A yabꞌixal vin̈ mayordomo
16
Ix yalan jun abꞌix tic Jesús dꞌa ebꞌ scꞌaybꞌum:
—Ay jun vin̈ patrón te bꞌeyum.
Ay jun vin̈ smayordomo vin̈.
Ix yabꞌan specal vin̈ to a vin̈ smayordomo vin̈ chiꞌ van satanel tastac ay dꞌa vin̈.
Lucas 16.1-18
2 Axo vin̈ patrón chiꞌ ix avtan vin̈,
ix yalan vin̈:
Ay juntzan̈ tas ix vabꞌ dꞌa a patic.
Yuj chiꞌ acꞌ entregar a cuenta dꞌayin.
Man̈xo ol ach munlaj dꞌa jun opisio tic dꞌayin,
xchi vin̈.
3 Yuj chiꞌ ix snaan vin̈ mayordomo chiꞌ,
¿tas ol vutoc in bꞌa ticnaic?
Ol in yiqꞌuel vin̈ dꞌa vopisio,
palta max uji junocxo munlajel vuuj.
Tzin qꞌuixvi vecꞌ dꞌa titac pat in cꞌan va in bꞌa.
4 Toxo ix in na ticnaic tas ol vutoc in bꞌa.
Yuj chiꞌ vachꞌchom malaj in munlajel,
tecan ay ebꞌ ol in chaanoch dꞌa yol spat,
xchi vin̈.
5 Ix lajvi chiꞌ,
ix laj yavtancot ebꞌ vin̈ ay sbꞌoc dꞌa vin̈ spatrón vin̈ chiꞌ.
Ix scꞌanbꞌan vin̈ dꞌa vin̈ ix bꞌabꞌlajcꞌochi:
¿Jantac a bꞌoc dꞌa vin̈ patrón?
xchi vin̈.
6 Cien barril in bꞌoc aceite dꞌa vin̈,
xchi vin̈.
Inye,
tato icha chiꞌ a bꞌoc aceite chiꞌ,
ina jun yumal a bꞌoc chiꞌ.
Elan̈chamel tzach em cꞌojan,
tza bꞌoan junocxo,
50-n̈ej tza tzꞌibꞌejemi,
xchi vin̈ mayordomo chiꞌ dꞌa vin̈.
7 Ix lajvi chiꞌ,
ix scꞌanbꞌan vin̈ dꞌa junxo vin̈:
Xal ach,
¿jantac pax ic dꞌa vin̈?
xchi vin̈.
A in tic,
cien quintal in bꞌoc trigo dꞌa vin̈,
xchi junxo vin̈ chiꞌ.
Tato icha chiꞌ,
a tzꞌajxican dꞌa yumal a bꞌoc chiꞌ,
80-xon̈ej tza tzꞌibꞌejemi,
xchi vin̈ dꞌa vin̈.
8 Ix yalan vin̈ patrón chiꞌ to te jelan ix yutej sbꞌa jun vin̈ mayordomo chiꞌ dꞌa elcꞌal.
Yujto a ebꞌ ay dꞌa yolyibꞌan̈qꞌuinal tic,
te jelan syutej sbꞌa ebꞌ dꞌa yichan̈ ebꞌ ayoch saquilqꞌuinal Dios dꞌay.
9 A in sval dꞌayex,
a qꞌuen tumin,
secojtac scꞌanji qꞌuen dꞌa chucal.
Palta vachꞌ tzeyamcꞌabꞌej qꞌuen dꞌa vachꞌil,
yic tzꞌaj eyamigo.
Tato icha chiꞌ,
ayic ol lajvoc yopisio qꞌuen e tumin chiꞌ,
ol ex chajoc dꞌa jun eyedꞌtal ay dꞌa juneln̈ej.
10 A ebꞌ tojol syutej sbꞌa yedꞌ jabꞌoc tasi,
an̈ejtonaꞌ tojol pax syutej sbꞌa ebꞌ dꞌa jantac tas nivan ay dꞌay.
A ebꞌ man̈ tojoloc syutej sbꞌa yedꞌ jabꞌoc tasi,
an̈ejtonaꞌ man̈ tojoloc ol yutoc sbꞌa ebꞌ yedꞌ junoc nivan ol acꞌjoc dꞌay.
11 Yuj chiꞌ,
tato man̈ tojoloc tzeyutej e bꞌa yedꞌ qꞌuen tumin scꞌanchaj dꞌa yolyibꞌan̈qꞌuinal tic,
malaj mach ol acꞌan junoc bꞌeyumal nivan yelcꞌoch dꞌa yol e cꞌabꞌ.
12 Tato man̈ tojoloc tzeyutej e bꞌa dꞌa junoc tas chꞌoc mach ay yicoꞌ,
malaj mach ol acꞌan junoc eyicoꞌ.
13 Malaj junoc mach syal yacꞌan servil chavan̈oc spatrón,
yujto ay jun malaj yelcꞌoch dꞌay.
Axo junxo te nivan yelcꞌoch dꞌay.
Vachꞌ syutej sbꞌa dꞌa junoc,
axo dꞌa junxo chuc syutej sbꞌa.
Max yal-laj cacꞌan servil Dios yedꞌ qꞌuen tumin,
xchi Jesús dꞌa ebꞌ.
14 Axo ebꞌ vin̈ fariseo,
an̈ej dꞌa qꞌuen tumin ayoch spensar ebꞌ vin̈.
Yuj chiꞌ,
ayic ix yabꞌan jun chiꞌ ebꞌ vin̈,
ix bꞌuchvaj ebꞌ vin̈ dꞌa Jesús.
15 Ix yalanxi Jesús chiꞌ dꞌa ebꞌ vin̈:
—A ex pax tic,
dꞌa yichan̈ ebꞌ anima,
vachꞌ tzeyutej e bꞌa.
Axo pax Dios yojtac tas yaj e pensar.
Ay juntzan̈ tas nivan yelcꞌoch dꞌa yichan̈ ebꞌ anima,
axo dꞌa yichan̈ Dios,
chacbꞌileli.
16 An̈ej ley Moisés yedꞌ juntzan̈ tas tzꞌibꞌabꞌilcan yuj ebꞌ schecabꞌ Dios dꞌa pecaꞌ aycanoch yopisio masantax ix ulecꞌ vin̈aj Juan vin̈ acꞌjinac bautizar.
Axo ticnaic,
atax ix ulecꞌ vin̈ ix elcan yich yaljiel jun vachꞌ abꞌix chajtil tzꞌaj yoch ebꞌ anima dꞌa yol scꞌabꞌ Dios.
Yuj chiꞌ masanil ebꞌ syacꞌ yip yoch dꞌa yol scꞌabꞌ Dios.
17 Vachꞌchom ol lajvoc ecꞌ satchaan̈ yedꞌ yolyibꞌan̈qꞌuinal tic,
axo pax jun ley chiꞌ,
vachꞌchom junoc letra,
malaj val junoc bꞌaj man̈ ol elcꞌoch tas syalaꞌ.
Ix yalcan Jesús yuj ebꞌ spuclaj sbꞌa
18 A junoc vin̈ spuc sbꞌa yedꞌ ix yetbꞌeyum,
syicꞌan junocxo ix,
tzꞌem vin̈ ajmulal.
Tato ay junoc vin̈ tzꞌicꞌan pax junoc ix spucnac sbꞌa yedꞌ vin̈ yetbꞌeyum chiꞌ,
tzꞌempax vin̈ ajmulal.
A yabꞌixal jun vin̈ bꞌeyum yedꞌ vin̈aj Lázaro
19 A junel ay jun vin̈ te bꞌeyum.
Vachꞌ sbꞌo vin̈ yedꞌ spichul te caro stojol.
Junjun cꞌu syacꞌan qꞌuin̈ vin̈,
tzijtum tas syacꞌ chijoc vin̈.
Lucas 16.19-31
20 Ay pax jun vin̈ mebꞌaꞌ scuch Lázaro,
ayqꞌue yabꞌil yaxcꞌa dꞌa vin̈.
Tzꞌem cꞌojan vin̈ dꞌa sat luum dꞌa stiꞌ spuertail spat vin̈ bꞌeyum chiꞌ.
21 A vin̈ mebꞌaꞌ chiꞌ,
snibꞌej vin̈ sva jabꞌoc juntzan̈ scꞌajil vael tzꞌem dꞌa yalan̈ smexa vin̈ bꞌeyum chiꞌ.
Axo nocꞌ tzꞌiꞌ bꞌat lecꞌanel sat yabꞌil yaxcꞌa ayqꞌue chiꞌ dꞌa vin̈.
22 Ix cꞌoch scꞌual ix cham vin̈ mebꞌaꞌ chiꞌ,
axo ebꞌ ángel ix icꞌanbꞌat vin̈ dꞌa svachꞌilal bꞌaj ayecꞌ vin̈aj Abraham.
Ix cꞌoch pax scꞌual ix cham vin̈ bꞌeyum chiꞌ.
Ix mucchaj vin̈.
23 Ix cꞌoch spixan vin̈ bꞌaj ay spixan ebꞌ chamnacxo.
Axo yic van yabꞌan syail vin̈,
ix qꞌue qꞌuelan vin̈,
najatto ix yilbꞌat vin̈aj Abraham chiꞌ vin̈.
Ayecꞌ vin̈aj Lázaro dꞌa stzꞌey vin̈.
24 Yuj chiꞌ ix avaj vin̈ bꞌeyum chiꞌ icha tic:
Mamin Abraham,
ocꞌocabꞌ a cꞌool dꞌayin.
Checcot vin̈aj Lázaro chiꞌ,
schꞌayan yiximal scꞌabꞌ vin̈,
tzul yacꞌanoch vin̈ dꞌa sn̈iꞌ vacꞌ yic siclabꞌ jabꞌoc,
yujto max techaj vabꞌan syail dꞌa cal cꞌacꞌ tic,
xchi vin̈.
25 Axo ix yalan vin̈aj Abraham chiꞌ:
A ach tic,
nacoti to te vachꞌ ach ecꞌ dꞌa yolyibꞌan̈qꞌuinal,
axo vin̈aj Lázaro tic,
dꞌa syaelal ix ecꞌ vin̈.
A ticnaic jun,
van schaan snivanil scꞌol vin̈ dꞌa tic.
An̈ejtonaꞌ ach,
van abꞌan syail taꞌ.
26 A junxo svalaꞌ,
ay jun nivan xabꞌ olan dꞌa co cal eyedꞌoc.
Yuj chiꞌ,
vachꞌchom ay ebꞌ ay dꞌa tic,
sgana scꞌaxpaj taꞌ,
max yal-laj.
An̈ejtonaꞌ ex,
max yal-laj e cꞌaxpajecꞌ taꞌ dꞌa tic,
xchi vin̈.
27 Tato icha chiꞌ jun mamin,
comonoc tza checbꞌat vin̈aj Lázaro chiꞌ dꞌa spat vin̈ in mam.
28 Ataꞌ ay ovan̈ ebꞌ vin̈ vucꞌtac.
Syalan vin̈ yabꞌ ebꞌ vin̈ yic vachꞌ man̈ ol ja ebꞌ vin̈ vedꞌ dꞌa scal yaelal tic,
xchi vin̈.
29 Ix yalan vin̈aj Abraham chiꞌ:
A dꞌa ebꞌ ayecꞌ juntzan̈ tas stzꞌibꞌejnaccan Moisés yedꞌ ebꞌ schecabꞌ Dios.
Yacꞌocabꞌoch ebꞌ dꞌa scꞌool tas syal juntzan̈ chiꞌ,
xchi vin̈.
30 Man̈ cꞌocbꞌiloc jun chiꞌ mamin,
palta tato ol pitzvocxi junoc dꞌa scal ebꞌ chamnac yal yabꞌ ebꞌ,
ol ton sna sbꞌa ebꞌ,
xchi vin̈.
31 Ix yalanxi vin̈aj Abraham chiꞌ:
Tato max yacꞌoch scꞌol ebꞌ dꞌa tas stzꞌibꞌejnaccan Moisés yedꞌ ebꞌ schecabꞌ Dios chiꞌ,
vachꞌchom ay junoc ol pitzvoc dꞌa scal ebꞌ chamnac,
an̈ejtonaꞌ man̈ ol yacꞌoch ebꞌ dꞌa scꞌool,
xchi vin̈aj Abraham chiꞌ dꞌa vin̈,
xchi Jesús.