A yopisio Jesús
20
Dꞌa jun cꞌu chiꞌ ix cꞌaybꞌaj ebꞌ anima dꞌa yamaqꞌuil stemplo Dios yuj Jesús.
Ix yalan vachꞌ abꞌix yic colnabꞌil dꞌa ebꞌ.
Ix cꞌoch ebꞌ vin̈ sacerdote,
ebꞌ vin̈ cꞌaybꞌum dꞌa ley Moisés yedꞌ ebꞌ vin̈ ichamtac vinac ay yopisio.
Lucas 20.1-26
—Al dꞌayon̈,
tas aji,
yuj chiꞌ tza cꞌulej juntzan̈ chiꞌ,
¿mach acꞌjinac opisio chiꞌ?
xchi ebꞌ vin̈ dꞌay.
3 —Ay pax jun tas tzin cꞌanbꞌej dꞌayex.
Alec dꞌayin,
4 ¿mach acꞌjinac yopisio vin̈aj Juan ayic ix yacꞌan bautizar ebꞌ ix laj cꞌoch dꞌa vin̈?
¿Am Dios acꞌjinac,
mato anima?
xchi Jesús chiꞌ dꞌa ebꞌ vin̈.
5 Ix yal-lan yabꞌ ebꞌ vin̈:
—¿Tas scutej co pacan dꞌa vin̈?
Tato scalaꞌ to a Dios ix acꞌancot vin̈aj Juan chiꞌ,
axom ol yalan vin̈:
¿Tas yuj maj eyacꞌoch dꞌa e cꞌol jun?
xcham vin̈.
6 Palta tato scalaꞌ to yic ebꞌ anima,
axom ebꞌ anima ol on̈ sjulqꞌuenejcham ebꞌ,
yujto a vin̈aj Juan chiꞌ,
schecabꞌ ton Dios yaj vin̈ dꞌa yichan̈ ebꞌ,
xchi ebꞌ vin̈.
7 Yuj chiꞌ ix yalan ebꞌ vin̈ to man̈ yojtacoc ebꞌ mach acꞌjinac yopisio vin̈aj Juan chiꞌ.
8 Ix yalan Jesús chiꞌ dꞌa ebꞌ vin̈:
—Tato icha chiꞌ,
man̈ ol valpaxlaj dꞌayex mach acꞌjinac vopisio yic tzin cꞌulan juntzan̈ tic,
xchi dꞌa ebꞌ vin̈.
A yabꞌixal ebꞌ munlajvum chuc spensar
9 Ix lajvi chiꞌ,
ix yalan jun abꞌix tic Jesús dꞌa ebꞌ ayecꞌ chiꞌ taꞌ:
—Ay jun vin̈ ix avan juntzan̈ teꞌ uva dꞌa sat sluum.*
Ix lajvi chiꞌ,
ix yacꞌancanbꞌat sluum vin̈ chiꞌ majanil yedꞌ masanil yavbꞌen teꞌ chiꞌ.
Ix lajvi chiꞌ,
nivan tiempo ix bꞌatcan vin̈.
10 Axo yic ix cꞌoch stiempoal smoljiel sat teꞌ uva chiꞌ,
ix schecbꞌat jun schecabꞌ vin̈ yic scꞌanan smajananubꞌal luum.
Axo ebꞌ ix majnan luum chiꞌ ix macꞌani,
ix spechan meltzaj ebꞌ,
malaj jabꞌoc tas ix yacꞌ ebꞌ dꞌay.
11 Yuj chiꞌ ix schecbꞌat junxo schecabꞌ vin̈ aj luum chiꞌ.
Palta an̈ejaꞌ ix stumej ebꞌ,
ix smacꞌan pax ebꞌ,
ix spechan meltzaj ebꞌ,
malaj jabꞌoc tas ix yacꞌ ebꞌ dꞌay.
12 Ix schecanxibꞌat junxo schecabꞌ vin̈,
axo ebꞌ ix majnan luum chiꞌ ix macꞌani,
ix spechan meltzaj ebꞌ.
13 Axo ix snaan vin̈ aj luum chiꞌ:
¿Tas tzin cꞌulej ticnaic?
Ol in checbꞌat jun vuninal te xajan vuuj.
Tecan ol xiv ebꞌ dꞌay,
xchi vin̈.
14 Axo ix cꞌoch vin̈ uninabꞌil chiꞌ,
ix slajtian sbꞌa ebꞌ majnum luum chiꞌ.
Ix yalan ebꞌ:
Ina sja vin̈ uninabꞌil bꞌaj ol can lum luum tic.
Co maqꞌueccham vin̈,
yic vachꞌ a on̈xo ol quiquejcan luum,
xchi ebꞌ.
15 Yuj chiꞌ,
ix sn̈eranel vin̈ ebꞌ dꞌa stiel avbꞌen chiꞌ,
ix smacꞌancham vin̈ ebꞌ.
Tzin cꞌanbꞌej dꞌayex,
¿tas ol utaj ebꞌ majnum lum chiꞌ yuj vin̈ aj luum chiꞌ tze naꞌa?
16 Axo lacꞌan vin̈ ol bꞌatoc.
Ol bꞌat smacꞌancham juntzan̈ ebꞌ majnum luum chiꞌ vin̈.
Ol yacꞌanxicanbꞌat luum vin̈ majanil dꞌa juntzan̈xo,
xchi Jesús dꞌa ebꞌ vin̈.
Ayic ix yabꞌan jun tic ebꞌ anima,
ix yalan ebꞌ:
—Comonoc malaj bꞌaqꞌuin̈ ol ujoc icha chiꞌ,
xchi ebꞌ.
17 Axo Jesús ix och qꞌuelan dꞌa ebꞌ,
ix yalani:
—Tato icha chiꞌ,
¿tas syalelcꞌoch juntzan̈ tas tzꞌibꞌabꞌilcan dꞌa Slolonel Dios tze naꞌa?
Syal icha tic:
A jun qꞌuen qꞌueen malaj yelcꞌoch dꞌa yichan̈ ebꞌ bꞌoum pat,
aton qꞌuen ix ochcan sjolomoc schiquin teꞌ pat chiꞌ,
xchicani.
18 Tato ay junoc mach tzꞌem tan̈naj dꞌa yibꞌan̈ jun qꞌueen chiꞌ,
chocꞌ tzꞌaji.
Tato a qꞌueen tzꞌem tan̈naj dꞌa yibꞌan̈ junocxo,
icha pococ tzꞌaji,
xchi Jesús dꞌa ebꞌ.
19 A ebꞌ vin̈ sat sacerdote yedꞌ ebꞌ vin̈ cꞌaybꞌum dꞌa ley Moisés,
ix snibꞌej ebꞌ vin̈ syam Jesús dꞌa elan̈chamel,
yujto ix snael ebꞌ vin̈ to a ebꞌ vin̈ van yalani,
palta ix xiv ebꞌ vin̈ dꞌa ebꞌ anima.
A juntzan̈ tumin scꞌanel ebꞌ yajal
20 Yuj chiꞌ ix checjibꞌat jayvan̈ ebꞌ vin̈ yilaꞌ talaj tzꞌoch smul Jesús chiꞌ.
A ix cꞌoch ebꞌ vin̈,
vachꞌ ix yutej sbꞌa ebꞌ vin̈ dꞌa yichan̈ Jesús chiꞌ.
Ix stzꞌacan scꞌumej ebꞌ vin̈ yic slectaj dꞌa slolonel,
yic syacꞌanoch ebꞌ vin̈ dꞌa yol scꞌabꞌ ebꞌ vin̈ yajal.
21 Yuj chiꞌ ix stzꞌac scꞌanbꞌej ebꞌ vin̈ dꞌay:
—Mamin cꞌaybꞌum,
cojtac to tojol tzutej a loloni yedꞌ pax on̈ a cꞌaybꞌani.
Man̈oclaj yilji anima tzilaꞌ,
yujto lajann̈ej yelcꞌoch junjun anima dꞌayach.
Cojtac paxi to tzon̈ a cꞌaybꞌej dꞌa tas sgana Dios dꞌa val yel.
22 Yuj chiꞌ al dꞌayon̈:
¿Tom vachꞌ scacꞌ juntzan̈ tumin scꞌanjiel dꞌayon̈ yuj vin̈ yajal dꞌa Roma,
mato maay?
xchi ebꞌ vin̈ dꞌay.
23 Ix snael Jesús to chuc spensar ebꞌ vin̈ scꞌanbꞌan ebꞌ vin̈.
Yuj chiꞌ ix yalan dꞌa ebꞌ vin̈:
24 —Chꞌoxec junoc tumin chiꞌ vilaꞌ.
¿Mach jun ayoch sat tic yedꞌ sbꞌi tic dꞌa qꞌueen?
xchi dꞌa ebꞌ vin̈.
—Aton sat vin̈ yajal dꞌa Roma yedꞌ sbꞌi vin̈,
xchi ebꞌ vin̈.
25 Yuj chiꞌ,
ix yalan dꞌa ebꞌ vin̈:
—A tas yictaxon vin̈ yajal chiꞌ yaji,
aqꞌuec dꞌa vin̈.
Palta a tas yictaxon Dios yaji,
aqꞌuec dꞌa Dios chiꞌ,
xchi dꞌa ebꞌ vin̈.
26 Malaj junoc tas ix yal chiꞌ bꞌaj ix acꞌji ganar yuj ebꞌ yic syaman ebꞌ.
Ix te sat scꞌool ebꞌ yabꞌan tas ix spac chiꞌ,
man̈xalaj tas ix yal ebꞌ.
A ebꞌ tzꞌalani to man̈ ol pitzvocxi ebꞌ chamnac
27 Ix lajvi chiꞌ,
ay juntzan̈ ebꞌ vin̈ saduceo ix cꞌoch dꞌa Jesús.
Aton ebꞌ vin̈ tic tzꞌalani to man̈ ol pitzvocxi ebꞌ chamnac,
yuj chiꞌ ix yalan ebꞌ vin̈ dꞌay:
Lucas 20.27-47
28 —Mamin Cꞌaybꞌum,
a vin̈aj Moisés tzꞌibꞌannaccan icha tic:
Tato ay junoc vin̈ vinac schami,
scan ix yetbꞌeyum vin̈,
palta malaj yuninal vin̈ scani,
tato icha chiꞌ,
axo vin̈ yucꞌtac vin̈,
tzꞌicꞌanpaxcan ix ix chiꞌ,
yic vachꞌ tato tzꞌaj yuninal ebꞌ,
ichato a vin̈ ix cham chiꞌ ay yicoꞌ.
Icha chiꞌ ix yalcan vin̈aj Moisés chiꞌ.
29 A junel ay ucvan̈ ebꞌ vin̈ yucꞌtac sbꞌa.
A vin̈ bꞌabꞌel vinac icꞌan jun ix ix,
palta cham vin̈,
malaj yuninal ebꞌ cani.
30 Axo junxo yucꞌtac vin̈ icꞌanxican ix.
Palta cham junxo vin̈ chiꞌ.
Malaj yuninal ebꞌ canxi.
31 Slajvi chiꞌ,
axo vin̈ yoxil icꞌanxi ix.
An̈ejtonaꞌ yicꞌnac ix ebꞌ vin̈ yucvan̈il.
Cham ebꞌ vin̈ smasanil.
Malaj junoc ebꞌ vin̈ elcan yuninal yedꞌ ix.
32 Axo dꞌa slajvubꞌxo,
scham ix.
33 Axo ol pitzvocxi ebꞌ chamnac,
¿mach junoc ebꞌ vin̈ ol icꞌan ix yujto yicꞌnac ix ebꞌ vin̈ yucvan̈il?
xchi ebꞌ vin̈.
34 Yuj chiꞌ ix yalan Jesús dꞌa ebꞌ vin̈ saduceo chiꞌ:
—A dꞌa yolyibꞌan̈qꞌuinal tic,
syicꞌlaj sbꞌa ebꞌ anima.
35 Palta ay val junxo lugar.
A ebꞌ ol pitzvocxi dꞌa scal ebꞌ chamnac,
ebꞌ smoj scꞌochcan taꞌ,
ataꞌ man̈xalaj icꞌlajbꞌail.
Man̈xo ol yacꞌbꞌat yisil ebꞌ cꞌanjoc.
36 Yujto a dꞌa jun tiempoal chiꞌ,
man̈xo ol chamlaj ebꞌ.
Lajan ol aj ebꞌ yedꞌ ebꞌ ángel.
Yuninal ton Dios ol aj ebꞌ,
yujto ol pitzvocxi ebꞌ.
37 An̈ejtonaꞌ dꞌa vin̈aj Moisés chiꞌ yalnaccan Dios dꞌa scal teꞌ qꞌuiix ayoch scꞌacꞌal,
ataꞌ yacꞌnac cojtaquejeli to ol pitzvocxi ebꞌ chamnac,
bꞌaj yalnaccan icha tic:
A in ton tic sDiosal in vin̈aj Abraham,
vin̈aj Isaac yedꞌ vin̈aj Jacob,
xchi.
38 Yuj chiꞌ,
vachꞌchom chamnac ebꞌ vin̈ chiꞌ,
cojtac to man̈ satnacoquel ebꞌ vin̈ dꞌa juneln̈ej,
yujto yalnac Dios to sDiosal ebꞌ vin̈ yaji.
A dꞌa sat Dios,
pitzan ebꞌ anima smasanil,
xchi Jesús.
39 Ay juntzan̈ ebꞌ vin̈ cꞌaybꞌum dꞌa ley Moisés ix alan dꞌay:
—Yel ton tzal Mamin Cꞌaybꞌum,
xchi ebꞌ vin̈.
40 Yuj chiꞌ man̈xalaj tas syal scꞌanbꞌan ebꞌ vin̈ dꞌay.
A Cristo, Yuninal Dios
41 Ix yalan Jesús dꞌa ebꞌ vin̈:
—¿Tas yuj ay ebꞌ tzꞌalani to a Cristo yin̈tilal David yaji?
42 Yujto an̈ejaꞌ vin̈aj David chiꞌ alanxican dꞌa jun libro yic Salmos:
A Dios Cajal alannac dꞌa Vajalil icha tic:
Eman̈ cꞌojan dꞌa in vachꞌ cꞌabꞌ tic,
43 masanto ol vacꞌcanoch ebꞌ ayoch ajcꞌolal dꞌayach dꞌa yalan̈ oc,
xchi Dios dꞌa Vajalil,
xchi vin̈aj David chiꞌ.
44 Icha chiꞌ yutejnaccan vin̈aj David yalani to a Cristo ayoch yajaloc vin̈,
yuj chiꞌ cojtac to a Cristo chiꞌ,
man̈ yin̈tilalocn̈ej David chiꞌ yaji,
xchi Jesús dꞌa ebꞌ vin̈.
A smul ebꞌ cꞌaybꞌum dꞌa ley Moisés
45 Ayic van yabꞌan ebꞌ anima smasanil,
ix yalan Jesús icha tic dꞌa ebꞌ scꞌaybꞌum:
46 —Tzeyil val e bꞌa yic man̈ ol ex juvoquel yuj sbꞌeybꞌal ebꞌ vin̈ cꞌaybꞌum dꞌa ley Moisés,
yujto scham val bꞌat ebꞌ vin̈ yedꞌ juntzan̈ spichul jucan.
Snibꞌej ebꞌ vin̈ to tzꞌem n̈ojan ebꞌ anima dꞌa ebꞌ vin̈ bꞌaj ay mercado.
A scꞌan ebꞌ vin̈ to a dꞌa xila ebꞌ nivac vinac tzꞌem cꞌojjabꞌ ebꞌ vin̈ dꞌa yoltac spatil culto.
Ayic tzꞌoch vael,
snibꞌej ebꞌ vin̈ tzꞌem cꞌojjabꞌ bꞌaj tzꞌem cꞌojan ebꞌ vin̈ nivac yelcꞌochi.
47 Syicꞌanpaxecꞌ ebꞌ vin̈ tas ay dꞌa ebꞌ ix chamnac yetbꞌeyum yedꞌ pax spat ebꞌ ix.
Slajvi chiꞌ,
najat syutej yoc slesal ebꞌ vin̈,
yic a snaan ebꞌ anima to malaj smul ebꞌ vin̈.
Palta a ebꞌ vin̈ chiꞌ,
yelxo val nivan yaelal ol acꞌjococh dꞌa yibꞌan̈ ebꞌ vin̈,
xchi Jesús chiꞌ.