Ix yalcan Jesús yuj chabꞌsatil
12
A junel smilalxo ebꞌ anima ix smolbꞌej sbꞌa dꞌa Jesús.
Ix laj ste svitzꞌej sbꞌa ebꞌ,
ix laj stecꞌlaj yoc ebꞌ.
Axo Jesús chiꞌ ix bꞌabꞌlaj alan dꞌa ebꞌ scꞌaybꞌum:
—Tzeyil val e bꞌa dꞌa yich span ebꞌ fariseo,
syalelcꞌochi,
aton schabꞌsatil ebꞌ,
Lucas 12.1-31
2 yujto jantacn̈ej tas cꞌubꞌanel ticnaic,
ol laj checlajelta.
Yedꞌ pax jantacn̈ej cꞌubꞌeltac yaji,
ol ojtacajeloc.
3 Yuj chiꞌ masanil tas tzeyal dꞌa cꞌubꞌeltac,
ol laj yabꞌ ebꞌ anima smasanil.
Yedꞌ pax masanil tastac slaj e sajlajoch dꞌa e chiquin,
ol laj pucaxel dꞌa scal ebꞌ anima smasanil.
An̈ej dꞌa Dios yovalil tzon̈ xivi
4 Sval dꞌayex ex vamigo,
man̈ ex xiv dꞌa ebꞌ smilan e nivanil tic,
yujto ayic slajvi ex smilan ebꞌ,
malaj junocxo tas syal ex yutan ebꞌ.
5 Palta sval dꞌayex mach bꞌaj yovalil tzex xivi:
Xivan̈ec dꞌa Dios.
Aton jun syal yicꞌanel e qꞌuinal,
slajvi chiꞌ tzex yacꞌanbꞌat dꞌa infierno.
Yuj chiꞌ val yel xivan̈ec dꞌay.
6 Ilecnabꞌ nocꞌ cotac much,
malaj yelcꞌoch nocꞌ.
Ayic schon̈chaj nocꞌ,
ovan̈ nocꞌ dꞌa chabꞌ cotac tumin,
palta a Dios max satlaj scꞌool dꞌa junoc nocꞌ.
7 A ex xo tic,
ecꞌalto eyelcꞌoch dꞌa yichan̈ jantac nocꞌ yunetac much chiꞌ.
Inatax xil e jolom,
bꞌisbꞌil yuj Dios chiꞌ.
Yuj chiꞌ man̈ ex och ilcꞌolal.
Ebꞌ max qꞌuixvi yalani to yic Cristo ebꞌ
8 A in sval dꞌayex,
yaln̈ej mach junoc ebꞌ tzꞌalan dꞌa yichan̈ ebꞌ anima to vic ebꞌ,
icha in pax taꞌ,
a in Acꞌbꞌil in cot yuj Dios voch animail tic,
ol val ebꞌ vicoc dꞌa yichan̈ ebꞌ yángel Dios.
9 A ebꞌ tzꞌalan dꞌa yichan̈ ebꞌ anima to man̈ vicoc ebꞌ,
a in xo ol val pax el dꞌa yichan̈ ebꞌ yángel Dios to man̈ vicoc ebꞌ.
10 A ebꞌ tzꞌalan junoc chucal dꞌa in patic,
a in Acꞌbꞌil in cot yuj Dios voch animail tic,
syal yacꞌji lajvoc smul ebꞌ.
Axo ebꞌ tzꞌalan junoc chucal dꞌa spatic Yespíritu Dios,
a jun mul chiꞌ,
man̈xo ol ecꞌbꞌatlaj.
11 Ayic ol ex icꞌjocbꞌat dꞌa spatil culto,
ma tzex icꞌjibꞌat dꞌa yichan̈ ebꞌ vin̈ juez,
ma ebꞌ vin̈ yajal,
man̈ eyacꞌ pensar yuj tas ol eyutoc e colan e bꞌa dꞌa ebꞌ,
ma yuj tas ol eyalaꞌ,
12 yujto ayic ol cꞌoch stiempoal eyalani,
a Yespíritu Dios ol alan dꞌayex tas ol eyalaꞌ,
xchi Jesús dꞌa ebꞌ.
Ay smay jun bꞌeyumal
13 A dꞌa scal juntzan̈ anima chiꞌ,
ay jun vin̈ ix alan dꞌa Jesús:
—Ach co Cꞌaybꞌumal,
al dꞌa vin̈ vucꞌtac to a tas aycan dꞌa vin̈ yuj vin̈ co mam syacꞌ nan̈aloc vic vin̈ yedꞌoc,
xchi vin̈.
14 Ix yalan Jesús dꞌa vin̈:
—Ach vamigo,
¿tom ay mach ix acꞌan vopisio voch juezal dꞌayex,
yic tzin pucanbꞌat juntzan̈ e cꞌael chiꞌ?
xchi dꞌa vin̈.
15 Ix lajvi chiꞌ,
ix yalan dꞌa ebꞌ anima:
—Tzeyil e bꞌa,
tze tan̈vej val e bꞌa,
yic malaj bꞌaj ol eyil e cꞌool dꞌa junoc tas,
yujto vachꞌchom tzijtum tas ay dꞌayon̈,
man̈ yujoc chiꞌ tzalajcꞌolal tzon̈ ecꞌ dꞌa yolyibꞌan̈qꞌuinal tic,
xchi.
16 Yuj chiꞌ ix yal jun chꞌoxnabꞌil tic dꞌa ebꞌ:
—Ay jun vin̈ bꞌeyum,
tzijtum sat tas syavej vin̈ ix el dꞌa sat sluum.
17 Ix snaubꞌtan̈an vin̈:
¿Tas svutej?
Man̈xa bꞌaj syal in molancan sat tas ix vavej tic.
18 Ix snaan vin̈ icha tic:
Ol in pojel juntzan̈ spatil sat vavbꞌen tic,
ol in bꞌoan juntzan̈ocxo nivac.
Ataꞌ ol in molcanoch masanil tastac ix vavej yedꞌ masanil in cꞌael.
19 Ol lajvoc chiꞌ,
ol valan icha tic:
A ticnaic,
nivan tas ix in molbꞌejcani,
nivan tiempo ol in cꞌanaꞌ,
yuj chiꞌ syal vicꞌan vip ticnaic,
syal tzin vaꞌi,
svucꞌan aꞌ,
jantacn̈ej tas tzin nibꞌej.
Syal vacꞌan tzalajbꞌoc in cꞌool,
xin chama,
xchi vin̈.
20 Palta ix yalan Dios dꞌa vin̈:
A ach tic te malaj a pensar.
Dꞌa jun acꞌval tic ol ach chamoc.
A juntzan̈ molbꞌilcan tic uuj,
¿mach ay yicoꞌ?
xchi Dios dꞌa vin̈.
21 Icha chiꞌ yaj ebꞌ smolan sbꞌeyumal dꞌa yol yicoꞌ,
axo dꞌa yic Dios mebꞌaꞌ ebꞌ,
xchi Jesús dꞌa ebꞌ anima.
A Dios tzꞌilan ebꞌ yuninal
22 Ix lajvi chiꞌ,
ix yalan Jesús dꞌa ebꞌ scꞌaybꞌum:
—Sval dꞌayex,
man̈ eyacꞌ pensar yuj tas ol icꞌan yecꞌ tiempo eyuuj.
Yuj tas tze vaꞌa yedꞌ pax yuj e pichul tzeyacꞌochi.
23 A Dios tzꞌacꞌan co qꞌuinal,
ocxom tas sco vaꞌa,
¿tom man̈ ol yacꞌaꞌ?
A ix acꞌan co nivanil,
¿tom man̈ ol yacꞌ pax co pichul?
24 Ina nocꞌ much,
¿tom ay tas syavej nocꞌ?
¿tom ay tas sjachꞌ nocꞌ?
Malaj yedꞌtal bꞌaj smolbꞌej jabꞌoc svael nocꞌ,
palta a Dios tzꞌacꞌann̈ej tas sva nocꞌ.
A ex xo pax tic,
ecꞌal eyelcꞌoch dꞌa yichan̈ nocꞌ much chiꞌ.
25 ¿Tom ay junoc ex syal eyacꞌanoch nan̈alocxo vara e teel yujto tzeyacꞌ pensar?
26 Yuj chiꞌ tato max techaj e bꞌoan juntzan̈ tas malaj yelcꞌochi,
¿tas yuj tzeyacꞌ pensar yuj juntzan̈ocxo tasi?
27 Ilec nabꞌ teꞌ xumac sqꞌuibꞌi.
Max munlaj teꞌ,
max chꞌalvi teꞌ.
Vachꞌchom icha chiꞌ,
ayic yecꞌnac vin̈aj rey Salomón dꞌa pecaꞌ,
te vachꞌ yilji vin̈ yedꞌ spichul,
palta maj tzacꞌvan yilji vin̈ icha teꞌ xumac chiꞌ.
28 A juntzan̈ teꞌ chiꞌ,
ton̈ej ayecꞌ teꞌ dꞌa caltac teꞌ,
axo dꞌa junxo cꞌu sn̈usjitzꞌa teꞌ dꞌa yol horno.
Vachꞌchom icha chiꞌ yaj teꞌ,
a Dios tzꞌacꞌan svachꞌil yilji teꞌ.
Yuj chiꞌ a ex tic,
yelxo val ol yacꞌ e pichul Dios,
palta a ex pural tzeyacꞌoch dꞌa e cꞌool.
29 Yuj chiꞌ man̈ eyacꞌ pensar yuj tas ol e vaꞌa,
yedꞌ yuj tas ol eyuqꞌuej.
30 A ebꞌ man̈ ojtannacoc Dios,
aton dꞌa spatic juntzan̈ tic qꞌuelanoch ebꞌ,
palta yojtac Dios to ay tzꞌoch juntzan̈ chiꞌ cuuj,
yujto co Mam yaji.
31 Yuj chiꞌ,
aqꞌuec eyip e cꞌanabꞌajan Dios Cajal.
Tato icha chiꞌ tze cꞌulej,
ol acꞌjocpax masanil juntzan̈ chiꞌ dꞌayex.
Molec e bꞌeyumal dꞌa satchaan̈
32 A ex tic,
icha in calnel eyaji.
Vachꞌchom jayvan̈ exn̈ej,
palta man̈ ex och ilcꞌolal,
yujto a co Mam Dios ix ex acꞌan och dꞌa yol scꞌabꞌ,
yujto icha chiꞌ ix el dꞌa scꞌool.
Lucas 12.32-59
33 Chon̈eccan el tastac ay dꞌayex,
aqꞌuec dꞌa ebꞌ malaj yicoꞌ.
Icha chiꞌ ol aj smolchaj e bꞌeyumal dꞌa satchaan̈,
ichoc dꞌa yol junoc yedꞌtal malaj bꞌaqꞌuin̈ ol cꞌaoc.
A jun chiꞌ malaj bꞌaqꞌuin̈ ol lajvoc.
Ataꞌ,
malaj junoc elcꞌum syal yelcꞌanelta.
An̈ejtonaꞌ,
man̈ ol och pax ijaxoc.
34 A bꞌaj ay co bꞌeyumal,
ataꞌ aybꞌat co pensar.
Yovalil lista scutej co bꞌa
35 Te lista tzeyutej e bꞌa icha ebꞌ ayoch spichul,
ay pax och scandil ebꞌ stan̈vani.
36 Qꞌuinaloc ay ebꞌ checabꞌ van stan̈van sjax spatrón dꞌa junoc qꞌuin̈ nupnajel,
sjax dꞌa spat.
A sjavi,
tzꞌavajochi,
lista yaj ebꞌ checabꞌ chiꞌ sjacanoch dꞌa elan̈chamel.
Icha syutej sbꞌa ebꞌ checabꞌ chiꞌ stan̈vani,
icha chiꞌ tzeyutej e bꞌa.
37 Tato pitzan ebꞌ checabꞌ chiꞌ ayic sjax spatrón ebꞌ chiꞌ,
te vachꞌ yic ebꞌ.
Val yel sval dꞌayex to a val vin̈ patrón chiꞌ sbꞌoanem cꞌojjabꞌ ebꞌ dꞌa mexa,
tzꞌacꞌji va ebꞌ yuj vin̈.
38 Vachꞌchom chimilacꞌvalxo,
ma ayto scꞌanaꞌ,
ta pitzan ebꞌ schecabꞌ chiꞌ,
te vachꞌ yic ebꞌ.
39 Nachajocabꞌel jun abꞌix tic eyuuj.
Qꞌuinaloc ay junoc vin̈ ix och elcꞌum dꞌa yol spat,
tato yojtac vin̈ jantac hora scꞌoch jun elcꞌum chiꞌ,
majam scha jacjoclaj spat vin̈ chiꞌ.
40 A exxo pax tic,
lista tzeyutej e bꞌa,
tze maclani,
yujto ayic manto in e na javoc,
ol in ja jucnaj a in Acꞌbꞌil in cot yuj Dios voch animail tic,
xchi Jesús dꞌa ebꞌ.
41 Yuj chiꞌ ix scꞌanbꞌan vin̈aj Pedro dꞌay:
—Mamin,
¿cuujn̈ej a ma ix al jun chꞌoxnabꞌil tic,
ma yuj ebꞌ anima smasanil?
xchi vin̈.
42 Yuj chiꞌ ix yalan Jesús dꞌa ebꞌ:
—¿Mach ebꞌ schꞌox ebꞌ checabꞌ vachꞌ chiꞌ tze naꞌa?
Qꞌuinaloc ay junoc patrón,
tato ay junoc checabꞌ scꞌanabꞌajani,
jelan paxi,
aton jun chiꞌ tzꞌacꞌjioch yopisio yoch mayordomoal yic syil ebꞌ schecabꞌ chiꞌ smasanil,
syacꞌan va ebꞌ dꞌa junjuntac el.
43 Tato a jun checabꞌ chiꞌ van smunlaj icha sgana spatrón,
te vachꞌ yicoꞌ ayic ol jax spatrón chiꞌ.
44 Val yel sval dꞌayex to ol yacꞌoch vin̈ yilumaloc jantac tas ay dꞌay.
45 Palta qꞌuinaloc a jun checabꞌ chiꞌ snaani to manto ol ja spatrón chiꞌ,
yuj chiꞌ syamanoch smacꞌan ebꞌ yetchecabꞌvumal chiꞌ yedꞌ ebꞌ ix ix smunlaji,
ton̈ej syacꞌ sgana svaꞌi,
syucꞌan an̈.
46 Axo dꞌa junoc cꞌu snaꞌa to manto ol jalaj vin̈ spatrón chiꞌ,
palta a dꞌa jun cꞌu chiꞌ ol javoc vin̈.
Ta sjavi vin̈ ayic man̈ tan̈vabꞌiloc,
man̈ naanoc yuj jun checabꞌ chiꞌ,
te nivan syaelal ol acꞌjococh dꞌa yibꞌan̈.
Ol yacꞌanbꞌat vin̈ dꞌa scal ebꞌ maj acꞌan och Dios dꞌa scꞌool.
47 Qꞌuinaloc ay junoc checabꞌ ojtannac tas sgana spatrón dꞌay.
Palta man̈ listaoc syutej sbꞌa,
max scꞌanabꞌajej paxi.
Te nivan yaelal ol ochcan dꞌa yibꞌan̈.
48 Palta qꞌuinaloc ay jun checabꞌ man̈ ojtannacoc tas sgana spatrón,
scꞌulej juntzan̈ tas smoj tzꞌacꞌjicot yaelal dꞌa yibꞌan̈ yuuj,
quenn̈ej yaelal chiꞌ ol cot dꞌa yibꞌan̈.
A ebꞌ nivan tas ix acꞌji dꞌay,
nivan pax tas ol cꞌanbꞌaj dꞌa ebꞌ.
Yedꞌ ebꞌ nivan tas ix acꞌjioch dꞌa yol scꞌabꞌ,
nivan pax tas ol yacꞌxi entregar ebꞌ.
Yuj Jesús ay ebꞌ ol spojel sbꞌa
49 A in tic,
in ja vacꞌoch jun icha cꞌacꞌ dꞌa yolyibꞌan̈qꞌuinal tic.
Comonoc val vanxo sqꞌue tin̈ton scꞌacꞌal ticnaic.
50 Ay val jun nivan yaelal ol ja dꞌa vibꞌan̈,
ichato ol in acꞌjoc bautizar yuuj.
Tzin cus val sicꞌlabꞌil ticnaic masanto ol ujoc elcꞌochi.
51 ¿Tom tze na a ex tic to in ja vacꞌoch juncꞌolal dꞌa yolyibꞌan̈qꞌuinal tic?
Sval eyabꞌi to maay.
In javi vacꞌ spoj sbꞌa ebꞌ anima.
52 Qꞌuinaloc ay ovan̈oc dꞌa junoc pat,
ol och oxvan̈oc ajcꞌolal dꞌa chavan̈xo.
Axo ebꞌ chavan̈ chiꞌ ol och ajcꞌolal pax dꞌa ebꞌ oxvan̈ chiꞌ.
Icha chiꞌ ol aj ebꞌ anima dꞌa jun tiempoal tic.
53 A ebꞌ mamabꞌil,
ol yacꞌ oval ebꞌ yedꞌ ebꞌ yuninal.
An̈ejaꞌ pax ebꞌ ix nunabꞌil,
ol yacꞌ oval ebꞌ ix yedꞌ yuneꞌ.
Ay pax ebꞌ ix alibꞌal ol yacꞌ oval yedꞌ ebꞌ ix yalibꞌ,
xchi Jesús dꞌa ebꞌ.
A juntzan̈ yechel yic lajvubꞌ cꞌual
54 Ix yalan juntzan̈xo tic Jesús dꞌa ebꞌ anima:
—Ayic tzeyilan sqꞌue vaan asun bꞌaj tzꞌem cꞌu,
elan̈chamel tzeyalaꞌ to ol yacꞌ n̈abꞌ.
Yel toni,
icha chiꞌ yaji.
55 Axo yic scot icꞌ dꞌa sur,
tzeyalani to ol qꞌuixnajoc.
Yel tzeyalaꞌ,
sqꞌuixnaji.
56 Palta a ex tic,
chabꞌ sat ex.
Jelan snachajel juntzan̈ chiꞌ eyuuj,
juntzan̈ scot dꞌa satchaan̈ yedꞌ dꞌa yolyibꞌan̈qꞌuinal tic,
palta ¿tas yuj max nachajel eyuuj tas syalelcꞌoch jun tiempoal tic?
Sco bꞌo co bꞌa yedꞌ ebꞌ cajcꞌool
57 ¿Tas yuj max e bꞌeycꞌolej e bꞌa tato tojol tas tze cꞌulej dꞌa yichan̈ Dios?
58 Qꞌuinaloc ay junoc mach tzꞌacꞌanoch tas dꞌa eyibꞌan̈ ticnaic,
ayic vanto e bꞌat yedꞌ dꞌa yol bꞌe,
tzeyalan e bꞌa dꞌay,
yic maxtzac ex cꞌoch dꞌa yichan̈ vin̈ alcal.
Yujto a vin̈ alcal chiꞌ ol ex acꞌanoch dꞌa yol scꞌabꞌ ebꞌ vin̈ polencía.
Axo ebꞌ vin̈ ol ex acꞌanoch dꞌa preso.
59 Sval dꞌayex,
max ex el dꞌa libre,
masanto tze tup e multa smasanil.