Bꞌoxinac scꞌool jun vin̈ penaay
14
A dꞌa jun scꞌual icꞌoj ip,
aton dꞌa sábado,
ix cꞌoch Jesús vael dꞌa spat jun vin̈ yajal ebꞌ vin̈ fariseo.
Axo juntzan̈xo ebꞌ vin̈ yetfariseoal vin̈ ix maclan yilaꞌ tas ol yutej sbꞌa.
Lucas 14.1-24
2 Ataꞌ ayecꞌ jun vin̈ penaay yuj mal cꞌabꞌ oc dꞌa yichan̈ Jesús.
3 Axo Jesús chiꞌ ix cꞌanbꞌan dꞌa ebꞌ vin̈ cꞌaybꞌum dꞌa ley Moisés yedꞌ dꞌa ebꞌ vin̈ fariseo chiꞌ:
—¿Ay am sleyal scacꞌ bꞌoxoc scꞌol junoc penaay dꞌa scꞌual icꞌoj ip,
mato maay?
xchi dꞌa ebꞌ vin̈.
4 Man̈xalaj tas ix yal ebꞌ vin̈.
Ichato chiꞌ ix chaji vin̈ penaay chiꞌ yuj Jesús,
ix bꞌoxi scꞌool vin̈ yuuj,
ix yalan dꞌa vin̈ to spax vin̈.
5 Ix lajvi chiꞌ,
ix yalan dꞌa ebꞌ vin̈ fariseo chiꞌ:
—Qꞌuinaloc a ex tic ay junoc eyuninal ma junoc e vacax,
sbꞌat dꞌa yol junoc xabꞌ,
¿tom max bꞌat eyicꞌqꞌueta dꞌa elan̈chamel,
vachꞌchom scꞌual icꞌoj ip?
xchi dꞌa ebꞌ vin̈.
6 Majxo nachajlaj tas syutej ebꞌ vin̈ spacan dꞌay.
A yabꞌixal ebꞌ avtabꞌil dꞌa jun nupnajel
7 Ix yilan Jesús tas ix yutej sbꞌa ebꞌ avtabꞌil dꞌa jun vael.
Snibꞌej ebꞌ tzꞌem cꞌojjabꞌ bꞌaj tzꞌem cꞌojan ebꞌ nivac vinac.
Yuj chiꞌ ix yalan jun tic dꞌa ebꞌ:
8 —Tato ay bꞌaj tzex avtaj dꞌa junoc qꞌuin̈ nupnajel,
man̈ ex em cꞌojan dꞌa scꞌojnubꞌ ebꞌ nivac vinac.
Talaj icha chiꞌ ay junoc vin̈ ecꞌal yelcꞌoch dꞌayex scꞌoch taꞌ,
9 axo vin̈ tzex avtan chiꞌ tzꞌalan dꞌayex:
Elan̈ dꞌa teꞌ xila tic,
acꞌbꞌat teꞌ dꞌa vin̈ tic,
tato xchi.
Tzex qꞌuixvi,
axo dꞌa xila ebꞌ malaj yelcꞌoch tzex emcan cꞌojan.
10 Palta ayic tzex avtaji,
tzex em cꞌojan bꞌaj malaj val yelcꞌochi,
yic axo sja vin̈ tzex avtan chiꞌ,
syalan vin̈ dꞌayex:
Ach vamigo,
ochan̈ dꞌa jun lugar bꞌaj tzꞌem cꞌojan ebꞌ nivac yelcꞌochi,
xcham vin̈.
Ichato chiꞌ,
nivan tzꞌaj eyelcꞌoch dꞌa yichan̈ ebꞌ ayecꞌ dꞌa mexa chiꞌ.
11 Yaln̈ej mach syicꞌchaan̈ sbꞌa,
ol icꞌjoc emta.
Axo ebꞌ emnaquil syutej sbꞌa,
ol icꞌjoc chaan̈ ebꞌ.
12 Ix yalanpax dꞌa vin̈ ix avtan ebꞌ vael chiꞌ:
—Ayic tza bꞌoan junoc nivan vael,
man̈ avtej ebꞌ amigo,
ebꞌ ucꞌtac,
ebꞌ a cꞌabꞌ oc yedꞌ ebꞌ bꞌeyum dꞌa a lacꞌanil.
Yujto ol ach yavtej pax ebꞌ dꞌa yicoꞌ,
icha chiꞌ ol a chaanxi spac chiꞌ.
13 Palta ayic tza bꞌoan junoc nivan vael,
tzavtej ebꞌ mebꞌaꞌ,
ebꞌ elnac scꞌabꞌ,
ebꞌ max uji sbꞌeyi yedꞌ ebꞌ max uji yilani.
14 Tato icha chiꞌ tzutej,
vachꞌ ic syal chiꞌ,
yujto vachꞌchom max a cha spac dꞌa ebꞌ,
ol a cha spac ayic ol pitzvocxi ebꞌ vachꞌ sbꞌeybꞌal,
xchi Jesús dꞌa vin̈.
A yabꞌixal jun nivan vael
15 Ay jun vin̈ ayoch dꞌa scal ebꞌ ayoch dꞌa jun mexa chiꞌ,
ayic ix yabꞌan juntzan̈ chiꞌ vin̈,
ix yalan vin̈ dꞌa Jesús:
—Te vachꞌ yic ebꞌ ol och vael bꞌaj ayoch Dios Yajalil,
xchi vin̈.
16 Yuj chiꞌ ix yal jun abꞌix tic Jesús:
—A junel,
ay jun vin̈ ix bꞌoan jun nivan vael.
Tzijtum ebꞌ anima ix yavtej vin̈.
17 Axo ix cꞌoch yorail jun vael chiꞌ,
ix schecanbꞌat jun schecabꞌ vin̈,
ix bꞌat yalan dꞌa ebꞌ avtabꞌil,
ix yalan dꞌa ebꞌ:
Cotan̈ec.
Ix cꞌoch yorail yoch vael,
vachꞌxo yaj smasanil,
xchi dꞌa ebꞌ.
18 Palta ix laj scꞌanan nivancꞌolal sbꞌa ebꞌ.
A jun vin̈ bꞌabꞌel,
ix yal vin̈ icha tic:
Ay jun in luum toto ix in manaꞌ,
yovalil bꞌat vilaꞌ.
Sval in bꞌa dꞌayach,
aqꞌuin nivancꞌolal,
xa chi,
xchi vin̈.
19 Axo ix yalan junxo vin̈:
Ato val slajvi in manan oyeꞌ par in vacax tic,
ol bꞌat vacꞌlej proval nocꞌ.
Acꞌabꞌ nivancꞌolal,
xa chi dꞌa vin̈,
xchi vin̈.
20 Ix yalan junxo vin̈:
Toto ix och vetbꞌeyum,
yuj chiꞌ max yal-laj in bꞌati,
xa chi,
xchi vin̈.
21 Yuj chiꞌ a vin̈ checabꞌ chiꞌ ix alan juntzan̈ tic dꞌa spatrón.
Ix cot yoval vin̈ patrón chiꞌ,
ix yalan vin̈ icha tic:
Ixic elan̈chamel dꞌa yoltac calle dꞌa juntzan̈ bꞌe tzꞌecꞌ dꞌa cal chon̈abꞌ tic,
tzicꞌcot ebꞌ mebꞌaꞌ,
ebꞌ ay spaltail,
ebꞌ max uji sbꞌeyi yedꞌ ebꞌ max uji yilani,
xchi vin̈.
22 Axo ix cꞌochxi vin̈ schecabꞌ chiꞌ junelxo,
ix yalan vin̈ dꞌa vin̈:
Mamin patrón,
ix in cꞌanabꞌajej tas ix alaꞌ,
palta ayto scꞌan sbꞌudꞌji,
xchi vin̈.
23 Ix yalanxi vin̈ dꞌa vin̈:
Ixic dꞌa yoltac calle,
dꞌa juntzan̈xo bꞌe tzꞌecꞌ dꞌa yol chon̈abꞌ tic,
tzacꞌan pural ebꞌ scoti yic sbꞌudꞌji in pat tic yuj ebꞌ.
24 Yujto sval dꞌayach,
malaj junoc ebꞌ ix in bꞌabꞌlaj avtej ol va dꞌa jun nivan vael tic,
xchi vin̈ patrón chiꞌ,
xchi Jesús.
A ebꞌ tzꞌoch scꞌaybꞌumoc Jesús yovalil syabꞌ syail ebꞌ
25 Tzijtum ebꞌ anima ix och tzacꞌan yuj Jesús,
yuj chiꞌ ix meltzajbꞌat qꞌuelan dꞌa ebꞌ,
ix yalani:
Lucas 14.25-35
26 —Tato ay ebꞌ sja dꞌayin,
palta ta más nivan yelcꞌoch smam snun ebꞌ dꞌa vichan̈ snaani,
ma ix yetbꞌeyum,
yuninal,
ebꞌ yucꞌtac,
ebꞌ ix yanabꞌ,
ma sqꞌuinal ebꞌ,
tato icha chiꞌ,
max yal-laj yoch ebꞌ in cꞌaybꞌumoc.
27 A ebꞌ sbꞌeybꞌalan in bꞌeybꞌal,
sbꞌecanpax cham sbꞌa ebꞌ dꞌa teꞌ culus vuuj,
an̈ej ebꞌ smoj yoch in cꞌaybꞌumoc.
28 Qꞌuinaloc ay junoc ex tze nibꞌej tze bꞌo junoc nivan pat,
ayic manto eyamoch e bꞌoani,
¿tom max ex em cꞌojan tze naan yuj stojol tato cꞌocbꞌil syabꞌi?
29 Tato maay,
ton̈ej tzeyacꞌcanem yich,
axo ebꞌ anima tzex bꞌuchani.
30 Syalan ebꞌ:
A jun vin̈ tic,
ix syamoch vin̈ sbꞌoan spat,
palta maj bꞌolaj yuj vin̈,
xcham ebꞌ.
31 Qꞌuinaloc ay junoc vin̈ rey van sbꞌat yacꞌ oval yedꞌ junocxo vin̈ rey,
palta an̈ej lajun̈eꞌ mil soldado vin̈ yedꞌnac.
Axo pax junxo vin̈ rey chiꞌ,
ay 20 mil soldado vin̈ yedꞌnac.
Ayic manto bꞌatlaj vin̈,
¿tom max em cꞌojan vin̈ snaan sicꞌlabꞌil tato stechaj yacꞌan jun oval chiꞌ vin̈?
32 Tato sna vin̈ to max techaj yuuj,
schecanbꞌat junoc schecabꞌ vin̈ dꞌa vin̈ yedꞌnac syacꞌan oval chiꞌ,
yacbꞌan najatto van scot vin̈,
yic syalan vin̈ to tzꞌoch ebꞌ dꞌa juncꞌolal.
33 Ichex pax taꞌ,
tato max eyactejcan jantac tas ay dꞌayex,
max yal eyoch in cꞌaybꞌumoc.
Ayic slajviecꞌ scꞌachial atzꞌam atzꞌam