¿Mach am junoc más nivan yelcꞌochi?
18
A dꞌa jun tiempoal chiꞌ,
ix cꞌoch ebꞌ scꞌaybꞌum Jesús dꞌay.
Ix scꞌanbꞌan ebꞌ:
—¿Mach am junoc más nivan yelcꞌoch dꞌa yol scꞌabꞌ Dios aj satchaan̈?
xchi ebꞌ dꞌay.
—Val yel sval dꞌayex,
tato max e qꞌuex e pensar,
tato man̈ lajanoc tzꞌaj e pensar icha ebꞌ unin,
max yal eyoch dꞌa yol scꞌabꞌ Dios aj satchaan̈.
4 Yuj chiꞌ,
a ebꞌ te emnaquil syutej sbꞌa icha jun unin tic,
an̈ej ebꞌ te nivan yelcꞌoch taꞌ.
5 A mach schaan junoc anima lajan icha jun unin tic,
yujto vic jun anima chiꞌ,
a in tzin schaꞌa.
6 Palta tato ay mach tzꞌacꞌan somchaj spensar junoc anima tzin acꞌanoch dꞌa scꞌool,
aton junoc icha spensar ebꞌ unin tic,
chuc yic jun chiꞌ.
Octom bꞌabꞌel spixjioch junoc nivan qꞌuen dꞌa sjaj,
syumjicanbꞌat dꞌa yol aꞌ mar yic sjicꞌvichamoc,
yacbꞌan manto yacꞌ somchaj spensar jun anima chiꞌ.
Tato icha chiꞌ,
más vachꞌ yicoꞌ.
7 Obꞌiltac ebꞌ anima yuj juntzan̈ tas tzꞌacꞌan somchajel spensar.
Masanil tiempo ay juntzan̈ chiꞌ,
palta a val ebꞌ tzꞌacꞌan somchajel spensar ebꞌ yetanimail,
te chuc yic ebꞌ.
8 Tato a junoc e cꞌabꞌ,
ma junoc eyoc tzex icꞌanbꞌat dꞌa chucal,
más vachꞌ tze tzepeli,
tzeyumaneli,
yujto vachꞌchom man̈ ex tzꞌacanoc,
tato ol e cha e qꞌuinal dꞌa juneln̈ej,
te vachꞌ eyicoꞌ.
Palta vachꞌchom tzꞌacan e cꞌabꞌ yedꞌ eyoc,
tato ol ex bꞌatcan dꞌa scal jun cꞌacꞌ malaj bꞌaqꞌuin̈ stupi,
te chuc eyicoꞌ.
9 Tato a junoc yol e sat tzex icꞌanbꞌat dꞌa chucal,
más vachꞌ tzeyiqꞌuelta,
tzeyumaneli.
Yujto vachꞌchom junn̈ej yol e sat,
tato ol e cha e qꞌuinal dꞌa juneln̈ej,
te vachꞌ eyicoꞌ.
Palta vachꞌchom tzꞌacan yol e sat,
tato ol ex bꞌatcan dꞌa scal cꞌacꞌ dꞌa infierno,
te chuc eyicoꞌ.
A yabꞌixal junoc nocꞌ calnel satnac
10-11 Man̈ e patiquejel ebꞌ unin tic.
Sval dꞌayex to a ebꞌ ángel stan̈van junjun ebꞌ,
masanil tiempo ayecꞌ ebꞌ yedꞌ co Mam Dios dꞌa satchaan̈.
12 Qꞌuinaloc ay junoc mach ay junoc ciento scalnel.
Tato satbꞌat junoc,
syactancan nocꞌ 99 bꞌaj ayecꞌ chiꞌ,
sbꞌat sayan nocꞌ satcan chiꞌ.
13 Tato tzꞌilchaj nocꞌ yuuj,
ste tzalaj yuj nocꞌ.
Axo nocꞌ 99 ayecꞌ chiꞌ,
ichato max tzalaj yuj nocꞌ.
14 Icha pax chiꞌ co Mam ay dꞌa satchaan̈.
Malaj sgana ay junoc dꞌa scal ebꞌ unin tic sateli.
Yovalil scacꞌ nivancꞌolal dꞌa junocxo anima
(Lc 17.3)
15 Tato ay junoc ucꞌtac tzꞌoch smul dꞌayach,
bꞌat al dꞌay schꞌocoj to ix och smul dꞌayach.
Tato scha yabꞌ dꞌayach,
tzacꞌ ganar a montan jun ucꞌtac chiꞌ.
16 Palta tato max scha yabꞌ dꞌayach,
tzicꞌbꞌat jun chavan̈ocxo mach,
bꞌat yalan ebꞌ dꞌay.
Ayocabꞌ chavan̈ oxvan̈oc testigo,
yic vachꞌ ay yip masanil tas tzꞌalji,
icha syal dꞌa Slolonel Dios Tzꞌibꞌabꞌilcani.
17 Palta tato an̈ejaꞌ max scha yabꞌi,
tzal dꞌa iglesia.
Tato an̈ejaꞌ max scha yabꞌ pax dꞌa ebꞌ,
canocabꞌ ichn̈ej taꞌ.
Icha junoc comon anima dꞌa chꞌoc chon̈abꞌil,
ma junoc tecumel tumin,
ichocabꞌ taꞌ tzꞌajcan dꞌa ichan̈.
18 Val yel sval dꞌayex,
a tas ol eyalaꞌ to ay yovalil dꞌa yolyibꞌan̈qꞌuinal tic,
a jun chiꞌ ay pax yovalil dꞌa satchaan̈.
An̈ejtonaꞌ,
a tas ol eyalaꞌ to malaj yovalil dꞌa yolyibꞌan̈qꞌuinal tic,
a jun chiꞌ malaj pax yovalil dꞌa satchaan̈.
19 Svalan pax dꞌayex,
tato ay chavan̈oc ex lajann̈ej e naan tas ol e cꞌanaꞌ,
axo co Mam Dios ayecꞌ dꞌa satchaan̈ ol acꞌan dꞌayex,
20 yujto a bꞌaj ay chavan̈ oxvan̈oc anima smolbꞌej sbꞌa,
yic syalan sbꞌa ebꞌ dꞌayin,
ayinecꞌ yedꞌ ebꞌ,
xchi Jesús.
21 Axo vin̈aj Pedro ix cꞌoch dꞌa stzꞌey,
ix yalan vin̈ dꞌay:
—Mamin,
tato ay junoc vucꞌtac tzijtum el tzꞌoch smul dꞌayin,
¿jayel svacꞌ nivancꞌolal dꞌay?
¿Yovalil am svacꞌ nivancꞌolal uqueloc?
xchi vin̈.
22 —Sval dꞌayach,
man̈ uquelocn̈ej tzacꞌ nivancꞌolal.
Vachꞌchom 500 el* tzꞌoch smul dꞌayach,
yovalil an̈ejaꞌ tzacꞌn̈ej nivancꞌolal,
xchi Jesús.
A yabꞌixal jun vin̈ max acꞌan nivancꞌolal
23 Ol val dꞌayex chajtil ol aj ebꞌ ayxo och dꞌa yol scꞌabꞌ Dios aj satchaan̈.
Lajan icha junoc vin̈ rey sbꞌo yaj scuenta yedꞌ ebꞌ tzꞌacꞌan servil.
24 Ayic ix och ijan sbꞌoan yaj juntzan̈ scuenta vin̈ chiꞌ,
ix icꞌjicot jun vin̈ tzꞌacꞌan servil,
man̈xo bꞌischajbꞌenoc* jantac sbꞌoc vin̈ dꞌa vin̈ rey chiꞌ.
25 Palta a jun vin̈ chiꞌ,
malaj stumin vin̈.
Yuj chiꞌ ix yal vin̈ rey chiꞌ to yovalil schon̈jiel vin̈* yedꞌ ix yetbꞌeyum,
ebꞌ yuninal yedꞌ jantacn̈ej tas ay dꞌa vin̈,
talaj stupchajel sbꞌoc vin̈ chiꞌ.
26 Axo vin̈ tzꞌacꞌan servil chiꞌ,
ix em cuman vin̈ dꞌa yichan̈ vin̈ rey chiꞌ.
Ix tevioch vin̈ dꞌa vin̈:
Mamin,
acꞌ in nivancꞌolal.
Jabꞌjabꞌil ol in tup in bꞌoc chiꞌ smasanil dꞌayach,
xchi vin̈.
27 Yuj chiꞌ,
ix yil scꞌol vin̈ rey chiꞌ dꞌa vin̈.
Ix acꞌjican lajvoc sbꞌoc vin̈ smasanil.
Ix el vin̈ dꞌa libre.
28 Axo yic ix el vin̈ dꞌa libre chiꞌ,
ix ilchajel jun vin̈ yetmunlajvumal vin̈ yuuj,
ay jabꞌ sbꞌoc vin̈ dꞌa vin̈.*
Yuj chiꞌ ix och bꞌinbꞌin vin̈ dꞌa sjaj vin̈,
ix yalan vin̈:
Acꞌcot a bꞌoc chiꞌ dꞌayin val ticnaic,
xchi vin̈.
29 Palta ix em cumnaj jun vin̈ ay sbꞌoc chiꞌ dꞌa yichan̈ vin̈.
Ix tevi vin̈ dꞌa vin̈:
Acꞌ in nivancꞌolal.
Jabꞌjabꞌil ol in tup in bꞌoc chiꞌ dꞌayach smasanil,
xchi vin̈.
30 Palta maj yal scꞌool vin̈ ix yacꞌ nivancꞌolal vin̈.
Yuj chiꞌ,
ix icꞌjibꞌat vin̈ dꞌa preso yuj vin̈,
masanto ix stup sbꞌoc vin̈ chiꞌ dꞌa vin̈.
31 Axo ix yilan juntzan̈xo ebꞌ vin̈ yetmunlajvumal vin̈ chiꞌ tas ix scꞌulej vin̈,
ix te och ebꞌ vin̈ ilcꞌolal yilani.
Yuj chiꞌ ix bꞌat yal ebꞌ vin̈ dꞌa vin̈ rey chiꞌ,
tas ix scꞌulej vin̈.
32 Axo vin̈ rey chiꞌ,
ix checan avtajcot vin̈.
Ix yalan vin̈:
Ach in checabꞌ,
puch vinac ach.
Inai,
ix vacꞌ lajvoc a bꞌoc chiꞌ smasanil,
yujto ix al a bꞌa dꞌayin.
33 Octom val ix il a cꞌol dꞌa vin̈ etbꞌeyum chiꞌ,
icha ix ocꞌ in cꞌool dꞌayach,
xchi vin̈.
34 Yuj chiꞌ,
ix te cot yoval vin̈ rey chiꞌ.
Ix acꞌjioch vin̈ dꞌa preso yuj vin̈.
Ix yalan vin̈ to tzꞌacꞌjioch yaelal dꞌa yibꞌan̈ vin̈ masanto stup sbꞌoc vin̈ chiꞌ.
35 Yuj chiꞌ,
a ex tic,
tato max eyacꞌ nivancꞌolal dꞌa ebꞌ eyucꞌtac eyanabꞌ dꞌa smasanil e cꞌool,
icha chiꞌ ol ex yutocxi co Mam Dios ay dꞌa satchaan̈,
xchi Jesús dꞌa ebꞌ.