Ix chamnac yetbꞌeyum yedꞌ vin̈ juez
18
Ay jun abꞌix ix yal Jesús dꞌa ebꞌ scꞌaybꞌum,
yic snachajel yuj ebꞌ to max yal stzactzaj ebꞌ yacꞌan lesal dꞌa masanil tiempo.
Lucas 18.1-17
—A junel ay jun vin̈ juez dꞌa jun chon̈abꞌ.
Malaj yelcꞌoch Dios dꞌa sat vin̈.
Malaj pax yelcꞌoch ebꞌ anima dꞌa vin̈.
3 A dꞌa jun chon̈abꞌ chiꞌ,
ay jun ix chamnac yetbꞌeyum.
Junjun cꞌu bꞌat scꞌan ix dꞌa vin̈ juez chiꞌ to sbꞌo yaj yoval ix.
4 Te nivanxo tiempo tzꞌeqꞌui,
malaj sgana vin̈ juez chiꞌ sbꞌoan yaj dꞌa ix.
Palta yibꞌan̈taquilto ix snaan vin̈:
Vachꞌchom max in cꞌanabꞌajej Dios,
malaj pax tzꞌoch ebꞌ anima dꞌayin,
5 palta a jun ix tic,
ol in bꞌo yaj yoval ix,
yujto junjun cꞌu tzul avaj ochta ix dꞌayin.
Tato maay,
man̈xo ol techajlaj ix vuuj,
xchi vin̈.
6 Icha chiꞌ ix yutej vin̈ juez chuc chiꞌ snaani.
7 Axo pax Dios,
¿tom man̈ ol sbꞌo yaj dꞌa ebꞌ sicꞌbꞌilel yuuj,
ebꞌ tzꞌavtan dꞌa cꞌual dꞌacꞌval?
¿Tom ol ecꞌ tiempo scolvaj dꞌa ebꞌ tze naꞌa?
8 Sval dꞌayex,
ol sbꞌo yaj dꞌa ebꞌ dꞌa elan̈chamel.
Palta a in Acꞌbꞌil in cot yuj Dios voch animail tic,
ayic ol in jaxoc,
¿ay am ebꞌ aytoecꞌ dꞌa yolyibꞌan̈qꞌuinal tic,
an̈ejaꞌ ayoch Dios dꞌa scꞌool?
xchi Jesús Cajal.
Vin̈ fariseo yedꞌ vin̈ tecumel alcabar
9 Ix yalanxi junxo abꞌix tic Jesús dꞌa juntzan̈ ebꞌ vachꞌ spensar snaani.
A dꞌa sat ebꞌ chiꞌ,
malaj svachꞌil juntzan̈xo ebꞌ anima.
Yuj chiꞌ,
icha tic ix aj yalan dꞌa ebꞌ:
10 —Ay chavan̈ ebꞌ vin̈ vinac ix bꞌat lesal dꞌa yamaqꞌuil stemplo Dios.
Ay jun vin̈ fariseo,
ay pax jun vin̈ tecumel alcabar.
11 Ayic ix cꞌoch vin̈ fariseo chiꞌ,
ix qꞌue lin̈an vin̈.
Ix lesalvi vin̈ icha tic:
Ach in Diosal,
svacꞌ yuj diosal dꞌayach,
yujto man̈ in lajanoc yedꞌ juntzan̈xo ebꞌ anima.
A ebꞌ chiꞌ,
elcꞌum ebꞌ,
man̈ vachꞌoc syutej sbꞌa ebꞌ,
tzꞌem ebꞌ dꞌa ajmulal.
Yedꞌ pax jun vin̈ tecumel alcabar tic,
svacꞌ yuj diosal dꞌayach yujto man̈ in lajanoc yedꞌ vin̈.
12 Yujto a in tic,
chael tzin och dꞌa tzecꞌojcꞌolal dꞌa junjun semana.
An̈ejtonaꞌ svacꞌ sdiezmoal dꞌayach yuj jantac tas svacꞌ ganar,
xchi vin̈.
13 Axo pax vin̈ tecumel alcabar chiꞌ,
najatto ix cotcan lin̈an vin̈,
yujto xiv vin̈,
man̈ jabꞌoc ix qꞌue qꞌuelan vin̈ dꞌa satchaan̈.
Ix smacꞌ sn̈iꞌ scꞌol vin̈,
ix yalan vin̈ icha tic:
Ach in Diosal,
ocꞌoc val a cꞌool dꞌayin,
te chuc in,
xchi vin̈ dꞌa Dios.
14 A in tic svalaꞌ to ayic ix pax vin̈ tecumel alcabar chiꞌ,
vachꞌxo vin̈ dꞌa yichan̈ Dios.
Axo pax vin̈ fariseo chiꞌ,
man̈ vachꞌoc vin̈ dꞌa yichan̈ Dios,
yujto a ebꞌ syicꞌchaan̈ sbꞌa,
ol icꞌjocxiemta ebꞌ.
Axo ebꞌ syiqꞌuemta sbꞌa,
nivan ol aj yelcꞌoch ebꞌ,
xchi Jesús.
Schꞌoxnac svachꞌcꞌolal Jesús dꞌa ebꞌ unin
15 Ay ebꞌ mamabꞌil ix icꞌancot ebꞌ yuninal dꞌa Jesús yic syaqꞌuecꞌ scꞌabꞌ dꞌa yibꞌan̈ ebꞌ.
Ayic ix yilan ebꞌ scꞌaybꞌum to icha chiꞌ,
ix cot yoval ebꞌ dꞌa ebꞌ ix icꞌancot ebꞌ chiꞌ,
ix cachji ebꞌ yuj ebꞌ.
16 Axo Jesús ix avtancot ebꞌ scꞌaybꞌum chiꞌ,
ix yalan dꞌa ebꞌ:
—Chaeccot ebꞌ unin dꞌayin.
Man̈ e cachoch vaan ebꞌ,
yujto an̈ej ebꞌ lajan spensar icha ebꞌ unin tic,
an̈ej ebꞌ ay yalan yic yoch dꞌa yol scꞌabꞌ Dios.
17 Val yel sval dꞌayex,
a ebꞌ max chaan Dios Yajaloc icha syutej ebꞌ unin schaani,
malaj bꞌaqꞌuin̈ ol och ebꞌ dꞌa yol scꞌabꞌ,
xchi Jesús.
A jun vin̈ bꞌeyum ix lolon yedꞌ Jesús
18 Ay jun vin̈ yajal dꞌa scal ebꞌ ix cꞌanbꞌan dꞌa Jesús:
—Ach vachꞌ cꞌaybꞌum,
¿tas vachꞌ tzin cꞌulej yic tzin chaan in qꞌuinal dꞌa juneln̈ej?
xchi vin̈.
Lucas 18.18-43
19 —¿Tas yuj tzin al vachꞌil?
Malaj junoc mach vachꞌ,
an̈ejton Dios vachꞌ.
20 A ach tic,
ojtac schecnabꞌil Dios syal icha tic:
Man̈ ex em dꞌa ajmulal.
Man̈ e milcham junoc eyetanimail.
Man̈ ex elcꞌanoc.
Man̈ eyacꞌoch es dꞌa yibꞌan̈ junoc eyetanimail.
Cꞌanabꞌajejec e mam e nun,
xchi Jesús dꞌa vin̈.
21 —Yictax unin in,
ix in cꞌanabꞌajej masanil juntzan̈ checnabꞌil tic,
xchi vin̈ dꞌay.
22 —Palta ayto junxo a paltail.
Ixic,
chon̈canel masanil tastac ay dꞌayach,
tzacꞌan stojol dꞌa ebꞌ mebꞌaꞌ,
ichato chiꞌ ol aj a bꞌeyumal dꞌa satchaan̈.
Slajvi chiꞌ,
tzach jaxi,
tzach och in cꞌaybꞌumoc,
xchi Jesús dꞌa vin̈.
23 Axo ix yabꞌan juntzan̈ chiꞌ vin̈,
ix te cus vin̈,
yujto te bꞌeyum vin̈.
24 Axo ix yilan Jesús to ix te och vin̈ ilcꞌolal,
ix yalani:
—Ay val smay man̈ ol ochlaj ebꞌ bꞌeyum dꞌa yol scꞌabꞌ Dios.
25 Qꞌuinaloc ay junoc nocꞌ camello,
¿tom ol yal yecꞌ nocꞌ dꞌa yixal junoc qꞌuen acxa?
Icha chiꞌ yaj ebꞌ bꞌeyum.
Tato ol och ebꞌ,
pural ol och ebꞌ dꞌa yol scꞌabꞌ Dios,
xchi Jesús dꞌa ebꞌ.
26 Axo ebꞌ ix abꞌan jun chiꞌ ix yalan ebꞌ:
—A...
tato icha chiꞌ jun,
¿mach pax ebꞌ ol colchajoc?
xchi ebꞌ.
27 —A tas max yal-laj yuj ebꞌ anima,
axo Dios masanil syal yuuj,
xchi Jesús dꞌa ebꞌ.
28 Axo vin̈aj Pedro ix alan dꞌay:
—Mamin,
a on̈ tic ix cactejcan juntzan̈ tastac yic tzon̈ och a cꞌaybꞌumoc,
xchi vin̈.
29 Yuj chiꞌ ix yalan Jesús dꞌa ebꞌ:
—Val yel sval dꞌayex,
a ebꞌ syactejcan spat,
ma smam snun,
yucꞌtac,
yanabꞌ,
ix yetbꞌeyum,
yuninal yedꞌ yisil yujto axon̈ej Dios sgana ebꞌ syacꞌ servil,
30 nivan spac ol scha ebꞌ dꞌa jun tiempoal tic,
axo dꞌa junxo tiempoal ol javoc,
ol scha sqꞌuinal ebꞌ dꞌa juneln̈ej,
xchi Jesús dꞌa ebꞌ.
Ayocto ix yalancan Jesús yuj schamel
31 A Jesús ix avtancot ebꞌ lajchavan̈ chiꞌ schꞌocojil,
ix yalan dꞌa ebꞌ:
—A ticnaic van co bꞌat dꞌa Jerusalén.
Ataꞌ ol ujoc elcꞌoch jantacn̈ej tas tzꞌibꞌabꞌilcan yuj ebꞌ schecabꞌ Dios dꞌa pecaꞌ yic yalannaccan vabꞌixal ebꞌ,
a in Acꞌbꞌil in cot yuj Dios voch animail tic.
32 Ataꞌ ol in acꞌjococh dꞌa yol scꞌabꞌ ebꞌ chꞌoc chon̈abꞌil.
Ol in sbꞌuch ebꞌ.
Ol laj yal chuc ebꞌ dꞌayin.
Ol in stzubꞌej ebꞌ.
33 Ol in smacꞌ ebꞌ.
Slajvi chiꞌ,
ol in smilancham ebꞌ.
Axo dꞌa schabꞌjial,
ol in pitzvocxi,
xchi Jesús dꞌa ebꞌ.
34 Palta maj nachajel-laj jabꞌoc yuj ebꞌ.
Man̈ yojtacoclaj ebꞌ tas van yalan chiꞌ,
yujto max nachajel-laj yuj ebꞌ.
Bꞌoxinac yol sat vin̈ aj Jericó yuj Jesús
35 Ayic vanxo scꞌoch Jesús dꞌa chon̈abꞌ Jericó,
ay jun vin̈ max uji yilani,
cꞌojan ecꞌ vin̈ dꞌa tiꞌ bꞌe,
van scꞌanan stumin vin̈.
36 Ix yabꞌan vin̈ to tzijtum anima van yecꞌ dꞌa yol bꞌe chiꞌ,
yuj chiꞌ ix scꞌanbꞌan yabꞌ vin̈ tas van yuji.
37 Ix yalan ebꞌ dꞌa vin̈ to a Jesús aj Nazaret van yecꞌ dꞌa yol bꞌe chiꞌ.
38 Yuj chiꞌ,
ix avajqꞌue vin̈,
ix yalan vin̈:
—Jesús,
yin̈til ach can vin̈aj David,
ocꞌoc val a cꞌol dꞌayin,
xchi vin̈.
39 A ebꞌ bꞌabꞌel sbꞌat chiꞌ ix cachan vin̈ yic tzꞌem numan vin̈.
Palta masn̈ej ix avajqꞌue vin̈:
—Ach yin̈tilalcan vin̈aj David,
ocꞌoc val a cꞌol dꞌayin,
xchi vin̈.
40 Yuj chiꞌ,
ix och tecꞌnaj Jesús chiꞌ,
ix schecan icꞌjoccot vin̈.
Axo yic ix ja vin̈ dꞌa slacꞌanil,
ix scꞌanbꞌan dꞌa vin̈:
41 —¿Tas a gana tzach vutej?
xchi dꞌa vin̈.
—Mamin,
in gana sbꞌoxican vilani,
xchi vin̈.
42 —Bꞌoocabꞌxican ilani.
Tzach bꞌoxicani yujto in acꞌoch dꞌa a cꞌool,
xchi Jesús dꞌa vin̈.
43 Dꞌa jun rato chiꞌ,
ix bꞌoxican yilan vin̈,
ix och tzacꞌan vin̈ yuj Jesús.
Ix yalan vachꞌ lolonel vin̈ dꞌa Dios.
An̈ejtonaꞌ,
a jantac ebꞌ ix ilan jun chiꞌ,
ix yal pax vachꞌ lolonel ebꞌ dꞌa Dios.