A smul ebꞌ vin̈ fariseo yedꞌ ebꞌ vin̈ cꞌaybꞌum dꞌa ley Moisés
23
Ix lajvi chiꞌ,
ix yalan Jesús dꞌa ebꞌ anima yedꞌ dꞌa ebꞌ scꞌaybꞌum:
2 —A ebꞌ cꞌaybꞌum dꞌa ley Moisés yedꞌ ebꞌ fariseo,
ay yopisio ebꞌ yalan tas yaj ley chiꞌ.
3 Yuj chiꞌ,
yaln̈ej tas syal ebꞌ chiꞌ,
tze cꞌanabꞌajej.
Palta man̈ e cꞌulej icha scꞌulej ebꞌ chiꞌ.
Yujto a tas syal ebꞌ,
max scꞌanabꞌajejlaj ebꞌ.
4 A juntzan̈ schecnabꞌil ebꞌ,
lajan icha junoc icatz te al.
Syacꞌqꞌue bꞌulan ebꞌ dꞌa yibꞌan̈ anima,
palta max yacꞌoch yiximal scꞌabꞌ ebꞌ sdꞌun̈anbꞌat jabꞌoc dꞌa yibꞌan̈ ebꞌ.
5 Yujn̈ej to sgana ebꞌ to vachꞌ ebꞌ dꞌa yichan̈ anima,
nivanoc scꞌulej ebꞌ juntzan̈ vachꞌil chiꞌ yil ebꞌ.
Ay juntzan̈ tzꞌuum bꞌaj tzꞌibꞌabꞌiloch jabꞌoc slolonel Dios,
syacꞌoch ebꞌ dꞌa scꞌabꞌ yedꞌ dꞌa snan̈al sat.
Nivac syutejoch ebꞌ,
yic vachꞌ ebꞌ dꞌa yichan̈ ebꞌ anima snaani.
Jucan pax syutejoch spichul ebꞌ,
yelxo val te jucan yajoch schional yuj ebꞌ.
6 Ayic tzꞌoch juntzan̈ nivac vael,
an̈ej bꞌaj te vachꞌ,
an̈ej taꞌ tzꞌem cꞌojan ebꞌ.
Yedꞌ pax dꞌa yoltac spatil sculto ebꞌ,
an̈ej val dꞌa juntzan̈ xila ebꞌ nivac vinac tzꞌem cꞌojan ebꞌ.
7 Axo yic slaj ecꞌ ebꞌ dꞌa calle,
stzalaj val ebꞌ ayic slaj yacꞌanem sbꞌa ebꞌ anima dꞌa ebꞌ.
Ste qꞌuechaan̈ ebꞌ ayic tzꞌalji ebꞌ yuj ebꞌ anima scꞌaybꞌumaloc.
8 Palta a exxo tic,
man̈ e cha aljoc e bꞌa cꞌaybꞌumal,
yujto junn̈ej e cꞌaybꞌumal.
A exxo tic,
eyucꞌtac e bꞌa,
eyanabꞌ e bꞌa e masanil.
9 Malaj junoc mach dꞌa yolyibꞌan̈qꞌuinal tic tze comon alej e mamoc.
Yujto junn̈ej e Mam,
aton Dios ay dꞌa satchaan̈.
10 Man̈ e cha aljoc e bꞌa cuchbꞌumal,
yujto junn̈ej e Cuchbꞌumal,
a in ton Cristo in tic.
11 A mach syacꞌoch sbꞌa checabꞌoc dꞌa e cal,
aton jun chiꞌ te nivan yelcꞌochi.
12 A mach syicꞌchaan̈ sbꞌa,
ol icꞌjocxiemi.
Palta axo ebꞌ syiqꞌuem sbꞌa,
aton ebꞌ ol icꞌjocchaan̈.
13-14 A exxo tic ex cꞌaybꞌum dꞌa ley Moisés yedꞌ ex fariseo,
te chuc eyicoꞌ.
Chabꞌ sat ex.
Tze macoch vaan ebꞌ anima,
yic max och ebꞌ dꞌa yol scꞌabꞌ Dios aj satchaan̈.
Max ex och a ex tic.
Max e chapaxoch ebꞌ sgana yochi.
15 A ex cꞌaybꞌum ex dꞌa ley Moisés yedꞌ ex fariseo,
te chuc eyicoꞌ.
Chabꞌ sat ex.
Tzex ecꞌ dꞌa sat luum tic yedꞌ dꞌa sat aꞌ mar,
yic ay mach tze montejoch eyedꞌoc.
Axo ebꞌ tzꞌoch eyedꞌ chiꞌ,
ton̈ej svachꞌ juviel spensar ebꞌ eyuuj.
Yuj chiꞌ,
eyuuj ecꞌbꞌal yaelal ol acꞌjococh dꞌa yibꞌan̈ ebꞌ dꞌa eyichan̈.
16 A ex tic,
lajan ex icha junoc mach max uji yilani,
chꞌoxum bꞌe syutej sbꞌa dꞌa junocxo.
Te chuc eyicoꞌ,
yujto tzeyal icha tic:
Tato ay mach slocan sbꞌi stemplo Dios,
malaj tzꞌochi,
xe chi.
Palta tato ay mach slocan sbꞌi qꞌuen oro ayoch dꞌa stemplo Dios chiꞌ,
yovalil scꞌanabꞌajej,
xe chi.
17 Yuj chiꞌ,
te quistal ex,
musansatil eyaji.
¿Bꞌaja junoc más nivan yelcꞌoch tze naꞌa?
¿Tom a qꞌuen oro chiꞌ schꞌocoj,
mato a stemplo Dios chiꞌ?
A qꞌuen oro chiꞌ,
yujto ayoch qꞌuen dꞌa stemplo Dios,
yujn̈ej chiꞌ yic Dios yaj qꞌueen.
18 Tzeyalan paxi:
Tato ay mach slocan sbꞌi jun altar bꞌaj sn̈usjitzꞌa juntzan̈ silabꞌ dꞌa Dios,
malaj tzꞌochi,
xe chi.
Palta axo mach slocan sbꞌi jun silabꞌ ay dꞌa altar chiꞌ,
yovalil scꞌanabꞌajej,
xe chi.
19 Yuj chiꞌ te quistal ex.
Musansatil eyaji.
¿Bꞌaja junoc más nivan yelcꞌoch tze naꞌa?
¿Tom a jun silabꞌ chiꞌ,
mato a jun altar chiꞌ?
A jun silabꞌ chiꞌ,
yujto ayecꞌ dꞌa yibꞌan̈ jun altar chiꞌ,
yujn̈ej chiꞌ yic Dios yaji.
20 Yuj chiꞌ,
tato ay mach slocan sbꞌi altar,
man̈ocn̈ej jun altar chiꞌ sloc sbꞌi.
Slocpax sbꞌi jantacn̈ej tas ayqꞌue dꞌa yibꞌan̈.
21 An̈ejtonaꞌ,
tato ay mach slocan sbꞌi stemplo Dios,
man̈ocn̈ej templo chiꞌ sloc sbꞌi.
Slocpax sbꞌi Dios yedꞌoc,
yujto cajan Dios chiꞌ taꞌ.
22 Tato ay pax mach slocan sbꞌi satchaan̈,
syalelcꞌochi,
van slocan sbꞌi sdespacho Dios.
Slocpax sbꞌi Dios yedꞌoc,
yujto ataꞌ ayecꞌ Dios chiꞌ.
23 A ex cꞌaybꞌum ex dꞌa ley Moisés yedꞌ ex fariseo,
te chuc eyicoꞌ.
Chabꞌ sat ex.
Tzeyacꞌ sdiezmoal juntzan̈ an̈ alavena,
juntzan̈ an̈ anix yedꞌ juntzan̈ an̈ comino.
Palta ay juntzan̈ schecnabꞌil Dios nivan yelcꞌochi,
max e cꞌanabꞌajejlaj.
A checnabꞌil chiꞌ tzꞌalani to yovalil tojol scutej co bꞌa,
tzꞌocꞌ pax co cꞌool dꞌa ebꞌ quetanimail,
scacꞌanpaxelcꞌoch tas scalaꞌ.
Palta inai malaj tzꞌoch juntzan̈ tic dꞌayex.
Octom tze cꞌanabꞌajej juntzan̈ tic,
tze cꞌanabꞌajan pax juntzan̈xo chiꞌ.
24 A ex pax tic,
lajan ex icha junoc mach max uji yilani,
chꞌoxum bꞌe syutej sbꞌa dꞌa junocxo.
An̈ej nocꞌ us tzeyicꞌcanel dꞌa scal tas tzeyuqꞌuej.
Slajvi chiꞌ,
axo nocꞌ camello tze turbꞌati.
25 A ex cꞌaybꞌum ex dꞌa ley Moisés yedꞌ ex fariseo,
te chuc eyicoꞌ.
Chabꞌ sat ex.
A ex tic lajan ex icha junoc mach an̈ej spatic svaso yedꞌ yucꞌabꞌ sbꞌiqueli,
axo yool mictac.
Ichex ton taꞌ a ex tic,
te vachꞌn̈ej tzeyutej e bꞌa dꞌa yichan̈ anima,
palta axo dꞌa elcꞌaltac jun,
ton̈ej tzex och bꞌeyumal yuj eyixtan anima,
yuj eyacꞌan sgana e pecꞌal.
26 A ex fariseo ex tic,
ichato max uji eyilan jabꞌoc.
Bꞌabꞌlaj bꞌoejec e pensar,
ichato chiꞌ,
vachꞌ ol ex aj dꞌa yichan̈ anima.
27 A ex cꞌaybꞌum ex dꞌa ley Moisés yedꞌ ex fariseo,
te chuc eyicoꞌ.
Chabꞌ sat ex.
Lajan ex icha bꞌaj smucchaj ebꞌ chamnac,
sac yilji.
A dꞌa spatic te vachꞌ yilji,
palta axo dꞌa yool,
bꞌudꞌan yuj sbꞌaquil juntzan̈ chamnac chiꞌ yedꞌ juntzan̈xo tas tzon̈ ixtanel dꞌa sat ley.
28 Ichex taꞌ,
yujto a dꞌa yichan̈ ebꞌ anima,
nivanoc vachꞌ tzeyutej e bꞌa,
palta axo e pensar,
chabꞌ sat yaji,
te chuc.
29 A ex cꞌaybꞌum ex dꞌa ley Moisés yedꞌ ex fariseo,
chuc eyicoꞌ.
Chabꞌ sat ex.
A ex tic,
tzato e bꞌoqꞌue bꞌaj mucan ebꞌ schecabꞌ Dios.
An̈ejaꞌ pax juntzan̈ ebꞌ tojol spensar mucan taꞌ,
tzato e bꞌoqꞌue smonumentoal.
30 Tzeyalani:
Qꞌuinaloc ay on̈ ecꞌ dꞌa stiempoal ebꞌ co mam quicham dꞌa pecaꞌ chiꞌ,
man̈ cacꞌnac am och co bꞌa yedꞌ ebꞌ ayic smilannaccham ebꞌ schecabꞌ Dios chiꞌ ebꞌ,
nivanoc xe chi.
31 Palta a tzeyalan icha chiꞌ,
tze chꞌoxeli to yin̈til ex ebꞌ miljinac ebꞌ schecabꞌ Dios chiꞌ.
32 A exxo,
tze vachꞌ aqꞌuejoch stzꞌacubꞌ tas scꞌulejnac ebꞌ e mam eyicham chiꞌ.
33 A ex tic,
te jelan ex dꞌa chucal icha nocꞌ chan.
An̈ejtonaꞌ,
icha pax chiꞌ ebꞌ e mam eyicham chiꞌ.
¿Tom ol yal e colanel e bꞌa dꞌa jun yaelal dꞌa infierno?
34 Abꞌec.
Ol in checbꞌat juntzan̈ ebꞌ schecabꞌ Dios dꞌayex,
ebꞌ ay sjelanil dꞌa yic Dios yedꞌ ebꞌ cꞌaybꞌum.
Ay ebꞌ ol e culusejqꞌuei,
ol e milancham ebꞌ.
Ay ebꞌ ol e macꞌ dꞌa yoltac spatil culto.
Ol laj e pech bꞌeyecꞌ ebꞌ dꞌa junjun chon̈abꞌ.
35 Yuj chiꞌ,
a dꞌa eyibꞌan̈ ol ja schamel masanil ebꞌ tojol spensar ix miljicham dꞌa yolyibꞌan̈qꞌuinal tic,
yictax ix cham vin̈aj Abel,
jun vin̈ tojol spensar,
masanto yic ix miljicham vin̈aj Zacarías yuninal vin̈aj Berequías.
A vin̈aj Zacarías chiꞌ,
ix miljicham vin̈ yuj ebꞌ e mam eyicham chiꞌ dꞌa snan̈al stemplo Dios yedꞌ altar.*
36 Val yel sval dꞌayex,
a schamel junjun ebꞌ chiꞌ,
ol ochcan e muloc a ex ayex ecꞌ ticnaic.
Cusnac Jesús yuj ebꞌ aj Jerusalén
37 A ex val tic ex aj Jerusalén,
chuc eyicoꞌ,
tzꞌocꞌ val in cꞌool eyuuj.
Slaj e miln̈ejcham ebꞌ schecabꞌ Dios.
Axo juntzan̈xo ebꞌ schecjicot dꞌayex yuj Dios,
ton̈ej slaj e julcham ebꞌ dꞌa qꞌuen yax qꞌueen.
Tzijtum elxo in gana tzex vavtejcot dꞌayin,
icha junoc nocꞌ caxlan̈ syavtejcot yuneꞌ,
smoyanqꞌue yuneꞌ nocꞌ chiꞌ,
palta toxon max yal e cꞌool.
38 Abꞌec.
A jun e templo tic,*
ol can tzꞌinan.
39 Sval dꞌayex to man̈xo ol in eyil-laj,
masanto ol eyal icha tic:
Calec vachꞌ lolonel dꞌa jun checbꞌilcot yuj Dios Cajal,
xe chama,
xchi Jesús dꞌa ebꞌ.