2 Yuj chiꞌ a ebꞌ vin̈ fariseo yedꞌ ebꞌ vin̈ cꞌaybꞌum dꞌa ley Moisés,

bꞌuchumtac slolon ebꞌ vin̈ dꞌa spatic Jesús chiꞌ,

ix yalan ebꞌ vin̈:

—A jun vin̈ tic schan̈ej ebꞌ chuc sbꞌeybꞌal vin̈ scꞌoch dꞌay.

Ina sva vin̈ yedꞌ ebꞌ,

xchi ebꞌ vin̈.

3 Yuj chiꞌ ix yal jun chꞌoxnabꞌil tic Jesús dꞌa ebꞌ vin̈:

4 —Qꞌuinaloc ay junoc vin̈ dꞌa e cal tic ay cienoc nocꞌ scalnel.

Tato ay junoc nocꞌ satcani,

scan nocꞌ yetbꞌeyum nocꞌ chiꞌ dꞌa junoc acꞌlic,

sbꞌat vin̈ say nocꞌ satcan chiꞌ,

masanto schax nocꞌ yuj vin̈.

5 Axo schaxcꞌoch nocꞌ chiꞌ,

schelancot nocꞌ vin̈.

Ste tzalaj val vin̈.

6 Ayic scꞌochxi vin̈ dꞌa spat,

syavtancot ebꞌ yamigo vin̈ yedꞌ ebꞌ ay dꞌa slacꞌanil.

Syalan vin̈ dꞌa ebꞌ:

Tzalajan̈ec vedꞌoc,

yujto ix sat jun nocꞌ in calnel.

Palta toxo ix ilchajxi nocꞌ vuuj,

xchi vin̈ dꞌa ebꞌ.

7 An̈ejtonaꞌ,

qꞌuinaloc ay 99-oc anima,

toxonton tojol spensar,

man̈ yovaliloc sna sbꞌa ebꞌ snaani,

malaj tzalajcꞌolal dꞌa satchaan̈ yuj ebꞌ.

Palta a in sval dꞌayex,

tato ay junoc malaj svachꞌil sbꞌeybꞌal,

sna sbꞌa yuj smul,

yelxo val nivan tzalajcꞌolal yuj jun chiꞌ dꞌa satchaan̈.

8 Qꞌuinaloc ay junoc ix ix ay lajun̈eoc stumin.

Tato satbꞌat junoc,

syacꞌoch staj ix,

slaj smesanelta yol spat ix.

Syacꞌ val sgana ix sayani masanto tzꞌilchaji.

9 Axo schax qꞌuen yuj ix,

smolbꞌan ebꞌ ix svachꞌcꞌool ix yedꞌ ebꞌ ay dꞌa slacꞌanil ix.

Syalan ix dꞌa ebꞌ:

Tzalajan̈ec vedꞌoc,

yujto ay jun qꞌuen in tumin ix sati.

Axo ticnaic,

ix chax qꞌuen vuuj,

xchi ix dꞌa ebꞌ.

10 Val yel sval dꞌayex,

icha pax chiꞌ stzalaj Dios yedꞌ ebꞌ yángel dꞌa satchaan̈ yuj junoc anima chuc sbꞌeybꞌal sna sbꞌa dꞌa smul,

xchi Jesús.

11 Ix yalanpax junxo abꞌix tic Jesús:

—Ay jun vin̈ ay chavan̈ yuninal.

12 A vin̈ tzacꞌan unin ix alan dꞌa vin̈ smam icha tic:

Mamin,

pojcan snan̈al tastac ol acꞌcan dꞌayon̈ ato syalaꞌ jantac ol acꞌ dꞌayin,

xchi vin̈.

Yuj chiꞌ,

a vin̈ mamabꞌil chiꞌ ix pojancan dꞌa ebꞌ vin̈.

13 Jayeanto cꞌual chiꞌ,

ix laj schon̈anel tastac ix acꞌjican dꞌa vin̈ yuj smam chiꞌ,

ix bꞌat vin̈ dꞌa junxo chon̈abꞌ te najat.

Ataꞌ ix bꞌat slajel stumin vin̈ dꞌa juntzan̈ chucal.

14 Ayic toxo ix lajviel qꞌuen tumin chiꞌ,

ix ja jun nivan vejel dꞌa jun chon̈abꞌ chiꞌ.

Man̈xalaj tas sva vin̈,

syacꞌ val techaj vejel vin̈.

15 Yuj chiꞌ ix bꞌat scꞌan munlaj sbꞌa vin̈ dꞌa jun vin̈ ay dꞌa chon̈abꞌ chiꞌ.

Axo vin̈ ix checanbꞌat vin̈ dꞌa jun sluum tan̈voj chitam.

16 Scham vin̈ yuj vejel,

yuj chiꞌ ix snibꞌej vin̈ yabꞌlej tas syabꞌlej nocꞌ chitam chiꞌ,

palta malaj mach tzꞌacꞌan jabꞌoc tas dꞌa vin̈.

17 Ichato chiꞌ ix snaan sbꞌa vin̈:

¿Tas yuj icha tic tzin cꞌulej,

svacꞌcham in bꞌa yuj vejel dꞌa tic,

axom dꞌa vin̈ in mam jantac am tas sva ebꞌ smajan vin̈,

syacꞌ sobre tas sva ebꞌ?

18 Más vachꞌ tzin pax bꞌaj ay vin̈ in mam chiꞌ.

Ol valan dꞌa vin̈:

Mamin,

ix och in mul dꞌa Dios yedꞌ dꞌayach.

19 Man̈xo in al uninaloc.

Ichocabꞌ junoc a majan tzin ajcani,

xin chama,

xchi vin̈.

20 Ix meltzaj vin̈ bꞌian.

Najatto van scot vin̈,

ix yilanbꞌat vin̈ smam vin̈ chiꞌ,

ix te ocꞌ scꞌool vin̈ dꞌa vin̈.

Ix bꞌat lemnaj vin̈ schacot vin̈.

Ix och lacꞌnaj vin̈ dꞌa vin̈,

ix stzꞌubꞌanelta stiꞌ vin̈ dꞌa tzalajcꞌolal.

21 Ix yalan vin̈ dꞌa vin̈ smam chiꞌ:

Mamin,

ix och in mul dꞌa Dios yedꞌ dꞌayach.

Man̈xo smojoc tzin al uninaloc,

xchi vin̈.

22 Axo vin̈ mamabꞌil chiꞌ ix alan dꞌa ebꞌ smajan:

Lemec,

iqꞌueccot jun mojoc pichul te vachꞌ,

tzeyacꞌanoch dꞌa vin̈ vuninal tic.

Tzeyacꞌanpax och junoc colcꞌabꞌ dꞌa scꞌabꞌ vin̈,

tzeyacꞌanoch xan̈abꞌ vin̈.

23 Slajvi chiꞌ,

tzeyicꞌancot junoc nocꞌ yuneꞌ vacax,

aton nocꞌ te bꞌaqꞌuech,

tze milancham nocꞌ.

To ol och jun nivan vael,

ol cacꞌanoch qꞌuin̈.

24 Yujto a vin̈ vuninal tic,

chamnacxo vin̈ in naani,

palta tobꞌan pitzan vin̈.

Satnacbꞌat vin̈,

axo ticnaic ix jax vin̈ dꞌayin,

xchi vin̈.

Ichato chiꞌ,

ix syamanoch ebꞌ yacꞌanoch qꞌuin̈ chiꞌ.

25 Axo vin̈ bꞌabꞌel unin,

aybꞌat vin̈ dꞌa smunlajel.

Axo ix jax vin̈,

ix yabꞌan vin̈ ayoch son,

van yecꞌ ebꞌ chan̈al.

26 Yuj chiꞌ ix yavtancot jun smajan vin̈ smam vin̈ chiꞌ,

ix scꞌanbꞌan vin̈ dꞌay:

¿Tas yuj ayoch jun qꞌuin̈ tic?

xchi vin̈.

27 Yuj vin̈ ucꞌtac ix jaxi.

A vin̈ a mam ix checan miljoccham nocꞌ yuneꞌ vacax bꞌaqꞌuech,

yujto vachꞌ scꞌool vin̈ ix jax vin̈,

malaj tas ix icꞌan vin̈,

xchi jun majan chiꞌ dꞌa vin̈.

28 Yuj chiꞌ ix cot yoval vin̈.

Man̈xalaj sgana vin̈ yoch dꞌa yol pat.

Yuj chiꞌ ix elta vin̈ smam vin̈ chiꞌ,

ix och ijan vin̈ smontan vin̈ yic tzꞌoch vin̈.

29 Palta ix yalan vin̈ dꞌa vin̈ smam chiꞌ:

Ojtac jantacxo tiempo tzin munlaji,

malaj bꞌaj ix in pitej in bꞌa dꞌayach.

Manta bꞌaj tzacꞌ junoc nocꞌ yuneꞌ chiva yic svacꞌoch in qꞌuin̈ yedꞌ ebꞌ vamigo.

30 Axo ticnaic ix jax vin̈ uninal xidꞌ satanel a tumin yedꞌ ebꞌ ix ajmul ix.

Axo yuj vin̈ tza milancham nocꞌ vacax bꞌaqꞌuech,

xchi vin̈ dꞌa vin̈ smam chiꞌ.

31 Axo ix yalan vin̈ smam vin̈ chiꞌ:

Ach vuninal,

ay achn̈ej ecꞌ vedꞌoc.

Masanil tas ay dꞌayin icn̈ej yaji.

32 Yuj chiꞌ smoj ton cacꞌan och qꞌuin̈ yic tzon̈ tzalaji.

Yujto a vin̈ ucꞌtac tic,

chamnacxo vin̈ co naani,

tobꞌan pitzan vin̈.

Satnac bꞌat vin̈,

palta ix jax vin̈ dꞌayin,

xchi vin̈ mamabꞌil chiꞌ,

xchi Jesús.