Max yal co chꞌolbꞌitan tas yaj junocxo anima
(Lc 6.37-38, 41-42)
7
Man̈ e chꞌolbꞌitej tas yaj junoc anima yic man̈ ol ex chꞌolbꞌitaj pax yuj co Mam Dios.
2 Yujto icha tzꞌaj e chꞌolbꞌitan tas yaj ebꞌ eyetanimail chiꞌ,
icha chiꞌ ol ex yutoc Dios ex schꞌolbꞌitani.
A eyechlabꞌ tzeyacꞌlabꞌej,
a ol acꞌlabꞌaj pax dꞌayex.
3 Qꞌuinaloc ay junoc eyetanimail sbꞌat jabꞌoc cꞌalem dꞌa yol sat,
a exxo tic ay junoc patzabꞌ ayoch dꞌa yol e sat,
tato max e na to ayoch jun patzabꞌ chiꞌ dꞌa yol e sat,
¿tom ol yal eyilan jabꞌ cꞌalem aybꞌat dꞌa yol sat junxo chiꞌ?*
4 Tato ayoch jun patzabꞌ chiꞌ dꞌa yol e sat,
¿tom ol yal eyalan dꞌa jun chiꞌ:
Aybꞌat jun cꞌalem dꞌa yol a sat,
in gana svicꞌqꞌueta dꞌayach,
tom xe chi dꞌay?
5 Tato icha chiꞌ tzeyutej eyalani,
chabꞌ sat ex.
Yovalil tze bꞌabꞌlaj iqꞌuejcanel jun patzabꞌ chiꞌ dꞌa yol e sat.
Icha chiꞌ bꞌian,
ol yal eyilani,
axo eyicꞌanelta jun cꞌalem chiꞌ dꞌa yol sat jun eyetanimail chiꞌ.
6 A slolonel Dios yicn̈ej yaji,
lajan icha juntzan̈ ton̈ perla* sbꞌi,
te caro stojol.
Yuj chiꞌ,
max yal cacꞌan dꞌa ebꞌ malaj yelcꞌoch Dios dꞌa sat.
Yujto a ebꞌ chiꞌ,
lajan yaj ebꞌ icha juntzan̈ nocꞌ tzꞌiꞌ scot dꞌayon̈,
tzon̈ schiꞌan nocꞌ.
Ay pax ebꞌ icha juntzan̈ nocꞌ chitam,
ton̈ej slaj steqꞌuem tas scacꞌ dꞌay.
Cꞌanec, sayec, avajan̈ecoch dꞌa stiꞌ puerta
(Lc 11.9-13; 6.31)
7 Cꞌanec,
ol acꞌjoc dꞌayex.
Sayec,
ol ilchaj eyuuj.
Avajan̈ecoch dꞌa stiꞌ puerta,
ol jacchaj teꞌ dꞌayex.
8 Yujto a ebꞌ scꞌanani,
ol scha ebꞌ.
Axo ebꞌ sayani,
ol ilchaj yuj ebꞌ.
An̈ejtonaꞌ ebꞌ tzꞌavajoch dꞌa stiꞌ puerta,
ol jacjoc teꞌ dꞌa ebꞌ.
9 Qꞌuinaloc ayex,
a ebꞌ eyuninal scꞌanan yooch dꞌayex,
¿tom a junoc qꞌueen ol eyacꞌ dꞌa ebꞌ?
10 Tato a junoc chay scꞌan ebꞌ dꞌayex,
¿tom a junoc nocꞌ chan tzeyacꞌ dꞌa ebꞌ?
11 A ex tic,
vachꞌchom malaj e vachꞌil,
palta eyojtac tas tzeyutej eyacꞌan juntzan̈ tas vachꞌ dꞌa ebꞌ eyuninal.
Ocxom co Mam Dios ayecꞌ dꞌa satchaan̈,
¿tom man̈ ol yacꞌ junoc vachꞌil dꞌa ebꞌ scꞌanan dꞌay?
12 E gana te vachꞌ syutej sbꞌa ebꞌ eyetanimail dꞌayex.
Ichaocabꞌ pax taꞌ tzeyutej e bꞌa dꞌa ebꞌ.
Yujto icha chiꞌ syal juntzan̈ ley Moisés aycani yedꞌ juntzan̈ chꞌan̈ uum tzꞌibꞌabꞌilcan yuj ebꞌ schecabꞌ Dios dꞌa pecaꞌ.
A jun icha puerta yunen̈ej sat
(Lc 13.24)
13 Ay jun icha puerta yunen̈ej sat,
ataꞌ slaj ex ochi.
Ay pax junxo icha puerta te levan yedꞌ jun icha nivan bꞌe te levan,
palta yic syaelal.
Yuj chiꞌ man̈ jantacoc ebꞌ anima sbꞌatcan taꞌ.
14 Palta axo jun icha puerta yic qꞌuinal,
yunen̈ej yedꞌ jun bꞌe scꞌoch taꞌ icha utzin bꞌe.
Yuj chiꞌ,
malaj val ebꞌ anima sbꞌat taꞌ.
A co bꞌeybꞌal lajan icha sat te teꞌ
15 Ay ebꞌ nivanoc syaloch sbꞌa schecabꞌoc Dios.
Tzeyil val e bꞌa dꞌa ebꞌ,
yujto a ol cꞌoch ebꞌ dꞌayex,
nivanoc nanam ol yutoc sbꞌa ebꞌ,
icha junoc nocꞌ calnel.
Palta axo spensar ebꞌ,
te chuc,
icha nocꞌ oques te ov.
16 Yujn̈ej sbꞌeybꞌal ebꞌ,
ol eyojtaquejel ebꞌ,
icha cojtacanel juntzan̈ te teꞌ yuj sat.
¿Tom syal quicꞌanelta sat teꞌ uva dꞌa teꞌ qꞌuiix?
¿tom higo sat teꞌ syacꞌaꞌ?
17 Yujto a juntzan̈ snunal te teꞌ vachꞌ,
vachꞌ sat syacꞌaꞌ.
Yedꞌ pax juntzan̈ snunal te teꞌ chuc,
chucn̈ej sat syacꞌaꞌ.
18 A junoc snunal te teꞌ vachꞌ max yacꞌ junoc sat teꞌ chuc.
Yedꞌ pax juntzan̈ snunal te teꞌ chuc,
max yal yacꞌan junoc sat vachꞌ.
19 Icha juntzan̈ teꞌ chuc sat syacꞌaꞌ,
schꞌacjieli,
syumjibꞌat dꞌa yol cꞌacꞌ,
icha chiꞌ ol aj ebꞌ malaj svachꞌil sbꞌeybꞌal.
20 Yuj chiꞌ,
a ebꞌ nivanoc syacꞌoch sbꞌa schecabꞌoc Dios,
yujn̈ej sbꞌeybꞌal ebꞌ chiꞌ ol eyojtacanel ebꞌ.
21 Ay ebꞌ ol alan dꞌayin:
Ach Mamin Vajal,
xcham ebꞌ,
palta man̈ masaniloc ebꞌ ol och dꞌa yol scꞌabꞌ Dios aj satchaan̈.
Palta an̈ej val ebꞌ scꞌanabꞌajan tas sgana in Mam ayecꞌ dꞌa satchaan̈ chiꞌ,
an̈ej val ebꞌ ol cꞌochoc.
22 Ato yic ol ja jun cꞌual chiꞌ,
tzijtum ebꞌ ol alan dꞌayin:
Mamin,
Mamin calnac val el a lolonel.
Yuj a poder quicꞌnaquel juntzan̈ enemigo dꞌa ebꞌ anima.
An̈ejtonaꞌ yuj a poder,
tzijtum milagro co chꞌoxnac,
xcham ebꞌ dꞌayin.
23 Palta ol valan dꞌa ebꞌ:
Toxon man̈ ex vojtacoc.
Elan̈ec dꞌa in tzꞌey,
yujto an̈ej chucal ix laj e cꞌulej,
xin cham dꞌa ebꞌ.
Yovalil sco cꞌanabꞌajej icha syal Jesús
24 A ebꞌ tzꞌabꞌan in lolonel,
tato scꞌanabꞌajej ebꞌ tas svalaꞌ,
lajan ebꞌ icha junoc vin̈ jelan ix bꞌoan spat dꞌa yibꞌan̈ qꞌueen.
25 Axo ix yacꞌan jun yax n̈abꞌ,
ix ja aꞌ elumaꞌ,
ix ochpax chulan jun icꞌ te ov dꞌa jun pat chiꞌ.
Palta maj telvoclaj,
yujto a dꞌa yibꞌan̈ qꞌueen bꞌobꞌilqꞌuei.
26 Palta ay juntzan̈xo ebꞌ tzꞌabꞌan in lolonel,
max scꞌanabꞌajej ebꞌ tas svalaꞌ.
Lajan ebꞌ icha junoc vin̈ malaj spensar,
ix sbꞌoqꞌue spat dꞌa yibꞌan̈ qꞌuen arena.
27 Axo ix yacꞌan jun yax n̈abꞌ.
Ix ja aꞌ elumaꞌ,
ix och pax chulan icꞌ te ov dꞌa spat vin̈ chiꞌ,
yuj chiꞌ ix cꞌan̈ val stelvi,
xchi Jesús dꞌa ebꞌ.