Ix cꞌoch Jesús dꞌa Jerusalén
11
Ayic van scꞌoch Jesús yedꞌ ebꞌ scꞌaybꞌum dꞌa slacꞌanil Betfagé yedꞌ Betania,
dꞌa yichan̈bꞌat tzalan Olivo dꞌa slacꞌanil Jerusalén,
ix schecanbꞌat chavan̈ ebꞌ scꞌaybꞌum,
Marcos 11.1-14
—Ixiquec dꞌa jun chon̈abꞌ dꞌa quichan̈bꞌat tic.
Ayic ol ex cꞌoch taꞌ,
ol eyilan jun nocꞌ quelem bꞌuru etzanochi.
A jun nocꞌ chiꞌ mantalaj mach sqꞌue juneloc dꞌa yibꞌan̈ nocꞌ.
Tze tijelta nocꞌ,
tzeyicꞌancot nocꞌ.
3 Tato ay ebꞌ tzꞌalan icha tic dꞌayex:
¿Tas yuj tze tijelta nocꞌ?
ta xchi ebꞌ,
tzeyalan dꞌa ebꞌ:
Yujto ay tzꞌoch nocꞌ yuj jun Cajalil,
ol ul cacꞌxican nocꞌ dꞌa jun rato,
xe chi,
xchi Jesús dꞌa ebꞌ.
4 Yuj chiꞌ ix bꞌat ebꞌ,
ix yilan nocꞌ quelem bꞌuru chiꞌ ebꞌ.
Etzanoch nocꞌ dꞌa stiꞌ jun pat dꞌa yol bꞌe.
Ix stijanelta nocꞌ ebꞌ.
5 Palta ay juntzan̈ ebꞌ ayecꞌ taꞌ ix cꞌanbꞌan dꞌa ebꞌ:
—¿Tas tze cꞌulej tic?
¿Tas yuj tze tijelta nocꞌ bꞌuru tic?
xchi ebꞌ.
6 Ix yalan ebꞌ icha ix yutej Jesús yalani.
Yuj chiꞌ ix acꞌji nocꞌ dꞌa ebꞌ.
7 Ix yicꞌanbꞌat nocꞌ ebꞌ dꞌa Jesús.
Ix yacꞌanqꞌue juntzan̈ spichul ebꞌ stzꞌaamoc nocꞌ.
Ix lajvi chiꞌ,
ix qꞌue Jesús dꞌa yibꞌan̈ nocꞌ.
8 Ayic van sbꞌey yedꞌ nocꞌ,
tzijtum ebꞌ anima ix laj lichꞌanem spichul dꞌa yol bꞌe bꞌaj van sbꞌeybꞌat chiꞌ.*
Ay pax juntzan̈xo ebꞌ ix xicanelta te cꞌabꞌtac teꞌ ay xiil.
Ix laj yacꞌanem teꞌ ebꞌ dꞌa yol bꞌe chiꞌ.
9 Axo ebꞌ bꞌabꞌel yedꞌ ebꞌ tzacꞌan,
ix laj avajqꞌue ebꞌ:
—Yuj val dios.
Calequel vachꞌ lolonel dꞌa jun Acꞌbꞌilcot yuj Dios Cajal.
10 Calec vachꞌ lolonel dꞌa jun ol och Cajaloc tic,
icha yutejnac co mam quicham David yoch yajalil dꞌa pecaꞌ.
Caqꞌuec yuj diosal dꞌa Dios,
xchi ebꞌ.
11 Axo ix cꞌoch Jesús dꞌa Jerusalén,
ix och dꞌa yol yamaqꞌuil stemplo Dios,
ix ecꞌ qꞌueleloc yilan smasanil juntzan̈ tas ayecꞌ taꞌ.
Palta yujto vanxo yem cꞌu,
yuj chiꞌ ix bꞌat dꞌa chon̈abꞌ Betania yedꞌ ebꞌ scꞌaybꞌum slajchavan̈il.
A tas ix yal Jesús dꞌa teꞌ higo
12 Axo yic ix qꞌuin̈ibꞌi dꞌa junxo cꞌu,
ix elxi ebꞌ dꞌa Betania chiꞌ,
axo Jesús ix och svejel dꞌa yol bꞌe.
13 Najatto ix yilbꞌat jun teꞌ higo,
te ay xil teꞌ.
Ix bꞌat yilanbꞌati,
talaj ay junoc sat teꞌ tzꞌilchaj yuuj.
Palta axo ix cꞌoch dꞌa teꞌ,
an̈ej xil teꞌ ay,
yujto man̈ stiempoaloc satan teꞌ.
14 Yuj chiꞌ ix yalan dꞌa teꞌ:
—Man̈xa junoc mach ol loan a sat,
xchi dꞌa teꞌ.
Ix yabꞌ ebꞌ scꞌaybꞌum yalan jun chiꞌ.
Ebꞌ pechbꞌilelta dꞌa yol yamaqꞌuil stemplo Dios
15 Ix lajvi chiꞌ,
ix cꞌochxi ebꞌ dꞌa Jerusalén.
Ix och Jesús dꞌa yol yamaqꞌuil stemplo Dios.
Ix och ijan spechanelta ebꞌ schon̈vaj taꞌ yedꞌ ebꞌ smanvaji.
Ix laj slocan pacꞌlaj smexa ebꞌ qꞌuexum tumin yedꞌ xila ebꞌ chon̈um paramuch.*
Marcos 11.15-33
16 Man̈xalaj junoc mach ix chajiecꞌ yedꞌ syamcꞌabꞌ dꞌa yamaqꞌuil stemplo Dios yuuj.
17 Ix scꞌaybꞌan ebꞌ,
ix yalani:
—Yalnaccan Dios icha tic dꞌa Slolonel Tzꞌibꞌabꞌilcani:
A in templo ol alchaj yuuj to yicn̈ej lesal yaj yuj junjun chon̈abꞌ,
xchi.
Palta a ex tic,
icha junoc n̈aqꞌueen bꞌaj scꞌubꞌejel sbꞌa ebꞌ elcꞌum,
icha chiꞌ tzeyutej,
xchi Jesús dꞌa ebꞌ.
18 Axo ebꞌ vin̈ sat sacerdote yedꞌ ebꞌ vin̈ cꞌaybꞌum dꞌa ley Moisés,
ayic ix yabꞌan ebꞌ vin̈ tas ix scꞌulej Jesús,
ix te xiv ebꞌ vin̈ yuuj,
yujto te nivan yelcꞌoch juntzan̈ scꞌaybꞌubꞌal dꞌa yichan̈ ebꞌ anima smasanil.
Yuj chiꞌ,
ix sayan ebꞌ vin̈ tas syutej smilancham Jesús chiꞌ.
19 Axo dꞌa qꞌuicꞌbꞌalil,
ix elxi Jesús yedꞌ ebꞌ scꞌaybꞌum dꞌa Jerusalén chiꞌ.
Ix tacjiel teꞌ higo
20 Axo dꞌa junxo qꞌuin̈ibꞌalil,
a ix paxta ebꞌ,
ix yilanxi teꞌ higo ebꞌ,
toxo ix tacjiel teꞌ masanto dꞌa schꞌan̈al yibꞌ.
21 Axo vin̈aj Pedro ix naancoti.
Yuj chiꞌ,
ix yalan vin̈ dꞌa Jesús:
—Mamin,
ina teꞌ higo a catabꞌej evi.
Toxo ix tacjiel teꞌ,
xchi vin̈ dꞌay.
22 Yuj chiꞌ ix yalan Jesús:
—Aqꞌuecoch Dios dꞌa e cꞌool.
23 Qꞌuinaloc ayex tzeyal dꞌa jun vitz tic:
Elan̈ dꞌa edꞌtal tic.
Yumbꞌat a bꞌa dꞌa yol aꞌ mar,
tato xe chi,
tato malaj e chabꞌcꞌolal,
ol elcꞌoch icha tzeyal chiꞌ.
24 Yuj chiꞌ,
sval dꞌayex,
a tzeyacꞌan lesal,
tzeyacꞌoch dꞌa e cꞌool to yel ol e cha jantac tas tze cꞌan chiꞌ.
Tato icha chiꞌ,
ol acꞌjoc dꞌayex.
25-26 Tato ay mach tzꞌoch smul dꞌayex,
ayic tzeyacꞌan lesal,
tzeyacꞌ nivancꞌolal.
Tato icha chiꞌ,
axo co Mam Dios ayecꞌ dꞌa satchaan̈,
syacꞌ pax lajvoc e mul,
xchi Jesús dꞌa ebꞌ.
A yopisio Jesús
27 Ix lajvi scꞌochxi ebꞌ dꞌa Jerusalén,
ix ochxi Jesús dꞌa yamaqꞌuil stemplo Dios.
Ix bꞌeyecꞌ dꞌa yool.
Axo ebꞌ vin̈ sat sacerdote,
ebꞌ vin̈ cꞌaybꞌum dꞌa ley Moisés yedꞌ ebꞌ vin̈ ichamtac vinac,
ix cꞌoch ebꞌ vin̈ dꞌay.
28 Ix scꞌanbꞌan ebꞌ vin̈:
—¿Tas opisio,
yuj chiꞌ a comon cꞌulej juntzan̈ chiꞌ evi?
¿Mach acꞌjinac opisio chiꞌ?
xchi ebꞌ vin̈ dꞌay.
29 Yuj chiꞌ ix yalan dꞌa ebꞌ vin̈:
—An̈ejtonaꞌ ol in cꞌanbꞌej pax junoc tas dꞌayex.
Tato ol e yal dꞌayin,
ol val dꞌayex mach acꞌjinac vopisio in cꞌulan juntzan̈ chiꞌ.
30 ¿Mach acꞌjinac yopisio vin̈aj Juan ayic yacꞌannac bautizar ebꞌ anima vin̈?
¿A am Dios acꞌjinac,
mato a ebꞌ anima?
Alec dꞌayin,
xchi Jesús dꞌa ebꞌ vin̈.
31 Yuj chiꞌ,
ix laj slajtian sbꞌa ebꞌ vin̈ yuj juntzan̈ ix yal chiꞌ.
Ix laj yalan ebꞌ vin̈:
—¿Tas scutej calan dꞌa vin̈?
Tato scalaꞌ to a Dios acꞌjinac yopisio vin̈aj Juan chiꞌ,
axom ol yalan vin̈ dꞌayon̈:
¿Tas yuj maj eyacꞌoch dꞌa e cꞌool jun?
xcham vin̈.
32 Palta max yal-laj calanpaxi to yic anima vin̈,
xchi ebꞌ vin̈.
Icha chiꞌ ix yutej ebꞌ vin̈ yalani,
yujto xiv ebꞌ vin̈ dꞌa ebꞌ anima.
Yujto a vin̈aj Juan chiꞌ,
schecabꞌ Dios yaj vin̈ dꞌa yichan̈ ebꞌ anima smasanil.
33 Yuj chiꞌ ix yalan ebꞌ vin̈ dꞌa Jesús:
—Man̈ cojtacoc,
mach am acꞌjinac yopisio vin̈aj Juan chiꞌ,
xchi ebꞌ vin̈.
—Tato icha chiꞌ,
man̈ ol valpaxlaj dꞌayex mach acꞌjinac vopisio in cꞌulan juntzan̈ chiꞌ,
xchi Jesús dꞌa ebꞌ vin̈.