Ix acꞌji proval Jesús yuj vin̈ diablo
4
Axo Jesús ix icꞌjibꞌat yuj Yespíritu Dios dꞌa taquin̈ luum.
Ix cꞌoch taꞌ yic tzꞌacꞌji proval yuj vin̈ diablo.
2 40 cꞌual majxo valaj Jesús chiꞌ,
ichato chiꞌ ix och svejel.
3 Axo vin̈ diablo ix cꞌoch yacꞌlan smontanbꞌat dꞌa chucal,
ix yalan vin̈:
—Ina Yuninal ach Dios,
al dꞌa juntzan̈ qꞌueen tic yic tzꞌoch qꞌuen panil,
xchi vin̈ dꞌay.
4 Palta ix yalan Jesús:
—A dꞌa Slolonel Dios Tzꞌibꞌabꞌilcani,
a tzꞌalan icha tic:
Man̈ yujocn̈ej tas svaji ay co qꞌuinal.
Palta yuj jantacn̈ej tas syal Dios ay co qꞌuinal,
xchicani,
xchi Jesús.
5 Ix lajvi chiꞌ,
ix icꞌjibꞌat yuj vin̈ diablo chiꞌ dꞌa jun chon̈abꞌ yicn̈ej Dios yaji,
aton Jerusalén.
Ix yicꞌanqꞌue Jesús chiꞌ vin̈ dꞌa schon stemplo Dios.
6 Ix yalan vin̈ dꞌay icha tic:
—Ina Yuninal ach Dios,
eman̈ chennaj dꞌa sat luum chiꞌ,
yujto syalcan dꞌa Slolonel Dios Tzꞌibꞌabꞌilcani:
Ol yal Dios dꞌa ebꞌ yángel,
yic tzach stan̈vej ebꞌ.
Ol ach quetzchajqꞌue yuj ebꞌ,
yic vachꞌ man̈ ol a tenoch oc dꞌa qꞌuen qꞌueen,
xchicani,
xchi vin̈ diablo chiꞌ.
7 Ix tacꞌvi pax Jesús chiꞌ:
—Palta syalpax icha tic dꞌa Slolonel Dios Tzꞌibꞌabꞌilcani:
Man̈ in eyacꞌ proval,
yujto e Yajal in,
e Diosal in,
xchicani,
xchi dꞌa vin̈.
8 Ix yicꞌanxibꞌat Jesús chiꞌ vin̈ diablo,
ix cꞌoch ebꞌ dꞌa jun nivan tzalan.
Ix schꞌoxan masanil nación vin̈ dꞌa yolyibꞌan̈qꞌuinal tic dꞌay.
Ix schꞌoxan vin̈ to te nivan yelcꞌoch svachꞌil.
9 Ix lajvi chiꞌ,
ix yalan vin̈:
—Masanil juntzan̈ tic,
ol vacꞌ iquej,
tato tzach em cuman dꞌayin,
tzalan a bꞌa dꞌayin,
xchi vin̈.
10 Palta ix yalan Jesús dꞌa vin̈:
—Ach Satanás,
elan̈ dꞌa in tzꞌey.
Yujto icha tic syal dꞌa Slolonel Dios Tzꞌibꞌabꞌilcani:
A dꞌayin tzeyal e bꞌa,
yujto e Yajal in,
e Diosal in.
A inn̈ej tzin eyacꞌ servil,
xchi Dios,
xchi Jesús chiꞌ.
11 Yuj chiꞌ,
ix actajcan Jesús chiꞌ yuj vin̈.
Axo ebꞌ ángel ix ul acꞌan servil.
Ix schael yich yopisio Jesús dꞌa Galilea
12 Axo yic ix yabꞌan Jesús to preso yaj vin̈aj Juan,
ix bꞌatxi dꞌa yol yic Galilea.
13 Man̈oc dꞌa Nazaret ix cꞌochi,
palta a dꞌa Capernaum,
ataꞌ ix cꞌoch cajan.
A jun chon̈abꞌ chiꞌ,
a dꞌa stiꞌ aꞌ n̈ajabꞌ ay.
A dꞌa yol smacbꞌen ebꞌ yin̈tilal vin̈aj Zabulón yedꞌ vin̈aj Neftalí,
ataꞌ ay.
14 Icha chiꞌ ix aj yelcꞌoch tas tzꞌibꞌabꞌilcan yuj vin̈aj Isaías schecabꞌ Dios dꞌa pecaꞌ,
xchi icha tic:
15 A dꞌa yol yic Zabulón yedꞌ dꞌa yol yic Neftalí,
a dꞌa stiꞌ aꞌ n̈ajabꞌ ataꞌ ay,
dꞌa scꞌaxepalecꞌ aꞌ nivan Jordán.
Ataꞌ ay jun chon̈abꞌ Galilea sbꞌi,
aton bꞌaj cajan ebꞌ man̈ israeloc.
16 A ebꞌ anima chiꞌ,
ayto ecꞌ ebꞌ dꞌa qꞌuicꞌalqꞌuinal,*
palta ol yil jun saquilqꞌuinal ebꞌ te nivan yelcꞌochi.
A ebꞌ ayecꞌ taꞌ,
ichato chamnac ebꞌ,
palta ol cꞌoch saquilqꞌuinal dꞌa ebꞌ,
xchi dꞌa Slolonel Dios chiꞌ.
17 Axo yic ix cꞌoch Jesús chiꞌ taꞌ,
ix och ijan yalanel slolonel Dios dꞌa ebꞌ anima chiꞌ,
ix yalan icha tic:
—Naec e bꞌa,
yujto toxo ol vachꞌ och Dios aj satchaan̈ Yajalil,
xchi dꞌa ebꞌ.
Ix avtaj chan̈van̈ ebꞌ yamum chay yuj Jesús
18 Ayic van sbꞌeyecꞌ Jesús dꞌa stiꞌ aꞌ n̈ajabꞌ yic Galilea,
ix yilani ayecꞌ vin̈aj Simón scuch pax Pedro yedꞌ jun vin̈ yucꞌtac vin̈ scuchan Andrés.
Van yacꞌanem jun schimpa ebꞌ vin̈ yic yamlabꞌ chay dꞌa yol aꞌ,
yujto yamum chay ebꞌ vin̈.
19 Axo Jesús ix alan dꞌa ebꞌ vin̈:
—Ochan̈ec in cꞌaybꞌumoc.
Ol vacꞌoch eyopisio.
Icha tzeyutej eyaman nocꞌ chay tic,
icha chiꞌ ol eyutoc eyicꞌancot ebꞌ anima dꞌayin,
xchi dꞌa ebꞌ vin̈.
20 Dꞌa jun rato chiꞌ ix yactejcan chꞌan̈ schimpa ebꞌ vin̈.
Ix och ebꞌ vin̈ scꞌaybꞌumoc Jesús chiꞌ.
21 Janicꞌanto sbꞌat ebꞌ,
ix ilchaj chavan̈xo ebꞌ vin̈ yucꞌtac sbꞌa yuuj,
aton vin̈aj Jacobo yedꞌ vin̈aj Juan.
A vin̈aj Zebedeo ay yic ebꞌ vin̈.
Ayoch ebꞌ vin̈ dꞌa yol jun barco yedꞌ smam chiꞌ,
van snipan schimpa ebꞌ vin̈ yic yamlabꞌ chay.
Axo Jesús ix avtancot ebꞌ vin̈.
22 Dꞌa jun rato chiꞌ ix yactancan smam ebꞌ vin̈ chiꞌ yedꞌ jun barco chiꞌ,
ix och ebꞌ vin̈ scꞌaybꞌumoc Jesús.
Yalnac vachꞌ abꞌix Jesús dꞌa ebꞌ anima
23 Ix ecꞌ Jesús dꞌa yol yic Galilea chiꞌ yedꞌ ebꞌ scꞌaybꞌum.
Ix laj ecꞌ scꞌaybꞌej ebꞌ anima dꞌa yoltac spatil sculto.
Ix ecꞌ yalanel jun vachꞌ abꞌix,
chajtil tzꞌaj yoch ebꞌ dꞌa yol scꞌabꞌ Dios aj satchaan̈.
Jantacn̈ej juntzan̈ yabꞌil tzꞌicꞌan ebꞌ anima chiꞌ,
ix laj bꞌoxican ebꞌ yuuj.
24 Ix laj pucaxel yabꞌixal Jesús dꞌa scal masanil yol yic Siria.
Yuj chiꞌ ix icꞌjibꞌat ebꞌ penaay smasanil dꞌay,
jantacn̈ej juntzan̈ yabꞌil yedꞌ juntzan̈ ilya tzꞌicꞌan ebꞌ.
An̈ejtonaꞌ,
ay pax ebꞌ tzꞌixtaj yuj ebꞌ enemigo,
ebꞌ scot dꞌa sjolom yedꞌ ebꞌ sicbꞌinaqueli.
Ix laj icꞌjibꞌat ebꞌ dꞌay.
Yuj chiꞌ ix bꞌoxican ebꞌ smasanil yuuj.
25 Jantac ebꞌ aj Galilea chiꞌ,
ix laj och tzacꞌan ebꞌ yuuj.
An̈ejtonaꞌ,
ay ebꞌ dꞌa juntzan̈ chon̈abꞌ dꞌa yol yic Decápolis,
dꞌa Jerusalén,
dꞌa Judea yedꞌ pax dꞌa scꞌaxepalecꞌ aꞌ nivan Jordán,
ix laj och pax tzacꞌan ebꞌ yuuj.