A yabꞌixal lajun̈van̈ ebꞌ ix cobꞌestac
25
Ol val dꞌayex,
chajtil ol aj ebꞌ anima,
ayic ol vachꞌ och Dios aj satchaan̈ Yajalil.
Lajan icha lajun̈van̈ ebꞌ ix cobꞌestac.
Ix yicꞌbꞌat scandil ebꞌ ix dꞌacꞌvalil.
Ix bꞌat ebꞌ ix dꞌa jun nupnajel.
Ix bꞌat ebꞌ ix scha vin̈ van snupnaj chiꞌ.*
2 Ovan̈ ebꞌ ix quistal,
ovan̈ pax ebꞌ ix ay spensar.
3 A ebꞌ ix quistal chiꞌ,
malaj yaceite ebꞌ ix ix yicꞌbꞌat yedꞌoc yic scandil.
An̈ej jabꞌ aycanem dꞌa yol scandil ebꞌ ix chiꞌ.
4 Axo ebꞌ ix ay spensar chiꞌ,
chꞌoc ix yicꞌbꞌat nan̈alxo yaceite ebꞌ ix.
5 Axo vin̈ van snupnaj chiꞌ,
ix ecꞌ hora sjavi vin̈.
Yuj chiꞌ,
ix laj cot svayan̈ ebꞌ ix.
Ix laj vaybꞌat ebꞌ ix.
6 Axo dꞌa chimilacꞌval,
ay jun mach ix avaj dꞌa ebꞌ ix:
Van sja vin̈ van snupnaji,
bꞌat chaec vin̈,
xchi dꞌa ebꞌ ix.
7 Yuj chiꞌ,
ix laj qꞌue vaan ebꞌ ix.
Ix yacꞌanoch scꞌacꞌal scandil ebꞌ ix chiꞌ.
8 Axo ebꞌ ix quistal chiꞌ ix alan dꞌa ebꞌ ix ay spensar chiꞌ:
Aqꞌuec jabꞌoc eyaceite tic co cꞌanaꞌ.
Axo val stup quic tic,
xchi ebꞌ ix.
9 Max cacꞌlaj.
Talaj ol lajvoc pax quic tic.
Ixiquec,
ix manec eyic bꞌaj schon̈chaji,
xchi ebꞌ ix.
10 Yuj chiꞌ ix bꞌat ebꞌ ix sman yicoꞌ.
Aytobꞌat ebꞌ ix,
ix ja vin̈ van snupnaj chiꞌ.
A ebꞌ ix lista yaj yedꞌ scandil chiꞌ,
ix ochcan ebꞌ ix yedꞌ vin̈ bꞌaj tzꞌoch qꞌuin̈ nupnajel chiꞌ.
Ix macchajcan teꞌ puerta bꞌaj ix ochcan ebꞌ chiꞌ.
11 Axo ix jax ebꞌ ix quistal chiꞌ,
ix to avajoch ebꞌ ix:
Mamin,
Mamin,
jacon̈ ochi,
xchi ebꞌ ix.
12 Axo ix yalan vin̈ dꞌa ebꞌ ix:
Val yel sval dꞌayex,
man̈ ex vojtacoclaj,
xchi vin̈ dꞌa ebꞌ ix.
13 Yuj chiꞌ,
sval dꞌayex,
te lista tzeyutej e bꞌa,
yujto man̈ eyojtacoc bꞌaja scꞌual,
yorail ol in javoc,
xchi Jesús dꞌa ebꞌ.
A yabꞌixal oxvan̈ ebꞌ checabꞌ
14 Ol val dꞌayex,
chajtil ol aj ebꞌ anima,
ayic ol vachꞌ och Dios aj satchaan̈ Yajalil.
Lajan icha jun vin̈ ix bꞌat dꞌa junxo chon̈abꞌ te najat.
Ayic manto bꞌat vin̈,
ix yavtancot ebꞌ schecabꞌ vin̈.
Ix yacꞌancan juntzan̈ stumin vin̈ dꞌa yol scꞌabꞌ ebꞌ.
15 Ay jun bꞌaj ix yacꞌ oyeꞌ talento vin̈.*
Axo dꞌa junxo,
chabꞌ talento ix yacꞌ vin̈.
Ay pax junxo bꞌaj ix yacꞌ jun talento vin̈,
ato syal sjelanil junjun ebꞌ.
Ix lajvi chiꞌ,
ix bꞌat vin̈.
16 Axo vin̈ checabꞌ ix chaan oyeꞌ talento chiꞌ,
ix yacꞌ snegocio vin̈ yedꞌ qꞌueen.
Ix yacꞌan ganar oyexo talento vin̈.
17 Icha pax chiꞌ vin̈ ix chaan chabꞌ talento chiꞌ,
ix yacꞌ ganar chabꞌxo talento vin̈.
18 Palta axo vin̈ junn̈ej talento ix chaan chiꞌ,
ix sjoy bꞌaj ix smuquem qꞌuen tumin chiꞌ vin̈.
19 Pecataxo chiꞌ ix jax vin̈ spatrón ebꞌ chiꞌ.
Ix sbꞌoan scuenta vin̈ yedꞌ junjun ebꞌ.
20 A vin̈ chajinac oyeꞌ talento chiꞌ,
a vin̈ ix bꞌabꞌlaj cꞌoch dꞌa vin̈.
Ix yacꞌan oyexo talento ix yacꞌ ganar vin̈ chiꞌ.
Ix yalan vin̈ dꞌa vin̈ spatrón chiꞌ:
Mamin,
acꞌnaccan oyeꞌ talento qꞌuen a tumin tic dꞌayin,
palta ticnaic,
ina pax oyexo talento yuneꞌ qꞌueen ix vacꞌ ganar tic,
xchi vin̈.
21 Yuj chiꞌ ix yalan vin̈ spatrón vin̈ chiꞌ:
Vachꞌ jun.
Te vachꞌ ix utej a munlaj dꞌayin.
Ix a cꞌanabꞌajej icha in gana.
Yujto ix a cꞌanabꞌajej yedꞌ jabꞌ tic,
yuj chiꞌ tzijtumto tas ol vacꞌ dꞌayach.
Yuj chiꞌ tzalajan̈ vedꞌoc,
xchi vin̈ dꞌa vin̈ schecabꞌ chiꞌ.
22 Ix lajvi chiꞌ,
ix cꞌoch vin̈ bꞌaj cannac chabꞌ talento chiꞌ.
Ix yalan vin̈ dꞌa vin̈ spatrón chiꞌ:
Mamin,
acꞌnaccan chabꞌ talento qꞌuen a tumin tic dꞌayin,
palta ticnaic,
ina chabꞌxo talento yuneꞌ qꞌuen ix vacꞌ ganar tic,
xchi vin̈.
23 Yuj chiꞌ ix yalanxi vin̈ spatrón vin̈ chiꞌ:
Vachꞌ jun.
Vachꞌ ix utej a munlaj dꞌayin.
Ix a cꞌanabꞌajej icha in gana.
Yujto ix a cꞌanabꞌajej yedꞌ jabꞌ tic,
yuj chiꞌ tzijtumto tas ol vacꞌ dꞌayach.
Yuj chiꞌ,
tzalajan̈ vedꞌoc,
xchi vin̈ dꞌa junxo schecabꞌ chiꞌ.
24 Palta axo ix cꞌoch vin̈ junn̈ej talento cannac chiꞌ dꞌay,
ix yalan vin̈:
Ach in patrón,
vojtac to ov ach.
Ton̈ej tzach jachꞌvi,
palta malaj tas tzavej.
Ton̈ej tza cha tas syacꞌ ganar junocxo anima.
25 Yuj chiꞌ,
in xiv dꞌayach,
in mucnaquem qꞌuen a tumin chiꞌ dꞌa yol luum.
Ina qꞌuen tic,
xchi vin̈.
26 Axo ix yalan vin̈ spatrón vin̈ chiꞌ:
A ach tic,
nivanoc checabꞌ ach,
palta malaj a vachꞌil.
Te jaragana ach.
Tato ojtac to ton̈ej tzin jachꞌvi,
palta malaj tas svavej,
ton̈ej tzin cha viquej tas syacꞌ ganar junocxo anima.
27 Tato icha chiꞌ,
¿tas yuj maj acꞌbꞌat qꞌuen in tumin tic majanil,
yic vachꞌ tzin chapax qꞌuen yedꞌ yuneꞌ in javi?
xchi vin̈ dꞌa vin̈ schecabꞌ chiꞌ.
28 Ix lajvi chiꞌ,
ix yalan vin̈ dꞌa juntzan̈ ebꞌ ayecꞌ ta:
Iqꞌuequecꞌ qꞌuen talento tic dꞌa vin̈.
Aqꞌuec qꞌuen dꞌa vin̈ ay lajun̈eꞌ talento yicoꞌ.
29 Yujto a mach ay yicoꞌ,
ol vachꞌ acꞌjoc dꞌay yic ol yacꞌ sobre yic chiꞌ.
Axo ebꞌ malaj val yicoꞌ,
ol vachꞌ icꞌjoquecꞌ jabꞌ yic ebꞌ chiꞌ.
30 Axo vin̈ checabꞌ malaj tzꞌoch tic,
bꞌat yumeccanbꞌat vin̈ dꞌa scal qꞌuicꞌalqꞌuinal.
Ataꞌ ol ocꞌ vin̈.
Ol siqꞌuicꞌoc vin̈ yocꞌ yuj yabꞌan syail,
xchi vin̈,
xchi Jesús dꞌa ebꞌ.
Ayic ol chꞌolbꞌitaj tas yaj ebꞌ anima
31 A in Acꞌbꞌil in cot yuj Dios voch animail tic,
ol in ja yedꞌ ebꞌ vángel smasanil,
ol in och Yajalil.
Ol in em cꞌojan dꞌa in cꞌojnubꞌ.
Ato taꞌ ol checlajelta to te nivan velcꞌochi.
32 Ol laj och molan junjun chon̈abꞌ dꞌa vichan̈.
Ol in pojan snan̈al ebꞌ icha junoc vin̈ tan̈vum calnel spojanel nocꞌ scalnel dꞌa scal nocꞌ chiva.
33 A ebꞌ icha nocꞌ calnel chiꞌ,
ol can ebꞌ dꞌa in vachꞌ.
Axo ebꞌ icha nocꞌ chiva,
ol can ebꞌ dꞌa in qꞌuexan̈.
34 A in Rey in tic,
ol val dꞌa ebꞌ ay dꞌa in vachꞌ chiꞌ:
A ex tic,
yacꞌnac svachꞌcꞌolal in Mam dꞌayex.
Ochan̈ec vedꞌoc bꞌaj svacꞌ Yajalil.
Yujto atax ix sbꞌoan yolyibꞌan̈qꞌuinal tic Dios ix sbꞌoancan jun tic eyicoc.
35 Yujto ayic yochnac in vejel,
in eyacꞌnac vaoc.
Ayic stacjinac in tiꞌ,
eyacꞌnac aꞌ vuqꞌuej.
Ayic in bꞌeyecꞌ icha yecꞌ junoc bꞌeyum anima,
eyacꞌnac in posado.
36 Ayic malaj in pichul,
eyacꞌnac vicoꞌ.
Ayic penaay in,
xidꞌnac ex in eyilaꞌ.
Axo yic ay in och preso,
xidꞌnac ex in e cꞌumej,
xin cham dꞌa ebꞌ.
37 Axo ebꞌ tojol sbꞌeybꞌal chiꞌ ol alan dꞌayin:
Mamin,
¿bꞌacꞌn̈i ix quil yoch a vejel yedꞌ stacji a tiꞌ?
¿Toc ay tas ix cacꞌ dꞌayach?
38 ¿Bꞌacꞌn̈i ix quil a bꞌeyecꞌ icha junoc bꞌeyum anima chiꞌ,
yic tza cꞌan a posado chiꞌ?
Axo yic malaj a pichul,
¿toc ay tas cacꞌnac dꞌayach?
39 Ayic penaay ach yedꞌ dꞌa yic ay ach och dꞌa preso chiꞌ,
¿toc ay bꞌaj xidꞌnac on̈ ach quilaꞌ?
xcham ebꞌ dꞌayin.
40 Icha to chiꞌ bꞌian,
ol valan dꞌa ebꞌ:
Val yel sval dꞌayex,
ayic ix eyacꞌan juntzan̈ tic dꞌa ebꞌ vucꞌtac,
ebꞌ vanabꞌ,
vachꞌchom dꞌa ebꞌ malaj yelcꞌochi,
syalelcꞌochi,
a dꞌayin ix eyacꞌaꞌ,
xin cham dꞌa ebꞌ.
41 Ichato chiꞌ,
ol valan dꞌa ebꞌ ay dꞌa in qꞌuexan̈:
Elan̈ec a ex tic dꞌa in tzꞌey,
yujto aycot yoval scꞌool Dios dꞌa eyibꞌan̈.
Ixiquec dꞌa jun cꞌacꞌ malaj bꞌaqꞌuin̈ stupi,
dꞌa jun lugar sbꞌonac Dios yicoc vin̈ diablo yedꞌ ebꞌ yángel.
42 Yujto ayic ix och in vejel,
maj in eyacꞌ vaoc.
Ayic ix tacji in tiꞌ,
malaj jabꞌoc tas ix eyacꞌ vuqꞌuej.
43 Ayic ix in bꞌeyecꞌ icha junoc bꞌeyum anima,
maj eyacꞌ in posado.
Ayic malaj in pichul,
malaj jabꞌoc in pichul ix eyacꞌaꞌ.
An̈ejtonaꞌ,
ayic penaay in yedꞌ ayic ay in och dꞌa preso,
maj xidꞌ in eyil jabꞌoc,
xin cham dꞌa ebꞌ.
44 Yuj chiꞌ,
icha tic ol yal ebꞌ dꞌayin:
Mamin,
¿bꞌacꞌn̈i ix ach quilaꞌ ayic ix och a vejel,
ayic ix tacji a tiꞌ chiꞌ,
ayic ix ach bꞌeyeqꞌui,
ayic malaj a pichul chiꞌ,
ayic penaay ach,
ayic preso aji?
¿Tom ay bꞌaj maj on̈ colvaj dꞌayach?
xcham ebꞌ dꞌayin.
45 Palta ol valan dꞌa ebꞌ:
Val yel sval dꞌayex,
ayic maj ex colvaj dꞌa juntzan̈ ebꞌ tic,
vachꞌchom malaj tzꞌoch ebꞌ,
syalelcꞌochi,
a dꞌayin maj ex colvajoc,
xin cham dꞌa ebꞌ.
46 A ebꞌ chiꞌ,
ol bꞌat ebꞌ dꞌa syaelal dꞌa juneln̈ej.
Palta axo ebꞌ tojol sbꞌeybꞌal,
ol scha sqꞌuinal ebꞌ dꞌa juneln̈ej,
xchi Jesús dꞌa ebꞌ.