2 Yuj chiꞌ ix yalan Jesús dꞌa ebꞌ:

—¿Tzam e na tas yuj icha chiꞌ ix aj ebꞌ vin̈ aj Galilea chiꞌ?

¿Yuj am to te chuc ebꞌ vin̈ dꞌa yichan̈ juntzan̈ ebꞌ yetchon̈abꞌ chiꞌ tze naꞌa?

3 Sval dꞌayex to maay.

A ex tic,

tato max e na e bꞌa yuj e mul,

ol ex champax e masanil.

4 Naeccot yuj 18 ebꞌ anima chamnac yuj jun pat te chaan̈ steel lan̈chajnac dꞌa Siloé.

¿Tas yuj icha chiꞌ ajnac ebꞌ tze naꞌa?

¿Tom te chuc ebꞌ dꞌa yichan̈ juntzan̈xo ebꞌ yetchon̈abꞌ dꞌa Jerusalén chiꞌ?

5 Sval dꞌayex to maay.

A ex tic,

tato max e na e bꞌa yuj e mul,

e masanil ol ex champaxoc,

xchi Jesús dꞌa ebꞌ.

6 Ix lajvi chiꞌ,

ix yalan jun abꞌix tic dꞌa ebꞌ:

—Ay jun vin̈ avabꞌil jun teꞌ higo yuj dꞌa sat sluum.

Ix bꞌat vin̈ yilaꞌ tato ay sat teꞌ,

palta axo ix cꞌoch vin̈,

malaj junoc sat teꞌ ix ilchaj yuj vin̈.

7 Yuj chiꞌ ix yalan vin̈ dꞌa vin̈ smunlaj dꞌa sluum chiꞌ:

Ina yoxilxo abꞌil in cajvi vecꞌ in say junoc sat teꞌ,

palta malaj juneloc svil junoc pitan̈.

Yuj chiꞌ sval dꞌayach,

chꞌaquel teꞌ.

Nabꞌan̈ej tzꞌixtax lum luum macbꞌil tic yuj teꞌ,

xchi vin̈.

8 Axo vin̈ smunlaj chiꞌ ix alani:

Mamin patrón,

tan̈vej junocxo abꞌil.

Ol vacꞌlej in dꞌocan cꞌunbꞌoc lum dꞌa yich teꞌ,

ol vacꞌan och abono dꞌa teꞌ,

9 talaj icha chiꞌ ol yacꞌ sat teꞌ.

Palta tato maay,

ol in chꞌacanel teꞌ icha tzal chiꞌ,

xchi vin̈,

xchi Jesús.

10 A dꞌa scꞌual icꞌoj ip ix cꞌoch Jesús dꞌa yol spatil culto,

yic scꞌaybꞌej ebꞌ anima.

11 Ayecꞌ jun ix ix taꞌ,

18 abꞌilxo yoch jun enemigo dꞌa ix.

Ix coxobꞌican snan̈al ix,

toxon̈ej n̈ojanem ix.

Maxtzac yal-laj stojolbꞌiqꞌue lin̈an ix.

12 Axo yic ix ilchaj ix yuj Jesús,

ix avtajcot ix yuuj,

ix yalan dꞌa ix:

—Ach ix,

toxo ach colchaj dꞌa jun a yaelal tic,

xchi dꞌa ix.

13 Ix yacꞌanecꞌ scꞌabꞌ Jesús dꞌa yibꞌan̈ ix,

val dꞌa jun rato chiꞌ ix tojolbꞌiqꞌue lin̈an ix.

Ix och ijan ix yalan vachꞌ lolonel dꞌa Dios.

14 Axo vin̈ yajal bꞌaj ayecꞌ ebꞌ chiꞌ,

ix cot yoval vin̈ yujto a Jesús ix acꞌan bꞌoxoc scꞌol jun ix ix chiꞌ dꞌa scꞌual icꞌoj ip,

yuj chiꞌ ix yalan vin̈ dꞌa ebꞌ anima ayecꞌ taꞌ:

—Vaquen̈ej cꞌu smoj tzon̈ munlaj dꞌa yol semana.

A dꞌa juntzan̈ cꞌual chiꞌ syal tzex ja e cꞌan bꞌoxoc e cꞌool.

Man̈oc dꞌa scꞌual icꞌoj ip,

xchi vin̈ yajal chiꞌ.

15 Ix tacꞌvi Jesús dꞌa vin̈:

—A ex tic,

chabꞌ sat ex.

Qꞌuinaloc ay junoc nocꞌ e vacax,

ma junoc nocꞌ e bꞌuru etzan dꞌa scꞌual icꞌoj ip,

¿tom man̈ ol eyiqꞌuelta nocꞌ yic bꞌat eyacꞌan yucꞌ aꞌ nocꞌ?

16 A jun ix tic,

yin̈tilal Abraham ix.

Ayxo 18 abꞌil yambꞌil ix yuj vin̈ Satanás,

ichato tzecꞌbꞌil ix yuj vin̈.

¿Tom man̈ smojoc scolchaj ix dꞌa jun syaelal tic yujto scꞌual icꞌoj ip?

xchi Jesús.

17 Ayic ix yalan jun chiꞌ,

masanil ebꞌ ayoch ajcꞌolal dꞌay,

ix te qꞌuixvi ebꞌ.

Palta masanil juntzan̈xo ebꞌ anima,

ix te tzalaj ebꞌ yilan juntzan̈ tas ix scꞌulej Jesús chiꞌ,

yujto te nivan yelcꞌoch juntzan̈ milagro chiꞌ.

18 Ix yalan Jesús:

—¿Chajtil ol aj sqꞌuibꞌ sbꞌisul ebꞌ anima tzꞌoch dꞌa yol scꞌabꞌ Dios tze naꞌa?

Ol val jun abꞌix tic eyabꞌi yic ol nachajel eyuuj.

19 A jun chiꞌ lajan icha sat an̈ mostaza ix yavej jun vin̈ dꞌa sat sluum.

Sqꞌuibꞌ an̈,

lajan tzꞌaj an̈ yedꞌ juntzan̈ teꞌ nivac teꞌ.

Yuj chiꞌ syal svay nocꞌ much dꞌa scꞌabꞌ an̈,

xchi Jesús.

20 Ix yalan junxo abꞌix Jesús:

—Ol val junxo abꞌix dꞌayex chajtil ol aj sqꞌuibꞌ sbꞌisul ebꞌ anima tzꞌoch dꞌa yol scꞌabꞌ Dios.

21 A jun chiꞌ lajan icha jabꞌoc yich pan syacꞌoch jun ix ix dꞌa scal oxeꞌ almul harina.

Spajbꞌi masanil ixim yuj jabꞌ yich pan chiꞌ,

sipji ixim yuuj,

xchi Jesús.

22 An̈ejtonaꞌ van sbꞌat Jesús dꞌa sbꞌeal Jerusalén,

ix laj ecꞌ dꞌa juntzan̈ chon̈abꞌ yedꞌ dꞌa juntzan̈ aldea bꞌaj ix scꞌaybꞌej ebꞌ anima.

23 Ay jun anima ix cꞌanbꞌan dꞌay:

—Mamin,

¿tom jayvan̈n̈ej ebꞌ ol colchajoc?

xchi.

Yuj chiꞌ ix yalan Jesús:

24 —Aqꞌuec eyip eyoch dꞌa jun puerta yunen̈ej,

yujto sval dꞌayex to tzijtum ebꞌ sgana yochi palta max yal-laj yoch ebꞌ.

25 A in tic,

icha yajal pat vaji.

Tato tzin qꞌue lin̈an tzin macan in pat yacbꞌan ayexto ecꞌ dꞌa stiꞌ teꞌ pat chiꞌ,

ol ex avajochoc,

Mamin,

jac on̈ ochi,

xe chama.

Axo ol valani:

Man̈ vojtacoc mach ex,

xin chama.

26 Palta a on̈ tic vanac on̈,

cucꞌnac aꞌ edꞌoc.

A cꞌaybꞌejnac on̈ dꞌa yoltac calle,

xe cham dꞌayin.

27 Axo ol valan dꞌayex:

Toxo ix val dꞌayex,

man̈ ex vojtacoc.

Elan̈ec e masanil,

yujto an̈ej chucal tze cꞌulej,

xin cham dꞌayex.

28 Ato taꞌ ol ex siqꞌuicꞌoc eyoqꞌui ayic ol eyilani,

ayecꞌ vin̈aj Abraham,

vin̈aj Isaac,

vin̈aj Jacob yedꞌ smasanil ebꞌ schecabꞌ Dios ayxo ecꞌ dꞌa yol scꞌabꞌ Dios,

a exxo tic,

ayex can elta dꞌa spatic.

29 Yujto ay ebꞌ ol cot dꞌa junjun chon̈abꞌ,

bꞌaj sja cꞌu,

bꞌaj tzꞌem cꞌu,

dꞌa norte yedꞌ dꞌa sur,

ol em cꞌojan ebꞌ sva dꞌa smexa ebꞌ ayxo och dꞌa yol scꞌabꞌ Dios chiꞌ.

30 Ay ebꞌ malaj yelcꞌoch ticnaic,

axo dꞌa jun tiempoal chiꞌ nivan ol aj yelcꞌoch ebꞌ.

Ay pax ebꞌ nivan yelcꞌoch ticnaic,

axo dꞌa jun tiempoal chiꞌ,

malaj jabꞌoc ol aj yelcꞌoch ebꞌ,

xchi Jesús.

31 An̈ejaꞌ dꞌa jun cꞌu chiꞌ,

ix cꞌoch juntzan̈ ebꞌ vin̈ fariseo dꞌa Jesús,

ix yalan ebꞌ vin̈:

—Elan̈ dꞌa tic,

yujto sgana vin̈aj Herodes tzach smilchamoc,

xchi ebꞌ vin̈ dꞌay.

32 Ix tacꞌvi Jesús chiꞌ dꞌa ebꞌ vin̈:

—A vin̈ chiꞌ,

lajan vin̈ icha nocꞌ vaax,

¿toc ay yelcꞌoch nocꞌ?

Ixiquec,

alec dꞌa vin̈:

A ticnaic yedꞌ qꞌuicꞌan sviqꞌuel ebꞌ enemigo dꞌa ebꞌ anima,

ol laj bꞌoxoc ebꞌ penaay vuuj.

Axo chabꞌej tzin vachꞌ bꞌoan in munlajel tic,

xchi Jesús,

xe chi dꞌa vin̈.

33 Palta a in tic,

an̈ejaꞌ ol in bꞌat ticnaic,

qꞌuicꞌan yedꞌ chabꞌej,

yujto an̈ej dꞌa Jerusalén tzon̈ miljicham a on̈ schecabꞌ on̈ Dios tic.

34 A ex tic ex aj Jerusalén,

chuc eyicoꞌ,

tzꞌocꞌ val in cꞌol eyuuj.

Tze miln̈ejcham ebꞌ schecabꞌ Dios.

Axo juntzan̈xo ebꞌ schecjicot yuj Dios dꞌayex,

ton̈ej slaj e julcham ebꞌ dꞌa qꞌuen yax qꞌueen.

Tzijtum elxo in gana tzex vavtejcot dꞌayin,

icha junoc nocꞌ caxlan̈ syavtejcot yuneꞌ,

smoyqꞌue dꞌa yalan̈ scꞌaxil,

palta max yal e cꞌool tzex coti.

35 Abꞌec.

A jun e templo tic ol can tzꞌinan,^*

yujto sval dꞌayex to man̈xo ol in eyil-laj,

masanto ol eyal icha tic:

Calec vachꞌ lolonel dꞌa jun checbꞌilcot yuj Dios Cajal,

xe chama,

xchi Jesús dꞌa ebꞌ.