Bꞌoxinac scꞌool jun vin̈ sicbꞌinaqueli
2
Ayxom sjayiloc cꞌu,
ix cꞌochxi Jesús dꞌa chon̈abꞌ Capernaum.
Axo ix yabꞌan ebꞌ anima to ayecꞌ dꞌa spat.
Marcos 2.1-12
2 Yuj chiꞌ,
man̈ jantacoc anima ix smolbꞌej sbꞌa dꞌa spat chiꞌ,
man̈xalaj bꞌaj tzꞌaj ebꞌ.
Axo Jesús ix alanel slolonel Dios dꞌa scal ebꞌ.
3 Ay jun vin̈ sicbꞌinaquel ix icꞌjicot yuj chan̈van̈ ebꞌ vin̈.
4 Palta maj yal-laj yoch ebꞌ bꞌaj ayecꞌ Jesús chiꞌ,
yujto tzijtum anima.
Yuj chiꞌ ix qꞌue ebꞌ dꞌa span̈anil yibꞌan̈ jun pat chiꞌ.
Axo dꞌa stojolal bꞌaj ayeqꞌui,
ataꞌ ix yol ebꞌ.
Ix lajvi chiꞌ,
ix yacꞌanem dꞌun̈un̈oc vin̈ sicbꞌinaquel chiꞌ ebꞌ yedꞌ svaynubꞌ bꞌaj ayecꞌ chiꞌ.
5 Ix yilan Jesús chiꞌ to ix yacꞌoch ebꞌ dꞌa scꞌool,
ix yalan dꞌa vin̈ sicbꞌinaquel chiꞌ:
—Ach vetanimail,
ix acꞌji lajvoc a mul,
xchi dꞌa vin̈.
6 Palta ay juntzan̈ ebꞌ vin̈ cꞌaybꞌum dꞌa ley Moisés cꞌojanem taꞌ.
Ix snaan ebꞌ vin̈ icha tic:
7 ¿Tas yuj syal vin̈ icha chiꞌ?
Te bꞌuchumtac vin̈ dꞌa Dios.
Malaj junoc anima syal yacꞌan lajvoc co mul,
an̈ej val Dios,
xchi ebꞌ vin̈.
8 Axo Jesús yojtacxo tas sna ebꞌ vin̈.
Yuj chiꞌ ix yalan dꞌa ebꞌ vin̈:
—¿Tas yuj van e naan juntzan̈ chiꞌ?
9 ¿Bꞌaja junoc secojtac calan tze naꞌa?
Tic ix acꞌji lajvoc a mul,
¿tom xco chi?
¿Mato:
Qꞌuean̈ vaan,
bꞌeyan̈ xco chi?
10 Palta a ticnaic,
ol in chꞌox dꞌayex to a in Acꞌbꞌil in cot yuj Dios voch animail tic,
ay vopisio vacꞌancan lajvoc smul ebꞌ anima dꞌa yolyibꞌan̈qꞌuinal tic,
xchi dꞌa ebꞌ vin̈.
Ix lajvi chiꞌ,
ix yalan dꞌa vin̈ sicbꞌinaquel chiꞌ:
11 —A in tic sval dꞌayach,
qꞌuean̈ vaan.
Icꞌqꞌue vaan a vaynubꞌ tic.
Paxan̈ dꞌa a pat,
xchi Jesús chiꞌ dꞌa vin̈.
12 Dꞌa jun rato chiꞌ,
ix qꞌue vaan vin̈.
Ix yicꞌanchaan̈ svaynubꞌ vin̈ chiꞌ.
Qꞌuelanoch ebꞌ,
ix pax vin̈.
Yuj chiꞌ ix te sat scꞌol ebꞌ smasanil.
Ix laj yalan vachꞌ lolonel ebꞌ dꞌa Dios.
—Malaj bꞌaj squiltaxon jun tic,
xchi ebꞌ.
Ix och vin̈aj Leví scꞌaybꞌumoc Jesús
13 Ix lajvi chiꞌ,
ix cꞌochxi Jesús dꞌa stiꞌ aꞌ n̈ajabꞌ junelxo.
Ix laj cꞌoch masanil ebꞌ anima dꞌay,
ix scꞌaybꞌan ebꞌ.
Marcos 2.13-28
14 Axo yic van sbꞌati,
ix yilani to ayecꞌ jun vin̈ scuch Leví,*
vin̈ yuninal vin̈aj Alfeo,
cꞌojanem vin̈ bꞌaj stecchajel alcabar.
—Ochan̈ in cꞌaybꞌumoc,
xchi Jesús chiꞌ dꞌa vin̈.
Yuj chiꞌ ix qꞌue vaan vin̈,
ix och vin̈ scꞌaybꞌumoc Jesús.
15 Axo ix cꞌoch Jesús dꞌa spat vin̈aj Leví chiꞌ,
ayic ix em cꞌojan vael yedꞌ ebꞌ scꞌaybꞌum,
ay juntzan̈xo ebꞌ tecumel alcabar ix em cꞌojan yedꞌ ebꞌ yedꞌ juntzan̈xo ebꞌ chuc sbꞌeybꞌal,
yujto tzijtumxo ebꞌ ix och tzacꞌan yuuj.
16 Axo ebꞌ vin̈ cꞌaybꞌum dꞌa ley Moisés yedꞌ ebꞌ vin̈ fariseo,
ix yilan ebꞌ vin̈ to van sva Jesús yedꞌ ebꞌ malaj svachꞌil sbꞌeybꞌal chiꞌ.
Yuj chiꞌ ix yalan ebꞌ vin̈ dꞌa ebꞌ vin̈ scꞌaybꞌum Jesús chiꞌ:
—¿Tas yuj sva Jesús yedꞌ ebꞌ tecumel alcabar yedꞌ juntzan̈xo ebꞌ malaj svachꞌil sbꞌeybꞌal tic?
xchi ebꞌ vin̈.
17 Axo ix yabꞌan Jesús,
ix yalan dꞌa ebꞌ vin̈:
—Qꞌuinaloc ay junoc vin̈ an̈tum,
a ebꞌ vachꞌ scꞌool,
malaj tzꞌoch vin̈ yuj ebꞌ.
An̈ej ebꞌ penaay ay tzꞌoch vin̈ yuuj.
Maj in javilaj vavtejcot ebꞌ vachꞌ sbꞌeybꞌal snaani,
palta yuj vavtan ebꞌ ojtannac to malaj svachꞌil sbꞌeybꞌal,
xchi Jesús dꞌa ebꞌ vin̈.
Max schalaj sbꞌa jun icham bꞌeybꞌal yedꞌ jun acꞌ cꞌaybꞌubꞌal
18 A junel ix och ebꞌ scꞌaybꞌum vin̈aj Juan yedꞌ ebꞌ scꞌaybꞌum ebꞌ fariseo dꞌa tzecꞌojcꞌolal.
Yuj chiꞌ ay ebꞌ ix cꞌoch dꞌa Jesús,
ix yalan ebꞌ dꞌay:
—A ebꞌ scꞌaybꞌum vin̈aj Juan yedꞌ ebꞌ scꞌaybꞌum ebꞌ fariseo,
ayoch ebꞌ dꞌa tzecꞌojcꞌolal,
palta axo ebꞌ a cꞌaybꞌum tic,
¿tas yuj max och ebꞌ dꞌa tzecꞌojcꞌolal?
xchi ebꞌ dꞌay.
19 Yuj chiꞌ ix yalan Jesús dꞌa ebꞌ:
—Qꞌuinaloc ay junoc nupnajel ticnaic,
a ebꞌ avtabꞌil taꞌ,
¿tom syal yoch ebꞌ dꞌa tzecꞌojcꞌolal yacbꞌan aytoecꞌ vin̈ snupnaj chiꞌ yedꞌ ebꞌ?
Ayic aytoecꞌ vin̈ yedꞌ ebꞌ,
max yal yoch ebꞌ dꞌa tzecꞌojcꞌolal.
20 Palta ato yic ol ja stiempoal ol icꞌjoquel vin̈ dꞌa scal ebꞌ,
ato taꞌ ol och ebꞌ dꞌa tzecꞌojcꞌolal.
21 Qꞌuinaloc ay junoc cꞌa pichul tzolchaji,
¿tom ay junoc mach tzꞌacꞌanoch junoc acꞌ cꞌapac snipuloc jun cꞌa pichul chiꞌ?
Yujto a jun acꞌ cꞌapac chiꞌ tzꞌutzꞌi,
svachꞌ tocꞌan n̈icꞌchaj jun cꞌa cꞌapac chiꞌ.
Svachꞌ ixtaxbꞌat jun cꞌa cꞌapac chiꞌ yuuj.
22 An̈ejtonaꞌ,
malaj junoc mach syal yacꞌanem vino manto sipjoc dꞌa yol junoc cꞌa tzꞌuum yedꞌtal vino.*
Yujto a sipji vino chiꞌ,
ton̈ej sn̈icꞌchaj jun cꞌa tzꞌuum chiꞌ yuuj.
Ton̈ej tzꞌixtax vino chiꞌ yedꞌ jun tzꞌuum chiꞌ.
Yuj chiꞌ,
an̈ej dꞌa yool juntzan̈ acꞌ tzꞌuum,
an̈ej taꞌ tzꞌem acꞌ vino chiꞌ,
xchi Jesús dꞌa ebꞌ.
Telajbꞌail yuj scꞌual icꞌoj ip
23 Dꞌa jun scꞌual yic syicꞌ yip ebꞌ aj Israel,
ix ecꞌ Jesús yedꞌ ebꞌ scꞌaybꞌum dꞌa jun bꞌe dꞌa scal ixim trigo.
Axo ebꞌ scꞌaybꞌum chiꞌ ix cꞌutzanelta ixim jolom trigo chiꞌ ayic van sbꞌey ebꞌ.
24 Yuj chiꞌ,
axo ebꞌ fariseo ix alan dꞌa Jesús:
—A ticnaic,
¿tas yuj smunlaj ebꞌ a cꞌaybꞌum dꞌa scꞌual icꞌoj ip?
Malaj sleyal scꞌulan ebꞌ icha chiꞌ,
xchi ebꞌ.
25 Palta ix yalan Jesús dꞌa ebꞌ:
—¿Tom malaj bꞌaj tzeyil dꞌa Slolonel Dios Tzꞌibꞌabꞌilcani,
tas scꞌulejnac vin̈aj David dꞌa junel,
ayic yoch svejel vin̈ yedꞌ ebꞌ ajun yedꞌoc?
26 Xidꞌnac ecꞌ vin̈ dꞌa scajnubꞌ Dios ayic ayoch vin̈aj Abiatar sat sacerdoteal.
Ataꞌ svanac juntzan̈ ixim pan vin̈ yic Dios yaji,
yacꞌanpax ixim vin̈ dꞌa ebꞌ ajun yedꞌoc.
A juntzan̈ ixim pan chiꞌ,
an̈ej ebꞌ sacerdote ay yalan yic svaan ixim.
Palta a jun scꞌulejnac ebꞌ chiꞌ,
man̈ muloclaj dꞌa sat Dios.