Yalnac Jesús yuj scꞌual icꞌoj ip
6
A dꞌa jun scꞌual icꞌoj ip ix ecꞌ Jesús dꞌa jun bꞌe dꞌa scal juntzan̈ ixim trigo yedꞌ ebꞌ scꞌaybꞌum.
Axo ebꞌ scꞌaybꞌum chiꞌ,
ix scꞌutzelta sjolom ixim ebꞌ,
ix svuchanel ixim ebꞌ,
ix scꞌuxan ixim ebꞌ.
Lucas 6.1-16
—¿Tas yuj tze cꞌulej junoc tas to man̈ smojoc scꞌulaj dꞌa scꞌual icꞌoj ip?
xchi ebꞌ vin̈.
3 Ix tacꞌvi Jesús dꞌa ebꞌ vin̈ icha tic:
—¿Tom manta bꞌaj tzeyilaꞌ tas scꞌulejnac vin̈aj David yedꞌ ebꞌ ajun yedꞌoc ayic yochnac svejel ebꞌ jun el?
4 Xidꞌnaquecꞌ vin̈ dꞌa scajnubꞌ Dios,
svanac juntzan̈ ixim pan vin̈ yicn̈ej Dios yaji,
yacꞌannac pax ixim vin̈ dꞌa ebꞌ ajun yedꞌoc.
A juntzan̈ pan chiꞌ,
an̈ej ebꞌ vin̈ sacerdote ay yalan yic svaani,
palta maj ochlaj smul vin̈aj David yedꞌ ebꞌ ajun yedꞌ chiꞌ,
xchi dꞌa ebꞌ vin̈.
5 Ix yalanxi dꞌa ebꞌ vin̈:
—A in tic Acꞌbꞌil in cot yuj Dios voch animail,
yuj chiꞌ syal valani tas smoj sco cꞌulej dꞌa scꞌual icꞌoj ip.
A jun vin̈ sicbꞌinaquel scꞌabꞌ
6 Dꞌa junxo scꞌual icꞌoj ip,
ix och Jesús dꞌa yol spatil culto,
ix och ijan scꞌaybꞌan ebꞌ.
Ataꞌ ay jun vin̈ sicbꞌinaquel svachꞌ cꞌabꞌ.
7 Axo ebꞌ vin̈ cꞌaybꞌum dꞌa ley Moisés yedꞌ ebꞌ vin̈ fariseo,
van smaclan ebꞌ vin̈ yilaꞌ tato ol bꞌoxoc scꞌabꞌ jun vin̈ chiꞌ yuj Jesús dꞌa scꞌual icꞌoj ip chiꞌ,
yic vachꞌ syacꞌoch ebꞌ vin̈ dꞌa yibꞌan̈.
8 Palta axo Jesús,
yojtacxo tas van snaan ebꞌ vin̈,
yuj chiꞌ ix yalan dꞌa vin̈ sicbꞌinaquel scꞌabꞌ chiꞌ:
—Qꞌuean̈ lin̈an dꞌa co cal tic,
xchi dꞌa vin̈.
Ix qꞌue lin̈an vin̈ bꞌian.
9 Ix yalan Jesús dꞌa ebꞌ smasanil:
—Tzin cꞌanbꞌej dꞌayex:
¿Tas junoc smoj co cꞌulan dꞌa scꞌual icꞌoj ip?
¿Tzam yal co cꞌulan juntzan̈ tas vachꞌ,
mato a juntzan̈ chucal?
¿Tzam yal co colan junoc penaay,
mato vachꞌ sco macꞌchamoc?
xchi dꞌa ebꞌ.
10 Ix lajvi chiꞌ,
ix och qꞌuelan Jesús dꞌa ebꞌ oyanecꞌ chiꞌ,
ix yalan dꞌa vin̈ penaay chiꞌ:
—Aqꞌuel lian a cꞌabꞌ chiꞌ,
xchi dꞌa vin̈.
Ix slianel scꞌabꞌ vin̈ chiꞌ,
ix bꞌoxican vin̈.
11 Axo ebꞌ vin̈ cꞌaybꞌum dꞌa ley chiꞌ yedꞌ ebꞌ vin̈ fariseo,
ix te cot yoval ebꞌ vin̈,
ix och ijan ebꞌ vin̈ scꞌanbꞌan dꞌay junjun tas vachꞌ syutej ebꞌ vin̈ yicꞌancot dꞌa yibꞌan̈ Jesús chiꞌ.
A Jesús ix sicꞌanel ebꞌ lajchavan̈ scꞌaybꞌum
12 A dꞌa juntzan̈ cꞌual chiꞌ,
ix bꞌat Jesús dꞌa jun tzalan lesal.
Jun acꞌval ix lesalvi dꞌa Dios.
13 Axo ix sacbꞌi ix sicꞌanel ebꞌ vin̈ scꞌaybꞌum,
ix sicꞌanelta lajchavan̈ ebꞌ vin̈.
A ebꞌ vin̈ chiꞌ,
ix yacꞌoch schecabꞌoc.
14 Aton ebꞌ vin̈ tic:
Vin̈aj Simón,
scuchan pax Pedro yuj Jesús,
vin̈aj Andrés yucꞌtac vin̈aj Simón chiꞌ,
vin̈aj Jacobo,
vin̈aj Juan,
vin̈aj Felipe yedꞌ vin̈aj Bartolomé.
15 Vin̈aj Mateo,
vin̈aj Tomás,
vin̈aj Jacobo yuninal vin̈aj Alfeo,
vin̈aj Simón tzꞌalji pax Zeloteal.
16 Vin̈aj Judas,
yucꞌtac vin̈aj Jacobo yedꞌ vin̈aj Judas aj Queriot,
aton vin̈ acꞌjinacoch Jesús dꞌa yol scꞌabꞌ chamel dꞌa slajvubꞌalxo.
Aton ebꞌ vin̈ tic ix siqꞌuelta Jesús,
yic tzꞌoch ebꞌ vin̈ schecabꞌoc.
Tzijtum ebꞌ anima ix scꞌaybꞌej Jesús
17 Ix emixta Jesús yedꞌ ebꞌ scꞌaybꞌum dꞌa jun tzalan chiꞌ,
ix och vaan dꞌa jun acꞌlic.
Ataꞌ ix smolbꞌej sbꞌa jantac ebꞌ anima tzacꞌanoch yuuj,
yedꞌ pax ebꞌ cotnac dꞌa yol yic Judea,
dꞌa chon̈abꞌ Jerusalén yedꞌ dꞌa stitac aꞌ mar dꞌa yol yic Tiro yedꞌ Sidón.
Ix javi ebꞌ smaclej yabꞌ tas syal Jesús chiꞌ,
yic sbꞌoxipaxcan ebꞌ penaay.
Lucas 6.17-36
18 A ebꞌ tzꞌixtaj yuj ebꞌ enemigo,
ix bꞌoxipaxcan ebꞌ.
19 Masanil ebꞌ sgana syamlan Jesús,
yujto sbꞌoxican scꞌool ebꞌ smasanil yuj spoder.
Ebꞌ vachꞌ yicoꞌ yedꞌ ebꞌ chuc yicoꞌ
20 Axo Jesús ix ecꞌ qꞌueleloc dꞌa ebꞌ scꞌaybꞌum,
ix yalan dꞌa ebꞌ icha tic:
—A ex mebꞌaꞌ ex,
te vachꞌ eyicoꞌ,
yujto ayexxo och dꞌa yol scꞌabꞌ Dios.
21 A ex ay e vejel ticnaic,
te vachꞌ eyicoꞌ,
yujto ol ex bꞌudꞌjoccanoc.
A ex tzex oqꞌui,
te vachꞌ eyicoꞌ yujto slajvi chiꞌ ol ex tzevajoc.
22 Vujn̈ej a in Acꞌbꞌil in cot yuj Dios voch animail tic,
ol chichon scꞌool ebꞌ anima dꞌayex,
ol ex spechelta ebꞌ dꞌa scal,
ol ex sbꞌuchan ebꞌ.
Te chuc ol yal ebꞌ dꞌa e patic vuuj.
Palta ayic ol ex yutan ebꞌ icha chiꞌ,
te vachꞌ eyicoꞌ.
23 Tzex te qꞌuechaan̈,
tzex te tzalaji,
yujto te nivan spac ol e cha dꞌa satchaan̈,
yujto icha chiꞌ utabꞌil ebꞌ schecabꞌ Dios dꞌa pecaꞌ yuj smam yicham ebꞌ anima tic.
24 Obꞌiltac ex bꞌeyum ex,
yujto toxo ix eyil svachꞌil dꞌa tic.
25 A ex bꞌudꞌann̈ej e cꞌool ticnaic,
te chuc eyicoꞌ,
yujto ol ja jun tiempoal ol te och e vejel.
Obꞌiltac ex,
mach ex tzex tzevaji,
ol ex ocꞌ pax yuj cuscꞌolal.
26 Ayic syalan ebꞌ anima smasanil to vachꞌ ex,
te chuc eyicoꞌ,
yujto icha chiꞌ ix utaj ebꞌ ix yaloch sbꞌa schecabꞌoc Dios dꞌa pecaꞌ yuj ebꞌ smam yicham ebꞌ anima tic.
Sco xajanej ebꞌ cajcꞌool
(Mt 5.38-48; 7.12)
27 Palta a exxo tzeyabꞌ tas sval tic,
sval dꞌayex:
Xajanejec ebꞌ eyajcꞌool,
vachꞌ tzeyutej e bꞌa dꞌa ebꞌ tzex chacaneli.
28 Tato ay ebꞌ scꞌanancot yaelal dꞌa eyibꞌan̈,
a exxo,
a svachꞌcꞌolal Dios tze cꞌancot dꞌa yibꞌan̈ ebꞌ.
Tato ay ebꞌ tzex bꞌuchani,
tzex lesalvi yuj ebꞌ.
29 Tato ay ebꞌ stzꞌitanbꞌat junoc spacꞌul e tiꞌ,
meltzitejecbꞌat junxo pacꞌan̈ dꞌa ebꞌ.
Tato ay ebꞌ tzꞌicꞌanecꞌ e chumpa,
aqꞌuec pax bꞌat e camix dꞌa ebꞌ.
30 Tato ay ebꞌ scꞌanan junoc tas dꞌayex,
tzeyacꞌn̈ej dꞌa ebꞌ.
Tato ay ebꞌ tzꞌicꞌanecꞌ junoc tas eyicoꞌ,
man̈xo e cꞌanxi meltzaj dꞌa ebꞌ.
31 Tato tze nibꞌej vachꞌ syutej sbꞌa ebꞌ eyetanimail dꞌayex,
icha pax chiꞌ tzeyutej e bꞌa dꞌa ebꞌ.
32 Tato an̈ej ebꞌ anima xajan ex yuuj tze xajanej,
¿bꞌaja svachꞌil jun tze cꞌulej chiꞌ?
An̈ejaꞌ ebꞌ chuc icha pax chiꞌ syutej sbꞌa ebꞌ.
33 Tato an̈ej ebꞌ vachꞌ syutej sbꞌa dꞌayex bꞌaj vachꞌ tzeyutej e bꞌa,
¿bꞌaja svachꞌil jun tze cꞌulej chiꞌ?
An̈ejaꞌ ebꞌ chuc icha pax chiꞌ scꞌulej ebꞌ.
34 Tato ay ebꞌ scꞌanan sqꞌuex junoc tas dꞌayex,
tato an̈ej dꞌa ebꞌ syal yacꞌanxi dꞌayex,
an̈ej dꞌa ebꞌ tzeyacꞌaꞌ ¿tom vachꞌ tze cꞌulej icha chiꞌ?
Icha chiꞌ syutej sbꞌa ebꞌ chuc yacꞌan junoc tas majanil dꞌa ebꞌ yetchucal,
yujto sna ebꞌ to ol schapax tas ebꞌ dꞌa ebꞌ.
35 Palta a ex tic,
xajanejec ebꞌ eyajcꞌool,
vachꞌ tzeyutej e cꞌool.
Tato ay junoc tas tzeyacꞌ majanil,
man̈ e na to ol tupjoc dꞌayex.
Tato icha chiꞌ tzeyutej e bꞌa,
nivan spac ol e chaꞌa.
Ol checlajeloc to yuninal ex Dios nivan yelcꞌochi,
yujto an̈ejaꞌ icha chiꞌ Dios chiꞌ,
vachꞌ syutej sbꞌa dꞌa ebꞌ max yacꞌ yuj diosal yedꞌ pax dꞌa ebꞌ chuc scꞌulej dꞌay.
36 Ocꞌocabꞌ e cꞌool dꞌa ebꞌ eyetanimail,
icha tzꞌaj yocꞌ scꞌol Dios dꞌayex.
Man̈ e chꞌolbꞌitej tas yaj junocxo
(Mt 7.1-5)
37 Man̈ e chꞌolbꞌitej tas yaj junocxo mach,
yuj chiꞌ man̈ ol ex schꞌolbꞌitejpax Dios.
Man̈ eyacꞌbꞌat dꞌa yibꞌan̈ junocxo mach,
yic vachꞌ a Dios man̈ ol acꞌanbꞌat dꞌa eyibꞌan̈.
Tzeyacꞌ nivancꞌolal,
tato icha chiꞌ,
axo Dios ol acꞌan lajvoc e mul.
Lucas 6.37-49
38 Aqꞌuec tas tzꞌoch yuj junocxo mach.
Axo Dios ol acꞌanpax dꞌayex.
Icha junoc mucuc tzꞌoch echlabꞌil,
ste bꞌudꞌji,
tenbꞌil tzꞌaji,
man̈xa bꞌaj syal yem jabꞌocxo,
icha chiꞌ ol yutoc Dios yacꞌan tastac dꞌayex.
Yujto icha tzeyutej eyacꞌan dꞌa ebꞌ eyetanimail,
icha pax chiꞌ ol yutoc Dios yacꞌan dꞌayex.
39 Ix yal jun chꞌoxnabꞌil tic Jesús:
—Qꞌuinaloc a junoc mach max uji yilani,
a schꞌoxan bꞌe dꞌa junocxo mach max uji pax yilani,
tato icha chiꞌ,
syetbꞌatejbꞌat sbꞌa ebꞌ dꞌa junoc jul.
40 Malaj junoc mach van scꞌaybꞌaji,
ecꞌto dꞌa yichan̈ jun scꞌaybꞌumal chiꞌ,
vachꞌchom ayic toxo ix yilel smasanil,
lajan tzꞌaj yedꞌ scꞌaybꞌumal chiꞌ.
41 Qꞌuinaloc ay junoc eyetanimail,
aybꞌat jabꞌoc cꞌalem dꞌa yol sat,
a exxo a junoc teꞌ patzabꞌ* ayoch dꞌa yol e sat.
Tato max eyilaꞌ to ayoch jun teꞌ chiꞌ dꞌa yol e sat,
¿tom ol yal eyilan jabꞌ cꞌalem aybꞌat dꞌa yol sat jun eyetanimail chiꞌ?
42 Tato ayoch jun teꞌ patzabꞌ chiꞌ dꞌa yol e sat,
¿tom smoj eyalan dꞌa junxo chiꞌ:
Ina yajelta jabꞌ cꞌalem dꞌa yol a sat chiꞌ,
tzin nibꞌej sviqꞌuelta dꞌayach,
tom xe chi dꞌay?
Tato icha chiꞌ tzeyutej eyalani,
te chabꞌ sat ex.
Yovalil tze bꞌabꞌlaj iqꞌuejelta jun teꞌ patzabꞌ chiꞌ dꞌa yol e sat.
Ichato chiꞌ,
syal eyicꞌanelta jabꞌ cꞌalem dꞌa yic jun eyetanimail chiꞌ.
A te teꞌ tzꞌojtacajel yuj sat
43 Malaj junoc te teꞌ vachꞌ chuclaj sat syacꞌaꞌ.
Malaj pax junoc te teꞌ chuc vachꞌ sat syacꞌaꞌ.
44 Yujto a sat junjun teꞌ,
a tzꞌacꞌan cojtaquejeli tas yaj junjun teꞌ.
Qꞌuinaloc ay junoc teꞌ qꞌuiix,
¿tom higo sat teꞌ syacꞌaꞌ?
Qꞌuinaloc ay junoc teꞌ mequiix,
¿tom uva sat teꞌ syacꞌaꞌ?
45 Icha pax chiꞌ ebꞌ anima vachꞌ,
vachꞌ tas syal ebꞌ,
yujto a tas vachꞌ sna ebꞌ.
A ebꞌ anima chuc,
chuc tas syal ebꞌ,
yujto chuc tas sna ebꞌ.
A tas scalaꞌ,
a dꞌa co pensar scoti.
Chabꞌ yich pat ayemi
46 ¿Tas yuj tzeyal dꞌayin:
Ach Mamin Vajal,
xe chi,
palta max e cꞌanabꞌajej tas svalaꞌ?
47 Ol val dꞌayex chajtil yaj ebꞌ sjavi dꞌayin,
syabꞌan in lolonel ebꞌ,
scꞌanabꞌajan pax ebꞌ:
48 Lajan ebꞌ icha jun vin̈ ix sjuc yedꞌtal spat masanto ix cꞌoch bꞌaj ay lum stzatzil.*
Ichato chiꞌ ix sbꞌoanqꞌue spat vin̈ chiꞌ.
Axo ix javi aꞌ nivac elumaꞌ dꞌa jun pat chiꞌ,
maj ibꞌxoclaj yuj aꞌ,
yujto a dꞌa lum stzatzil ayem yich.
49 Axo ebꞌ tzꞌabꞌan in lolonel,
palta max scꞌanabꞌajej ebꞌ,
lajan ebꞌ icha jun vin̈ ix sbꞌoqꞌue spat bꞌaj nabꞌa tza luum,
man̈ tzatzoclaj ix ajem yich.
Axo yic ix javi aꞌ nivac elumaꞌ dꞌa jun pat chiꞌ,
ix em lan̈najoc,
man̈xa jabꞌoc tas ix cani,
xchi Jesús dꞌa ebꞌ.