Telajbꞌail yuj scꞌual icꞌoj ip
12
A dꞌa jun scꞌual icꞌoj ip,
ix ecꞌ Jesús dꞌa jun bꞌe dꞌa scal ixim trigo yedꞌ ebꞌ scꞌaybꞌum.
Axo ebꞌ scꞌaybꞌum chiꞌ,
ix te och svejel ebꞌ.
Yuj chiꞌ,
ix scꞌutzelta ixim jolom trigo chiꞌ ebꞌ,*
ix svuchanel ixim ebꞌ scꞌuxuꞌ.
2 Palta ix yilan juntzan̈ ebꞌ vin̈ fariseo tas ix scꞌulej ebꞌ,
yuj chiꞌ ix yalan ebꞌ dꞌa Jesús:
—Ina ebꞌ a cꞌaybꞌum tic.
Van smunlaj ebꞌ dꞌa scꞌual icꞌoj ip,
palta man̈ sleyaloc sco cꞌulej icha chiꞌ,
xchi ebꞌ vin̈.
3 Palta ix yalan dꞌa ebꞌ vin̈:
—¿Tom manta bꞌaj tzeyil dꞌa Slolonel Dios Tzꞌibꞌabꞌilcani,
tas scꞌulejnac vin̈aj David dꞌa junel,
ayic ste ochnac svejel vin̈ yedꞌ ebꞌ ajun yedꞌoc?
4 Xidꞌnaquecꞌ vin̈ dꞌa scajnubꞌ Dios.
Svanac juntzan̈ ixim pan vin̈ yicn̈ej Dios yaji yedꞌ ebꞌ ajun yedꞌoc chiꞌ.*
A juntzan̈ ixim pan chiꞌ,
an̈ej ebꞌ sacerdote ay yalan yic svaan ixim.
Man̈ sleyaloc scomon vaan ixim vin̈ yedꞌ ebꞌ ajun yedꞌoc.
Palta man̈ muloc jun scꞌulejnac vin̈ chiꞌ yedꞌ ebꞌ dꞌa yichan̈ Dios.
5 ¿Tom malaj bꞌaj ix eyil dꞌa ley Moisés to a ebꞌ sacerdote,
ebꞌ ay dꞌa yol stemplo Dios,
man̈ scꞌanabꞌajejnacoc scꞌual icꞌoj ip ebꞌ?
Palta man̈ ochnacoclaj smuloc ebꞌ.
6 Palta a in tic sval dꞌayex,
ay jun dꞌa e cal tic ecꞌto yelcꞌoch dꞌa yichan̈ stemplo Dios,
a in ton tic.
7 Octom val snachajel eyuuj tas yalnaccan Dios dꞌa Slolonel Tzꞌibꞌabꞌilcani,
ayic yalannaccan icha tic:
In gana tzꞌocꞌ e cꞌool dꞌa ebꞌ eyetanimail.
Man̈ocn̈ej juntzan̈ silabꞌ sn̈usji chiꞌ in gana,
xchi.
Octom snachajel jun tic eyuuj,
max am eyalaꞌ to tzꞌoch smul ebꞌ malaj smul.
8 A in tic Acꞌbꞌil in cot yuj Dios voch animail,
yuj chiꞌ syal valani tas sco cꞌulej dꞌa scꞌual icꞌoj ip,
xchi Jesús dꞌa ebꞌ vin̈ fariseo chiꞌ.
9 Ix lajvi chiꞌ,
ix bꞌat Jesús,
ix cꞌoch dꞌa yol spatil sculto ebꞌ vin̈.
10 Ataꞌ ay jun vin̈ sicbꞌinaquel scꞌabꞌ,
juneln̈ej taquin̈ roquinac.
Axo ebꞌ vin̈ chiꞌ,
sgana ebꞌ vin̈ ay junoc smul Jesús tzꞌilchaji,
yic syacꞌoch ebꞌ vin̈ dꞌa yibꞌan̈.
Yuj chiꞌ,
ix stzꞌacan scꞌanbꞌej ebꞌ vin̈ dꞌay:
—¿Ay am sleyal scacꞌ bꞌoxoc junoc penaay dꞌa scꞌual icꞌoj ip,
mato maay?
xchi ebꞌ vin̈.
11 Yuj chiꞌ ix yalan dꞌa ebꞌ vin̈:
—Qꞌuinaloc ay junoc nocꞌ e calnel sbꞌat dꞌa yol junoc xabꞌ dꞌa scꞌual icꞌoj ip,
¿tom max ex bꞌat eyicꞌqꞌueta nocꞌ?
12 Ocxom junoc anima,
yelxo val nivan yelcꞌoch dꞌa yichan̈ junoc nocꞌ calnel chiꞌ.
Yuj chiꞌ,
sleyal ton sco cꞌulej juntzan̈ tas vachꞌ dꞌa scꞌual icꞌoj ip,
xchi dꞌa ebꞌ vin̈.
13 Ix lajvin̈ej chiꞌ,
ix yalan dꞌa vin̈:
—Aqꞌuel lian a cꞌabꞌ chiꞌ,
xchi dꞌa vin̈.
Ix slianel scꞌabꞌ vin̈ chiꞌ,
ix bꞌoxican bꞌian.
Lajan ix aj yedꞌ jun toxonton vachꞌ chiꞌ.
14 Axo ix elta ebꞌ vin̈ fariseo chiꞌ,
ix slajtian sbꞌa ebꞌ vin̈ tas ol yutoc ebꞌ vin̈ smilan Jesús.
Ayocto yalannaccan Dios yuj Jesucristo
15 Ayic ix snaanel Jesús tas sgana ebꞌ syutej,
ix sbꞌesanel sbꞌa taꞌ.
Tzijtum anima ix bꞌat yedꞌoc.
Masanil ebꞌ penaay,
ix laj bꞌoxican scꞌool ebꞌ yuuj.
16 Ix yalan dꞌa ebꞌ:
—Ayta bꞌaj tzeyaleli mach in,
xchi.
17 Icha chiꞌ ix aj yelcꞌoch tas tzꞌibꞌabꞌilcan yuj vin̈aj Isaías,
vin̈ schecabꞌ Dios dꞌa pecaꞌ.
Xchican icha tic:
18 A jun tic,
in checabꞌ yaji,
sicꞌbꞌil yajcanel vuuj.
Te xajan vuuj.
Tzin qꞌue val chaan̈ yedꞌoc.
Ol vacꞌ Vespíritu dꞌay.
Ol yalanel dꞌa scal ebꞌ man̈ israeloc to ol chꞌolbꞌitaj tas yaj ebꞌ dꞌa stojolal.
19 Malaj bꞌaj ol yacꞌ oval.
Malaj bꞌaj ol el yav.
Malaj mach ol abꞌan sjaj dꞌa yol calle.
20 Ay ebꞌ obꞌiltac,
icha junoc teꞌ aj spacchaji,
ma icha junoc candil van stupi,
icha chiꞌ yaj ebꞌ,
palta aꞌ ol colvaj yedꞌ ebꞌ,
man̈ ol ixtaj ebꞌ yuuj.
Icha chiꞌ ol yutoc sbꞌa,
masanto ol vachꞌ och yajalil,
axo yacꞌan yajalil chiꞌ dꞌa stojolal.
21 Axo ebꞌ anima dꞌa junjun chon̈abꞌ,
ol yacꞌoch ebꞌ yipoc scꞌool,
xchi Dios dꞌa Slolonel Tzꞌibꞌabꞌilcani.
Ay ebꞌ aljinac to a vin̈ diablo ayoch yedꞌ Jesús
22 Ay jun vin̈ ix icꞌjibꞌat dꞌa Jesús.
Max ujilaj yilan vin̈,
max yalpaxlaj slolon vin̈,
yujto ixtabꞌil vin̈ yuj jun enemigo.
Axo Jesús ix acꞌan bꞌoxoc scꞌool vin̈.
Yuj chiꞌ ix yilxi vin̈,
ix lolonxi vin̈.
23 Axo ebꞌ anima smasanil ix te sat scꞌool ebꞌ yilani.
Ix laj yalan ebꞌ:
—A jun vin̈ tic,
¿tecan a jun yin̈tilal vin̈aj David vin̈ tan̈vabꞌil sja cuuj?
xchi ebꞌ.
24 Palta ayic ix yabꞌan juntzan̈ chiꞌ ebꞌ vin̈ fariseo,
ix yalan ebꞌ vin̈:
—A jun vin̈ tic,
syalton yicꞌanel ebꞌ enemigo vin̈,
yujto a vin̈ Beelzebú,
yajal ebꞌ enemigo,
a ayoch yedꞌ vin̈,
xchi ebꞌ vin̈.
25 Axo Jesús,
yojtacxo tas van snaan ebꞌ vin̈ chiꞌ,
yuj chiꞌ ix yalan dꞌa ebꞌ vin̈:
—A junoc nación spoj sbꞌa dꞌa yol yicoꞌ,
sjuvieli.
An̈ejtonaꞌ junoc chon̈abꞌ,
ma junoc pat spoj sbꞌa dꞌa yol yicoꞌ,
sjuvipaxeli.
26 An̈ejtonaꞌ,
icha pax chiꞌ vin̈ Satanás,
tato spechel ebꞌ yetenemigoal vin̈,
spojnacxom sbꞌa ebꞌ,
¿tom ol najtilax yopisio vin̈?
27 A ex tic tzeyalaꞌ,
yujto ayoch vin̈ Beelzebú vedꞌoc yuj chiꞌ tzin pechel ebꞌ enemigo chiꞌ.
Tato yel tzeyalaꞌ,
¿mach ayoch yedꞌ ebꞌ e cꞌaybꞌum chiꞌ ayic spechanel ebꞌ enemigo chiꞌ ebꞌ?
An̈ejtonaꞌ ebꞌ e cꞌaybꞌum chiꞌ schꞌoxanel e paltail.
28 Palta yujn̈ej Yespíritu Dios tzin pechel ebꞌ enemigo chiꞌ.
Yuj chiꞌ,
scheclajeli to toxo ix och Dios yacꞌ yajalil dꞌa e cal.
29 Qꞌuinaloc ay junoc vin̈ te ay yip.
Malaj junoc mach syal scomon och dꞌa yol spat vin̈,
syicꞌanbꞌat tastac ay dꞌa vin̈.
An̈ej tato tzꞌacꞌji ganar stzecꞌchajcan vin̈ aj pat chiꞌ,
an̈ej icha chiꞌ,
syal yicꞌjibꞌat tastac ay dꞌa yol spat vin̈ chiꞌ.
30 A ebꞌ man̈ ayococh vedꞌoc,
ajcꞌool ebꞌ dꞌayin.
A ebꞌ max molbꞌancot ebꞌ anima dꞌayin,
a ebꞌ spechan saclem ebꞌ anima chiꞌ.
31 Yuj chiꞌ,
sval dꞌayex,
yalxon̈ej tas smul ebꞌ anima,
yalxon̈ej tas malaj svachꞌil syal ebꞌ,
ol yal yacꞌji lajvoc yuj Dios.
Palta a ebꞌ sbꞌuchvaj dꞌa Yespíritu Dios,
man̈xo ol acꞌjoclaj nivancꞌolal ebꞌ.
32 A ebꞌ tzꞌalan junoc chucal dꞌa in patic a in Acꞌbꞌil in cot yuj Dios voch animail tic,
syal yacꞌji lajvoc smul ebꞌ.
Palta axo ebꞌ sbꞌuchvaj dꞌa spatic Yespíritu Dios,
a smul ebꞌ chiꞌ,
man̈xo ol ecꞌbꞌatlaj,
vachꞌchom ticnaic,
vachꞌchom dꞌa junxo tiempoal toto ol javoc.
33 Naec sicꞌlabꞌil,
tato ay junoc te teꞌ vachꞌ,
vachꞌ sat teꞌ syacꞌaꞌ.
Tato ay junoc te teꞌ chuc,
chuc sat teꞌ syacꞌaꞌ.
Yuj sat teꞌ chiꞌ,
scojtaquejel tas teꞌal teꞌ.
34 A ex tic,
lajan ex icha juntzan̈ nocꞌ chan.
Malaj e vachꞌil.
Yuj chiꞌ,
¿tom ay jabꞌoc tas vachꞌ syal eyalani?
Yujto an̈ej tas ay dꞌa e pensar,
an̈ej chiꞌ tzeyalaꞌ.
35 Tato vachꞌ co pensar,
vachꞌ scutej co bꞌa,
yujto an̈ej tas vachꞌ chiꞌ ay dꞌa co pensar.
Axo ta chuc co pensar,
chuc scutej co bꞌa,
yujto an̈ej chucal sco naꞌa.
36 Yuj chiꞌ,
sval dꞌayex,
ato yic ol ja jun cꞌual yic ol chꞌolbꞌitaj tas eyaji,
jantacn̈ej juntzan̈ lolonel malaj yopisio tzeyalaꞌ,
ol chꞌolbꞌitaj tas eyaj yuuj.
37 Yujto a Dios ol ex chꞌolbꞌitan yuj tas tzeyalaꞌ.
Ol yalaꞌ,
tato malaj e mul yuj tas slaj eyal chiꞌ,
mato ay,
xchi Jesús.
A ebꞌ cꞌanjinac yil junoc milagro
38 Ay juntzan̈ ebꞌ vin̈ cꞌaybꞌum dꞌa ley Moisés yedꞌ juntzan̈ ebꞌ vin̈ fariseo ix alan dꞌa Jesús:
—Ach co cꞌaybꞌumal,
co gana tza chꞌox junoc milagro quilaꞌ,
xchi ebꞌ vin̈ dꞌay.
39 Yuj chiꞌ ix yalan dꞌa ebꞌ vin̈:
—A ex dꞌa jun tiempoal tic,
malaj e vachꞌil,
man̈oc dꞌa Dios tzeyacꞌoch e pensar.
Ton̈ej tze cꞌan eyil junoc milagro,
junoc schꞌoxan spoder Dios.
Palta a junoc milagro ol chꞌoxjoc eyilaꞌ,
aton jun icha schꞌoxnac Dios yedꞌ jun vin̈ schecabꞌ scuchan Jonás.
40 A vin̈aj Jonás chiꞌ,
oxeꞌ cꞌual,
oxeꞌ acꞌval ecꞌnac vin̈ dꞌa yol scꞌool jun nocꞌ nivan chay.
Icha ajnac vin̈aj Jonás chiꞌ,
icha chiꞌ ol in aj pax a in tic,
a in Acꞌbꞌil in cot yuj Dios voch animail tic.
Oxeꞌ cꞌual,
oxeꞌ acꞌval ol in ecꞌ dꞌa yol luum.
41 Ayic ecꞌ yalannaccanel yabꞌixal Dios vin̈aj Jonás dꞌa ebꞌ aj Nínive,
snanac val sbꞌa ebꞌ.
Axo ticnaic,
ayinecꞌ eyedꞌoc,
ecꞌto velcꞌoch dꞌa yichan̈ vin̈aj Jonás chiꞌ,
palta max e nalaj e bꞌa.
Yuj chiꞌ,
ato ol javoc jun cꞌual yic ol chꞌolbꞌitaj tas eyaji,
a ebꞌ aj Nínive chiꞌ,
ol qꞌue vaan ebꞌ,
ol yalan e mul ebꞌ.
42 Icha pax chiꞌ jun ix yajal dꞌa Sur dꞌa pecaꞌ,
te najat cotnac ix,
ul yabꞌannac sjelanil vin̈aj Salomón ix.
Axo ticnaic,
ay in ecꞌ dꞌa tic,
ecꞌto velcꞌoch dꞌa yichan̈ vin̈,
palta max ul e cꞌanbꞌej eyabꞌ dꞌayin.
Yuj chiꞌ,
ato ol javoc jun cꞌual ayic ol chꞌolbꞌitaj tas eyaji,
ol qꞌue vaan ix,
ol yalan e mul ix.
A yabꞌixal jun enemigo scꞌochxi dꞌa yedꞌtal
43 Qꞌuinaloc ay jun enemigo tzꞌel dꞌa junoc anima ticnaic.
Tzꞌecꞌ dꞌa tzꞌinan luum,
sayan bꞌaj syicꞌ yip.
Palta max ilchaj yuuj.
44 Yuj chiꞌ snaani:
Ol in pax dꞌa in pat bꞌaj cotnac in,
xchi.
Axo yic scꞌochxi,
syilan jun anima chiꞌ,
icha junoc pat mesesi yool,
malaj yajal,
vachꞌ yilji.
45 Yuj chiꞌ smeltzajxibꞌat dꞌa spatic,
sbꞌat yicꞌancot ucvan̈ocxo ebꞌ enemigo ecꞌto schucal dꞌa yichan̈.
Svachꞌ och cajan ebꞌ smasanil dꞌa jun anima chiꞌ.
Yuj chiꞌ,
ste juviel jun anima chiꞌ icha dꞌa sbꞌabꞌelal.
Icha jun anima chiꞌ,
icha chiꞌ ol aj svachꞌ juviel e pensar a ex tic,
xchi Jesús dꞌa ebꞌ.
A ix snun Jesús yedꞌ ebꞌ yucꞌtac
46 Vanto yalan Jesús dꞌa ebꞌ anima chiꞌ,
ix cꞌoch ix snun yedꞌ ebꞌ yucꞌtac.
A dꞌa tiꞌ pat ix cꞌoch ebꞌ.
Sgana ebꞌ scꞌumej Jesús chiꞌ.
47 Yuj chiꞌ ay jun vin̈ ix alan dꞌa Jesús:
—Ix ja ix a nun yedꞌ ebꞌ ucꞌtac dꞌa tiꞌ pat.
Sgana ebꞌ slolon edꞌoc,
xchi vin̈ dꞌay.
48 Palta ix yalan Jesús dꞌa vin̈:
—¿Mach ix in nun,
mach ebꞌ vucꞌtac chiꞌ tza naꞌa?
xchi.
49 Ix lajvi chiꞌ,
ix schꞌoxan ebꞌ scꞌaybꞌum dꞌa vin̈.