Yalnac el slolonel Dios Jesús dꞌa jun tzalan
5
A ix yilan ebꞌ anima Jesús,
ix qꞌue dꞌa jun tzalan.
Ix em cꞌojan taꞌ,
axo ebꞌ scꞌaybꞌum ix cꞌoch ebꞌ dꞌay.
2 Ix scꞌaybꞌan ebꞌ,
ix yalan icha tic:
Ebꞌ te vachꞌ yicoꞌ
3 —A ebꞌ snachajel yuuj to man̈ vachꞌoc ebꞌ dꞌa yichan̈ Dios,
te vachꞌ yic ebꞌ,
yujto ayxo och ebꞌ dꞌa yol scꞌabꞌ Dios aj satchaan̈.
4 A ebꞌ scus yuj smul,
te vachꞌ yic ebꞌ,
yujto a Dios ol acꞌan snivanil scꞌool ebꞌ.
5 A ebꞌ emnaquil syutej sbꞌa,
te vachꞌ yic ebꞌ,
yujto ol yiquej jun lugar ebꞌ yalnaccan Dios.
6 A ebꞌ te ay sgana stojolbꞌitan spensar,
te vachꞌ yic ebꞌ,
yujto ol och Dios yedꞌ ebꞌ,
yic vachꞌ icha chiꞌ ol aj stojolbꞌi ebꞌ.
7 A ebꞌ tzꞌocꞌ scꞌool dꞌa ebꞌ yetanimail,
te vachꞌ yic ebꞌ,
yujto tzꞌocꞌ pax scꞌool Dios dꞌa ebꞌ.
8 A ebꞌ malaj chucal dꞌa spensar,
te vachꞌ yic ebꞌ,
yujto ol yil Dios ebꞌ.
9 A ebꞌ acꞌum lajvoc oval,
te vachꞌ yic ebꞌ,
yujto a Dios ol alan ebꞌ yuninaloc.
10 A ebꞌ tzꞌabꞌan syail yujto vachꞌ syutej sbꞌa ebꞌ,
te vachꞌ yic ebꞌ,
yujto ayoch ebꞌ dꞌa yol scꞌabꞌ Dios aj satchaan̈.
11 A exxo tic,
tato vuuj tzex bꞌajji,
tato ay tas tzꞌacꞌjioch dꞌa eyibꞌan̈,
te vachꞌ eyicoꞌ.
An̈ejtonaꞌ tato vuuj tzꞌacꞌjicot juntzan̈ es dꞌa eyibꞌan̈,
te vachꞌ eyicoꞌ.
12 Tzex tzalaj val sicꞌlabꞌil,
yujto te nivan spac ol e cha dꞌa satchaan̈.
Icha tzꞌaj yacꞌjioch dꞌa eyibꞌan̈ ticnaic,
icha chiꞌ ajnac och dꞌa yibꞌan̈ ebꞌ schecabꞌ Dios dꞌa pecaꞌ.
Icha atzꞌam atzꞌam, icha saquilqꞌuinal, icha chiꞌ caji
13 Icha atzꞌam atzꞌam,
icha chiꞌ eyaj dꞌa yolyibꞌan̈qꞌuinal tic.
Qꞌuinaloc a atzꞌam atzꞌam satel scꞌachial,
¿tas to ol aj scꞌachibꞌixi?
Man̈xalaj tzꞌoch atzꞌam.
Ton̈ej syumjiel atzꞌam,
slaj stecꞌnubꞌan ebꞌ anima.
14 Icha saquilqꞌuinal,
icha chiꞌ eyaj dꞌa yolyibꞌan̈qꞌuinal tic.
Qꞌuinaloc ay junoc chon̈abꞌ dꞌa junoc tzalan,
max yal-laj co cꞌubꞌaneli.
15 Ayic scacꞌanoch scꞌacꞌal co candil,
¿tom a dꞌa yalan̈ junoc cajón scacꞌcan ochi?
Maay,
palta chaan̈ scutejqꞌuei,
yic vachꞌ syil ebꞌ tzꞌoch dꞌa yol pat chiꞌ.
16 Icha yaj jun candil chiꞌ,
icha chiꞌ eyaji.
Chꞌoxequel saquilqꞌuinal dꞌa ebꞌ anima,
syalelcꞌochi,
aton e vachꞌ bꞌeybꞌal tze chꞌox yil ebꞌ,
yuj chiꞌ ol yal vachꞌ lolonel ebꞌ dꞌa co Mam Dios ayecꞌ dꞌa satchaan̈.
Yalnac Jesús tas yopisio ley Moisés
17 Man̈ e naꞌa to in ja vacꞌ lajvoc ley Moisés yedꞌ juntzan̈ scꞌaybꞌubꞌal ebꞌ schecabꞌ Dios dꞌa pecaꞌ.
Man̈ yujoc jun chiꞌ in javi,
palta in javi yic vachꞌ ol elcꞌoch tas syal jun ley chiꞌ.
18 Val yel sval dꞌayex,
yovalil ol elcꞌoch masanil tas tzꞌibꞌabꞌilcan dꞌa jun ley chiꞌ.
Yacbꞌan ayto ecꞌ jun yolyibꞌan̈qꞌuinal tic yedꞌ satchaan̈,
malaj val jabꞌoc Slolonel Dios Tzꞌibꞌabꞌilcan chiꞌ ol sateloc.
Vachꞌchom a junoc letra,
ma junoc punto,
malaj val junoc tas ol sateloc,
masanto ol elcꞌoch masanil tas tzꞌibꞌyajcan dꞌay.
19 Ay juntzan̈ checnabꞌil dꞌa jun ley chiꞌ,
ichato malaj val yelcꞌochi,
palta yaln̈ej mach max cꞌanabꞌajan smasanil,
syalanpax dꞌa ebꞌ anima to max scꞌanabꞌajej pax ebꞌ,
tato ol cꞌoch ebꞌ dꞌa yol scꞌabꞌ Dios dꞌa satchaan̈,
val yel malaj val ol aj yelcꞌoch ebꞌ dꞌa scal ebꞌ ayecꞌ taꞌ.
Palta a ebꞌ scꞌanabꞌajan tas syal jun ley chiꞌ,
syalanpax dꞌa ebꞌ anima to scꞌanabꞌajej ebꞌ,
ayic ol cꞌoch ebꞌ dꞌa yol scꞌabꞌ Dios chiꞌ,
yel ton val te nivan ol aj yelcꞌoch ebꞌ dꞌa scal ebꞌ ayecꞌ taꞌ.
20 A ebꞌ cꞌaybꞌum dꞌa ley Moisés yedꞌ ebꞌ fariseo,
ichato te tojol sbꞌeybꞌal ebꞌ dꞌa yichan̈ ebꞌ anima,
palta sval dꞌayex,
tato man̈ ecꞌocto svachꞌil e bꞌeybꞌal chiꞌ dꞌa ebꞌ,
toton man̈ ton ol ex cꞌochlaj dꞌa yol scꞌabꞌ Dios.
Yalnac Jesús yuj chichoncꞌolal
21 Cabꞌnac tas albꞌilcan dꞌa ebꞌ co mam quicham dꞌa pecaꞌ.
Xchi icha tic:
Man̈ e macꞌcham ebꞌ eyetanimail.
Yaln̈ej mach smacꞌancham junocxo anima,
yovalil ol cꞌoch dꞌa yichan̈ ley,
axo taꞌ ol chꞌolbꞌitaj tas yaji,
xchi.
22 Palta a in sval dꞌayex,
yaln̈ej mach junoc schichonoch scꞌool dꞌa junoc yetanimail,
ol chꞌolbꞌitaj tas yaji.
Yaln̈ej mach sbꞌuchvaj dꞌa junoc yetanimail,
ol chꞌolbꞌitaj yuj ebꞌ sat yajal.
An̈ejtonaꞌ yaln̈ej mach junoc sbꞌajan junoc yetanimail,
ay smay sbꞌatcan dꞌa infierno dꞌa scal cꞌacꞌ.
23 Yuj chiꞌ,
ayic tzex cꞌoch yedꞌ eyofrenda bꞌaj tzeyacꞌ dꞌa Dios,
tato tze nacoti to ay bꞌaj ix och e mul dꞌa junocxo anima,
24 canocabꞌ jun eyofrenda chiꞌ bꞌela.
Bꞌat e bꞌocan yaj yedꞌoc.
Slajvi chiꞌ,
tzex jaxi,
tzeyacꞌan eyofrenda chiꞌ.
25 Qꞌuinaloc ay ebꞌ tzꞌacꞌanoch dꞌa eyibꞌan̈,
tzex yicꞌanbꞌat ebꞌ dꞌa vin̈ yajal,
ayic van to e bꞌat dꞌa yol bꞌe,
tze bꞌoancan yaj yedꞌ ebꞌ,
yic vachꞌ maxtzac bꞌat ex yacꞌoch ebꞌ dꞌa yol scꞌabꞌ vin̈ yajal chiꞌ.
Yujto a vin̈ yajal chiꞌ tzex acꞌanoch dꞌa yol scꞌabꞌ ebꞌ vin̈ polencía.
Axo ebꞌ vin̈ tzex acꞌanbꞌat preso.
26 Val yel sval dꞌayex,
maxtzac ex actajeli masanto tze tup e multa smasanil.
Yalnac Jesús yuj ajmulal
27 Cabꞌnac pax tas albꞌilcan dꞌa sley Dios,
ayic yalannaccani:
Man̈ ex em ajmulal,
xchi.
28 Palta a in tic sval dꞌayex,
yaln̈ej mach syiloch scꞌool dꞌa junoc ix ix,
a jun chiꞌ toxo ix em ajmulal yedꞌ ix dꞌa spensar.
29 Qꞌuinaloc ayex,
yuj yol e sat ay dꞌa e vachꞌ,
tzꞌixtaxel e pensar.
Tato icha chiꞌ,
vachꞌ ama tzeyiqꞌuelta jun yol e sat chiꞌ,
tzeyumaneli.
Yujto vachꞌ tato jabꞌn̈ej e nivanil satcaneli,
dꞌa yichan̈ tzex bꞌatcan dꞌa infierno yedꞌ e nivanil chiꞌ smasanil.
30 Qꞌuinaloc ayex yuj e cꞌabꞌ ay dꞌa e vachꞌ tzꞌixtaxel e pensar.
Tato icha chiꞌ,
te vachꞌ tato tze tzepel jun e cꞌabꞌ chiꞌ,
tzeyumancaneli.
Yujto vachꞌ tato jabꞌn̈ej e nivanil satcaneli,
dꞌa yichan̈ tzex bꞌatcan dꞌa infierno yedꞌ e nivanil chiꞌ smasanil.
Ix yalcan Jesús yuj ebꞌ spuc sbꞌa yedꞌ yetbꞌeyum
31 Atax dꞌa pecaꞌ albꞌilcan jun tic:
A vin̈ spuc sbꞌa yedꞌ ix yetbꞌeyum,
yovalil sbꞌocan junoc yumal ayic spucan sbꞌa ebꞌ chiꞌ,
syacꞌancan vin̈ dꞌa ix,
xchi.
32 Palta a in tic,
sval dꞌayex,
tato ay mach spuc sbꞌa yedꞌ ix yetbꞌeyum,
tato man̈ yujoc ajmulal,
tato icha chiꞌ,
a vin̈ tzꞌacꞌanoch ix dꞌa ajmulal.
An̈ejtonaꞌ,
yaln̈ej mach junoc vin̈ tzꞌicꞌan jun ix spucnac sbꞌa yedꞌ vin̈ yetbꞌeyum,
tzꞌochpax vin̈ ajmulal.
Max yal co locan sbꞌi junoc tasi
33 Cabꞌnac tas albꞌilcan dꞌa ebꞌ co mam quicham dꞌa pecaꞌ,
xchi icha tic:
Tato tze loc sbꞌi Dios Cajal,
tzeyacꞌan e tiꞌ,
yovalil tze cꞌanabꞌajej juntzan̈ tas tzeyalcan chiꞌ,
xchi.
34 Palta a in tic sval dꞌayex,
mocabꞌa junoc tas tze loc sbꞌi.
Max yal e locan sbꞌi satchaan̈,
yujto a jun chiꞌ,
aton sdespacho Dios.
35 Yedꞌ pax sat luum tic,
max yal e locan sbꞌi,
yujto icha stecꞌnubꞌ Dios yaji.
Yedꞌ pax Jerusalén,
max yal e locan sbꞌi,
yujto a jun chiꞌ,
aton schon̈abꞌ jun co Reyal te nivan yelcꞌochi.
36 An̈ejtonaꞌ e jolom,
max yal e locan pax sbꞌi,
yujto man̈ eyicoc e chꞌocoj,
yujto max yal eyacꞌan sacbꞌoc junoc pitan̈ xil e jolom ma eyacꞌanxi qꞌuicꞌbꞌoc.
37 Ayic tzex loloni,
Yel toni,
xe chin̈ej,
Maay,
xe chi.
Max yal e locan sbꞌi junoc tasi,
yujto a jun locoj bꞌi chiꞌ dꞌa vin̈ diablo scoti.
Max yal co pacan co bꞌa
38 Cabꞌnac tas albꞌilcan dꞌa pecaꞌ.
Xchi icha tic:
Tato ay junoc mach smacꞌan poj yol sat junocxo,
macꞌjocabꞌ pax poj yicoꞌ.
An̈ejtonaꞌ tato ay mach smacꞌanel ye junoc,
macꞌjocabꞌ pax el yicoꞌ,
xchi.
39 Palta a in tic,
sval dꞌayex,
man̈ eyacꞌ oval yedꞌ ebꞌ chuc syutej sbꞌa dꞌayex.
Tato ay junoc mach sdꞌobꞌanbꞌat e tiꞌ dꞌa e vachꞌ,
tze meltzitejbꞌat junxo pacꞌan̈ dꞌay.
40 Tato ay mach sgana stocꞌanecꞌ e camix dꞌa yichan̈ ley,
tzeyacꞌpaxbꞌat e chumpa dꞌay.
41 An̈ejtonaꞌ,
tato ay junoc mach tzex acꞌan pural e cuchanbꞌat nan̈aloc legua yicatz,
tato icha chiꞌ,
jun legua tze cuchbꞌat dꞌay.*
42 Yaln̈ej mach junoc scꞌanan smajnej junoc tas dꞌayex,
man̈ ex bꞌat micnaj dꞌay.
Sco xajanej ebꞌ schichonoch scꞌool dꞌayon̈
(Lc 6.27-28, 32-36)
43 Cabꞌnac tas albꞌilcan dꞌa pecaꞌ.
Xchi icha tic:
Tze xajanej ebꞌ vachꞌ eyacꞌan yedꞌoc.
Axo ebꞌ eyajcꞌool,
schichonoch e cꞌool dꞌa ebꞌ,
xchi.
44 Palta a in tic sval dꞌayex:
Yovalil tze xajanej ebꞌ ajcꞌol yajoch dꞌayex.
Tzex lesalvipax yuj ebꞌ tzꞌacꞌanoch junoc chucal dꞌa eyibꞌan̈.
45 Icha chiꞌ tzeyutej e chꞌoxanel e bꞌa to yel yuninal ex co Mam ay dꞌa satchaan̈,
yujto a tzꞌacꞌanemta yoc cꞌu dꞌa yibꞌan̈ ebꞌ chuc yedꞌ dꞌa yibꞌan̈ ebꞌ vachꞌ.
An̈ejtonaꞌ,
syacꞌanpax emta n̈abꞌ dꞌa yibꞌan̈ ebꞌ man̈ tojoloc spensar yedꞌ dꞌa yibꞌan̈ ebꞌ tojol spensar.
46 Tato an̈ej ebꞌ tzex xajanan tze xajanej,
¿tom ol e cha spac jun chiꞌ tze naꞌa?
Ina ebꞌ vin̈ tecumel tumin,
an̈ejaꞌ icha pax chiꞌ syutej sbꞌa ebꞌ vin̈.
47 An̈ejtonaꞌ,
tato an̈ej ebꞌ e vachꞌ cꞌool tze cꞌumej,
¿tom ay yelcꞌoch jun chiꞌ e naani?
Ina ebꞌ man̈ ojtannacoc Dios,
an̈ejaꞌ icha pax chiꞌ syutej sbꞌa ebꞌ.
48 Yovalil tzꞌacan ex dꞌa masanil tas vachꞌ,
icha co Mam ayecꞌ dꞌa satchaan̈,
tzꞌacan dꞌa masanil tas vachꞌ.