A Jesús ix checanbꞌat ebꞌ scꞌaybꞌum yalel yabꞌixal
10
Axo Jesús ix avtancot ebꞌ scꞌaybꞌum slajchavan̈il.
Ix acꞌji yopisio ebꞌ yicꞌanel ebꞌ enemigo.
Ix yacꞌanpax yopisio ebꞌ yacꞌan bꞌoxoc scꞌool ebꞌ yalxon̈ej tas ilyail tzꞌicꞌani ma yaelal.
2 A ebꞌ lajchavan̈ schecabꞌ tic:
Aton vin̈aj Simón,
scuchan Pedro yedꞌ jun vin̈ yucꞌtac vin̈ scuchan Andrés,
vin̈aj Jacobo yedꞌ pax jun vin̈ yucꞌtac vin̈ scuchan Juan.
A ebꞌ vin̈ chavan̈ tic,
yuninal ebꞌ vin̈ vin̈aj Zebedeo.
3 Yedꞌ pax vin̈aj Felipe,
vin̈aj Bartolomé,
vin̈aj Tomás,
vin̈aj Mateo,
vin̈ tecumel alcabar dꞌa yalan̈taxo,
vin̈aj Jacobo yuninal vin̈aj Alfeo yedꞌ vin̈aj Tadeo.
4 Ay pax junxo vin̈ scuch Simón,
yetbꞌeyumejnac ebꞌ Zelote yedꞌ vin̈aj Judas aj Queriot,
aton vin̈ ix acꞌanoch Jesús dꞌa yol scꞌabꞌ chamel dꞌa slajvubꞌalxo.
5 Aton ebꞌ lajchavan̈ tic ix checjibꞌat yuj Jesús.
Ayic manto bꞌat ebꞌ,
ix yalan juntzan̈ checnabꞌil tic dꞌa ebꞌ:
—Ayic tzex bꞌati,
man̈ ex ecꞌ dꞌa juntzan̈ schon̈abꞌ ebꞌ man̈ israeloc.
Man̈ ex ecꞌ pax dꞌa juntzan̈ chon̈abꞌ dꞌa yol yic Samaria.
6 An̈ej dꞌa ebꞌ satnacto dꞌa scal ebꞌ quetisraelal,
an̈ej taꞌ tzex eqꞌui.
Yujto icha juntzan̈ nocꞌ calnel satnaqueqꞌui,
icha chiꞌ yaj ebꞌ.
7 Bꞌat eyaleli to toxo ol vachꞌ och Dios aj satchaan̈ Yajalil.
8 A ebꞌ penaay yuj lepra,
bꞌat eyacꞌ bꞌoxoc ebꞌ.
Yedꞌ juntzan̈xo ebꞌ penaay,
tzeyacꞌ pax bꞌoxoc scꞌool ebꞌ.
Tzeyacꞌanpax pitzvoc ebꞌ chamnac.
An̈ejtonaꞌ,
slaj eyiqꞌuel ebꞌ enemigo ayoch dꞌa ebꞌ anima.
Nabꞌan̈ej ix e cha jun opisio tic,
yuj chiꞌ nabꞌan̈ej tzex colvaj pax dꞌa ebꞌ.
9 Ayic tzex bꞌati,
man̈ eyicꞌbꞌat e tumin.
Malaj junoc centavo tzeyicꞌbꞌati.
10 Man̈ eyicꞌbꞌat e pa.
Junn̈ej e camix tzeyacꞌochi,
tzex bꞌati.
Man̈ eyicꞌbꞌat jun mojocxo e xan̈abꞌ.
Man̈ eyicꞌ e cꞌococh.
Sval juntzan̈ tic dꞌayex,
yujto a ebꞌ smunlaji,
smoj ton schaan ebꞌ tas syabꞌlej.
11 Ayic tzex cꞌoch dꞌa junjun chon̈abꞌ,
dꞌa junjun aldea,
tze say junoc mach vachꞌ sbꞌeybꞌal bꞌaj smoj e cani,
masanto tzex bꞌatxi dꞌa junocxo lugar.
12 Ayic tzex cꞌoch dꞌa jun pat chiꞌ,
tzeyal dꞌa ebꞌ aj pat chiꞌ:
Ayocabꞌ sjuncꞌolal Dios eyedꞌoc,
xe chi dꞌa ebꞌ.
13 Tato smoj ebꞌ icha chiꞌ,
elocabꞌcꞌoch icha tzeyal chiꞌ dꞌa ebꞌ.
Palta tato man̈ smojoc ebꞌ icha chiꞌ jun,
mocabꞌ elcꞌoch icha tzeyal chiꞌ dꞌa ebꞌ.
14 Tato max ex scha ebꞌ,
tato malaj sgana ebꞌ dꞌa tas tzeyal chiꞌ,
tzex elixta dꞌa yol spat ebꞌ yedꞌ dꞌa yol schon̈abꞌ ebꞌ chiꞌ.
Tze tzicancanel spococal eyoc,*
yic tze chꞌoxancaneli to man̈xalaj eyalan eyic dꞌa ebꞌ.
15 Val yel sval dꞌayex,
ayic ol ja jun cꞌual schꞌolbꞌitaj tas yaj ebꞌ anima,
yelxo val nivan syaelal ebꞌ ol acꞌjoc dꞌa yichan̈ ebꞌ aj Sodoma yedꞌ ebꞌ aj Gomorra.
A tastac ol acꞌjococh dꞌa yibꞌan̈ ebꞌ yic Cristo
16 Abꞌec,
tzex in checbꞌati.
Icha juntzan̈ nocꞌ calnel sbꞌat dꞌa scal nocꞌ oques,
icha chiꞌ ol ex ajoc.
Yuj chiꞌ,
lista tzeyutej e bꞌa icha junoc nocꞌ chan te jelan.
Palta te nanam tzeyutej e bꞌa ichoc nocꞌ paramuch.
17 Tzeyil val e bꞌa,
yujto ay ebꞌ ol ex icꞌanbꞌat dꞌa ebꞌ vin̈ yajal.
Ol ex smacꞌ ebꞌ dꞌa yoltac spatil sculto.
18 Ol ex yicꞌbꞌat ebꞌ dꞌa yichan̈ ebꞌ vin̈ nivac yajal yedꞌ dꞌa yichan̈ ebꞌ vin̈ rey vuuj.
Yuj chiꞌ ol yal eyalanel vabꞌixal dꞌa ebꞌ vin̈ chiꞌ yedꞌ dꞌa ebꞌ man̈ israeloc.
19 Palta ayic ol ex acꞌjococh dꞌa yol scꞌabꞌ ebꞌ vin̈ yajal chiꞌ,
man̈ e na yuj tas ol eyalaꞌ.
Man̈ ex och ilcꞌolal yuj tas ol eyutoc eyalan dꞌa ebꞌ vin̈,
yujto a dꞌa jun rato chiꞌ,
a Dios ol acꞌan nachajel eyuuj tas ol eyalaꞌ.
20 Man̈oc ex ol ex lolonoc,
yujto a Yespíritu Dios,
aton co Mam ol ex majnanoc,
ol eyalani.
21 A dꞌa jun tiempoal chiꞌ,
ay ebꞌ ucꞌtacabꞌil ol acꞌanoch yucꞌtac dꞌa yol scꞌabꞌ chamel.
Ay pax ebꞌ mamabꞌil icha chiꞌ ol yutoc sbꞌa dꞌa ebꞌ yuninal.
An̈ejtonaꞌ,
ay pax ebꞌ uninabꞌil ol yacꞌ oval yedꞌ smam chiꞌ,
ol yacꞌanoch smam ebꞌ dꞌa yol scꞌabꞌ chamel.
22 Masanil ebꞌ anima ol chichonoch scꞌool dꞌayex vuuj.
Palta a mach ol acꞌan techaj smasanil juntzan̈ chiꞌ,
a ebꞌ chiꞌ ol colchajoc.
23 Ayic syacꞌan chucal ebꞌ dꞌayex dꞌa junoc chon̈abꞌ bꞌaj ayex eqꞌui,
elan̈ec dꞌa ebꞌ,
tzex bꞌat dꞌa junocxo chon̈abꞌ.
Val yel sval dꞌayex,
ayic manto ex ecꞌchaj dꞌa masanil juntzan̈ schon̈abꞌ ebꞌ quetisraelal,
ol in jax a in Acꞌbꞌil in cot yuj Dios voch animail tic.
24 Malaj junoc ebꞌ cꞌaybꞌum ecꞌto yelcꞌoch dꞌa yichan̈ scꞌaybꞌumal.
An̈ejtonaꞌ,
malaj junoc tzꞌacꞌan servil ecꞌto yelcꞌoch dꞌa jun tzꞌacꞌan mandar.
25 Tato lajan tzꞌaj junoc cꞌaybꞌum yedꞌ scꞌaybꞌumal,
smoj ton icha chiꞌ tzꞌaji.
Icha pax chiꞌ junoc checabꞌ yedꞌ spatrón.
A in tic,
ichato aj pat in.
A exxo tic,
icha uninabꞌil ex.
Ay ebꞌ tzꞌalani to Beelzebú in,
to yajal ebꞌ enemigo vaji.
Ocxom val dꞌayex a ex tic.
An̈ej dꞌa Dios syal tzon̈ xivi
26 Yuj chiꞌ,
man̈ ex xiv dꞌa ebꞌ anima.
Jantacn̈ej tas cꞌubꞌeltac yaj ticnaic,
ol laj checlajelta.
Yedꞌ jantacn̈ej tas cꞌubꞌeltac yaji,
ol laj acꞌjoc ojtacajeloc.
27 A juntzan̈ tas sval dꞌayex dꞌa cꞌubꞌeltaquil,
tzeyalel dꞌa ebꞌ anima.
Yedꞌ juntzan̈xo tas cꞌubꞌeltac tzin sajoch dꞌa e chiquin,
tzeyalel dꞌa yoltac calle.
28 Man̈ ex xiv dꞌa ebꞌ syal smilan e nivanil tic,
yujto a e pixan max yal smilan ebꞌ.
Palta a dꞌa Dios bꞌaj tzex xivi,
yujto a syal satanel e pixan yedꞌ e nivanil,
syacꞌancanbꞌat dꞌa infierno.
29 Tzeyilnabꞌ juntzan̈ nocꞌ cotac much.
Ayic schon̈chaj nocꞌ,
chavan̈ nocꞌ dꞌa jun yuneꞌ tumin,
palta malaj junoc nocꞌ scomon chami,
tato man̈ ichoc taꞌ sgana co Mam Dios.
30-31 Palta a exxo tic,
yelxo val nivan eyelcꞌoch dꞌa yichan̈ masanil nocꞌ cotac much chiꞌ.
Ina masanil xil e jolom bꞌisbꞌil yuuj.
Yuj chiꞌ,
man̈ ex xivoc.
A ebꞌ max qꞌuixvi yalani, to yic Cristo ebꞌ
32 Yaln̈ej mach ebꞌ max qꞌuixvi yalan dꞌa yichan̈ ebꞌ anima to vicoꞌ,
a inxo tic,
ol val ebꞌ vicoc dꞌa co Mam Dios ayecꞌ dꞌa satchaan̈.
33 Palta axo ebꞌ tzꞌalan dꞌa yichan̈ ebꞌ anima to man̈ vicoc ebꞌ,
an̈ejtonaꞌ in,
ol valpax dꞌa co Mam Dios ayecꞌ dꞌa satchaan̈ to man̈ vicoc ebꞌ.
Yuj Jesús, ay ebꞌ syacꞌ oval
34 Man̈ e naꞌ to in ja vacꞌ juncꞌolal dꞌa scal ebꞌ anima dꞌa yolyibꞌan̈qꞌuinal tic.
Man̈ yujoc yoch juncꞌolal dꞌa scal ebꞌ in javi.
Palta yuj yoch oval dꞌa scal ebꞌ.
35 In javi,
yic vachꞌ ay ebꞌ vin̈ vinac ol yacꞌ oval yedꞌ smam.
Ay ebꞌ ix ix ol yacꞌ oval yedꞌ snun.
Ay ebꞌ ix alibꞌal ol yacꞌ oval yedꞌ ix yalibꞌ.
36 Yuj chiꞌ,
a ebꞌ jun yaj yedꞌ junoc mach dꞌa yol spat,
aton ebꞌ ol laj meltzajoch ajcꞌolal dꞌay junjun.
37 A mach másxo val xajanej smam snun dꞌa vichan̈,
man̈ smojoc yoch vicoc.
An̈ejtonaꞌ,
a mach másxo val xajanej yuninal dꞌa vichan̈,
man̈ smojoc yoch vicoc.
38 A mach man̈ bꞌecanoc scꞌool yabꞌan syail vuuj,
man̈ bꞌecanoc scꞌool yoch chamel dꞌa yibꞌan̈,
tzꞌoch dꞌa spenec teꞌ culus,
man̈ smojoc yoch tzacꞌan vuuj.
39 A ebꞌ sgana scol sbꞌa dꞌa yolyibꞌan̈qꞌuinal tic,
ol satel sqꞌuinal ebꞌ dꞌa juneln̈ej.
Palta axo ebꞌ sbꞌec sbꞌa scham vuuj,
aton ebꞌ ol scha sqꞌuinal dꞌa juneln̈ej.
A ebꞌ ol chaan spac dꞌa Dios
(Mr 9.41)
40 A ebꞌ tzex chaani,
a in tzin scha ebꞌ.
Axo ebꞌ tzin chaan chiꞌ,
van schaan pax jun checjinac in cot ebꞌ.
41 A ebꞌ schaan junoc schecabꞌ Dios,
yujn̈ej to schecabꞌ Dios yaji,
ol scha spac ebꞌ icha yic ebꞌ schecabꞌ Dios chiꞌ.
A ebꞌ schaan junoc mach tojol sbꞌeybꞌal,
yujn̈ej to tojol sbꞌeybꞌal,
ol scha spac ebꞌ icha yic ebꞌ tojol sbꞌeybꞌal chiꞌ.
42 Yaln̈ej junoc mach ebꞌ sian junoc vaso siquilaꞌ* dꞌa junoc ebꞌ in cꞌaybꞌum,
yujn̈ej to in cꞌaybꞌum,
vachꞌchom junoc malaj val yelcꞌochi,
val yel ol scha spac ebꞌ.