Yalnac Jesús to ol em lan̈naj stemplo Dios
24
Ix elta Jesús dꞌa yamaqꞌuil stemplo Dios.
Ayic van sbꞌati,
ix cꞌoch ebꞌ scꞌaybꞌum dꞌay.
Ix schꞌoxan junjun macan̈il yic stemplo Dios chiꞌ ebꞌ dꞌay.
2 Ix yalan dꞌa ebꞌ:
—¿Tzam eyil juntzan̈ nivac pat tic smasanil?
Val yel sval dꞌayex,
a juntzan̈ qꞌuen qꞌueen latzꞌbꞌilqꞌue tic,
man̈xa junoc qꞌuen ol can dꞌa yibꞌan̈ qꞌuen yetqꞌueenal.
Ol juchajem smasanil,
xchi dꞌa ebꞌ.
A juntzan̈ yechel yic lajvubꞌ cꞌual
3 Ix lajvi chiꞌ,
ix bꞌat dꞌa tzalan Olivo.
Ix em cꞌojan taꞌ.
Axo ebꞌ scꞌaybꞌum,
ix cꞌoch ebꞌ schꞌocoj dꞌay,
ix yalan ebꞌ:
—Sco nibꞌej tzal dꞌayon̈,
¿bꞌaqꞌuin̈ ol ja jun ix al chiꞌ?
¿Tas junoc yechel ol acꞌan checlajoc to toxo ol ach javoc,
to toxo pax ol lajvoquecꞌ jun tiempoal tic?
xchi ebꞌ dꞌay.
4 Yuj chiꞌ ix yalanxi Jesús chiꞌ dꞌa ebꞌ:
—Te lista tzeyutej e bꞌa,
yic malaj junoc mach ol ex acꞌan musansatil.
5 Yujto tzijtum ebꞌ ol esanel in bꞌi,
ol laj yalan ebꞌ:
A in ton tic Cristo in,
xcham ebꞌ.
Tzijtum mach ol smusej sat ebꞌ.
6 Ol eyabꞌ yoch juntzan̈ nivac oval.
Ol eyabꞌanpax specal juntzan̈xo ijan ol ochoc.
Palta man̈ ex xivoc,
yujto yovalil icha chiꞌ ol ujoc elcꞌochi.
Palta manto ol lajvoc el-laj yolyibꞌan̈qꞌuinal tic taꞌ.
7 Yujto ay juntzan̈ nivac chon̈abꞌ ol yacꞌ oval yedꞌ juntzan̈xo nivac chon̈abꞌ.
Ol yacꞌan oval ebꞌ yajal yedꞌ ebꞌ yetyajalil.
Ol ja pax vejel dꞌa yibꞌan̈ ebꞌ.
Ol laj ecꞌ quixcabꞌ.
8 A juntzan̈ chiꞌ,
bꞌabꞌel yaelal.
Ayto juntzan̈xo ol javoc.
9 A ex tic,
ol laj ex acꞌjococh dꞌa yol scꞌabꞌ ebꞌ yajal,
yic ol ex och dꞌa syaelal yuj ebꞌ.
Ol laj ex smilcham ebꞌ.
Masanil ebꞌ anima ol laj och ajcꞌolal dꞌayex vuuj.
10 A dꞌa jun tiempoal chiꞌ,
tzijtum mach ol meltzajxican dꞌa spatic.
Ol laj och ebꞌ ajcꞌolal dꞌa ebꞌ yetbꞌeyum taxon chiꞌ.
Ol laj yacꞌlajoch sbꞌa ebꞌ dꞌa yol scꞌabꞌ chamel.
11 Tzijtum mach ol yaloch sbꞌa schecabꞌoc Dios.
Tzijtum ebꞌ anima ol smusej sat ebꞌ.
12 Ol te qꞌue vaan chucal.
Yuj chiꞌ tzijtum ebꞌ man̈xo ol xajanan Dios.
13 Palta a ebꞌ tecꞌan syutej sbꞌa yabꞌan syail masanto dꞌa slajvubꞌ,
aton ebꞌ chiꞌ ol colchajoc.
14 Axo jun vachꞌ abꞌix tzꞌalani chajtil tzꞌaj yoch ebꞌ anima dꞌa yol scꞌabꞌ Dios,
yovalil ol laj aljoquel dꞌa smasanil yolyibꞌan̈qꞌuinal tic,
yic ol laj yabꞌ ebꞌ dꞌa junjun chon̈abꞌ.
Ichato chiꞌ,
ol ja slajvubꞌ chiꞌ.
15 A vin̈aj Daniel,
vin̈ schecabꞌ Dios dꞌa pecaꞌ,
a vin̈ aljinaccan yuj jun vin̈ tzꞌacꞌan chucal,
tzꞌacꞌan juvoc juntzan̈ tasi.
A mach tzꞌavtan jun abꞌix chiꞌ,
nachajocabꞌ el yuuj.
Ayic ol eyilan jun chiꞌ dꞌa yol stemplo Dios,
16 a ebꞌ ayecꞌ dꞌa Judea,
bꞌatocabꞌ ebꞌ elelal dꞌa tzalquixtac.
17 A ebꞌ ayqꞌue dꞌa span̈anil yibꞌan̈ spat,
man̈xoocabꞌ emixta ebꞌ yic tzꞌoch ebꞌ yiqꞌuelta junoc tas dꞌa yol spat,
yic sbꞌat ebꞌ elelal.
18 Yedꞌ ebꞌ aybꞌat dꞌa smunlajel,
man̈xoocabꞌ ol ul yicꞌ spichul ebꞌ bꞌaj ix cani.
19 A dꞌa jun tiempoal chiꞌ,
te chuc yic ebꞌ ix yabꞌix yedꞌ ebꞌ ix vanto schuni yuneꞌ ayic ol bꞌat ebꞌ elelal.
20 Cꞌanec dꞌa Dios,
yic man̈oc dꞌa n̈abꞌil qꞌuinal ol ex bꞌat elelal,
mato dꞌa scꞌual icꞌoj ip.
21 Yujto te nivan yaelal ol javoc dꞌa jun tiempoal chiꞌ.
Manta bꞌaj tzuji icha chiꞌ yictax ix sbꞌoan yolyibꞌan̈qꞌuinal tic Dios.
An̈ej val jun chiꞌ,
man̈xa bꞌaqꞌuin̈ ol ujoc pax junelxo.
22 Tato max scꞌochlitej stiempoal jun yaelal chiꞌ Dios,
malaj am junoc mach ol colchajcanel dꞌa yol scꞌabꞌ chamel,
palta yuj ebꞌ sicꞌbꞌilxoel yuuj,
ol scꞌochlitej.
23 Tato ay ebꞌ ol alan icha tic dꞌayex:
Ina yajecꞌ Cristo dꞌa tic,
mato,
ina yajecꞌ dꞌa chiꞌ,
ta xchi ebꞌ,
man̈ e cha eyabꞌi.
24 Yujto ay ebꞌ ol laj yaloch sbꞌa Cristoal.
Ay pax ebꞌ ol yaloch sbꞌa schecabꞌoc Dios.
Ol laj schꞌox juntzan̈ yechel ebꞌ yedꞌ juntzan̈ milagro,
ol laj musaj sat ebꞌ anima yuj ebꞌ.
A ebꞌ sicꞌbꞌilxoel yuj Dios,
ijan val ol yacꞌ ganar ebꞌ sjuanel spensar ebꞌ.
25 Ayocto svalancan juntzan̈ tic dꞌayex.
26 Yuj chiꞌ,
tato ay ebꞌ ol alan icha tic dꞌayex:
Abꞌec.
Ayecꞌ Cristo dꞌa tzꞌinan luum,
tato xchi ebꞌ,
man̈ ex bꞌat eyilaꞌ.
Tato ay pax ebꞌ ol alanoc:
Ina yajecꞌ dꞌa yol jun pat chiꞌ,
tato xchi ebꞌ,
man̈ e cha eyabꞌi.
27 Yujto ayic ol in javoc a in Acꞌbꞌil in cot yuj Dios voch animail tic,
masanil mach ol ilanoc,
icha tzꞌaj yecꞌ copnaj lebꞌlon bꞌaj sjavi cꞌu,
scheclaj bꞌaj tzꞌem cꞌu,
masanil mach tzꞌilani.
28 Tato smolbꞌej sbꞌa nocꞌ ostoc,
syalelcꞌochi to ay junoc nocꞌ chamnac nocꞌ,
icha chiꞌ ol ajoc ayic ol in javoc chiꞌ.
A tas ol aj sja Jesús dꞌa schaelal
29 Ayic ol ecꞌchaj juntzan̈ yaelal chiꞌ,
a cꞌu ol qꞌuicꞌbꞌoqueloc,
man̈xo ol yacꞌlaj yoc qꞌuen uj.
Axo qꞌuen cꞌanal,
ol cot qꞌuen dꞌa satchaan̈.
Axo juntzan̈ yipal satchaan̈ chiꞌ ol tzicubꞌtan̈ajoc.
30 Ichato chiꞌ bꞌian,
axo scheclaj jun yechel dꞌa satchaan̈ to a in Acꞌbꞌil in cot yuj Dios voch animail tic van vemuli.
Axo ebꞌ anima dꞌa junjun chon̈abꞌ dꞌa yolyibꞌan̈qꞌuinal tic,
ol laj siqꞌuicꞌoc ebꞌ yoqꞌui,
yujto ol yil ebꞌ vemul dꞌa scal asun.
Man̈ jantacoc in poder,
te nivan in tziquiquial.
31 A inxo,
ol in checcot ebꞌ vángel,
te chaan̈ ol spu strompeta ebꞌ yic smolchajcot ebꞌ sicꞌbꞌilel vuuj.
Ol laj icꞌjoccot ebꞌ bꞌaj slajvicꞌoch yolyibꞌan̈qꞌuinal tic masanto bꞌaj ay yich chaan̈.
32 Abꞌec jun abꞌix ol val yuj teꞌ higo.
Ayic svolanxi teꞌ scꞌabꞌ,
eyojtacxo to toxo ol ja n̈abꞌilqꞌuinal.
33 An̈ejtonaꞌ,
ayic ol eyilan sja masanil juntzan̈ ix val tic,
ol nachajel eyuuj to toxo ol in javoc,
ichato ayinxo ecꞌ dꞌa stiꞌ puerta.
34 Val yel sval dꞌayex,
man̈ ol satel juntzan̈ anima tic,
masanto ol ecꞌchaj juntzan̈ ix val tic smasanil.
35 A satchaan̈ yedꞌ yolyibꞌan̈qꞌuinal tic,
ol sateloc,
palta a in lolonel,
malaj bꞌaqꞌuin̈ ol lajvoqueloc.
36 Palta malaj mach ojtannac bꞌaja cꞌu,
jantac yorail ol in javoc.
A ebꞌ ángel ay dꞌa satchaan̈,
man̈ yojtacoclaj ebꞌ.
A inxo tic,
Yuninal in Dios,
palta man̈ vojtacoc paxlaj.
An̈ej Dios Mamabꞌil ojtannac.
37 Icha dꞌa stiempoal vin̈aj Noé,
icha chiꞌ ol aj jun tiempoal ayic ol in ja a in Acꞌbꞌil in cot yuj Dios voch animail tic.
38 Yujto ayic manto ja jun oval aꞌ mucvajum,
¿toc ay tas sna ebꞌ anima?
Ton̈ej sva ebꞌ,
syucꞌan aꞌ ebꞌ,
syicꞌlan sbꞌa ebꞌ.
Icha chiꞌ van scꞌulan ebꞌ,
ayic sjavinac scꞌual yoch vin̈aj Noé dꞌa yol teꞌ arca chiꞌ.
39 Maj nachajel-laj jabꞌoc yuj ebꞌ masanto sjavinac jun oval aꞌ mucvajum chiꞌ.
Ataꞌ chamnac ebꞌ smasanil.
Icha ajnac ebꞌ dꞌa jun tiempoal chiꞌ,
icha chiꞌ ol aj ebꞌ anima ayic ol in javoc.
40 Qꞌuinaloc ay chavan̈oc vinac aybꞌat munlajel ayic ol in ja chiꞌ,
ay jun ol icꞌjocbꞌatoc,
axo junxo ol canoc.
41 An̈ejtonaꞌ tato ay chavan̈oc ebꞌ ix ix van scheni:
Jun ix ol icꞌjocbꞌatoc,
axo junxo ix ol canoc.
42 Yuj chiꞌ,
te lista tzeyutej e bꞌa,
yujto man̈ eyojtacoc jantac yorail ol in javoc,
a in e Yajal vaji.
43 An̈ejtonaꞌ tato ay junoc vin̈ aj pat ticnaic,
tato yojtac vin̈ janicꞌ ol ja junoc elcꞌum dꞌacꞌvalil,
lista syutej sbꞌa vin̈ yic max yal yoch jun elcꞌum chiꞌ.
44 Yuj chiꞌ,
an̈ejtonaꞌ ex,
te lista tzeyutej e bꞌa,
yujto ayic man̈ in maclabꞌiloc eyuuj,
ataꞌ ol in javoc.
A ebꞌ checabꞌ yedꞌ spatrón
45 Qꞌuinaloc ay junoc vin̈ patrón yedꞌ junoc schecabꞌ.
A vin̈ scꞌanabꞌajani,
vin̈ ay spensar,
aton vin̈ ol yacꞌoch yopisio vin̈ yilan spat yedꞌ masanil tas ay dꞌay.
¿Palta mach jun scꞌanabꞌajan chiꞌ tze naꞌa?
46 Aton vin̈ van smunlaj icha sgana vin̈ patrón chiꞌ ayic ol jaxoc.
Te vachꞌ yic vin̈ chiꞌ.
47 Val yel sval dꞌayex,
ol acꞌjococh yopisio vin̈ dꞌa yibꞌan̈ masanil tas ay dꞌa vin̈ spatrón chiꞌ.
48 Palta tato a vin̈ checabꞌ chiꞌ chuc spensar,
a snaan vin̈ to man̈ ol ja vin̈ spatrón chiꞌ dꞌa elan̈chamel,
49 tzꞌoch ijan vin̈ smacꞌan ebꞌ yetchecabꞌvumal chiꞌ.
Ton̈ej tzꞌecꞌ vin̈ vael yedꞌ ebꞌ ucꞌum an̈.
Tzꞌucꞌvi an̈ vin̈ yedꞌ ebꞌ.
50 Axo dꞌa jun cꞌual man̈ maclabꞌiloc yuj vin̈ checabꞌ chiꞌ,
ataꞌ ol jax vin̈ spatrón chiꞌ.
Man̈ yojtacoc yorail vin̈.
51 Ol acꞌjocbꞌat jun vin̈ checabꞌ chiꞌ dꞌa syaelal.
Ol acꞌjocbꞌat vin̈ yedꞌ ebꞌ yetchabꞌsatil.
Ataꞌ ol ocꞌ ebꞌ.
Ol siqꞌuicꞌoc ebꞌ yocꞌ yabꞌan syail,
xchi Jesús dꞌa ebꞌ scꞌaybꞌum.