Ix acꞌji va chan̈eꞌ mil ebꞌ vinac
8
A dꞌa jun tiempoal chiꞌ,
man̈ jantacoc ebꞌ anima ix smolbꞌejcꞌoch sbꞌa dꞌa Jesús,
palta malaj tas sva ebꞌ.
Yuj chiꞌ ix yavtancot ebꞌ scꞌaybꞌum Jesús,
ix yalan dꞌa ebꞌ:
Marcos 8.1-21
2 —A in tic,
tzꞌocꞌ in cꞌool yuj juntzan̈ ebꞌ anima tic,
yujto chabꞌjitax ix javican ebꞌ vedꞌ dꞌa tic,
palta man̈xalaj tas sva ebꞌ.
3 Tato malaj tas sva ebꞌ,
tzin checan pax ebꞌ dꞌa spat,
tecan ol el yip ebꞌ dꞌa yol bꞌe,
yujto ay ebꞌ najat ix coti,
xchi Jesús dꞌa ebꞌ.
4 —Palta,
¿tas ol cutoc cacꞌan va ebꞌ dꞌa jun lugar tic?
xchi ebꞌ scꞌaybꞌum chiꞌ.
5 —¿Jayeꞌ ixim pan eyedꞌnac?
xchi dꞌa ebꞌ.
—Uquen̈ej ixim,
xchi ebꞌ dꞌay.
6 Ix lajvi chiꞌ,
ix yalan Jesús dꞌa ebꞌ anima chiꞌ to tzꞌem cꞌojan ebꞌ dꞌa sat luum.
Ix yicꞌanchaan̈ ixim pan chiꞌ yuquil,
ix yacꞌan yuj diosal dꞌa Dios yuj ixim.
Ix xepanbꞌat ixim pan chiꞌ,
ix yacꞌan ixim dꞌa ebꞌ scꞌaybꞌum.
Axo ebꞌ ix pucanbꞌat ixim dꞌa ebꞌ anima chiꞌ.
7 Ay jayvan̈ yunetac chay yedꞌnac ebꞌ.
Ix yacꞌanpax yuj diosal dꞌa Dios yuj nocꞌ.
Ix lajvi chiꞌ,
ix yalanpax dꞌa ebꞌ to spucbꞌat nocꞌ chay chiꞌ ebꞌ dꞌa ebꞌ anima chiꞌ.
8 Ix va ebꞌ smasanil,
ix bꞌudꞌji ebꞌ.
Ix lajvi sva ebꞌ chiꞌ,
uqueto xuuc bꞌudꞌan ix yacꞌ sobre ix can yuj ebꞌ.
9 Ay am chan̈eoc mil sbꞌisul ebꞌ ix vaꞌi.
Ix lajvi chiꞌ,
ix checji pax ebꞌ yuuj.
10 Ix ochxi dꞌa yol teꞌ barco yedꞌ ebꞌ scꞌaybꞌum chiꞌ.
Ix bꞌat ebꞌ dꞌa yol yic Dalmanuta.
A ebꞌ fariseo ix cꞌanan yil junoc milagro
11 Ay juntzan̈ ebꞌ vin̈ fariseo ix cꞌoch dꞌa Jesús.
Ix och ijan ebꞌ vin̈ stelan sbꞌa yedꞌoc,
yujto sgana ebꞌ vin̈ syacꞌ proval.
Yuj chiꞌ,
ix scꞌanan yil junoc milagro ebꞌ vin̈ scot dꞌa Dios.
12 Axo Jesús ix ja sicꞌson scꞌool.
Ix yalani:
—A ex tic,
¿tas yuj tze cꞌan eyil junoc milagro dꞌayin?
Val yel sval dꞌayex,
malaj junoc milagro ol in chꞌox eyilaꞌ,
xchi Jesús.
13 Ix lajvi chiꞌ,
ix yactancan ebꞌ vin̈ fariseo chiꞌ Jesús,
ix ochxi dꞌa yol teꞌ barco chiꞌ yedꞌ ebꞌ scꞌaybꞌum.
Ix cꞌaxpajecꞌ ebꞌ dꞌa junxo scꞌaxepal aꞌ n̈ajabꞌ chiꞌ.
A juntzan̈ scꞌaybꞌubꞌal ebꞌ fariseo
14 Axo ebꞌ scꞌaybꞌum Jesús,
maj sna ebꞌ yicꞌbꞌat jabꞌoc ixim span.
An̈ej val jun pitan̈ ixim yedꞌnac ebꞌ dꞌa yol teꞌ barco chiꞌ.
15 Ix yalan Jesús dꞌa ebꞌ:
—Abꞌec.
Tzeyil val e bꞌa dꞌa yich span ebꞌ fariseo yedꞌ dꞌa yich span vin̈aj Herodes,
yujto te ay smay tzex juviel yuuj,
xchi dꞌa ebꞌ.
16 Axo ebꞌ scꞌaybꞌum chiꞌ,
ix laj yalan ebꞌ yuj tas ix yalaꞌ:
—Syal icha tic,
yujto malaj ixim co pan quedꞌnac,
xchi ebꞌ.
17 Palta yojtac Jesús tas van yalan ebꞌ.
Yuj chiꞌ,
ix yal dꞌa ebꞌ:
—¿Tas yuj tzeyalaꞌ to malaj ixim e pan?
¿Tom max nachajel eyuuj?
¿Tom man̈ eyojtacoc tas syalelcꞌoch jun tic?
Te max in eyacꞌoch dꞌa e cꞌool.
18 ¿Tom maj eyilaꞌ?
¿Tom maj eyabꞌi?
¿Tom max e nacoti?
19 Ayic ix in pucanecꞌ oyeꞌ ixim pan dꞌa scal oyeꞌ mil vinac,
¿jayeto xuuc ixim ix yacꞌ sobre ix e sicꞌqꞌuei?
xchi dꞌa ebꞌ.
—Lajchaveꞌ xuuc,
xchi ebꞌ.
20 —Axo yic ix in pucanxiecꞌ uqueꞌ ixim pan dꞌa scal chan̈eꞌ mil anima,
¿jayeto xuuc ix bꞌudꞌji,
ix yacꞌ sobre ix e sicꞌqꞌuei?
xchi.
Uqueꞌ xuuc,
xchi ebꞌ.
21 —¿Tas yuj max nachajel jabꞌoc eyuuj jun?
xchi dꞌa ebꞌ.
Ix jacvi sat jun vin̈ yuj Jesús
22 Ix lajvi chiꞌ,
ix cꞌoch ebꞌ dꞌa chon̈abꞌ Betsaida.
Ay jun vin̈ max uji yilani,
ix quetzchajbꞌat vin̈ dꞌa Jesús yuj ebꞌ anima.
Ix tevi ebꞌ dꞌa Jesús chiꞌ to syamji vin̈ yuuj.
Marcos 8.22-38
23 Axo Jesús ix yaman scꞌabꞌ vin̈.
Ix squetzanbꞌat vin̈ dꞌa stiel chon̈abꞌ.
Ix sucanecꞌ jabꞌ stzubꞌ dꞌa yol sat vin̈.
Ix yacꞌanecꞌ scꞌabꞌ dꞌa yibꞌan̈ vin̈.
Ix lajvi chiꞌ ix scꞌanbꞌani tato tzaxo yal yilan vin̈.
24 Yuj chiꞌ,
ix yacꞌlej vin̈ yilani.
Ix yalan vin̈ dꞌa Jesús chiꞌ:
—Tzaxo vil juntzan̈ anima,
an̈ejto lajan ebꞌ yedꞌ te teꞌ svilaꞌ,
palta sbꞌeyecꞌ ebꞌ,
xchi vin̈.
25 Axo Jesús ix sucanxiecꞌ scꞌabꞌ dꞌa yibꞌan̈ sat vin̈.
Ichato chiꞌ,
ix vachꞌ jacvi yol sat vin̈ chiꞌ.
Te vachꞌxo ix aj yilan vin̈.
26 Ix lajvi chiꞌ,
ix checji pax vin̈ dꞌa spat yuuj.
Ix yalan dꞌa vin̈:
—Man̈ ach ecꞌ dꞌa yol chon̈abꞌ.
Ayta mach bꞌaj tzal jun tic,
xchi Jesús dꞌa vin̈.
Yalnac vin̈aj Pedro to a Jesús aton vin̈ Cristo
27 Ix lajvi chiꞌ,
ix ecꞌ Jesús dꞌa juntzan̈ aldea dꞌa yol yic Cesarea yic Filipos yedꞌ ebꞌ scꞌaybꞌum.
Axo yic van sbꞌey ebꞌ,
ix scꞌanbꞌan dꞌa ebꞌ:
—¿Mach in yalan ebꞌ anima tzeyabꞌi?
xchi dꞌa ebꞌ.
28 —Ay ebꞌ tzꞌalani,
tobꞌ a ach tic Juan ach,
vin̈ acꞌannac bautizar.
Ay pax ebꞌ tzꞌalani tobꞌ Elías ach.
Ay pax ebꞌ tzꞌalani tobꞌ schecabꞌ ach Dios ecꞌnac dꞌa pecaꞌ,
xchi ebꞌ scꞌaybꞌum chiꞌ dꞌay.
29 —Xal ex,
¿mach in eyalani?
xchi dꞌa ebꞌ.
Yuj chiꞌ ix tacꞌvi vin̈aj Pedro dꞌay:
—A ach tic,
Cristo ach,
xchi vin̈ dꞌay.
30 Palta ix yalanxi Jesús dꞌa ebꞌ:
—Ayta bꞌaj tzeyalel jun tic,
xchi.
Ayocto ix yalancan Jesús yuj schamel
31 Axo dꞌa jun tiempo chiꞌ,
ix syamoch Jesús scꞌaybꞌan ebꞌ scꞌaybꞌum yuj tastac ol javoc dꞌa yibꞌan̈,
ix yalan icha tic:
—A in Acꞌbꞌil in cot yuj Dios voch animail tic,
yovalil ol vabꞌ syail.
A val ebꞌ ichamtac vinac ay yopisio,
ebꞌ sat sacerdote yedꞌ ebꞌ cꞌaybꞌum dꞌa ley Moisés,
ol in spatiquejcanel ebꞌ.
Ol in smilancham ebꞌ.
Palta axo dꞌa schabꞌjial,
ol in pitzvocxoc,
xchi dꞌa ebꞌ.
32 Tojoln̈ej ix yutej Jesús yalan juntzan̈ chiꞌ dꞌa ebꞌ.
Palta axo vin̈aj Pedro,
ix icꞌanelta Jesús chiꞌ schꞌocoj.
Ix yacꞌlan vin̈ scachanoch vaan yalani.
33 Palta axo Jesús,
ix meltzajbꞌat qꞌuelan dꞌa juntzan̈xo ebꞌ scꞌaybꞌum.
Ix scachanoch vaan vin̈aj Pedro chiꞌ,
ix yalan dꞌa vin̈:
—Ach Satanás,
elan̈ dꞌa in tzꞌey,
yujto man̈oc juntzan̈ yic Dios bꞌaj tzacꞌoch a pensar.
An̈ej juntzan̈ yic anima bꞌaj ayoch a pensar,
xchi dꞌa vin̈.
34 Ix lajvi chiꞌ,
ix yavtancot ebꞌ scꞌaybꞌum yedꞌ ebꞌ anima,
ix yalan dꞌa ebꞌ:
—Tato ay ebꞌ sgana tzꞌoch in cꞌaybꞌumoc,
yovalil man̈xo yicoc sbꞌa ebꞌ schꞌocoj.
Yabꞌocabꞌ syail ebꞌ vuuj,
vachꞌchom dꞌa teꞌ culus.
Tato icha chiꞌ,
ochocabꞌ ebꞌ in cꞌaybꞌumoc.
35 Yujto yaln̈ej mach ebꞌ sgana an̈ej dꞌa yolyibꞌan̈qꞌuinal tic scol sbꞌa,
ol satel sqꞌuinal ebꞌ dꞌa juneln̈ej.
Palta axo ebꞌ ol yacꞌcham sbꞌa vuuj,
yuj pax jun vachꞌ abꞌix yic colnabꞌil tic,
aton ebꞌ ol scha sqꞌuinal dꞌa juneln̈ej.
36 Qꞌuinaloc tato squiquej masanil tas ay dꞌa yolyibꞌan̈qꞌuinal tic,
palta tato tzon̈ satcanel dꞌa juneln̈ej,
¿tas co ganar?
37 ¿Tasto val ol cacꞌ stojoloc yic tzon̈ colchajeli?
38 A val ebꞌ anima dꞌa jun tiempo tic,
man̈oc dꞌa Dios syacꞌoch spensar ebꞌ.
Malaj jabꞌoc svachꞌil ebꞌ.
A mach sqꞌuixvi vuuj dꞌa yichan̈ ebꞌ anima,
sqꞌuixvi pax yuj in lolonel,
an̈ejtonaꞌ,
a in Acꞌbꞌil in cot yuj Dios voch animail tic,
ol in qꞌuixvocpax yuuj,
ayic ol in ja yedꞌ spoder in Mam yedꞌ ebꞌ ángel yicxo yaji.