9
Val yel sval dꞌayex,
ay ex manto ex chamlaj ol eyil svachꞌ och Dios Yajalil yedꞌ spoder,
xchi dꞌa ebꞌ.
Marcos 9.1-32
Ix qꞌuexmaj yilji Jesús
2 Obꞌxitax chiꞌ,
ix icꞌjibꞌat vin̈aj Pedro,
vin̈aj Jacobo yedꞌ vin̈aj Juan yuj Jesús dꞌa jun nivan tzalan.
Schꞌocoj ebꞌ ix bꞌat yedꞌoc.
Ataꞌ ix qꞌuexmaj yilji dꞌa yichan̈ ebꞌ.
3 A spichul,
te tziquiqui ix aji.
Te sac ix aj yilji.
Malaj mach dꞌa yolyibꞌan̈qꞌuinal tic stzacꞌvan sacbꞌitan junoc cꞌapac icha chiꞌ.
4 Axo ix yilan ebꞌ,
ayecꞌ vin̈aj Elías yedꞌ vin̈aj Moisés van slolon ebꞌ yedꞌoc.
5 Yuj chiꞌ,
ix yalan vin̈aj Pedro dꞌay.
—Mamin,
te vachꞌ cajecꞌ dꞌa tic.
Tecan vachꞌ sco bꞌo oxeoc lechpat,
jun icoꞌ,
jun yic vin̈aj Moisés yedꞌ junoc yic vin̈aj Elías chiꞌ,
xchi vin̈ dꞌay.
6 Man̈ yojtacoc vin̈aj Pedro chiꞌ tas syalaꞌ yujto te xivnac ebꞌ scꞌaybꞌum chiꞌ.
7 Ix lajvi chiꞌ,
ix cꞌoch jun asun,
ix em moyan dꞌa yibꞌan̈ ebꞌ.
Ix aljiemta jun lolonel dꞌa scal jun asun chiꞌ,
ix yalani:
—Aton jun tic Vuninal,
te xajanabꞌil vuuj.
Aqꞌuecoch e chiquin dꞌay,
xchi jun lolonel chiꞌ.
8 Ix lajvi chiꞌ,
ix yilan ebꞌ to man̈xalaj mach ayeqꞌui.
Axon̈ej Jesús ayeqꞌui.
9 Ayic van yemxita ebꞌ dꞌa jun tzalan chiꞌ,
ix yalan dꞌa ebꞌ:
—Ayta bꞌaj tzeyalel jun ix eyil tic.
A in Acꞌbꞌil in cot yuj Dios voch animail,
ato yic ol in pitzvocxi dꞌa scal ebꞌ chamnac,
ato taꞌ ol eyaleli,
xchi Jesús dꞌa ebꞌ.
10 Yuj chiꞌ,
muniln̈ej yojtac jun chiꞌ ebꞌ.
Malaj junoc mach bꞌaj ix yal ebꞌ.
Palta ix laj snaubꞌtan̈an ebꞌ yuj tas ix yal chiꞌ to ol pitzvocxi dꞌa scal ebꞌ chamnac.
11 Ix lajvi chiꞌ,
ix scꞌanbꞌan ebꞌ dꞌa Jesús:
—A ebꞌ cꞌaybꞌum dꞌa ley Moisés,
slaj yal ebꞌ icha tic:
A vin̈aj Elías,
yovalil ol bꞌabꞌlaj javoc,
xchi ebꞌ.
¿Tas am yuj syal ebꞌ icha chiꞌ?
xchi ebꞌ oxvan̈ chiꞌ.
12 Yuj chiꞌ,
ix yalan Jesús dꞌa ebꞌ:
—Yel toni,
yovalil ol bꞌabꞌlaj javoc vin̈aj Elías chiꞌ,
yic vachꞌ listaxo yaj smasanil ayic tzin javi,
palta ¿tas syal dꞌa Slolonel Dios Tzꞌibꞌabꞌilcan vuuj,
a in Acꞌbꞌil in cot yuj Dios voch animail tic?
Ataꞌ syalaꞌ to ol vabꞌ syail,
ol in paticajcanel yuj ebꞌ anima.
13 Palta sval dꞌayex yuj vin̈aj Elías chiꞌ,
ulnacxoecꞌ vin̈.
Ay ebꞌ yacꞌnac sgana dꞌa spatic vin̈ icha snibꞌej.
Icha val tzꞌibꞌabꞌilcan yuj vin̈ dꞌa Slolonel Dios,
icha val chiꞌ ix yutej ebꞌ,
xchi dꞌa ebꞌ scꞌaybꞌum chiꞌ.
Bꞌonacxi scꞌool jun vin̈ unin ayoch enemigo dꞌay
14 Ayic vanxo scꞌochxi ebꞌ bꞌaj aycan juntzan̈xo ebꞌ scꞌaybꞌum chiꞌ,
ix yilanbꞌat Jesús to man̈ jantacoc anima ayecꞌ yedꞌ ebꞌ.
Axo ebꞌ vin̈ cꞌaybꞌum dꞌa ley Moisés,
van stelan sbꞌa ebꞌ vin̈ yedꞌ ebꞌ scꞌaybꞌum Jesús chiꞌ.
15 Axo smasanil ebꞌ ayecꞌ taꞌ,
ayic ix yilanbꞌat Jesús chiꞌ ebꞌ,
ix te sat scꞌol ebꞌ.
Yuj chiꞌ,
ix bꞌat lemnaj ebꞌ schaꞌa.
16 Axo ix cꞌoch ebꞌ dꞌa stzꞌey,
ix scꞌanbꞌan dꞌa ebꞌ:
—¿Tas yuj tze telaj e bꞌa yedꞌ ebꞌ vin̈?
xchi dꞌa ebꞌ.
17 Ay jun vin̈ ix tacꞌviqꞌue dꞌa scal ebꞌ anima chiꞌ:
—Mamin,
ix vicꞌcot jun vuninal dꞌayach.
Ayoch jun enemigo dꞌay,
yuj chiꞌ max ujilaj sloloni.
18 Yalxon̈ej bꞌaj scot dꞌay,
syumji telvoc yuuj.
Svoman stiꞌ,
sjuchꞌuchꞌi ye,
stzatzbꞌicanel yuuj.
Ix val dꞌa ebꞌ a cꞌaybꞌum to syiqꞌuel ebꞌ,
palta maj yal-laj yicꞌanel ebꞌ dꞌay,
xchi vin̈ dꞌa Jesús chiꞌ.
19 Yuj chiꞌ ix yalan Jesús chiꞌ:
—A...
a ex tic,
te max eyacꞌoch Dios dꞌa e cꞌool.
Ina ayxo tiempo ayinecꞌ eyedꞌoc.
¿Bꞌaqꞌuin̈to val ol nachajel eyuuj?
Svabꞌ val syail eyuuj.
Iqꞌueccot jun unin chiꞌ dꞌayin,
xchi.
20 Yuj chiꞌ,
ix bꞌat yicꞌancot jun yuninal vin̈ chiꞌ ebꞌ.
A ix yilanoch jun enemigo chiꞌ to a Jesús,
masn̈ej ix cot yoval scot dꞌa sjolom jun unin chiꞌ.
Ix telvi dꞌa sat luum,
ix te ecꞌ bꞌalbꞌonoc.
Ix voman stiꞌ.
21 Yuj chiꞌ,
ix scꞌanbꞌan Jesús dꞌa smam jun unin chiꞌ:
—¿Jantacxo tiempo syamchaj yuuj?
xchi.
Ix yalan vin̈:
—Atax dꞌa yuninal aytaxonoch dꞌay.
22 Tzijtumxo el tzꞌoch dꞌa yol cꞌacꞌ yuuj,
sbꞌat dꞌa yol aꞌ,
sgana scham yuuj snaani.
Palta tato syal a bꞌoani,
ocꞌoc val a cꞌool dꞌayon̈,
xchi vin̈ dꞌay.
23 —¿Tas yuj tzalaꞌ tato syal vuuj?
Syalaꞌ ta tzacꞌoch Dios dꞌa a cꞌool.
A mach tzꞌacꞌanoch Dios dꞌa scꞌool,
masanil tas ol yal yuuj,
xchi Jesús dꞌa vin̈.
24 Yuj chiꞌ,
te chaan̈ ix yal vin̈ smam vin̈ unin chiꞌ:
—Svacꞌoch dꞌa in cꞌool.
Colvajan vedꞌoc dꞌa in chabꞌcꞌolal,
xchi vin̈.
25 Axo ix yilan Jesús,
man̈ jantacoc anima van smolchajcꞌoch dꞌay,
yuj chiꞌ ix stuman jun enemigo chiꞌ:
—Ach enemigo,
acꞌum chacan̈il,
macum ti anima,
sval dꞌayach,
elan̈ dꞌa jun unin tic.
Man̈xo ach och dꞌay junelxo,
xchi Jesús.
26 Yuj chiꞌ,
ix el yav jun enemigo chiꞌ.
Te ov ix cotxi dꞌa sjolom jun unin chiꞌ.
Ichato chiꞌ bꞌian ix el dꞌay.
Axo jun unin chiꞌ,
icha chamnac ix ajcan yuuj.
Yuj chiꞌ,
tzijtum ebꞌ ix alani:
—Ix chami,
xchi ebꞌ.
27 Palta axo Jesús ix yaman scꞌabꞌ,
ix squetzanqꞌue vaan.
28 Ix lajvin̈ej chiꞌ,
ix och Jesús schꞌocoj yedꞌ ebꞌ scꞌaybꞌum dꞌa yol pat.
Ataꞌ ix scꞌanbꞌej ebꞌ dꞌay:
—¿Tas yuj maj yal quicꞌanel jun enemigo chiꞌ?
xchi ebꞌ.
29 Yuj chiꞌ ix yalan dꞌa ebꞌ:
—A jun macan̈ enemigo tic,
man̈ comonoc tzꞌeli.
An̈ej tato tzex lesalvi,
ol yal eyicꞌaneli,
xchi Jesús dꞌa ebꞌ.
Ayocto ix yalanxi Jesús yuj schamel
30 Ayic ix elxi ebꞌ taꞌ,
ix ecꞌ ebꞌ dꞌa yol yic Galilea.
Sgana Jesús malaj mach tzꞌabꞌan bꞌaj van scꞌochi,
31 yujto van scꞌaybꞌan ebꞌ scꞌaybꞌum.
Ix yalan dꞌa ebꞌ:
—A in Acꞌbꞌil in cot yuj Dios voch animail tic,
ol in acꞌjococh dꞌa yol scꞌabꞌ juntzan̈ vinac.
Ol in smilcham ebꞌ.
Palta axo dꞌa schabꞌjial chiꞌ,
ol in pitzvocxi,
xchi dꞌa ebꞌ.
32 Palta max nachajel yuj ebꞌ tas ix yalaꞌ.
Ix xivpax ebꞌ scꞌanbꞌan dꞌay tas syalelcꞌochi.
¿Mach am junoc más nivan yelcꞌochi?
33 Ix lajvi chiꞌ,
ix cꞌoch ebꞌ dꞌa chon̈abꞌ Capernaum.
Axo yic ayxoecꞌ ebꞌ dꞌa yol jun pat,
ix scꞌanbꞌan Jesús dꞌa ebꞌ:
—¿Tas yuj ix e telaj e bꞌa dꞌa yol bꞌe?
xchi dꞌa ebꞌ.
Marcos 9.33-50
34 Palta tzꞌinxon̈ej xchi ebꞌ,
yujto ayic van sbꞌey ebꞌ,
ix laj stelaj sbꞌa ebꞌ,
mach junoc nivan yelcꞌoch dꞌa scal ebꞌ.
35 Yuj chiꞌ ix em cꞌojan Jesús.
Ix yavtancot ebꞌ slajchavan̈il.
Ix yalan dꞌa ebꞌ:
—Tato ay junoc ex e gana nivan eyelcꞌoch dꞌa e cal dꞌa yichan̈ Dios,
yovalil más emnaquil tzeyutej e bꞌa dꞌa eyichan̈ e masanil.
Yovalil tzex och eyacꞌ servil ebꞌ eyetcꞌaybꞌumal tic smasanil,
xchi Jesús dꞌa ebꞌ.
36 Ix lajvi chiꞌ,
ix yicꞌanoch jun unin Jesús dꞌa scal ebꞌ.
Ix schelanqꞌuei.
Ix yalan dꞌa ebꞌ:
37 —A mach schaan junoc unin icha jun tic,
yujto vicoꞌ,
a in ton tzin scha ebꞌ.
Man̈oc inn̈ej tzin scha ebꞌ.
Scha pax jun checjinac in cot ebꞌ,
xchi.
A mach man̈ ajcꞌoloc dꞌayon̈ ayoch quedꞌoc
38 Axo vin̈aj Juan ix alan dꞌa Jesús:
—Mamin,
ay jun vin̈ ix quilaꞌ van yicꞌanel ebꞌ enemigo vin̈ dꞌa ebꞌ anima.
Syalan vin̈ to yuj a poder sbꞌo juntzan̈ chiꞌ vin̈.
Palta ix co cachoch vaan vin̈,
yujto man̈ junn̈ejoc yaj quedꞌoc,
xchi vin̈ dꞌay.
39 Palta ix yalan Jesús:
—Max yal-laj e cachanoch vaan vin̈,
yujto malaj junoc mach sbꞌoan junoc milagro dꞌa in bꞌi,
slajvi chiꞌ syalan chuc dꞌa in patic.
40 Yujto a ebꞌ man̈ ayococh ajcꞌolal dꞌayon̈,
junn̈ej caj yedꞌ ebꞌ.
41 Tato ay mach scolvaj dꞌayex,
yujto vic ex,
a in Cristo in tic,
vachꞌchom an̈ej junoc vaso aꞌ siej ebꞌ,
yovalil ol scha spac ebꞌ.
Ay smay sjuviel co pensar
42 Palta tato ay mach tzꞌacꞌan somchaj spensar junoc anima tzin acꞌanoch dꞌa scꞌool,
to icha spensar unin tzꞌaj spensar chiꞌ,
chuc yic jun anima chiꞌ.
Octom bꞌabꞌel spixjioch junoc nivaquil qꞌueen* dꞌa sjaj,
syumjicanbꞌat dꞌa yol aꞌ mar yic sjicꞌan aꞌ schami,
yacbꞌan mantzac yacꞌ somchaj spensar jun anima chiꞌ.
Tato icha chiꞌ,
más vachꞌ yicoꞌ.
43-44 Tato yuj junoc e cꞌabꞌ sjuviel e pensar,
más vachꞌ tze tzepel jun e cꞌabꞌ chiꞌ,
yic man̈ ol juvoquel e pensar yuj dꞌa juneln̈ej.
Yujto vachꞌchom junxon̈ej e cꞌabꞌ,
tato ol e cha e qꞌuinal dꞌa juneln̈ej,
te vachꞌ eyicoꞌ.
Palta vachꞌchom tzꞌacan e cꞌabꞌ,
tato ol ex bꞌatcan dꞌa infierno,
dꞌa scal cꞌacꞌ malaj bꞌaqꞌuin̈ stupi,
te chuc eyicoꞌ.
45-46 Tato yuj junoc eyoc sjuviel e pensar,
más vachꞌ tze tzepel jun eyoc chiꞌ,
yic vachꞌ max juviel e pensar yuuj dꞌa juneln̈ej.
Yujto vachꞌchom junxon̈ej eyoc,
tato ol e cha e qꞌuinal dꞌa juneln̈ej,
te vachꞌ eyicoꞌ.
Palta vachꞌchom tzꞌacan eyoc,
tato ol ex bꞌatcan dꞌa infierno,
dꞌa scal cꞌacꞌ malaj bꞌaqꞌuin̈ stupi,
te chuc eyicoꞌ.
47 Tato yuj junoc e sat sjuviel e pensar,
más vachꞌ tzeyiqꞌuelta,
yic man̈ ol juvoquel e pensar yuuj dꞌa juneln̈ej.
Yujto vachꞌchom junxon̈ej e sat,
tato ol ex och bꞌaj ayoch Dios Yajalil,
te vachꞌ eyicoꞌ.
Palta vachꞌchom tzꞌacan yol e sat,
tato ol ex bꞌatcan dꞌa infierno,
dꞌa scal cꞌacꞌ malaj bꞌaqꞌuin̈ stupi,
te chuc eyicoꞌ.
48 A dꞌa jun lugar chiꞌ,
malaj bꞌaqꞌuin̈ ol lajvoc yabꞌan syail ebꞌ anima chiꞌ taꞌ.
Axo jun cꞌacꞌ chiꞌ,
malaj bꞌaqꞌuin̈ ol tupoc.
49 Icha tzꞌaj yem yatzꞌamil tas sco chiꞌa,
icha chiꞌ ol aj yem cꞌacꞌ dꞌa yibꞌan̈ ebꞌ smasanil.
50 A atzꞌam atzꞌam,
te ay yopisio.
Palta qꞌuinaloc satel scꞌachial atzꞌam,
¿tasto val ol aj scꞌachibꞌixi?
Icha yatzꞌamil tas schichaji,
te ay yopisio,
ichocabꞌ ex taꞌ.
Ayocabꞌ pax juncꞌolal dꞌa e cal,
xchi Jesús dꞌa ebꞌ.