Yalnac Jesús yuj ebꞌ spuc sbꞌa
10
Ix elxi Jesús dꞌa Capernaum bꞌaj ayecꞌ chiꞌ,
ix ecꞌ dꞌa yol yic Judea.
Ix cꞌoch dꞌa junxo lugar ay dꞌa scꞌaxepal aꞌ Jordán.
Ataꞌ ix smolbꞌej sbꞌa ebꞌ anima dꞌay junelxo.
Ix scꞌaybꞌan ebꞌ ichataxon smodo.
Marcos 10.1-31
2 Ay juntzan̈ ebꞌ vin̈ fariseo ix cꞌoch dꞌay,
yujto sgana ebꞌ vin̈ syacꞌ proval.
Yuj chiꞌ,
ix scꞌanbꞌan ebꞌ vin̈ dꞌay tato ay sleyal spucan sbꞌa junoc vin̈ vinac yedꞌ ix yetbꞌeyum.
3 Yuj chiꞌ,
ix yalan Jesús dꞌa ebꞌ vin̈:
—¿Tas schican schecnabꞌil Moisés dꞌa Slolonel Dios Tzꞌibꞌabꞌilcani?
xchi.
4 Ix yalan ebꞌ vin̈:
—Yalnaccan vin̈aj Moisés chiꞌ to syal yacꞌan junoc yumal vin̈ yic pucojbꞌail dꞌa ix yetbꞌeyum,
slajvi chiꞌ spucan sbꞌa vin̈ yedꞌ ix,
xchi ebꞌ vin̈ dꞌay.
5 Ix yalanxi Jesús:
—Yuj val e pital,
yuj chiꞌ yalnaccan jun checnabꞌil chiꞌ vin̈aj Moisés chiꞌ.
6 Palta atax sbꞌoannac yolyibꞌan̈qꞌuinal tic Dios,
sbꞌoannaccan vin̈ vinac yedꞌ ix ix.
7 Atax taꞌ yalnaccan icha tic:
A vin̈ vinac,
ol yactejcan smam snun vin̈ yic junxon̈ej tzꞌajcan vin̈ yedꞌ ix yetbꞌeyum.
8 Junxon̈ej nivanil tzꞌajcan ebꞌ schavan̈il,
xchi Dios.
Yel,
man̈xo chavan̈oc ebꞌ,
junxon̈ej yaj ebꞌ.
9 Yuj chiꞌ,
a ebꞌ junxon̈ej yajcan yuj Dios max yal-laj spojan sbꞌa ebꞌ yuj ebꞌ anima,
xchi Jesús dꞌa ebꞌ vin̈.
10 Ix lajvi chiꞌ ix ochxi Jesús dꞌa yol pat yedꞌ ebꞌ scꞌaybꞌum,
ix scꞌanbꞌan ebꞌ dꞌay,
tas syalelcꞌoch jun ix yal chiꞌ.
11 Yuj chiꞌ ix yalan dꞌa ebꞌ:
—A mach spuc sbꞌa yedꞌ ix yetbꞌeyum,
syicꞌan junocxo ix,
tzꞌem ajmulal.
12 An̈ejtonaꞌ a junoc ix ix spuc sbꞌa yedꞌ vin̈ yetbꞌeyum,
syicꞌan junocxo vinac ix,
tzꞌem ix ajmulal,
xchi Jesús dꞌa ebꞌ.
Icꞌbꞌilcot ebꞌ unin dꞌa Jesús
13 Ix lajvi chiꞌ,
ay juntzan̈ unin ix icꞌjicot dꞌa Jesús yuj ebꞌ anima,
yic syaqꞌuecꞌ scꞌabꞌ dꞌa sjolom ebꞌ.
Palta axo ebꞌ scꞌaybꞌum ix cachanoch vaan ebꞌ tzꞌicꞌancot ebꞌ unin chiꞌ.
14 A ix yilan jun chiꞌ Jesús,
ix cot yoval dꞌa ebꞌ,
ix yalani:
—Chaeccot ebꞌ unin dꞌayin.
Man̈ e cach ebꞌ,
yujto an̈ej ebꞌ lajan spensar icha ebꞌ unin tic ay yalan yic yoch dꞌa yol scꞌabꞌ Dios.
15 Val yel sval dꞌayex,
a ebꞌ max chaan Dios Yajaloc icha syutej schaan junoc unin,
man̈ ol och ebꞌ dꞌa yol scꞌabꞌ,
xchi Jesús dꞌa ebꞌ.
16 Ix lajvi chiꞌ,
ix schelanqꞌue ebꞌ unin chiꞌ.
Ix yacꞌanecꞌ scꞌabꞌ dꞌa sjolom ebꞌ.
Ix scꞌanan svachꞌcꞌolal Dios dꞌa yibꞌan̈ ebꞌ.
A yabꞌixal jun vin̈ quelem bꞌeyum
17 Axo yic van sbꞌatxi Jesús dꞌa yol bꞌe,
ay jun vin̈ ix spil yip scot dꞌay.
Ix em cumnaj vin̈ dꞌa yichan̈ scꞌochi.
Ix yalan vin̈ dꞌay:
—Ach in vachꞌ Cꞌaybꞌumal,
tzin cꞌanbꞌej dꞌayach,
¿tas ol vutoc in chaan in qꞌuinal dꞌa juneln̈ej?
xchi vin̈ dꞌay.
18 —¿Tas yuj tzin al vachꞌil?
Junn̈ej mach vachꞌ,
an̈ejton Dios.
19 Inai,
ojtac juntzan̈ schecnabꞌil Dios tzꞌalan icha tic:
Man̈ ach em ajmulal.
Man̈ a milcham junoc etanimail.
Man̈ ach elcꞌanoc.
Man̈ acꞌoch es dꞌa yibꞌan̈ junoc etanimail.
Man̈ acꞌ musansatil junoc etanimail.
Ayocabꞌ yelcꞌoch a mam a nun dꞌa a sat,
xchi Jesús dꞌa vin̈.
20 —Mamin,
atax in cotoch uninal,
tzin cꞌanabꞌajej juntzan̈ checnabꞌil tic smasanil,
xchi vin̈ dꞌay.
21 Yuj chiꞌ,
ix och qꞌuelan Jesús dꞌa vin̈.
Ix te xajanaj vin̈ yuuj.
Ix yalan dꞌa vin̈:
—Ayto junxo max ach tzacꞌvani.
Ixic,
bꞌat chon̈el jantac tas ay dꞌayach.
Tzacꞌan stojol dꞌa ebꞌ mebꞌaꞌ,
yic ol a cha a bꞌeyumal dꞌa satchaan̈.
Slajvi chiꞌ,
tzach jax dꞌayin,
axo och in cꞌaybꞌumoc chiꞌ,
xchi dꞌa vin̈.
22 Axo ix yabꞌan juntzan̈ chiꞌ vin̈,
ix te cus vin̈.
Yuj chiꞌ te cuscꞌolalxo ix pax vin̈,
yujto man̈ jantacoc tas ay dꞌa vin̈.
23 Axo ix lajvi spax vin̈,
ix meltzajbꞌat qꞌuelan Jesús dꞌa ebꞌ scꞌaybꞌum.
Ix yalan dꞌa ebꞌ:
—A val ebꞌ bꞌeyum,
ay val smay man̈ ol ochlaj ebꞌ dꞌa yol scꞌabꞌ Dios,
xchi dꞌa ebꞌ.
24 A ebꞌ scꞌaybꞌum chiꞌ,
ix te sat scꞌol ebꞌ yabꞌan juntzan̈ chiꞌ.
Palta ix yalanxi dꞌa ebꞌ:
—Ex in cꞌaybꞌum,
a ebꞌ syacꞌoch sbꞌeyumal yipoc scꞌool,
ay val smay man̈ ol ochlaj ebꞌ dꞌa yol scꞌabꞌ Dios.
25 Qꞌuinaloc ay junoc nocꞌ camello ticnaic.
¿Tom ol yal yecꞌ nocꞌ dꞌa yixal junoc qꞌuen acxa?
Icha chiꞌ yaj ebꞌ bꞌeyum,
yelxo val pural ol och ebꞌ dꞌa yol scꞌabꞌ Dios,
xchi.
26 Ayic ix yabꞌan jun chiꞌ ebꞌ,
ix te vachꞌ satbꞌat scꞌool ebꞌ.
Ix laj yalan ebꞌ:
—Tato icha chiꞌ,
¿mach ol yal scolchaji?
xchi ebꞌ.
27 Yuj chiꞌ,
ix och qꞌuelan Jesús dꞌa ebꞌ,
ix yalani:
—A jun tic,
malaj junoc anima syal yuuj.
Palta a Dios syal yuuj.
Yujto masanil tas syaln̈ej yuuj,
xchi.
28 Axo vin̈aj Pedro ix alan dꞌay:
—Mamin,
a on̈ tic,
ix cactejcan smasanil tastac,
on̈ och a cꞌaybꞌumoc,
xchi vin̈ dꞌay.
29 —Val yel sval dꞌayex,
a mach syactejcan spat vuuj,
mato yucꞌtac,
yanabꞌ,
smam snun,
ma yuninal,
ma sluum syactejcan vuuj,
yuj pax jun vachꞌ abꞌix yic colnabꞌil,
te nivan spac ol schaꞌa.
30 Ol acꞌjoc junoc ciento spat,
yucꞌtac,
yanabꞌ,
snun,
yuninal,
yedꞌ sluum dꞌa jun tiempo tic.
Ol yabꞌ ton syail ebꞌ yuj ebꞌ anima,
palta axo dꞌa yic jun tiempoal ol javoc,
ol scha sqꞌuinal ebꞌ dꞌa juneln̈ej.
31 Ay ebꞌ nivan yelcꞌoch dꞌa co cal ticnaic,
palta a ebꞌ chiꞌ,
malaj ol aj yelcꞌoch ebꞌ dꞌa jun tiempoal chiꞌ.
An̈ejtonaꞌ ay ebꞌ malaj yelcꞌoch dꞌa co cal ticnaic,
palta a dꞌa jun tiempoal chiꞌ,
nivan ol aj yelcꞌoch ebꞌ,
xchi Jesús dꞌa ebꞌ.
Ayocto ix yalanxican Jesús yuj schamel
32 Axo Jesús ix bꞌatxi dꞌa yol jun bꞌe scꞌoch dꞌa Jerusalén.
Ix bꞌabꞌlaj yuj ebꞌ scꞌaybꞌum.
A ebꞌ scꞌaybꞌum chiꞌ,
ton̈ej ix sat scꞌool ebꞌ.
Axo juntzan̈xo ebꞌ anima ajun yedꞌ ebꞌ,
ix te xiv ebꞌ.
Axo Jesús,
ix avtanelta ebꞌ scꞌaybꞌum chiꞌ slajchavan̈il dꞌa scal ebꞌ anima chiꞌ.
Ix och ijan yalan dꞌa ebꞌ tastac ol javoc dꞌa yibꞌan̈.
Marcos 10.32-52
33 —Ina van co bꞌat dꞌa Jerusalén ticnaic.
A in Acꞌbꞌil in cot yuj Dios voch animail tic,
ol in acꞌjococh dꞌa yol scꞌabꞌ ebꞌ sat sacerdote yedꞌ dꞌa yol scꞌabꞌ ebꞌ cꞌaybꞌum dꞌa ley Moisés.
Ol yacꞌanoch chamel ebꞌ dꞌa vibꞌan̈.
Ol in acꞌjococh dꞌa yol scꞌabꞌ ebꞌ chꞌoc chon̈abꞌil.
34 Ol in sbꞌuch ebꞌ.
Ol in smacꞌan ebꞌ.
Ol in stzubꞌej ebꞌ.
Ol in smilancham ebꞌ.
Palta axo dꞌa schabꞌjial ol in pitzvocxi,
xchi Jesús dꞌa ebꞌ.
A tas ix scꞌan vin̈aj Jacobo yedꞌ vin̈aj Juan
35 A ebꞌ vin̈ yuninal vin̈aj Zebedeo,
aton vin̈aj Jacobo yedꞌ vin̈aj Juan,
ix cꞌoch ebꞌ vin̈ yal dꞌa Jesús:
—Mamin,
a tas ol co cꞌan dꞌayach,
co gana tzacꞌ dꞌayon̈,
xchi ebꞌ vin̈ dꞌay.
36 —¿Tas e gana svacꞌ dꞌayex?
xchi dꞌa ebꞌ vin̈.
37 —Ayic ol ach och yajalil,
tzoc on̈ a cha em cꞌojan dꞌa a tzꞌey,*
jun on̈ dꞌa a vachꞌ,
jun on̈xo dꞌa a qꞌuexan̈,
xchi ebꞌ vin̈ dꞌay.
38 —Max nachajel eyuuj tas tze cꞌan dꞌayin.
¿Tom ol techaj yaelal e yuuj icha ol in utaj a in tic?
A val jun tas ol javoc dꞌa vibꞌan̈ ichato ol in acꞌjoc bautizar yuuj,
¿tom ol techaj eyuuj?
xchi dꞌa ebꞌ vin̈.
39 —Ol techajoc,
xchi ebꞌ vin̈.
—Val yel,
ol ex acꞌjoc proval,
icha ol in ajoc.
Icha ol vabꞌ syail,
icha chiꞌ ol aj eyabꞌanpax syail.
40 Palta a in tic,
malaj valan vic ex vacꞌan em cꞌojan dꞌa in vachꞌ cꞌabꞌ,
ma dꞌa in qꞌuexan̈.
Yujto a co Mam Dios bꞌojinaccani mach ebꞌ ol em cꞌojan taꞌ,
xchi dꞌa ebꞌ vin̈.
41 Ayic ix yabꞌan lajun̈van̈xo ebꞌ yetcꞌaybꞌumal ebꞌ chiꞌ,
ix cot yoval ebꞌ dꞌa vin̈aj Jacobo yedꞌ dꞌa vin̈aj Juan chiꞌ.
42 Axo Jesús chiꞌ ix avtancot ebꞌ slajchavan̈il,
ix yalan dꞌa ebꞌ:
—Toxon eyojtac to a ebꞌ ayoch yajalil dꞌa junjun nivac chon̈abꞌ,
syacꞌ mandar ebꞌ.
Axo ebꞌ nivac vinac,
yajal yaj ebꞌ dꞌa yibꞌan̈ ebꞌ anima.
43 Palta a exxo tic,
man̈ ichoc taꞌ ol aj dꞌa e cal.
Tato ay mach sgana nivan tzꞌaj yelcꞌoch dꞌa e cal,
yovalil tzꞌoch ex yacꞌ servil.
44 An̈ejtonaꞌ,
tato ay mach sgana sat tzꞌaj dꞌa e cal,
yovalil tzꞌoch e checabꞌoc.
45 Yujto a in tic,
vachꞌchom Acꞌbꞌil in cot yuj Dios voch animail,
man̈ yujoc vacꞌji servil in javi,
palta yuj vacꞌan servil.
Ix in javi ul vacꞌcham in bꞌa sqꞌuexuloc ebꞌ anima,
yic vachꞌ tzijtum ebꞌ ol colchajcanel vuuj,
xchi Jesús dꞌa ebꞌ.
Ix jacvi sat vin̈aj Bartimeo yuj Jesús
46 Ix cꞌoch Jesús dꞌa chon̈abꞌ Jericó yedꞌ ebꞌ scꞌaybꞌum.
Axo yic ix bꞌatxi ebꞌ,
man̈ jantacoc anima ix bꞌat yedꞌ ebꞌ.
Axo dꞌa jun tiꞌ bꞌe,
ay jun vin̈ cꞌojanemi,
Bartimeo sbꞌi vin̈,
yuninal vin̈aj Timeo,
max ujilaj yilan vin̈.
Ton̈ej scꞌan jabꞌoc tas vin̈ dꞌa ebꞌ anima.
47 Axo ix yabꞌan vin̈ to van yecꞌ Jesús aj Nazaret,
yuj chiꞌ ix avaj chaan̈ vin̈:
—Jesús,
ach Yin̈tilal vin̈aj David,
¿ma max ocꞌ a cꞌool dꞌayin?
xchi vin̈ dꞌay.
48 Yuj chiꞌ,
tzijtum ebꞌ ix cachan vin̈aj Bartimeo chiꞌ yic tzꞌem numan vin̈.
Palta masn̈ej ix te avaj vin̈.
—Ach Yin̈tilal vin̈aj David,
¿ma max ocꞌ a cꞌool dꞌayin?
xchi vin̈ dꞌay.
49 Yuj chiꞌ ix och vaan Jesús,
ix yalani:
—Avtejeccot vin̈ dꞌayin,
xchi.
Yuj chiꞌ,
ix bꞌat ebꞌ yal dꞌa vin̈:
—Tzalajan̈.
Qꞌuean̈ vaan,
yujto tzach yavtejbꞌat Jesús,
xchi ebꞌ.
50 Yuj chiꞌ,
ix syumancanel jun sábana vin̈ bꞌacꞌanoch dꞌay.
Ix qꞌue jucnaj vin̈.
Elan̈chamel ix bꞌat vin̈ dꞌa Jesús.
51 Ix scꞌanbꞌan Jesús dꞌa vin̈:
—¿Tas a gana tzach vutej?
xchi dꞌa vin̈.
—Mamin,
in gana svilxi,
xchi vin̈ dꞌay.
52 Ix ach bꞌoxi yujto ix acꞌoch Dios dꞌa a cꞌool.
Yuj chiꞌ,
syalxo a pax ticnaic,
xchi Jesús dꞌa vin̈.
Dꞌa jun rato chiꞌ ix yilxi vin̈.
Ix lajvi chiꞌ,
ix och tzacꞌan vin̈ yedꞌ Jesús bꞌaj van sbꞌati.