A ebꞌ cꞌanjinac yil junoc milagro dꞌa Jesús
16
Ay juntzan̈ ebꞌ fariseo yedꞌ ebꞌ saduceo ix cꞌoch dꞌa Jesús,
yujto sgana ebꞌ yacꞌan proval.
Yuj chiꞌ ix scꞌan yil junoc milagro ebꞌ scot dꞌa satchaan̈.
2 Palta ix yalan Jesús dꞌa ebꞌ:
—A ex tic,
ay bꞌaj tzeyal icha tic dꞌa yemcꞌualil:
A qꞌuicꞌan maxtzac yacꞌlaj n̈abꞌ,
yujto van stzꞌa asun,
xe chi.
3 Ay bꞌaj tzeyal pax dꞌa qꞌuin̈ibꞌalil:
A ticnaic musan,
te qꞌuicꞌ asun,
ol yacꞌ n̈abꞌ,
xe chi.
Jelan eyilan juntzan̈ asun,
tzeyalani tato ol yacꞌ n̈abꞌ,
mato maay.
Ay juntzan̈xo yechel schꞌoxan tas yaj jun tiempoal tic,
palta ina max nachajel juntzan̈ chiꞌ eyuuj.
Yuj chiꞌ,
chabꞌ sat ex.
4 A ex tic,
te chuc ex,
man̈oclaj dꞌa Dios tzeyacꞌoch e pensar.
Yuj chiꞌ ton̈ej tze cꞌan eyil junoc milagro scot dꞌa Dios.
Palta an̈ej jun milagro ol acꞌjoc eyilaꞌ,
aton jun icha schꞌoxnac Dios yedꞌ vin̈aj Jonás,
xchi dꞌa ebꞌ.
Ix lajvi chiꞌ,
ix el dꞌa stzꞌey ebꞌ,
ix bꞌati.
A juntzan̈ cꞌaybꞌubꞌal syal ebꞌ fariseo
5 Ix bꞌat Jesús yedꞌ ebꞌ scꞌaybꞌum dꞌa junxo scꞌaxepal aꞌ n̈ajabꞌ.
Axo ebꞌ scꞌaybꞌum chiꞌ,
maj snalaj ebꞌ yicꞌbꞌat ixim pan yic svaꞌa.
6 Ix yalan Jesús dꞌa ebꞌ:
—Abꞌec tas sval tic.
Tzeyil val e bꞌa yuj yich span ebꞌ fariseo yedꞌ yuj yich span ebꞌ saduceo,
xchi dꞌa ebꞌ.
7 Yuj chiꞌ ix yalubꞌtan̈an ebꞌ yuj juntzan̈ ix yal chiꞌ.
—Syal icha chiꞌ,
yujto maj quicꞌcotlaj ixim co pan,
xchi ebꞌ.
8 Axo Jesús yojtacxo tas van yalan ebꞌ.
Yuj chiꞌ ix yalanpax dꞌa ebꞌ:
—¿Tas yuj tzeyalaꞌ to malaj ixim e pan?
Teveln̈ej tzeyacꞌoch Dios dꞌa e cꞌool.
9 ¿Tom an̈ejaꞌ max nachajel eyuuj?
¿Tom max e nacoti ayic vacꞌannac oyeꞌ pan dꞌa oyeꞌ mil vinac,
jayeto xuuc yacꞌnac sobre e molnacxiqꞌuei?
10 Yedꞌ vacꞌannac pax uqueꞌ pan dꞌa chan̈eꞌ mil vinac,
¿tom max e nacoti jayeto xuuc yacꞌnac sobre e molnacxiqꞌuei?
11 Ayic ix valan dꞌayex yuj yich span ebꞌ fariseo yedꞌ yich span ebꞌ saduceo,
¿tas yuj max nachajel eyuuj tas syalelcꞌochi?
A e naani to a ixim pan svalaꞌ,
xchi dꞌa ebꞌ.
12 Ayic ix yalan juntzan̈ chiꞌ Jesús,
ichato chiꞌ ix nachajel yuj ebꞌ to man̈oc yich pan bꞌaj syil sbꞌa ebꞌ,
palta aton dꞌa juntzan̈ cꞌaybꞌubꞌal syal ebꞌ fariseo yedꞌ ebꞌ saduceo.
Yalnac vin̈aj Pedro to a Jesús, aton Cristo
13 Ayic ix cꞌoch Jesús yedꞌ ebꞌ scꞌaybꞌum dꞌa yol yic Cesarea yic Filipo,
ix scꞌanbꞌan dꞌa ebꞌ:
—A in Acꞌbꞌil in cot yuj Dios voch animail tic,
¿mach in am yalan ebꞌ anima tzeyabꞌi?
xchi dꞌa ebꞌ.
14 —Ay ebꞌ tzꞌalani,
tobꞌ a ach tic Juan ach,
vin̈ ix acꞌan bautizar.
Ay pax ebꞌ tzꞌalani tobꞌ Elías ach.
Ay pax ebꞌ tzꞌalani,
tobꞌ Jeremías ach,
mato junocxo schecabꞌ Dios ecꞌnac dꞌa pecaꞌ,
xchi ebꞌ dꞌay.
15 —Xal ex tic,
¿mach in e naani?
xchi dꞌa ebꞌ.
16 Axo vin̈aj Pedro ix tacꞌvi dꞌay,
ix yalan vin̈ icha tic:
—A achton tic,
Cristo ach,
Yuninal ach Dios pitzan,
xchi vin̈ dꞌay.
17 Yuj chiꞌ ix yalanxi Jesús dꞌa vin̈:
—Simón,
yuninal ach vin̈aj Jonás,
te vachꞌ icoꞌ,
yujto a jun ix al tic,
man̈oclaj junoc anima ix acꞌan nachajel uuj,
palta aton in Mam ayecꞌ dꞌa satchaan̈,
a ix acꞌan nachajel uuj.
18 A in sval dꞌayach,
a ach ton Pedro ach.
(Pedro syalelcꞌochi,
qꞌueen.)
A dꞌa yibꞌan̈ jun tenam chiꞌ ol in bꞌo viglesia.
A viglesia chiꞌ,
man̈ ol acꞌjoc ganar ebꞌ yuj spoder chamel.
19 A dꞌayach ol vacꞌ sllaveal yic tzꞌoch ebꞌ anima dꞌa yol scꞌabꞌ Dios aj satchaan̈.
A tas ol alaꞌ to ay yovalil dꞌa yolyibꞌan̈qꞌuinal tic,
ay pax yovalil dꞌa satchaan̈.
An̈ejtonaꞌ a tas ol alaꞌ to malaj yovalil dꞌa yolyibꞌan̈qꞌuinal tic,
malaj pax yovalil dꞌa satchaan̈,
xchi Jesús dꞌa vin̈.
20 Ix lajvi chiꞌ,
ix yalan dꞌa ebꞌ scꞌaybꞌum chiꞌ:
—Ayta bꞌaj tzeyalaꞌ to a in tic Cristo in,
xchi dꞌa ebꞌ.
Ayocto yalancan Jesús yuj schamel
21 A dꞌa jun tiempoal chiꞌ,
ix och ijan Jesús yalan dꞌa ebꞌ scꞌaybꞌum tas ol ja dꞌa yibꞌan̈.
Ix yalani:
—Yovalil ol in bꞌat dꞌa Jerusalén.
Ataꞌ ol acꞌjococh dꞌa vibꞌan̈ yuj ebꞌ ichamtac vinac ay yopisio,
ebꞌ sat sacerdote yedꞌ ebꞌ cꞌaybꞌum dꞌa ley Moisés.
Ol in smilcham ebꞌ,
palta axo dꞌa schabꞌjial,
ol in pitzvocxi,
xchi dꞌa ebꞌ.
22 Palta axo vin̈aj Pedro ix icꞌanelta Jesús chiꞌ schꞌocoj,
yic syacꞌlan vin̈ scachani.
—Mamin,
man̈ ichoctaꞌ sgana Dios.
A juntzan̈ ix al chiꞌ,
man̈ ol jalaj dꞌa ibꞌan̈,
xchi vin̈ dꞌay.
23 Palta ix och val qꞌuelan Jesús dꞌa vin̈,
ix yalani:
—Elan̈ dꞌa in stzꞌey ach Satanás,
yujto a gana tzacꞌ somchajel in pensar.
Man̈oclaj juntzan̈ tas yic Dios bꞌaj tzacꞌoch a pensar.
An̈ej juntzan̈ yic anima tza naꞌa,
xchi dꞌa vin̈.
24 Ix lajvi chiꞌ,
ix yalanpax dꞌa ebꞌ scꞌaybꞌum:
—Tato ay mach sgana tzꞌoch in cꞌaybꞌumoc,
yovalil man̈xo yicoc sbꞌa schꞌocoj.
Sbꞌecocabꞌ sbꞌa yabꞌan syail vuuj,
taxon̈ej scham dꞌa teꞌ culus.
Tato icha chiꞌ,
ochocabꞌ tzacꞌan vuuj.
25 Yujto a ebꞌ sgana scol sbꞌa dꞌa yolyibꞌan̈qꞌuinal tic,
ol satel sqꞌuinal ebꞌ dꞌa juneln̈ej.
Axo ebꞌ sbꞌec sbꞌa scham vuuj,
aton ebꞌ chiꞌ ol scha sqꞌuinal dꞌa juneln̈ej.
26 Qꞌuinaloc tato squiquej masanil tas ay dꞌa yolyibꞌan̈qꞌuinal tic,
palta tato tzon̈ satcanel dꞌa juneln̈ej,
¿tas co ganar?
¿Tasto val ol cacꞌ stojoloc yic tzon̈ colchajeli?
27 Yujto a in Acꞌbꞌil in cot yuj Dios voch animail tic,
a yedꞌ spoder in Mam ol in ja yedꞌ ebꞌ vángel.
Axo vacꞌan spac chiꞌ dꞌa junjun anima,
icha tastac ix scꞌulej ebꞌ.
28 Val yel sval dꞌayex,
ay juntzan̈ ex ayex ecꞌ dꞌa tic,
manto ex chamlaj,
olto eyil in javi,
ol in och Yajalil,
xchi dꞌa ebꞌ scꞌaybꞌum chiꞌ.