Yalnac Jesús yuj ebꞌ spuc sbꞌa
19
Ix lajvi yalan juntzan̈ chiꞌ Jesús,
ix elxi dꞌa Galilea bꞌaj ayecꞌ chiꞌ.
Ix cꞌoch dꞌa yol yic Judea dꞌa scꞌaxepalecꞌ aꞌ nivan Jordán.
2 Tzijtum ebꞌ anima ix och tzacꞌan yuuj.
Ix acꞌji bꞌoxoc scꞌool ebꞌ penaay taꞌ yuuj.
3 Ay juntzan̈ ebꞌ fariseo ix cꞌoch dꞌay.
Sgana ebꞌ yacꞌan proval.
Yuj chiꞌ ix scꞌanbꞌan ebꞌ:
—¿Ay am sleyal spuc sbꞌa junoc vin̈ vinac yedꞌ ix yetbꞌeyum yaln̈ej tas yuuj?
xchi ebꞌ.
4 Yuj chiꞌ,
ix yalan dꞌa ebꞌ:
—¿Tom manta bꞌaj tzeyil dꞌa Slolonel Dios Tzꞌibꞌabꞌilcani,
atax yic sbꞌoannac yolyibꞌan̈qꞌuinal tic Dios,
bꞌobꞌil vin̈ vinac yedꞌ ix ix?
5 Yalnaccani:
Yuj chiꞌ,
a vin̈ vinac,
yovalil syactejcan smam snun vin̈,
yic junxon̈ej tzꞌajcan vin̈ yedꞌ ix yetbꞌeyum.
Axo ebꞌ schavan̈il,
ichato junxon̈ej nivanil tzꞌaj ebꞌ,
xchi Dios.
6 Yel man̈xo chavan̈oc ebꞌ,
junxon̈ej yaj ebꞌ.
Yuj chiꞌ,
a ebꞌ junxon̈ej yajcan yuj Dios,
max yal-laj yacꞌanoch sbꞌa anima yic spucan sbꞌa ebꞌ,
xchi Jesús dꞌa ebꞌ.
7 Ix yalanxi ebꞌ dꞌay:
—¿Palta tas yuj yalnaccan vin̈aj Moisés to a vin̈ vinac syal yacꞌan yumal yic pucojbꞌail vin̈ dꞌa ix yetbꞌeyum,
slajvi chiꞌ schecan pax ix vin̈?
xchi ebꞌ dꞌay.
8 —Yuj e pital,
yuj chiꞌ yalnaccan vin̈aj Moisés to syal e pucan e bꞌa yedꞌ ix eyetbꞌeyum chiꞌ.
Palta atax sbꞌoannac yolyibꞌan̈qꞌuinal tic Dios,
man̈ ichoctaꞌ yajcan yuuj.
9 Yuj chiꞌ,
sval dꞌayex,
a mach spuc sbꞌa yedꞌ ix yetbꞌeyum,
syicꞌan junocxo ix,
tzꞌem vin̈ ajmulal.
An̈ej tato tzꞌem ix dꞌa mul yedꞌ junocxo vinac,
syal spucan sbꞌa vin̈ yedꞌ ix,
xchi dꞌa ebꞌ.
10 Axo ebꞌ scꞌaybꞌum ix alan dꞌay:
—Tato icha chiꞌ,
más am vachꞌ max cacꞌoch ix quetbꞌeyum,
xchi ebꞌ.
11 Yuj chiꞌ ix yalan dꞌa ebꞌ:
—Palta man̈ masaniloc anima stechaj yuj jun tzeyal chiꞌ.
An̈ej ebꞌ tzꞌoch Dios yedꞌoc,
an̈ej ebꞌ stechaj yuuj.
12 Ay juntzan̈ ebꞌ,
atax dꞌa yaljubꞌal aytaxon palta yaj ebꞌ.
Yuj chiꞌ max yal yoch yetbꞌeyum ebꞌ.
Ay pax ebꞌ toto sjuvi yuj ebꞌ yetanimail.
Yuj chiꞌ max yal yoch yetbꞌeyum ebꞌ.
Ay pax ebꞌ max yacꞌochtaxon yetbꞌeyum,
yujto axon̈ej Yajalil ebꞌ ay dꞌa satchaan̈ sgana syacꞌ servil.
A ebꞌ tzꞌacꞌan techaj jun tic,
techajocabꞌ yuj ebꞌ,
xchi Jesús dꞌa ebꞌ.
A ebꞌ unin ix icꞌjibꞌat dꞌa Jesús
13 Ix lajvi chiꞌ,
ay juntzan̈ ebꞌ unin ix yicꞌbꞌat ebꞌ anima dꞌa Jesús,
yic syaqꞌuecꞌ scꞌabꞌ dꞌa sjolom ebꞌ,
slesalvi yuj ebꞌ.
Palta axo ebꞌ scꞌaybꞌum ix cachanoch vaan ebꞌ.
14 Palta ix yalan dꞌa ebꞌ scꞌaybꞌum chiꞌ:
—Chaeccot ebꞌ unin dꞌayin.
Man̈ e cach ebꞌ sja dꞌayin.
Yujto an̈ej ebꞌ lajan spensar icha ebꞌ unin tic,
an̈ej ebꞌ ol yal yoch dꞌa yol scꞌabꞌ Dios aj satchaan̈,
xchi dꞌa ebꞌ.
15 Ichato chiꞌ,
ix yacꞌanecꞌ scꞌabꞌ dꞌa sjolom ebꞌ.
Ix lajvi chiꞌ,
ix el dꞌa jun lugar chiꞌ.
A jun vin̈ quelem bꞌeyum ix lolon yedꞌ Jesús
16 A junel,
ay jun vin̈ quelem ix cꞌoch dꞌa Jesús.
Ix yalan vin̈ dꞌay:
—Ach in vachꞌ Cꞌaybꞌumal,
tzin cꞌanbꞌej dꞌayach,
¿tas vachꞌ tzin cꞌulej yic vachꞌ ol in cha in qꞌuinal dꞌa juneln̈ej?
xchi vin̈ dꞌay.
17 —¿Tas yuj tzin al vachꞌil?
Junn̈ej mach vachꞌ,
aton Dios,
malaj junocxo.
Tato a gana tza cha a qꞌuinal,
cꞌanabꞌajej juntzan̈ checnabꞌil tic,
xchi Jesús dꞌa vin̈.
18 —¿Tastac juntzan̈ checnabꞌil tzin cꞌanabꞌajej chiꞌ?
xchi vin̈ dꞌay.
—Man̈ e milcham eyetanimail.
Man̈ ex em ajmulal.
Man̈ ex elcꞌanoc.
Man̈ e naqꞌue lolonel dꞌa spatic ebꞌ eyetanimail.
19 Ayocabꞌ yelcꞌoch e mam e nun dꞌa e sat.
Ichaocabꞌ eyaꞌilan e bꞌa,
ichaocabꞌ chiꞌ e xajanan ebꞌ ay dꞌa spatic schiquin e pat.
20 —Atax in cotoch uninal,
tzin cꞌanabꞌajej juntzan̈ checnabꞌil tic smasanil.
Yuj chiꞌ ¿tasto val in paltail?
xchi vin̈.
21 —Tato a gana man̈xa jabꞌoc a paltail,
ixic,
bꞌat chon̈canel smasanil tastac ay dꞌayach.
Tzacꞌan stojol dꞌa ebꞌ mebꞌaꞌ,
yuj chiꞌ ol a cha a bꞌeyumal dꞌa satchaan̈.
Ichato chiꞌ bꞌian,
tzach jaxi,
axo och chiꞌ in cꞌaybꞌumoc,
xchi Jesús dꞌa vin̈.
22 Ayic ix yabꞌan juntzan̈ chiꞌ vin̈,
cuscꞌolalxo ix pax vin̈,
yujto man̈ jantacoc tas ay dꞌa vin̈.
23 Ix lajvi chiꞌ,
ix yalanxi Jesús dꞌa ebꞌ scꞌaybꞌum:
—Val yel sval dꞌayex,
a ebꞌ bꞌeyum,
tato ol och ebꞌ dꞌa yol scꞌabꞌ Dios aj satchaan̈,
te pural ol och ebꞌ.
24 Svalan dꞌayex:
Qꞌuinaloc ay junoc nocꞌ camello,
¿tom ol yal yecꞌ nocꞌ dꞌa yixal junoc qꞌuen acxa?
Icha chiꞌ yaj ebꞌ bꞌeyum.
Yelxo val pural ol och ebꞌ dꞌa yol scꞌabꞌ Dios,
xchi dꞌa ebꞌ.
25 Ayic ix yabꞌan jun chiꞌ ebꞌ scꞌaybꞌum,
ix te sat scꞌool ebꞌ.
Ix laj yalan ebꞌ:
—Tato icha chiꞌ,
¿mach ebꞌ ol colchaj jun?
xchi ebꞌ.
26 Yuj chiꞌ,
ix och qꞌuelan Jesús dꞌa ebꞌ,
ix yalani:
—A jun tic malaj junoc anima syal yuuj.
Palta an̈ej Dios syal yuuj.
Yujto masanil tas syaln̈ej yuuj,
xchi dꞌa ebꞌ.
27 Axo vin̈aj Pedro ix alan dꞌay:
—Mamin,
a on̈ tic,
ix cactejcan masanil tas ay dꞌayon̈,
on̈ och a cꞌaybꞌumoc.
Yuj chiꞌ,
¿tas am spac ol co chaꞌa?
xchi vin̈.
28 —Val yel sval dꞌayex,
ato yic ol acꞌbꞌocxi masanil tastac,
ato taꞌ ol e cha spac eyicoꞌ.
A in Acꞌbꞌil in cot yuj Dios voch animail tic,
ol in em cꞌojan dꞌa in cꞌojnubꞌ,
bꞌaj ol checlajel in poder.
A exxo ix ex och in cꞌaybꞌumoc tic,
ol ex em cꞌojan e lajchavan̈il dꞌa junjun e cꞌojnubꞌ.
Ol e chꞌolbꞌitan yaj ebꞌ quetisraelal slajchavil macan̈.
29 A mach syactejcan spat vuuj,
mato yucꞌtac,
yanabꞌ,
mato smam snun,
ma yuninal,
mato sluum syactejcan vuuj,
a jun chiꞌ,
te nivan spac ol schaꞌa.
An̈ejtonaꞌ ol schaan sqꞌuinal dꞌa juneln̈ej.
30 Ay ebꞌ anima nivan yelcꞌoch dꞌa co cal ticnaic.
Palta a ebꞌ chiꞌ,
tzijtum ebꞌ malaj jabꞌoc ol aj yelcꞌoch dꞌa jun tiempoal chiꞌ.
An̈ejtonaꞌ,
ay ebꞌ malaj jabꞌoc yelcꞌoch dꞌa co cal ticnaic,
palta a dꞌa scal ebꞌ chiꞌ,
ay ebꞌ nivan ol aj yelcꞌoch dꞌa jun tiempoal chiꞌ,
xchi Jesús dꞌa ebꞌ.