A yabꞌixal ebꞌ munlajvum chuc spensar
12
Axo Jesús ix och ijan yalan jun abꞌix.
Ix yalan icha tic:
—Ay jun vin̈ ix avan juntzan̈ teꞌ uva dꞌa sat sluum.
Ix smacan vin̈ yedꞌ qꞌuen tzꞌalqꞌueen.
Ix sbꞌoan jun yedꞌtal bꞌaj stecꞌchajel yal teꞌ uva chiꞌ vin̈.*
Ix sbꞌoanpaxqꞌue jun bꞌaj tzꞌaj ebꞌ stan̈van teꞌ uva chiꞌ vin̈,
chaan̈ ix ajqꞌuei.
Ix lajvi chiꞌ,
ix yacꞌanbꞌat sluum vin̈ chiꞌ majanil yedꞌ teꞌ uva chiꞌ dꞌa juntzan̈ ebꞌ vin̈ munlajvum.
Ix bꞌatcan vin̈ dꞌa junxo lugar najat.
Marcos 12.1-17
2 Axo ix javi stiempoal smolchajel sat teꞌ,
ix schecanbꞌat jun schecabꞌ vin̈ dꞌa ebꞌ vin̈ majnum luum chiꞌ,
yic bꞌat schaan smajananubꞌal lum bꞌaj tzꞌel teꞌ uva chiꞌ yalani.
3 Axo ix cꞌochi,
ix syamancot ebꞌ vin̈ smacꞌani.
Ix spechan paxta ebꞌ vin̈.
Malaj jabꞌoc tas ix yicꞌaꞌ.
4 Axo vin̈ aj luum chiꞌ ix checanbꞌat junxo schecabꞌ dꞌa ebꞌ vin̈.
Axo ix cꞌochi,
ix ste bꞌajej ebꞌ vin̈,
ix lajvi sjolom smacꞌan ebꞌ vin̈.
5 Yuj chiꞌ,
axo vin̈ aj luum chiꞌ ix checanbꞌat junxo schecabꞌ.
Axo ix cꞌoch junxo chiꞌ,
ix smilancham ebꞌ vin̈.
Tzijtumto ebꞌ schecabꞌ vin̈ ix schecbꞌati.
Ay ebꞌ ton̈ej ix macꞌji,
ay ebꞌ ix miljicham yuj ebꞌ vin̈.
6 Palta ay jun yuninal vin̈ te xajan yuuj.
Slajvubꞌxo chiꞌ,
ix schecanbꞌat yuninal vin̈ chiꞌ.
Tecan ol xiv ebꞌ vin̈ dꞌa jun vuninal tic,
xchi vin̈.
7 Palta axo yic van scꞌochi,
ix smol alan ebꞌ vin̈:
Ina sjavi vin̈ uninabꞌil tic.
Qꞌuinaloc ol cham vin̈ smam vin̈,
axo vin̈ ol icancan luum.
Co mileccham vin̈,
yic a dꞌayon̈ ol can luum,
xchi ebꞌ vin̈.
8 Yuj chiꞌ axo ix cꞌochi,
ix syamancot ebꞌ vin̈.
Ix smacꞌancham ebꞌ vin̈.
Ix lajvi chiꞌ,
ix bꞌat ebꞌ vin̈ syumcanel snivanil dꞌa stitac avbꞌen chiꞌ.
9 Yuj chiꞌ tzin cꞌanbꞌej dꞌayex,
a vin̈ aj luum chiꞌ,
¿tas ol yutoc ebꞌ vin̈ majnum luum chiꞌ vin̈ tze naꞌa?
A vin̈ aj luum chiꞌ ol bꞌat satanel ebꞌ vin̈.
Slajvi chiꞌ ol yacꞌancanbꞌat sluum vin̈ chiꞌ majanil dꞌa juntzan̈xo.
10 ¿Tom manta bꞌaj tzeyil dꞌa Slolonel Dios Tzꞌibꞌabꞌilcani,
bꞌaj syal icha tic?
A jun qꞌuen qꞌueen malaj yelcꞌoch dꞌa yichan̈ ebꞌ bꞌoum pat,
aton qꞌuen ix ochcan sjolomoc schiquin teꞌ pat chiꞌ.
11 Icha tic ix aj yuj Dios Cajal.
Yuj chiꞌ ayic squilani,
ste sat co cꞌool yuuj,
xchi dꞌa Slolonel Dios chiꞌ,
xchi Jesús dꞌa ebꞌ.
12 Axo ebꞌ vin̈ yajal ix sayani tas ol yutoc ebꞌ vin̈ syamchaj Jesús chiꞌ,
yujto ix nachajel yuj ebꞌ vin̈ to yuj ebꞌ vin̈ ix alji jun abꞌix chiꞌ.
Palta ix xiv ebꞌ vin̈ dꞌa ebꞌ anima.
Yuj chiꞌ ix yactejcan Jesús chiꞌ ebꞌ vin̈.
Ix pax ebꞌ vin̈.
A juntzan̈ tumin scꞌanjiel yuj ebꞌ vin̈ yajal
13 Ix lajvi chiꞌ,
ix checjibꞌat jayvan̈ ebꞌ fariseo yedꞌ ebꞌ spartido vin̈aj Herodes dꞌa Jesús.
Sgana ebꞌ syacꞌ proval,
talaj ay junoc slolonel ay palta syutej yalani.
Yujto sgana ebꞌ syacꞌoch dꞌa yibꞌan̈.
14 Ix bꞌat yalan ebꞌ dꞌay:
—Ach co Cꞌaybꞌumal,
cojtac to te yel tzalaꞌ.
Cojtacpaxi to jun lajann̈ej yilji ebꞌ anima dꞌayach.
Axo jun bꞌeybꞌal sgana Dios,
a tzacꞌ cꞌaybꞌaj dꞌa yel.
¿Tas tza naꞌa?
A juntzan̈ tumin scꞌanjiel dꞌayon̈ yuj vin̈ yajal dꞌa Roma,
¿vachꞌ am scacꞌaꞌ,
mato maay?
¿Ay am sleyal scacꞌaꞌ,
mato maay?
xchi ebꞌ dꞌa Jesús.
15 Palta yojtacxo Jesús to ton̈ej stzꞌac scꞌanbꞌej ebꞌ icha chiꞌ.
Yuj chiꞌ ix yalan dꞌa ebꞌ:
—¿Tas yuj tzin eyacꞌ proval?
Bꞌat iqꞌueccot junoc tumin chiꞌ vilaꞌ,
xchi dꞌa ebꞌ.
16 Yuj chiꞌ ix bꞌat yicꞌcot jun tumin chiꞌ ebꞌ.
Ix scꞌanbꞌan Jesús chiꞌ dꞌa ebꞌ:
—¿Mach ayoch yechel sat dꞌa jun tumin tic?
¿Mach tzꞌibꞌabꞌiloch sbꞌi tic dꞌay?
xchi dꞌa ebꞌ.
—Aton yechel vin̈ yajal dꞌa Roma yedꞌ sbꞌi vin̈,
xchi ebꞌ.
17 —A tas yictaxon vin̈ yajal chiꞌ,
aqꞌuec dꞌa vin̈.
Palta a tas yictaxon Dios,
a tzeyacꞌ dꞌay,
xchi dꞌa ebꞌ.
Axo ix yabꞌan juntzan̈ chiꞌ ebꞌ,
ix te sat scꞌool ebꞌ.
A ebꞌ tzꞌalani to man̈ ol pitzvocxi ebꞌ chamnac
18 Ix lajvi chiꞌ,
ay juntzan̈ ebꞌ saduceo ix cꞌoch dꞌa Jesús.
A ebꞌ chiꞌ syal ebꞌ to man̈ ol pitzvocxi ebꞌ chamnac,
yuj chiꞌ ix yalan ebꞌ dꞌay:
Marcos 12.18-44
19 —Ach co Cꞌaybꞌumal,
a vin̈aj Moisés tzꞌibꞌannaccan icha tic:
Qꞌuinaloc ay junoc mach schami,
scan ix yetbꞌeyum,
palta malaj junoc yuninal.
Tato icha chiꞌ,
axo junoc yucꞌtac yovalil tzꞌicꞌancan ix,
yic vachꞌ tato tzꞌaj yuninal junxo vin̈ chiꞌ,
ichato yuninal vin̈ ix cham chiꞌ tzꞌajcani.
Icha chiꞌ yaj yalancan vin̈aj Moisés chiꞌ.
20 A junel,
ay ucvaan̈ vinac,
yucꞌtacn̈ej sbꞌa ebꞌ vin̈.
A vin̈ bꞌabꞌel vinac icꞌan jun ix ix.
Palta cham vin̈.
Malaj junoc yuninal vin̈ cani.
21 Axo vin̈ schabꞌil yucꞌtac vin̈ icꞌancan ix.
Palta champax junxo vin̈ chiꞌ,
malaj pax junoc yuninal vin̈ cani.
Icha chiꞌ aj pax vin̈ yoxil.
22 An̈ejtonaꞌ,
icha chiꞌ ecꞌ ebꞌ vin̈ yucvan̈il dꞌa ix.
Malaj junoc yuninal ebꞌ vin̈ ajnaccani.
Slajvi scham ebꞌ vin̈ yucvan̈il,
ichato chiꞌ scham ix.
23 Ayic ol pitzvocxi ebꞌ chamnac,
¿mach junoc ebꞌ vin̈ ol icꞌan ix?
Yujto yicꞌnac ix ebꞌ vin̈ yucvan̈il,
xchi ebꞌ saduceo chiꞌ.
24 Yuj chiꞌ ix yalanxi Jesús dꞌa ebꞌ:
—Ton̈ej tzex te somchaji,
yujto man̈ eyojtacoc tas syal dꞌa Slolonel Dios Tzꞌibꞌabꞌilcani.
Man̈ eyojtacoc jantac spoder Dios.
25 Ayic ol pitzvocxi ebꞌ chamnac,
man̈xalaj icꞌlajbꞌail,
yujto lajan ol aj ebꞌ yedꞌ ebꞌ ángel ay dꞌa satchaan̈.
26 Palta toxonton chequelxo yaji to ol pitzvocxi ebꞌ chamnac.
¿Tom manta bꞌaj tzeyil tas stzꞌibꞌejnaccan vin̈aj Moisés dꞌa Slolonel Dios chiꞌ,
a slolonnac Dios dꞌa scal teꞌ qꞌuiix?
Xchi Dios icha tic:
A in ton tic sDiosal in vin̈aj Abraham,
sDiosal in vin̈aj Isaac,
sDiosal in pax vin̈aj Jacob,
xchi.
27 Yuj chiꞌ cojtac,
vachꞌchom chamnac ebꞌ dꞌa sat ebꞌ anima,
palta axo dꞌa sat Dios man̈ satnacoquel-laj ebꞌ,
pitzan ebꞌ dꞌa yichan̈,
yujto yalnaccani to sDiosal ebꞌ yaji.
A ex tic te somchajnac ex,
xchi Jesús dꞌa ebꞌ.
A jun checnabꞌil te nivan yelcꞌochi
28 Ay jun vin̈ cꞌaybꞌum dꞌa ley Moisés ix cꞌoch taꞌ.
Ix yabꞌan vin̈ to van stelan sbꞌa ebꞌ vin̈ saduceo chiꞌ yedꞌ Jesús.
Ix yabꞌanpax vin̈ to vachꞌ ix yutej Jesús spacan dꞌa ebꞌ vin̈,
yuj chiꞌ ix scꞌanbꞌan vin̈ dꞌay:
—¿Bꞌaja junoc checnabꞌil te nivan yelcꞌoch dꞌa yichan̈ smasanil?
xchi vin̈ dꞌay.
29 Yuj chiꞌ ix yalan Jesús:
—A jun checnabꞌil te nivan yelcꞌoch dꞌa yichan̈ smasanil,
xchi icha tic:
Abꞌec ex vetisraelal,
a Cajal co Diosal,
junn̈ej toni.
30 Tze xajanej Cajal co Diosal dꞌa smasanil e cꞌool,
dꞌa smasanil e pixan,
dꞌa smasanil e pensar yedꞌ dꞌa smasanil eyip,
xchi.
Aton jun checnabꞌil tic te nivan yelcꞌoch dꞌa yichan̈ smasanil.
31 Axo junxo ol val tic,
quen man̈ lajanoc yelcꞌoch yedꞌoc.
Xchi icha tic:
Ichaocabꞌ tzeyutej eyaꞌilan e bꞌa,
ichaocabꞌ chiꞌ tzeyutej e xajanan ebꞌ ay dꞌa spatic schiquin e pat,
xchi.
Malaj junocxo checnabꞌil ecꞌal yelcꞌoch dꞌa yichan̈ chabꞌ tic,
xchi Jesús.
32 Ix yalanxi vin̈ cꞌaybꞌum chiꞌ dꞌay:
—Vachꞌ ton Mamin,
yel ton tzalaꞌ.
Junn̈ej ton Dios,
malaj junocxo.
33 Yovalil sco xajanej Dios dꞌa smasanil co cꞌool,
dꞌa smasanil co pensar yedꞌ dꞌa smasanil quip.
An̈ejtonaꞌ yovalil icha scutej co yaꞌilan co bꞌa,
ichaocabꞌ chiꞌ scutej co xajanan ebꞌ ay dꞌa spatic schiquin co pat.
Aton chabꞌ checnabꞌil tic,
te nivan yelcꞌoch dꞌa yichan̈ masanil juntzan̈ silabꞌ smilji yedꞌ juntzan̈ silabꞌ sn̈usji tzꞌacꞌji dꞌa Dios,
xchi vin̈ dꞌay.
34 Axo ix yabꞌan Jesús to vachꞌ ix yutej vin̈ yalani,
ix yalanxi dꞌa vin̈:
—Jabꞌxon̈ej val och dꞌa yol scꞌabꞌ Dios,
xchi dꞌa vin̈.
Yuj chiꞌ,
malaj junocxo mach ix stecꞌbꞌej sbꞌa scꞌanbꞌan junocxo tas dꞌa Jesús chiꞌ.
A Cristo aton Yuninal Dios
35 A junel,
ix scꞌaybꞌej ebꞌ anima Jesús dꞌa yamaqꞌuil stemplo Dios,
ix yalani:
—¿Tas yuj syal ebꞌ cꞌaybꞌum dꞌa ley Moisés to a Cristo yin̈tilal vin̈aj David?
36 Palta yuj Yespíritu Dios yalnac vin̈aj David chiꞌ to a Cristo Yajal yaj dꞌa vin̈,
xchi icha tic:
A Dios Cajal alannac dꞌa Vajalil icha tic:
Eman̈ cꞌojan dꞌa in vachꞌ cꞌabꞌ tic,*
masanto ol vacꞌcanoch ebꞌ ayoch ajcꞌolal dꞌayach dꞌa yalan̈ oc,
xchi Dios dꞌa Vajalil,
xchi vin̈aj David chiꞌ.
37 Icha chiꞌ yutejnac vin̈ yalancani to a Cristo Yajal yaj dꞌa vin̈.
Yuj chiꞌ,
¿tom yin̈tilaln̈ej vin̈aj David chiꞌ yaji?
xchi Jesús dꞌa ebꞌ.
Man̈ jantacoc ebꞌ anima ix abꞌan jun tic.
Ix te tzalaj ebꞌ yabꞌani.
A smul ebꞌ cꞌaybꞌum dꞌa ley Moisés
38 Ayic van scꞌaybꞌan ebꞌ anima Jesús,
ix yalani:
—Tzeyil val e bꞌa,
yujto a ebꞌ cꞌaybꞌum dꞌa ley Moisés,
te ay smay sbꞌeybꞌal ebꞌ.
Sgana ebꞌ sbꞌeyecꞌ yedꞌ spichul te jucan.
Axo yic tzꞌecꞌ ebꞌ dꞌa calle,
ste qꞌuechaan̈ ebꞌ ayic slaj yacꞌanem sbꞌa ebꞌ anima dꞌa ebꞌ.
39 A dꞌa yoltac spatil culto,
an̈ej dꞌa xila ebꞌ nivac vinac snibꞌej ebꞌ tzꞌem cꞌojan.
Yedꞌ pax dꞌa yic tzꞌoch juntzan̈ nivac vael,
an̈ej dꞌa yedꞌtal ebꞌ vin̈ nivac vinac tzꞌaj ebꞌ.
40 Syicꞌanecꞌ ebꞌ tastac ay dꞌa ebꞌ ix chamnac yetbꞌeyum.
Slajvi chiꞌ,
te najat syutej yoc slesal ebꞌ,
yic sna ebꞌ anima to malaj smul ebꞌ.
Yuj chiꞌ,
yelxo val nivan yaelal ol och dꞌa yibꞌan̈ ebꞌ,
xchi Jesús.
A yofrenda jun ix chamnac yetbꞌeyum
41 A junel,
ix och Jesús dꞌa yol yamaqꞌuil stemplo Dios.
Ix em cꞌojan dꞌa stzꞌey jun chalabꞌ ofrenda.
Ix yilani chajtil tzꞌaj yacꞌanem stumin ebꞌ anima.
Tzijtum ebꞌ bꞌeyum ix ecꞌ taꞌ.
Nivac stumin ebꞌ ix ecꞌ yacꞌcanemi.
42 Palta ix cꞌoch jun ix chamnac yetbꞌeyum te mebꞌaꞌ.
Ix yacꞌanem chabꞌ yunetac tumin ix,
te jabꞌn̈ej yelcꞌochi.
43 Ix yavtancot ebꞌ scꞌaybꞌum Jesús chiꞌ,
ix yalan dꞌa ebꞌ:
—Val yel sval dꞌayex,
a jun ix chamnac yetbꞌeyum tic,
te mebꞌaꞌ ix.
Palta a jun yofrenda ix,
ix yacꞌ tic,
ecꞌto yelcꞌoch dꞌa yichan̈ yofrenda smasanil juntzan̈xo ebꞌ ix ecꞌ yaqꞌuem yic dꞌa yol jun chalabꞌ ofrenda tic.
44 Yujto a tas syacꞌ sobre dꞌa ebꞌ,
aꞌ ix laj yaqꞌuem ebꞌ.
Palta a jun ix tic,
te mebꞌaꞌ ix.
A masanil yic sgasto ix,
ix yaqꞌuemi.
Man̈xalaj tas ix can dꞌa ix,
xchi Jesús dꞌa ebꞌ.