A yabꞌixal vin̈aj Zaqueo
19
Ix cꞌoch Jesús dꞌa Jericó,
ix ecꞌ dꞌa yol chon̈abꞌ chiꞌ.
Lucas 19.1-27
2 Ataꞌ ay jun vin̈ bꞌeyum scuchan Zaqueo.
Yajal yaj vin̈ dꞌa ebꞌ tecumel alcabar dꞌa jun chon̈abꞌ chiꞌ.
3 Sgana vin̈ yilani chajtil yilji Jesús.
Palta max yal-laj yilan vin̈,
yujto tzijtum anima oyanoch dꞌa spatic Jesús chiꞌ ayic van sbꞌeyi,
yujto tzapan pax steel vin̈.
4 Ix bꞌabꞌlajbꞌat lemnaj vin̈,
ix qꞌue vin̈ dꞌa scꞌabꞌ jun te teꞌ ayecꞌ dꞌa tiꞌ bꞌe,
yic syil vin̈ yecꞌ Jesús chiꞌ.
5 Axo yic ix ecꞌ Jesús chiꞌ taꞌ,
ix qꞌue qꞌuelnaj dꞌa vin̈,
ix yalan dꞌa vin̈:
—Zaqueo,
eman̈cot elan̈chamel,
yujto a ticnaic a dꞌa a pat ol vacꞌ in posado,
xchi dꞌa vin̈.
6 Ayic ix yabꞌan vin̈ icha chiꞌ,
elan̈chamel ix emta vin̈.
Axo ix cꞌoch Jesús chiꞌ dꞌa spat vin̈,
ix scha vin̈ dꞌa tzalajcꞌolal.
7 Axo masanil ebꞌ anima,
man̈ jantacoc ix yal ebꞌ dꞌa spatic Jesús,
yujto ix cꞌoch yacꞌ sposado dꞌa spat jun vin̈ chuc sbꞌeybꞌal chiꞌ.
8 Axo vin̈aj Zaqueo chiꞌ ix qꞌue lin̈an,
ix yalan vin̈ dꞌa Jesús Cajal:
—A ticnaic Mamin,
a jantac tas ay dꞌayin,
chapoj ol vutoc.
Ol vacꞌ junoc macan̈ dꞌa ebꞌ mebꞌaꞌ.
Tato ay mach ix laj vixtej,
ix velqꞌuej,
chan̈el ol vacꞌpax sqꞌuexul dꞌa ebꞌ,
xchi vin̈.
9 Yuj chiꞌ ix yalan Jesús chiꞌ:
—A ticnaic,
ix cha scolnabꞌil vin̈ aj pat tic,
yujto val yel yin̈tilalpaxcan Abraham vin̈.
10 A in Acꞌbꞌil in cot yuj Dios voch animail tic,
in javi in say ebꞌ satnac yic tzin colanel ebꞌ,
xchi Jesús chiꞌ.
A yabꞌixal lajun̈eꞌ qꞌuen tumin
11 Yacbꞌan van yabꞌan ebꞌ anima tas ix yal Jesús chiꞌ,
ay jun abꞌix ix yal dꞌa ebꞌ,
yujto van scꞌoch ebꞌ dꞌa slacꞌanil Jerusalén.
A snaan ebꞌ to toxo ol vachꞌ och Dios Yajalil dꞌa yolyibꞌan̈qꞌuinal tic.
12 Icha tic ix yutej yalan dꞌa ebꞌ:
—A junel ay jun vin̈ vinac yin̈tilcan ebꞌ nivac yelcꞌochi.
Ix bꞌat vin̈ dꞌa jun chon̈abꞌ te najat,
yic tzꞌacꞌjioch vin̈ reyal dꞌa schon̈abꞌ.
13 Ayic manto bꞌat vin̈,
ix yavtancot lajun̈van̈ ebꞌ schecabꞌ vin̈.
Ix yacꞌan juntzan̈ qꞌuen tumin vin̈ dꞌa ebꞌ.
Nivac sat qꞌueen.
Jun lajan qꞌuen ix scha junjun ebꞌ.
Ix yalan vin̈ dꞌa ebꞌ:
Aqꞌuec e negocio yedꞌ qꞌuen tumin tic,
masanto ol in jaxoc,
ichato chiꞌ ol eyacꞌanxi qꞌuen dꞌayin,
xchi vin̈ dꞌa ebꞌ.
Ix bꞌat vin̈ bꞌian.
14 Axo ebꞌ yetchon̈abꞌ vin̈,
ix te chichon scꞌool ebꞌ dꞌa vin̈.
Ix schecanbꞌat jayvan̈ vinac ebꞌ dꞌa spatic vin̈,
yic syalan ebꞌ:
A jun vin̈ tic,
malaj co gana tzꞌoch vin̈ reyal dꞌa co chon̈abꞌ tic,
xchi ebꞌ.
15 Vachꞌchom icha chiꞌ ix yal ebꞌ,
ix ochn̈ej vin̈ dꞌa yopisio chiꞌ.
Axo yic ix jax vin̈,
ix laj yavtancot ebꞌ schecabꞌ vin̈ chiꞌ,
machtac ebꞌ bꞌaj yacꞌnaccan qꞌuen tumin chiꞌ vin̈,
yic syabꞌ vin̈ jantacxo yuneꞌ qꞌuen ix yacꞌ ganar junjun ebꞌ.
16 Ix bꞌabꞌlaj cꞌoch jun dꞌa vin̈,
ix yalani:
Mamin patrón,
a qꞌuen tumin acꞌnaccan dꞌayin,
lajun̈exo yuneꞌ qꞌuen ix yacꞌ ganar,
xchi dꞌa vin̈.
17 Axo ix yalan vin̈ yajal chiꞌ:
Vachꞌ jun.
A ach tic,
te vachꞌ ach dꞌayin.
Vachꞌchom quenn̈ej ix vacꞌ dꞌayach,
palta vachꞌ ix utej a bꞌa yedꞌoc.
Yuj chiꞌ,
svacꞌoch opisio och yajalil dꞌa lajun̈eoc chon̈abꞌ,
xchi vin̈ dꞌay.
18 Ix lajvi chiꞌ,
ix cꞌoch junxo schecabꞌ vin̈ chiꞌ.
Mamin patrón,
a qꞌuen a tumin acꞌnaccan dꞌayin,
oyexo yuneꞌ qꞌueen ix yacꞌ ganar,
xchi.
19 Yuj chiꞌ ix yalanxi vin̈:
Vachꞌ jun.
Yuj chiꞌ ol ach vacꞌoch yajalil dꞌa oyeꞌ chon̈abꞌ,
xchi vin̈.
20 Ix lajvi chiꞌ,
ix cꞌoch junxo schecabꞌ vin̈ chiꞌ,
ix yalan dꞌa vin̈:
Patrón,
ina qꞌuen a tumin tic.
Sicꞌbꞌilbꞌat qꞌuen vuuj dꞌa yol jun in payuꞌ.
21 A in tic tzin xivi,
yujto vojtac ach to junn̈ej bꞌelan̈ ach,
yujto a ach tic,
toxon̈ej tza cha iquej tas syacꞌ ganar junxo anima.
Toxon̈ej tza jachꞌaꞌ,
palta malaj tas tzavej,
xchi dꞌa vin̈.
22 Yuj chiꞌ ix yalan vin̈ yajal chiꞌ:
A ach tic vachꞌchom in checabꞌ ach,
palta te chuc ach.
Yuj juntzan̈ tzal tic,
svacꞌcanbꞌat dꞌa ibꞌan̈.
Yujto a ach val tzalaꞌ to junn̈ej bꞌelan̈ in.
Toxon̈ej tzin cha viquej tas syacꞌ ganar junxo anima.
Toxon̈ej tzin jachꞌaꞌ,
palta malaj tas svavej.
23 Tato icha chiꞌ tzutej a naan dꞌa vibꞌan̈,
¿tas yuj maj acꞌbꞌat qꞌuen majanil dꞌa junocxo,
axo tzin jax tic tzin chaanxi qꞌuen yedꞌ yuneꞌ?
xchi vin̈ dꞌay.
24 Ix lajvi chiꞌ ix yalan dꞌa ebꞌ ayecꞌ yedꞌ chiꞌ:
Iqꞌuec ecꞌ qꞌuen dꞌa vin̈,
tzeyacꞌan qꞌuen dꞌa vin̈ ix acꞌan ganar lajun̈eꞌ yuneꞌ yicoꞌ,
xchi vin̈ dꞌa ebꞌ.
25 Axo ix yalan ebꞌ:
Palta mamin patrón,
lajun̈exo qꞌuen ay dꞌa vin̈,
xchi ebꞌ.
26 Palta sval dꞌayex,
a mach ayxo yicoꞌ,
ol vachꞌ acꞌjoc nan̈alocxo dꞌay.
Axo ebꞌ malaj yicoꞌ,
ol vachꞌ icꞌjoquecꞌ tas ay dꞌa ebꞌ.
27 Yedꞌ pax ebꞌ vajcꞌool,
ebꞌ malaj sgana tzin och yajalil,
iqꞌueccot ebꞌ.
Mileccham ebꞌ dꞌa vichan̈ tic,
xchi vin̈ yajal chiꞌ,
xchi Jesús.
Ix cꞌoch Jesús dꞌa Jerusalén
28 Ix lajvi yalan jun abꞌix chiꞌ Jesús,
ix schaan pax sbꞌe,
ix bꞌabꞌlaj yuj ebꞌ scꞌaybꞌum yic sqꞌue ebꞌ dꞌa Jerusalén.
Lucas 19.28-48
29 Ayic van scꞌoch Jesús chiꞌ yedꞌ ebꞌ dꞌa slacꞌanil Betfagé yedꞌ Betania,
dꞌa yichan̈bꞌat tzalan Olivo dꞌa slacꞌanil Jerusalén,
ix schecanbꞌat chavan̈ ebꞌ scꞌaybꞌum.
30 Ayic manto bꞌat ebꞌ,
ix yalan dꞌa ebꞌ:
—Ixiquec dꞌa jun chon̈abꞌ dꞌa quichan̈bꞌat tic.
Ataꞌ ol eyil jun nocꞌ bꞌuru,
etzanoch nocꞌ.
Mantalaj mach sqꞌue dꞌa yibꞌan̈ nocꞌ.
Tze tijancot nocꞌ.
31 Tato ay mach tzꞌalan dꞌayex:
¿Tas yuj tze tijelta nocꞌ?
ta xchi ebꞌ,
tzeyalan dꞌa ebꞌ:
A Cajalil ay tzꞌoch nocꞌ yuuj,
xe chi,
xchi Jesús chiꞌ dꞌa ebꞌ vin̈.
32 Ix lajvi chiꞌ,
ix bꞌat ebꞌ scꞌaybꞌum chiꞌ.
Icha ix yutej yalan Jesús chiꞌ dꞌa ebꞌ,
icha chiꞌ ix aj yilchaj nocꞌ bꞌuru chiꞌ yuj ebꞌ.
33 Axo yic van stijanelta nocꞌ ebꞌ,
ix cꞌoch ebꞌ aj bꞌuru chiꞌ,
ix yalan ebꞌ:
—¿Tas yuj tze tijelta nocꞌ?
xchi ebꞌ.
34 —To ay ol och nocꞌ yuj Cajalil,
xchi ebꞌ.
35 Ix lajvi chiꞌ,
ix yicꞌanbꞌat nocꞌ ebꞌ dꞌa Jesús chiꞌ.
Ix yacꞌanoch spichul ebꞌ stzꞌamoc nocꞌ,
ix yacꞌanqꞌue Jesús chiꞌ ebꞌ dꞌa yibꞌan̈ nocꞌ.
36 Axo yic van sbꞌeyi,
ay ebꞌ ix laj lichꞌanem spichul dꞌa yol bꞌe* dꞌa yichan̈ bꞌaj sbꞌeybꞌat chiꞌ.
37 Axo yic van scꞌoch ebꞌ dꞌa jun bꞌe spichlaj em dꞌa tzalan Olivo,
a jantac ebꞌ scꞌaybꞌum,
ix laj och ijan ebꞌ yavajqꞌue yuj tzalajcꞌolal.
Ix laj yalan vachꞌ lolonel ebꞌ dꞌa Dios yuj juntzan̈ milagro ix yil ebꞌ.
38 Ix laj yalan ebꞌ icha tic:
—Calec vachꞌ lolonel dꞌa co reyal checbꞌilcot yuj Dios Cajal.
Te ay juncꞌolal dꞌa satchaan̈,
te nivan yelcꞌoch co Diosal taꞌ,
xchi ebꞌ.
39 Ay juntzan̈ ebꞌ vin̈ fariseo ayecꞌ dꞌa scal ebꞌ anima chiꞌ ix alan dꞌa Jesús chiꞌ:
—Ach Cꞌaybꞌum,
¿tas yuj max a cach ebꞌ a cꞌaybꞌum tic?
xchi ebꞌ vin̈.
40 Yuj chiꞌ ix yalan Jesús dꞌa ebꞌ vin̈:
—Sval dꞌayex tato tzꞌem numan ebꞌ,
axo juntzan̈ qꞌuen qꞌueen tic ol avajqꞌueoc,
xchi dꞌa ebꞌ.
41 Axo yic van scꞌoch Jesús dꞌa Jerusalén,
ix yilanbꞌat jun chon̈abꞌ chiꞌ,
ix ocꞌ yuuj.
42 Ix yalani:
—Ex aj Jerusalén,
octom val snachajel eyuuj dꞌa jun cꞌu tic chajtil tzꞌaj e chaan sjuncꞌolal Dios,
palta a ticnaic,
maxtzac yal-laj snachajel eyuuj,
yujto toxo ix cꞌubꞌchajel dꞌayex.
43 Yuj chiꞌ ay jun tiempoal ol ja dꞌa eyibꞌan̈,
a ebꞌ eyajcꞌool,
ol och oyan ebꞌ dꞌa spatic yichan̈ e chon̈abꞌ tic.
Ol laj yoyan sbꞌa ebꞌ dꞌa e patic,
ol yacꞌan oval ebꞌ eyedꞌoc.
44 Ol laj smaqꞌuem vecnaj jun chon̈abꞌ tic ebꞌ dꞌa sat luum.
Ol smilancham ebꞌ anima chiꞌ ebꞌ.
Axo qꞌuen qꞌueen latzꞌbꞌilqꞌuei,
man̈xa junoc qꞌuen ol can dꞌa yibꞌan̈ qꞌuen yetqꞌuenal chiꞌ.
A jun tic ol ja dꞌa eyibꞌan̈ yujto a dꞌa jun tiempoal tic ix ja Dios dꞌayex,
palta max nachajel eyuuj,
xchi Jesús.
A ebꞌ pechbꞌilelta dꞌa yol stemplo Dios
45 Ix lajvi chiꞌ ix cꞌoch Jesús dꞌa yol yamaqꞌuil stemplo Dios.
Ix spechanelta ebꞌ schon̈vaji yedꞌ ebꞌ smanvaji.
46 Ix yalan dꞌa ebꞌ:
—Tzꞌibꞌabꞌilcan dꞌa Slolonel Dios icha tic:
A in pat,
yicn̈ej lesal yaji,
xchi.
A exxo tic,
icha junoc qꞌuen n̈aqꞌueen bꞌaj scꞌubꞌejel sbꞌa ebꞌ elcꞌum,
icha chiꞌ tzeyutej,
xchi dꞌa ebꞌ.
47 Junjun cꞌu ix cꞌoch Jesús chiꞌ scꞌaybꞌej anima dꞌa yamaqꞌuil stemplo Dios chiꞌ.
Axo ebꞌ vin̈ sacerdote,
ebꞌ vin̈ cꞌaybꞌum dꞌa ley Moisés yedꞌ ebꞌ vin̈ yajalil jun chon̈abꞌ chiꞌ,
ix say ebꞌ vin̈ tas syutej ebꞌ vin̈ smilanchamoc.
48 Palta maj yal-laj yuj ebꞌ vin̈,
yujto ayoch dꞌa scꞌool ebꞌ anima smaclan yabꞌ dꞌay.