—Ay juntzan̈ tastac tzꞌicꞌan somchajel spensar ebꞌ anima,

palta a val mach tzꞌacꞌan somchajel spensar ebꞌ yetanimail,

te chuc yicoꞌ.

2 Octom bꞌabꞌel spixjioch junoc nivaquil qꞌuen dꞌa sjaj,

syumjicanbꞌat dꞌa yol aꞌ mar yic sjicꞌ aꞌ schami,

yacbꞌan manto yacꞌ somchaj spensar junoc uninto.

Tato icha chiꞌ,

te vachꞌ yicoꞌ.^*

3 Yuj chiꞌ tzeyil val e bꞌa.

Tato ay junoc eyetanimail tzꞌoch smul dꞌayex,

tzeyal dꞌay.

Tato sna sbꞌa,

tzeyacꞌ nivancꞌolal.

4 Vachꞌchom uquel tzꞌoch smul dꞌayex dꞌa junoc cꞌu,

palta uquel sbꞌat yalxi sbꞌa dꞌayex syalan icha tic:

Aqꞌuin nivancꞌolal,

man̈xo ol in cꞌulej junelxo,

tato xchi,

yovalil tzeyacꞌ nivancꞌolal,

xchi Jesús.

5 A ebꞌ schecabꞌ Jesús ix alan dꞌay:

—Ochan̈ quedꞌoc yic sco vachꞌ aqꞌuejoch Dios dꞌa co cꞌool,

xchi ebꞌ.

6 Yuj chiꞌ ix yalan dꞌa ebꞌ:

—Tato yel tzeyacꞌoch Dios dꞌa e cꞌool,

vachꞌchom jabꞌn̈ej,

icha quilan junoc pitan̈ sat an̈ mostaza,

ol yal eyalan dꞌa jun nivan teꞌ tic:

Qꞌuean̈cot yedꞌ schꞌan̈al ibꞌ.

Tzach bꞌatcan dꞌa yol aꞌ mar.

Bꞌat avejempax a bꞌa taꞌ,

tato xe chi,

ol scꞌanabꞌajej teꞌ icha tzeyal chiꞌ.

7 Qꞌuinaloc ay junoc co checabꞌ tzon̈ acꞌan servil.

Tato aybꞌat dꞌa co munlajel,

mato aybꞌat iloj calnel,

ma iloj vacax,

axo yic sjaxi,

¿tom naan calan dꞌay?

Ochan̈,

eman̈ cꞌojan,

vaꞌan̈,

¿tom xco chi dꞌay?

8 Maay jun.

Tecan icha tic scutej calan dꞌay:

Qꞌuexel a bꞌa,

bꞌiquel a cꞌabꞌ.

Tza bꞌoan in vael,

tzacꞌancot dꞌayin.

Ichato chiꞌ ol ach va ach tic,

xco chi dꞌay.

9 ¿Tom scacꞌ yuj diosal dꞌay yujn̈ej to ix scꞌanabꞌajej tas ix cal chiꞌ?

Maay.

10 Icha jun checabꞌ chiꞌ,

ichex taꞌ.

Ayic toxo ix lajvi e cꞌanabꞌajan masanil schecnabꞌil Dios,

smoj tzeyal icha tic:

Te malaj vachꞌ cochi,

an̈ej juntzan̈ tas ix checji co cꞌulej ix co bꞌoꞌo,

xe chi,

xchi Jesús dꞌa ebꞌ.

11 Axo Jesús,

an̈ejaꞌ sbꞌat dꞌa sbꞌeal Jerusalén,

ix cꞌoch dꞌa smojonal Samaria yedꞌ Galilea.

12 Ayic ix cꞌoch dꞌa jun aldea,

ay lajun̈van̈ ebꞌ vin̈ penaay yuj jun yabꞌil scuch lepra.

Yuj chiꞌ maj snitzochlaj sbꞌa ebꞌ vin̈ dꞌa stzꞌey Jesús,

13 ton̈ej ix avajcot ebꞌ vin̈ dꞌay:

—Mamin Jesús,

ocꞌoc val a cꞌool dꞌayon̈,

xchicot ebꞌ vin̈.

14 Axo ix iljibꞌat ebꞌ yuj Jesús,

ix yalanbꞌat dꞌa ebꞌ:

—Ixiquec,

ix chꞌoxec e bꞌa dꞌa ebꞌ sacerdote,

xchi dꞌa ebꞌ vin̈.

Yacbꞌan van sbꞌey ebꞌ vin̈,

ipan sbꞌoxi ebꞌ vin̈.

15 Ay jun vin̈ dꞌa scal ebꞌ vin̈ chiꞌ,

ayic ix yilan vin̈ to toxo ix bꞌo scꞌool,

ix meltzaj vin̈,

ix och ijan vin̈ yalan vachꞌ lolonel dꞌa Dios,

ix avaj val chaan̈ vin̈.

16 Ix javi vin̈ dꞌa yichan̈ Jesús,

ix em cumnaj vin̈ dꞌa sat luum yic syacꞌan yuj diosal vin̈ dꞌay.

Aj Samaria jun vin̈ chiꞌ.

17 Yuj chiꞌ ix yalan Jesús:

—¿Tom man̈ lajun̈van̈oc ebꞌ vin̈ ix bꞌoxi scꞌool?

¿Bꞌaj ay bꞌalun̈van̈xo ebꞌ vin̈ chiꞌ?

18 A jun vin̈ tic,

chꞌoc chon̈abꞌil vin̈,

palta an̈ej vin̈ ix ul alan vachꞌ lolonel dꞌa Dios.

19 Ix yalan Jesús dꞌa vin̈:

—Qꞌuean̈ vaan,

paxan̈.

Ach bꞌoxi yujto in acꞌoch dꞌa a cꞌool,

xchi dꞌa vin̈.

20 Ay juntzan̈ ebꞌ vin̈ fariseo ix cꞌanbꞌan dꞌa Jesús:

—¿Bꞌaqꞌuin̈ val ol och Dios Cajaloc?

xchi ebꞌ vin̈ dꞌay.

—Ayic ol och Dios Cajaloc,

max yal-laj quilan yedꞌ co sat.

21 Max yal-laj calani:

Ayecꞌ dꞌa tic,

ma ayecꞌ dꞌa chiꞌ,

man̈ xco chioc,

yujto a dꞌa co pixan tzꞌoch Yajalil,

xchi Jesús dꞌa ebꞌ vin̈.

22 Ix lajvi chiꞌ ix yalan dꞌa ebꞌ scꞌaybꞌum:

—Ay val jun tiempoal ol javoc,

ol eyalan icha tic:

Tzoc val jax junelxo jun Acꞌbꞌilcot yuj Dios dꞌa co cal tic,

vachꞌchom junn̈ejlaj cꞌual,

xe chama.

Palta man̈xo ol jalaj.

23 Ay ebꞌ ol alanoc:

Ina yajecꞌ dꞌa tic,

ma ina yajecꞌ dꞌa chiꞌ,

xcham ebꞌ,

palta man̈ ex bꞌatoc,

man̈ ex och tzacꞌan yuj ebꞌ.

24 Yujto icha val yecꞌ copnaj lebꞌlon,

sacbꞌi smasanil satchaan̈ yuuj,

icha chiꞌ ol aj in ja dꞌa jun cꞌual a in Acꞌbꞌil in cot yuj Dios voch animail tic.

25 Palta yovalil ol in bꞌabꞌlaj abꞌej val syail sicꞌlabꞌil.

Ol in spatiquejel ebꞌ anima dꞌa jun tiempoal tic.

26 Ayic ol in jaxoc,

lajan ol aj icha jun tiempoal ayic yecꞌnac vin̈aj Noé.

27 Yujto a ebꞌ anima dꞌa jun tiempoal chiꞌ,

ichn̈ejtaꞌ yecꞌ cꞌu yuj ebꞌ:

Sva ebꞌ,

syucꞌan aꞌ ebꞌ,

ay ebꞌ van yoch yetbꞌeyum,

ay ebꞌ van scꞌanji yisil.

Max snalaj ebꞌ tato ay tas ol ja dꞌa yibꞌan̈ ebꞌ.

Icha chiꞌ yecꞌ tiempo yuj ebꞌ masanto cꞌoch scꞌual yoch vin̈aj Noé chiꞌ dꞌa yol teꞌ arca.

Aton taꞌ cotnac jun nivan aꞌ mucvajum,

laj cham ebꞌ smasanil.

28 Icha pax chiꞌ,

ujinac dꞌa stiempoal pax vin̈aj Lot:

Sva ebꞌ,

syucꞌan aꞌ ebꞌ,

smanvaj ebꞌ,

schon̈vaj ebꞌ,

syavej tastac ebꞌ,

slaj sbꞌoan spat ebꞌ.

29 A val yelcancot vin̈aj Lot dꞌa yol chon̈abꞌ Sodoma,

yemul jun cꞌacꞌ yedꞌ juntzan̈ cotac qꞌueen chac xilinac.

Icha val yem n̈abꞌ,

icha chiꞌ yemta dꞌa satchaan̈.

Icha chiꞌ aj scham ebꞌ smasanil.

30 Icha val ajnac dꞌa jun tiempoal chiꞌ,

icha chiꞌ ol aj in ja a in tic,

xchi Jesús.

31 A dꞌa jun cꞌual chiꞌ,

tato ay ebꞌ ayqꞌue dꞌa yibꞌan̈ spat,

vachꞌchom ay tas aycan yuj ebꞌ dꞌa yol spat,

mocxobꞌ emtalaj ebꞌ yiqꞌueli.

Tato ay ebꞌ aybꞌat munlajel,

mocxobꞌ meltzaj ebꞌ dꞌa spat.

32 Tze nacot tas ajnac ix yetbꞌeyum vin̈aj Lot chiꞌ.

33 A ebꞌ snibꞌej scol sbꞌa dꞌa yolyibꞌan̈qꞌuinal tic,

ol satel sqꞌuinal ebꞌ dꞌa juneln̈ej.

Axo ebꞌ syacꞌcham sbꞌa vuuj,

ol scha sqꞌuinal ebꞌ dꞌa juneln̈ej.

34 Sval dꞌayex,

tato ay chavan̈oc vaynac dꞌa sat schꞌat dꞌa jun acꞌval chiꞌ,

ay jun ol icꞌjocbꞌatoc,

ay junxo ol canoc.

35-36 Qꞌuinaloc ay chavan̈oc ebꞌ ix van smol cheni,

jun ix ol icꞌjocbꞌatoc,

axo junxo ix ol canoc,

xchi Jesús dꞌa ebꞌ scꞌaybꞌum chiꞌ.

37 Ayic ix yabꞌan jun chiꞌ ebꞌ,

ix scꞌanbꞌan ebꞌ dꞌay:

—¿Bꞌajtil ol ujoc jun chiꞌ Mamin?

xchi ebꞌ.

—Icha tzꞌajcꞌoch nocꞌ ostoc bꞌaj ay junoc chamnac nocꞌ,

icha chiꞌ ol ajoc,

xchi Jesús dꞌa ebꞌ.