,
ol laj emta qꞌuen dꞌa satchaan̈ chiꞌ.
Axo juntzan̈ yipal satchaan̈,
ol tzicubꞌtan̈ajoc.
26 Ichato chiꞌ bꞌian,
axo ol yilanqꞌue ebꞌ anima to a in Acꞌbꞌil in cot yuj Dios voch animail tic ol in emul dꞌa scal asun.
Man̈ jantacoc in poder,
te nivan in tziquiquial ayic ol in javoc.
27 A in tic,
ol in checcot ebꞌ vángel yic ol ecꞌ ebꞌ smolbꞌejcot ebꞌ sicꞌbꞌilel vuuj dꞌa masanil yolyibꞌan̈qꞌuinal tic.
Ol ecꞌ icꞌjoccot ebꞌ bꞌaj slajvicꞌoch yolyibꞌan̈qꞌuinal masanto bꞌaj ay yichchaan̈.
28 Abꞌec jun abꞌix ol val tic yuj teꞌ higo.
Ayic tzꞌuninbꞌi scꞌabꞌ teꞌ,
sja pax xiil teꞌ scꞌabꞌ chiꞌ,
eyojtacxo to toxo ol ja n̈abꞌil qꞌuinal.
Marcos 13.28-37
29 An̈ejtonaꞌ,
ayic ol eyil sjavi juntzan̈ tic,
nachajocabꞌ el eyuuj to jabꞌxon̈ej sjavi slajvubꞌ,
ichato ayinxo ecꞌ dꞌa stiꞌ puerta.
30 Val yel sval dꞌayex,
manto ol satel-laj juntzan̈ anima tic,
masanto ol ecꞌcan juntzan̈ ix val tic smasanil.
31 A satchaan̈ yedꞌ yolyibꞌan̈qꞌuinal tic,
ol lajvoqueloc,
palta a in lolonel,
malaj bꞌaqꞌuin̈ ol lajvoqueloc.
32 Palta malaj junoc mach ojtannac tas cꞌual,
jantac yorail ol in javoc.
A ebꞌ ángel ay dꞌa satchaan̈,
man̈ yojtacoc pax ebꞌ.
A inxo pax tic,
Yuninal in Dios,
palta man̈ vojtacoc paxi.
An̈ejton Dios Mamabꞌil ojtannac.
33 Yuj chiꞌ,
te lista tzeyutej e bꞌa,
macvajan̈ec.
Lesalvan̈ec,
yujto man̈ eyojtacoc bꞌaqꞌuin̈ ol javoc stiempoal jun chiꞌ.
34 Qꞌuinaloc ay junoc vinac sbꞌat dꞌa junoc lugar najat,
scan spat vin̈,
syacꞌancanoch yopisio junjun ebꞌ smajan vin̈.
Syalancan vin̈ tastac scꞌulej junjun ebꞌ.
Syalanpaxcan vin̈ dꞌa vin̈ stan̈vumal stiꞌ spat:
Macvajan̈,
xchi vin̈.
35 Axo ebꞌ smajan vin̈ chiꞌ,
man̈ yojtacoc ebꞌ bꞌaqꞌuin̈ ol jax vin̈ aj pat chiꞌ,
mato qꞌuicꞌbꞌalil,
mato chimilacꞌval,
mato ayto scꞌanaꞌ,
mato van sacbꞌi.
Icha vin̈ aj pat chiꞌ,
ichin taꞌ.
Man̈ eyojtacoc bꞌaqꞌuin̈ ol in jax dꞌa schaelal.
Yuj chiꞌ,
te lista tzeyutej e bꞌa
36 yic vachꞌ mantoc ichato vaynac ex,
ol in ja lemnajoc.
37 A jun sval tic dꞌayex,
yic ebꞌ anima smasanil.
Te lista tzeyutej e bꞌa,
xchi Jesús.