Bꞌoxinac jun vin̈ sicbꞌinaquel scꞌabꞌ
3
Ix ochxi Jesús dꞌa yol spatil culto.
Ataꞌ ay jun vin̈ sicbꞌinaquel scꞌabꞌ,
juneln̈ej taquin̈ roquinac.
Marcos 3.1-19
2 Ay ebꞌ stan̈van yilaꞌ tato sbꞌoxi scꞌabꞌ vin̈ yuj Jesús dꞌa scꞌual icꞌoj ip,
yujto sgana ebꞌ yacꞌanoch dꞌa yibꞌan̈.
3 Ix yalan Jesús dꞌa vin̈ sicbꞌinaquel scꞌabꞌ chiꞌ:
—Qꞌuean̈ lin̈an,
cotan̈ dꞌa co nan̈al tic,
xchi Jesús dꞌa vin̈.
4 Ix lajvi chiꞌ ix yalan dꞌa ebꞌ anima:
—¿Bꞌaja junoc ay sleyal co cꞌulan dꞌa scꞌual icꞌoj ip tze naꞌa?
¿Tzam yal co cꞌulan juntzan̈ tas vachꞌ,
ma a juntzan̈ malaj svachꞌil syal co cꞌulani?
¿Tzam yal scacꞌ bꞌoxoc junoc penaay,
ma to syal co vachꞌ milanchamoc?
xchi Jesús.
Palta tzꞌinxon̈ej xchi ebꞌ.
5 Ix ecꞌ qꞌueleloc Jesús dꞌa ebꞌ,
ix cot yoval.
Ix te cusqꞌuei yujto te pit ebꞌ.
Ix yalan dꞌa vin̈:
—Aqꞌuel lian a cꞌabꞌ chiꞌ,
xchi.
Ix yacꞌanel lian vin̈.
Icha chiꞌ ix aj sbꞌoxicani.
6 Ayic toxo ix elta ebꞌ vin̈ fariseo,
ix lolon ebꞌ vin̈ yedꞌ ebꞌ spartido vin̈aj Herodes.
Ix laj slajtian sbꞌa ebꞌ chajtil ol yutoc ebꞌ smilancham Jesús.
Tzijtum anima ix cꞌoch dꞌa stiꞌ aꞌ n̈ajabꞌ
7 Axo Jesús ix cꞌoch dꞌa stiꞌ aꞌ n̈ajabꞌ yic Galilea yedꞌ ebꞌ scꞌaybꞌum.
Tzijtum ebꞌ anima ix cꞌoch yedꞌ ebꞌ.
Ay ebꞌ ix cot dꞌa yol yic Galilea,
8 dꞌa yol yic Judea,
dꞌa chon̈abꞌ Jerusalén,
dꞌa yol yic Idumea yedꞌ dꞌa scꞌaxepal aꞌ Jordán.
Ay pax ebꞌ ix cot dꞌa slacꞌanil Tiro yedꞌ Sidón.
Ix yabꞌan ebꞌ to man̈xo jantacoc milagro ix sbꞌo Jesús.
Yuj chiꞌ tzijtum ebꞌ ix cꞌoch dꞌay.
9 Yuj chiꞌ ix yalan Jesús dꞌa ebꞌ scꞌaybꞌum to syacꞌ lista junoc barco ebꞌ,
yic max vitzꞌcꞌaj yuj ebꞌ anima.
10 Man̈ jantacoc ebꞌ toxo ix bꞌoxi scꞌool yuuj.
Yuj chiꞌ tzijtum ebꞌ penaay syecoch sbꞌa yic smaslan Jesús chiꞌ ebꞌ.
11 Axo juntzan̈ ebꞌ enemigo,
ayic syilan Jesús ebꞌ,
tzꞌem cuman ebꞌ dꞌa yichan̈,
tzꞌavajqꞌue ebꞌ:
—A ach tic,
Yuninal ach Dios,
xchi ebꞌ.
12 Palta scachji ebꞌ yuuj,
yic max yalel ebꞌ mach.
A Jesús sicꞌjinaquel lajchavan̈ ebꞌ schecabꞌ
13 Ix lajvi chiꞌ,
ix bꞌat Jesús dꞌa jun tzalan.
Axo ebꞌ sgana to tzꞌecꞌ yedꞌoc,
ix yavtejcot ebꞌ,
ix cꞌoch ebꞌ dꞌay.
14 Lajchavan̈ ebꞌ ix acꞌjioch yopisio,
yic vachꞌ tzꞌecꞌ ebꞌ yedꞌoc,
yic syalanpaxel slolonel Dios ebꞌ.
15 Ix yacꞌanoch yopisio ebꞌ yicꞌanel enemigo ebꞌ dꞌa ebꞌ anima.
16 A ebꞌ lajchavan̈ chiꞌ aton ebꞌ tic:
Vin̈aj Simón,
scuchan pax Pedro yuj Jesús,
17 vin̈aj Jacobo yedꞌ vin̈ yucꞌtac vin̈ scuch Juan.
A chavan̈ ebꞌ tic,
yuninal ebꞌ vin̈aj Zebedeo.
Ix acꞌjican scuch ebꞌ Boanerges.
Boanerges syalelcꞌochi,
yuninal cꞌu scꞌan̈i.*
18 Ayecꞌ pax vin̈aj Andrés,
vin̈aj Felipe,
vin̈aj Bartolo,
vin̈aj Mateo,
vin̈aj Tomás,
vin̈aj Jacobo yuninal vin̈aj Alfeo,
vin̈aj Tadeo yedꞌ vin̈aj Simón.
A vin̈aj Simón tic,
spartido sbꞌa vin̈ yedꞌ ebꞌ Zelote.
19 Ayecꞌ pax vin̈aj Judas aj Queriot,
aton vin̈ ix acꞌanoch Jesús dꞌa yol scꞌabꞌ chamel.
Ay ebꞌ ix alani to a vin̈ diablo ayoch dꞌa Jesús
20 Ix lajvi chiꞌ,
ix bꞌat Jesús dꞌa jun pat yedꞌ ebꞌ scꞌaybꞌum.
Tzijtum anima ix smolbꞌej sbꞌa junelxo.
Yuj chiꞌ maxtzac yacꞌ tiempo sva ebꞌ.
Marcos 3.20-35
22 Ay juntzan̈ ebꞌ vin̈ cꞌaybꞌum dꞌa ley Moisés ix cot dꞌa Jerusalén,
ix yalan ebꞌ vin̈:
—A Beelzebú yajalil ebꞌ enemigo,
ayoch yedꞌ Jesús tic.
Yuj chiꞌ,
syal ton yicꞌanel ebꞌ enemigo chiꞌ,
yujto aꞌ ayoch yedꞌoc,
xchi ebꞌ.
23 Axo Jesús ix avtancot ebꞌ vin̈,
ix yalan dꞌa ebꞌ vin̈:
—A vin̈ Satanás chiꞌ,
¿tas ol yutoc vin̈ spechanel ebꞌ yetenemigoal?
24 Qꞌuinaloc ay junoc nivan chon̈abꞌ bꞌaj slaj spoj sbꞌa ebꞌ yajal,
slaj yacꞌan oval ebꞌ.
Tato icha chiꞌ,
dꞌa jun rato sjuviel jun chon̈abꞌ chiꞌ.
25 Qꞌuinaloc ay junoc patil ebꞌ anima,
spoj sbꞌa yuj oval.
Tato icha chiꞌ,
jun rato sjuviel jun patil ebꞌ anima chiꞌ.
26 An̈ejtonaꞌ,
icha chiꞌ yaj pax vin̈ Satanás.
Qꞌuinaloc spoj sbꞌa vin̈ yedꞌ ebꞌ yetenemigoal,
syacꞌan oval vin̈ yedꞌ ebꞌ.
Tato icha chiꞌ,
sjuviel vin̈.
Icha chiꞌ tzꞌaj yel yopisio vin̈.
27 Qꞌuinaloc ay junoc vinac te ay yip.
Malaj junoc mach syal scomon och dꞌa yol spat vin̈,
syicꞌanelta tastac ay dꞌay.
An̈ej ta syacꞌ ganar ebꞌ vin̈ stzecꞌancan vin̈ aj pat chiꞌ bꞌabꞌel,
ichato chiꞌ,
syal yicꞌjiel tastac ay dꞌa vin̈.
28 Dꞌa val yel sval dꞌayex,
yaln̈ej tas smul ebꞌ anima yedꞌ jantacn̈ej tas malaj svachꞌil syal ebꞌ dꞌa spatic Dios,
ol yal yacꞌan lajvoc Dios.
29 Palta a ebꞌ bꞌuchumtac dꞌa Yespíritu Dios,
a jun smul ebꞌ chiꞌ,
toxon man̈ ol acꞌjoc lajvoc.
Scan dꞌa yibꞌan̈ ebꞌ dꞌa juneln̈ej,
xchi Jesús.
30 Icha chiꞌ ix yutej yalani,
yujto ix yal ebꞌ to a vin̈ enemigo ayoch yedꞌoc.
A ix snun Jesús yedꞌ ebꞌ yucꞌtac
31 Ix lajvi chiꞌ,
ix cꞌoch ix snun Jesús yedꞌ ebꞌ yucꞌtac.
An̈ej dꞌa tiꞌ pat ix cꞌoch ebꞌ.
Ix schecan avtajelta Jesús ebꞌ.
32 Axo ebꞌ cꞌojanem dꞌa stzꞌey ix alan dꞌay:
—Ayecꞌ ix a nun yedꞌ ebꞌ ucꞌtac dꞌa tiꞌ pat,
van ach sayan ebꞌ,
xchi ebꞌ.
33 Palta ix yalan Jesús dꞌa ebꞌ:
—¿Mach ix in nun chiꞌ,
mach ebꞌ vucꞌtac chiꞌ tze naꞌa?
xchi dꞌa ebꞌ.
34 Ix lajvi chiꞌ,
ix ecꞌ qꞌueleloc dꞌa ebꞌ cꞌojanem dꞌa stzꞌey chiꞌ,
ix yalani: