Qꞌuexmajnac yilji Jesús
17
Obꞌxitax chiꞌ,
axo Jesús ix icꞌanbꞌat vin̈aj Pedro,
vin̈aj Jacobo yedꞌ vin̈ yucꞌtac vin̈ scuchan Juan.
Schꞌocojil ebꞌ ix bꞌat yedꞌoc dꞌa jun nivan tzalan.
2 Ataꞌ ix qꞌuexmaj yilji Jesús dꞌa yichan̈ ebꞌ.
Veei ix aj sat icha yoc cꞌu,
axo spichul,
te sac ix aj icha saquilqꞌuinal.
La transfiguración (Mateo 17.1-13)
3 Axo dꞌa jun rato chiꞌ,
ix ul schꞌox sbꞌa vin̈aj Moisés yedꞌ vin̈aj Elías.
Ix lolon ebꞌ yedꞌ Jesús.
4 Yuj chiꞌ ix yalan vin̈aj Pedro dꞌa Jesús chiꞌ:
—Mamin,
te vachꞌ cajecꞌ dꞌa tic.
Tato a gana,
sco bꞌo oxeoc lechpat,
jun icoꞌ,
jun yic vin̈aj Moisés yedꞌ jun yic vin̈aj Elías,
xchi vin̈.
5 Van to yalan vin̈aj Pedro chiꞌ,
ix cꞌoch jun asun.
Ix em moyan dꞌa yibꞌan̈ ebꞌ.
Toxon̈ej veei yilji.
Ix lajvi chiꞌ,
ix abꞌchaj jun lolonel dꞌa scal asun chiꞌ,
ix yalani:
—Aton jun tic Vuninal,
te xajanabꞌil vuuj.
Tzin tzalaj val yedꞌoc.
Aqꞌuecoch e chiquin dꞌa tas syalaꞌ,
xchi.
6 Ayic ix yabꞌan jun chiꞌ ebꞌ scꞌaybꞌum,
ix em lachaljoc ebꞌ.
Ix te xivbꞌat ebꞌ.
7 Yuj chiꞌ ix cꞌoch Jesús dꞌa stzꞌey ebꞌ.
Ix maslaj ebꞌ yuuj.
—Qꞌuean̈ec vaan.
Man̈ ex xivoc,
xchi dꞌa ebꞌ.
8 Axo ix yilan ebꞌ,
man̈xalaj mach ayeqꞌui.
Axon̈ej Jesús ayeqꞌui.
9 Ayic van yemxita ebꞌ dꞌa jun tzalan chiꞌ,
ix yalan Jesús dꞌa ebꞌ:
—Ayta bꞌaj tzeyalelta jun ix eyil chiꞌ.
A in Acꞌbꞌil in cot yuj Dios voch animail tic,
ato yic ol in pitzvocxi dꞌa scal ebꞌ chamnac,
ato taꞌ ol eyaleli,
xchi dꞌa ebꞌ.
10 Ix lajvi chiꞌ,
ix scꞌanbꞌan ebꞌ scꞌaybꞌum chiꞌ dꞌay:
—A ebꞌ cꞌaybꞌum dꞌa ley Moisés,
syal ebꞌ:
A vin̈aj Elías,
yovalil ol bꞌabꞌlaj javoc,
xchi ebꞌ.
¿Tas am yuj syal ebꞌ icha chiꞌ?
xchi ebꞌ dꞌa Jesús.
11 Ix yalanxi dꞌa ebꞌ:
—Yel ton syal ebꞌ,
yovalil ol javoc vin̈aj Elías chiꞌ,
yic sna sbꞌa ebꞌ anima.
12 Palta sval dꞌayex ulnacxoecꞌ vin̈.
Palta max nachajel yuj ebꞌ tato a vin̈.
Yuj chiꞌ,
yutejnac vin̈ ebꞌ icha val sgana.
Icha pax chiꞌ ol aj vabꞌan syail yuj ebꞌ a in Acꞌbꞌil in cot yuj Dios voch animail tic,
xchi Jesús dꞌa ebꞌ scꞌaybꞌum chiꞌ.
13 Icha chiꞌ ix aj snachajel yuj ebꞌ to aton vin̈aj Juan,
vin̈ acꞌannac bautizar,
ix yal Jesús.
Bꞌoxinac scꞌool jun unin ayoch jun enemigo dꞌay
14 Axo ix cꞌochxi ebꞌ bꞌaj ay jun n̈ilan̈ anima.
Ix cꞌoch jun vin̈ dꞌa Jesús,
ix em cuman vin̈ dꞌa yichan̈,
ix yalan vin̈ dꞌay:
15 —Mamin,
¿ma max ocꞌ a cꞌool dꞌa jun vuninal?
Scot numnaj dꞌa sjolom.
Te ya yaj yuuj.
Tzijtum elxo sbꞌat dꞌa yol cꞌacꞌ yedꞌ dꞌa yol a aꞌ yuuj.
16 Ix vicꞌcot dꞌa ebꞌ a cꞌaybꞌum tic,
palta maj bꞌolaj scꞌool yuj ebꞌ,
xchi vin̈ dꞌa Jesús.
17 Yuj chiꞌ ix yalan Jesús chiꞌ:
—A ex tic,
max eyacꞌoch Dios dꞌa e cꞌool,
te pit ex.
Inai,
ayxo tiempo ay in ecꞌ eyedꞌoc.
¿Bꞌaqꞌuin̈to val ol nachajel eyuuj?
Svabꞌ val syail eyuuj.
Ixiquec bꞌat iqꞌueccot vin̈ unin chiꞌ,
xchi.
18 Axo ix cꞌoch vin̈ unin chiꞌ dꞌa Jesús,
ix stuman jun enemigo ayoch chiꞌ dꞌa vin̈.
Yuj chiꞌ ix el jun enemigo chiꞌ dꞌa vin̈.
Dꞌa jun rato chiꞌ,
ix bꞌoxican scꞌool vin̈ yuuj.
19 Axo yic ix can Jesús schꞌocoj yedꞌ ebꞌ scꞌaybꞌum,
ix scꞌanbꞌan ebꞌ dꞌay:
—¿Tas am yuj maj el jun enemigo chiꞌ cuuj?
xchi ebꞌ dꞌay.
20-21 —Maj el-laj yujto max eyacꞌ val och Dios dꞌa e cꞌool.
Val yel sval dꞌayex,
tato tzeyacꞌoch Dios chiꞌ dꞌa e cꞌool,
vachꞌchom jabꞌn̈ej,
icha junoc pitan̈ sat an̈ mostaza,
ol yal eyalan icha tic dꞌa jun vitz tic:
Elan̈ dꞌa edꞌtal tic,
ixic dꞌa junocxo lugar,
xe chi.
Tato icha chiꞌ,
ol el eyuuj.
Masanil tas ol yal eyuuj tato yel tzeyacꞌoch Dios dꞌa e cꞌool,
xchi dꞌa ebꞌ.
Ayocto ix yalancan Jesús yuj schamel
22 Ayic molanxoecꞌ Jesús yedꞌ ebꞌ scꞌaybꞌum dꞌa yol yic Galilea,
ix yalan dꞌa ebꞌ:
—A in Acꞌbꞌil in cot yuj Dios voch animail tic,
ol in acꞌjococh dꞌa yol scꞌabꞌ ebꞌ anima.
23 Ol in smilancham ebꞌ.
Axo dꞌa schabꞌjial,
ol in pitzvocxoc,
xchi dꞌa ebꞌ.
Ayic ix yabꞌan juntzan̈ chiꞌ ebꞌ,
ix te cus ebꞌ.
A jun tumin stecjiel yuj stemplo Dios
24 Ayic ix cꞌoch ebꞌ dꞌa Capernaum,
a ebꞌ tecumel tumin yuj stemplo Dios xidꞌ alan dꞌa vin̈aj Pedro:
—A vin̈ e Cꞌaybꞌumal tic,
¿tzam yacꞌ qꞌuen tumin vin̈ stecjiel yic stemplo Dios?
xchi ebꞌ vin̈.
25 —Syacꞌ qꞌuen vin̈,
xchi vin̈ dꞌa ebꞌ.
Axo yic ix cꞌochxi vin̈aj Pedro dꞌa yol pat,
a Jesús ix bꞌabꞌlaj alan dꞌa vin̈:
—Simón,
¿tas tza naꞌa?
A juntzan̈ tumin stecjiel yuj ebꞌ rey,
¿mach am tzꞌacꞌani?
¿Am ebꞌ yuninal ebꞌ tzꞌacꞌani,
mato a ebꞌ anima?
xchi dꞌa vin̈.
26 —A ebꞌ anima,
xchi vin̈.
Yuj chiꞌ,
ix yalanxi Jesús dꞌa vin̈:
—Tato icha chiꞌ,
a ebꞌ uninabꞌil,
man̈ yovaliloc syacꞌ ebꞌ.
27 Palta malaj co gana somchaj scꞌool ebꞌ.
Yuj chiꞌ,
ixic dꞌa stiꞌ aꞌ n̈ajabꞌ.
Bꞌat aqꞌuem qꞌuen anzuelo dꞌa yol aꞌ.
A jun nocꞌ bꞌabꞌel chay syamchaj uuj,
tzicꞌqꞌueta nocꞌ.
Axo dꞌa yol stiꞌ nocꞌ ol ilchaj jun tumin uuj.
Cꞌocbꞌil ol yabꞌ jun tumin stecjiel chiꞌ dꞌayon̈.
Yuj chiꞌ tzicꞌcot jun tumin chiꞌ,
bꞌat acꞌan dꞌa ebꞌ tecumel tumin chiꞌ cuuj co chavan̈il,
xchi dꞌa vin̈.