A jun abꞌix yic ebꞌ munlajvum
20
Ix yalan Jesús dꞌa ebꞌ scꞌaybꞌum icha tic:
—Ol val dꞌayex tas tzꞌaj yoch ebꞌ anima dꞌa yol scꞌabꞌ Dios aj satchaan̈.
A junel,
ay jun vin̈ patrón ayto sacbꞌi ix qꞌue vaan.
Ix bꞌat vin̈ say ebꞌ smajan yic smolanel sat teꞌ uva ebꞌ.
2 Ayic ix ilchaj ebꞌ,
ix yacꞌ strato vin̈ yedꞌ ebꞌ.
Ix yalan vin̈ dꞌa ebꞌ to jun denario ol stup scꞌu junjun ebꞌ vin̈.
Ichato chiꞌ bꞌian,
ix checjibꞌat ebꞌ dꞌa smunlajel vin̈ chiꞌ.
3 Axo dꞌa qꞌuecꞌualilxo,
ix bꞌat vin̈ dꞌa mercado.
Ix yilan vin̈ to ay juntzan̈xo ebꞌ vin̈ ton̈ej ayeqꞌui.
4 Yuj chiꞌ ix yalan vin̈ dꞌa ebꞌ vin̈:
Tato e gana tze say munlaj e bꞌa,
ixiquec munlajel dꞌayin.
Tzꞌacan ol vacꞌ e tojol,
yaln̈ej jantac ol ex munlajoc,
xchi vin̈.
Yuj chiꞌ ix bꞌat ebꞌ vin̈ dꞌa vin̈ munlajel chiꞌ.
5 Axo dꞌa chimxocꞌual,
ix bꞌatxi vin̈.
An̈ejaꞌ lajan ix yutej vin̈ yacꞌanxi strato yedꞌ juntzan̈xo ebꞌ vin̈,
icha ix yutej vin̈ dꞌa qꞌuecꞌualil.
An̈ejaꞌ icha chiꞌ ix yutej vin̈ dꞌa tzꞌeymajcꞌualxo.
6 Axo dꞌa yemxocꞌualil,
ix bꞌatxi vin̈ dꞌa mercado chiꞌ.
Axo ix yilan vin̈,
ay juntzan̈xo ebꞌ vin̈ ton̈ej ayeqꞌui,
ix yalanpax vin̈ dꞌa ebꞌ vin̈:
¿Tas yuj ton̈ej ayex ecꞌ dꞌa tic tzꞌecꞌ cꞌu?
xchi vin̈.
7 Malaj mach tzon̈ manani,
xchi ebꞌ vin̈ dꞌa vin̈.
Tato icha chiꞌ,
ixiquec,
munlajan̈ec jabꞌoc dꞌayin.
Ol vacꞌ e tojol icha syal jantac ol ex munlajoc,
xchi vin̈.
8 Axo dꞌa qꞌuicꞌbꞌalxo,
ix yalan vin̈ dꞌa jun vin̈ scaporal:
Avtejcot ebꞌ vin̈ in majan chiꞌ,
tza tupan ebꞌ vin̈.
A ebꞌ vin̈ tzacꞌanto ix och dꞌa in munlajel chiꞌ,
a ebꞌ vin̈ tza bꞌabꞌlaj tupej.
Axo ebꞌ vin̈ bꞌabꞌel ix ochi,
tzacꞌanto tza tup ebꞌ vin̈,
xchi vin̈.
9 Yuj chiꞌ,
a ebꞌ vin̈ yemxocꞌualil ix ochi,
a ebꞌ vin̈ ix bꞌabꞌlajcꞌoch scha stojol.
Junjun denario ix scha ebꞌ vin̈ stojoloc.
10 Axo ebꞌ vin̈ ix bꞌabꞌlaj och dꞌa smunlajel chiꞌ,
a snaan ebꞌ vin̈ to más nivan stojol ebꞌ vin̈ ol schaꞌa.
Palta an̈ejtonaꞌ junjunn̈ej denario ix scha ebꞌ vin̈.
11 Ayic ix schaan stojol ebꞌ vin̈ chiꞌ,
ix cot yoval ebꞌ vin̈ dꞌa vin̈ patrón chiꞌ.
12 Ix yalan ebꞌ vin̈:
Ach co patrón,
a ebꞌ vin̈ ix och dꞌa slajvubꞌxo munlajel,
junxon̈ej hora ix yacꞌ ebꞌ vin̈ quedꞌoc,
palta lajan co tojol ix acꞌ yedꞌ ebꞌ vin̈.
Palta a on̈ tic pural ix ecꞌ cꞌu cuuj,
man̈ jantacoc cꞌacꞌ ix cabꞌi,
xchi ebꞌ vin̈.
13 Axo vin̈ patrón chiꞌ ix alan dꞌa jun vin̈ dꞌa scal ebꞌ vin̈:
Ach vamigo,
man̈ chucoc svutej in bꞌa dꞌayex.
Inai,
jun denario ix cutej co trato.
14 Yuj chiꞌ,
cha a tojol.
Ixic.
Axo juntzan̈xo ebꞌ vin̈ tzacꞌanto ix och dꞌa in munlajel,
a in dꞌa in gana,
tzꞌacan svacꞌ stojol ebꞌ vin̈.
15 Yujto a in,
vic in tumin.
Max yal scot oval dꞌayin,
yujto vachꞌ svutej in bꞌa dꞌa junjun anima,
xchi vin̈.
Icha chiꞌ syal jun abꞌix tic.
16 Yuj chiꞌ,
a ebꞌ malaj yelcꞌoch ticnaic,
más nivan ol aj yelcꞌoch ebꞌ.
Axo ebꞌ nivan yelcꞌoch ticnaic,
man̈xalaj ol aj yelcꞌoch ebꞌ taꞌ,
xchi Jesús dꞌa ebꞌ.
Ayocto ix yalancan Jesús yuj schamel
17 Axo Jesús van sbꞌatxi dꞌa yol bꞌe yedꞌ ebꞌ ajun yedꞌoc,
van sbꞌat ebꞌ dꞌa Jerusalén.
Ayic van sbꞌey ebꞌ,
ix yavtanelta ebꞌ scꞌaybꞌum slajchavan̈il dꞌa scal ebꞌ anima chiꞌ.
Ix yalan dꞌa ebꞌ:
18 Inai,
ticnaic van co bꞌat dꞌa Jerusalén.
A in tic,
vachꞌchom Acꞌbꞌil in cot yuj Dios voch animail,
palta ol in acꞌjococh dꞌa yol scꞌabꞌ ebꞌ vin̈ sacerdote yedꞌ dꞌa yol scꞌabꞌ ebꞌ vin̈ cꞌaybꞌum dꞌa ley Moisés.
Ol yacꞌoch chamel ebꞌ vin̈ dꞌa vibꞌan̈.
19 Ol in acꞌjococh dꞌa yol scꞌabꞌ ebꞌ man̈ israeloc.
Ol in sbꞌuch ebꞌ.
Ol in smacꞌan ebꞌ.
Ol in culusajqꞌueoc.
Axo dꞌa schabꞌjial,
ol in pitzvocxoc,
xchi dꞌa ebꞌ.
A tas scꞌannac ix snun vin̈aj Jacobo yedꞌ vin̈aj Juan
20 A ix yetbꞌeyum vin̈aj Zebedeo,
ix cꞌoch ix dꞌa Jesús yedꞌ chavan̈ ebꞌ yuneꞌ,
aton vin̈aj Jacobo yedꞌ vin̈aj Juan.
Ix em cuman ix dꞌa yichan̈,
yujto sgana ix scꞌan jabꞌoc tas dꞌay.
21 Yuj chiꞌ ix yalan dꞌa ix:
—¿Tas a gana tza cꞌan dꞌayin?
xchi.
—Ayic ol ach och Yajalil,
comonoc tza cha em cꞌojan ebꞌ vin̈ vuneꞌ tic dꞌa a tzꞌey,
jun vin̈ dꞌa a vachꞌ,
axo junxo vin̈ dꞌa a qꞌuexan̈,
xchi ix dꞌay.
22 Ix yalan Jesús dꞌa ebꞌ vin̈ schavan̈il:
—Max nachajel-laj eyuj tas tze cꞌan dꞌayin.
¿Tom ol techaj yaelal eyuuj icha ol in utaj a in tic?
xchi dꞌa ebꞌ vin̈.
—Ol techajoc,
xchi ebꞌ vin̈ dꞌay.
23 —Val yel ol ex acꞌjoc proval icha ol in utajoc.
Icha ol vabꞌ syail a in tic,
icha chiꞌ ol aj eyabꞌanpax syail.
Palta a in tic,
malaj valan vic ex vacꞌan em cꞌojan dꞌa in vachꞌ ma dꞌa in qꞌuexan̈.
Yujto a co Mam Dios bꞌojinaccani mach ebꞌ ol em cꞌojan taꞌ.
Yuj chiꞌ ol acꞌjoc dꞌa ebꞌ,
xchi Jesús dꞌa ebꞌ vin̈.
24 Axo lajun̈van̈xo ebꞌ scꞌaybꞌum,
ayic ix yabꞌan juntzan̈ chiꞌ ebꞌ,
ix cot yoval ebꞌ dꞌa ebꞌ chavan̈ chiꞌ.
25 Yuj chiꞌ ix avtajcot ebꞌ slajchavan̈il yuj Jesús.
Ix yalan dꞌa ebꞌ:
—Eyojtacxo,
a ebꞌ ayoch yajalil dꞌa junjun nivac chon̈abꞌ,
a ebꞌ tzꞌacꞌan mandar.
Axo ebꞌ nivac vinac,
yajal ton yaj ebꞌ dꞌa yibꞌan̈ ebꞌ anima.
26 Palta a ex tic,
man̈ ichoctaꞌ ol aj dꞌa e cal.
Tato ay mach sgana nivan tzꞌaj yelcꞌoch dꞌa e cal,
yovalil tzꞌoch ex yacꞌ servil.
27 A mach sgana sat tzꞌaj dꞌa e cal,
yovalil tzꞌoch e checabꞌoc.
28 Ichin pax taꞌ a in Acꞌbꞌil in cot yuj Dios voch animail tic,
man̈ yujoc in yacꞌan servil ebꞌ anima in javi,
palta yuj ul vacꞌan servil ebꞌ,
in ja vacꞌcham in bꞌa yuj ebꞌ,
yic vachꞌ tzijtum mach ol colchaj vuuj,
xchi dꞌa ebꞌ.
Jacvinac sat chavan̈ vinac yuj Jesús
29 Ayic van yelxi ebꞌ dꞌa Jericó,
tzijtum anima ix och tzacꞌan yuj Jesús.
30 Axo dꞌa tiꞌ bꞌe,
cꞌojanem chavan̈ vinac max uji yilani.
Axo ix yabꞌan ebꞌ to van yecꞌ Jesús,
te chaan̈ ix avaj ebꞌ:
—Mamin,
ach Yin̈tilalcan vin̈aj David,
¿tom max ocꞌ a cꞌool dꞌayon̈?
xchi ebꞌ dꞌay.
31 Palta axo ebꞌ anima ix cachan ebꞌ yic tzꞌem numan ebꞌ.
Palta masn̈ej ix avaj chaan̈ ebꞌ:
—Mamin,
ach Yin̈tilal can vin̈aj David,
¿tom max ocꞌ a cꞌool dꞌayon̈?
xchi ebꞌ.
32 Yuj chiꞌ,
ix och vaan Jesús,
ix yavtancot ebꞌ:
—¿Tas e gana tzex vutej?
xchi.
33 —Mamin,
co gana tza jac co sat,
xchi ebꞌ.
34 Ix ocꞌ scꞌool Jesús dꞌa ebꞌ.
Ix maslaj sat ebꞌ chiꞌ yuuj.
Dꞌa jun rato chiꞌ ix jacvi sat ebꞌ,
ix och tzacꞌan ebꞌ yuuj.