A tas ajnac syamchaj Jesús
26
Ayic ix lajvi yalan juntzan̈ chiꞌ Jesús,
ix yalanxi dꞌa ebꞌ scꞌaybꞌum:
2 —Eyojtac,
chabꞌejocxo tzꞌoch qꞌuin̈ yic sco naancoti tas aj yelnaccot ebꞌ co mam quicham dꞌa Egipto.
A in Acꞌbꞌil in cot yuj Dios voch animail tic,
ataꞌ ol in acꞌjococh dꞌa yol scꞌabꞌ ebꞌ ol in culusanchamoc,
xchi dꞌa ebꞌ.
3 Axo ebꞌ vin̈ sat sacerdote,
ebꞌ vin̈ cꞌaybꞌum dꞌa ley Moisés yedꞌ ebꞌ vin̈ ichamtac vinac,
ix smolbꞌej sbꞌa ebꞌ vin̈ dꞌa spat vin̈aj Caifás,
vin̈ sat sacerdote.
4 Ataꞌ ix laj yal ebꞌ vin̈ tas ol yutoc ebꞌ vin̈ yacꞌanoch es dꞌa yibꞌan̈ Jesús,
yic syamchaj yuj ebꞌ vin̈,
smilancham ebꞌ vin̈.
5 Palta ix yalan ebꞌ vin̈:
—Max yal-laj co yaman vin̈ dꞌa yol qꞌuin̈ tic,
yujto ay smay ol qꞌue somnaj ebꞌ anima scot yoval dꞌayon̈ yuj vin̈,
xchi ebꞌ vin̈.
Qꞌuenac jun sucꞌuqꞌui sjabꞌ dꞌa sjolom Jesús
6 Ix cꞌoch Jesús dꞌa Betania.
Ix ochcꞌoch dꞌa yol spat vin̈aj Simón.
A dꞌa yic yalan̈taxo,
penaay vin̈ yuj jun yabꞌil scuchan lepra.
7 Ayic cꞌojanem Jesús svaꞌi,
ix cꞌoch jun ix ix dꞌay.
Yedꞌnac jun limeta ix sbꞌonac yedꞌ jun qꞌuen scuch alabastro.*
Bꞌudꞌudꞌi qꞌueen dꞌa jun sucꞌuqꞌui sjabꞌ te caro stojol.
Ix stobꞌanqꞌue jun chiꞌ ix dꞌa sjolom Jesús.
8 Axo ix yilan jun chiꞌ ebꞌ scꞌaybꞌum Jesús chiꞌ,
ix cot yoval ebꞌ dꞌa ix.
Ix laj yalanqꞌue ebꞌ:
—¿Tas yuj nabꞌan̈ej tzꞌixtax jun tic?
9 A jun sucꞌuqꞌui sjabꞌ tic,
te caro stojol.
Octom ix chon̈chaji,
axo stojol chiꞌ tzꞌacꞌji dꞌa ebꞌ mebꞌaꞌ,
xchi ebꞌ.
10 Axo ix yabꞌan juntzan̈ chiꞌ Jesús,
ix yalan dꞌa ebꞌ:
—¿Tas yuj tze tzuntzej ix?
A jun scꞌulej ix tic dꞌayin,
vachꞌ toni.
11 A ebꞌ mebꞌaꞌ tzeyal chiꞌ,
ayn̈ejecꞌ ebꞌ eyedꞌoc.
Palta a inxo tic,
man̈ masaniloc tiempo ay in ecꞌ eyedꞌoc.
12 Ayocto ix yacꞌanoch jun sucꞌuqꞌui sjabꞌ tic ix dꞌa in nivanil tic,
yic vachꞌ listaxo vaj yedꞌ in muquil.
13 Val yel sval dꞌayex,
yaln̈ej bꞌajtil ol aljoquel vachꞌ abꞌix yic colnabꞌil dꞌa yolyibꞌan̈qꞌuinal tic,
ol aljoc pax yabꞌixal tas ix scꞌulej ix tic,
yic ol najoccot ix,
xchi dꞌa ebꞌ vin̈.
Chon̈bꞌil Jesús yuj vin̈aj Judas
14 Ay jun vin̈ dꞌa scal ebꞌ vin̈ slajchavan̈il,
aton vin̈aj Judas aj Queriot,
ix bꞌat lolon vin̈ yedꞌ ebꞌ vin̈ sat sacerdote.
15 Ix yalan vin̈ dꞌa ebꞌ vin̈ icha tic:
—Tato svacꞌoch Jesús dꞌa yol e cꞌabꞌ,
¿jantac tzin e tupuꞌ?
xchi vin̈.
Yuj chiꞌ,
30 plata tumin* ix acꞌji dꞌa vin̈ yuj ebꞌ vin̈.
16 Yuj chiꞌ ix sayan modo vin̈ tas ol yutoc yacꞌanoch Jesús dꞌa yol scꞌabꞌ ebꞌ.
A Santa Cena
17 A dꞌa jun sbꞌabꞌel cꞌual qꞌuin̈ svaji ixim pan malaj yich aybꞌat dꞌa scal,
ix cꞌoch ebꞌ scꞌaybꞌum Jesús dꞌay,
ix scꞌanbꞌan ebꞌ:
—¿Bꞌajtil a gana sco bꞌo bꞌaj ol on̈ vaoc yic sco naancoti tas aj yelnaccot ebꞌ co mam quicham dꞌa Egipto?
xchi ebꞌ dꞌay.
18 —Ixiquec dꞌa chon̈abꞌ.
Ay jun vin̈ bꞌaj ol ex cꞌoch dꞌa spat.
Icha tic ol eyal dꞌa vin̈:
Xchicot co Cꞌaybꞌumal to quenxon̈ej tiempo ayeqꞌui.
Yuj chiꞌ syalaꞌ to dꞌa a pat tic ol va quedꞌ a on̈ scꞌaybꞌum on̈ tic,
yic sco nacot yedꞌoc tas aj yelnaccot ebꞌ co mam quicham dꞌa Egipto,
xchi.
Icha chiꞌ tzeyutej eyalan dꞌa vin̈,
xchi Jesús dꞌa ebꞌ.
19 Yuj chiꞌ,
ix bꞌat ebꞌ scꞌaybꞌum chiꞌ sbꞌo icha ix yal chiꞌ.
Ix sbꞌoan ebꞌ tas ol schi ebꞌ dꞌa qꞌuin̈ chiꞌ.
20 Axo dꞌa qꞌuicꞌbꞌalil,
ix cꞌoch Jesús chiꞌ vael yedꞌ ebꞌ scꞌaybꞌum chiꞌ.
21 Ayic van sva yedꞌ ebꞌ,
ix yalani:
—Val yel sval dꞌayex,
ay jun dꞌa co cal tic ol in acꞌanoch dꞌa yol scꞌabꞌ chamel,
xchi dꞌa ebꞌ.
22 Ix laj och ebꞌ ilcꞌolal yabꞌan jun chiꞌ.
Yuj chiꞌ,
junjun ebꞌ ix och ijan scꞌanbꞌan yabꞌ dꞌay:
—Mamin,
¿tom a in?
xchi junjun ebꞌ dꞌay.
23 Yuj chiꞌ ix yalan dꞌa ebꞌ:
—A jun van sva vedꞌ dꞌa jun ucꞌabꞌ ayecꞌ dꞌa co nan̈al tic,
a ol in acꞌanoch dꞌa yol scꞌabꞌ chamel.
24 A in tic,
Acꞌbꞌil in cot yuj Dios voch animail tic,
palta yovalil ol in chamoc,
icha yaj stzꞌibꞌchajcan dꞌa Slolonel Dios.
Palta te chuc yic jun ol in acꞌanoch dꞌa yol scꞌabꞌ chamel chiꞌ.
Octom maj uneajlaj.
Tato icha chiꞌ,
más vachꞌ yicoꞌ,
xchi dꞌa ebꞌ.
25 Axo vin̈aj Judas,
vin̈ ol acꞌanoch dꞌa yol scꞌabꞌ chamel chiꞌ,
ix alan dꞌay:
—Ach in Cꞌaybꞌumal,
¿tom a in?
xchi vin̈.
—A ach toni,
xchi dꞌa vin̈.
26 Ayic van sva yedꞌ ebꞌ scꞌaybꞌum chiꞌ,
ix yicꞌanchaan̈ ixim pan.
Ix yacꞌan yuj diosal yuj ixim.
Ix lajvin̈ej chiꞌ,
ix xepanbꞌat ixim,
ix yacꞌan dꞌa ebꞌ scꞌaybꞌum.
—Vaan̈ec.
Aton in nivanil tic,
xchi dꞌa ebꞌ.
27 Ix lajvi chiꞌ,
ix syaman jun vaso ayem yal sat uva dꞌa yool.
Ix yacꞌan yuj diosal dꞌa Dios yuuj.
Ix yacꞌanpax dꞌa ebꞌ.
—Mol uqꞌuejec jun tic e masanil.
28 Yujto aton jun tic in chiqꞌuil.
Yuj in chiqꞌuil tic ol elcꞌoch jun strato Dios eyedꞌoc.*
Ol elcan in chiqꞌuil tic,
yic vachꞌ tzijtum mach ol acꞌjoc lajvoc smul yuuj.
29 Palta svalcan dꞌayex ticnaic to man̈xa bꞌaj ol vucꞌ yal sat teꞌ uva,
masanto dꞌa jun cꞌu ol vucꞌxi eyedꞌoc,
ayic ol vachꞌ och co Mam Dios Yajalil,
xchi dꞌa ebꞌ.
Yalnaccan Jesús to ol yiqꞌuel vin̈aj Pedro dꞌa yibꞌan̈
30 Ix lajvi sbꞌitan jun bꞌit* ebꞌ dꞌa Dios,
ix elta ebꞌ.
Ix bꞌat ebꞌ dꞌa tzalan Olivo.
31 Ataꞌ ix yal Jesús dꞌa ebꞌ:
—Masanil ex tic ol ex somchajcanel vuuj dꞌa jun acꞌval tic.
Yujto tzꞌibꞌyajcan dꞌa Slolonel Dios:
Ol in milcham vin̈ tan̈vum calnel.
Axo nocꞌ calnel chiꞌ,
ol saclemcanbꞌat nocꞌ,
xchi.
32 Palta axo yic ol in pitzvocxi,
ol in bꞌabꞌlaj cꞌoch eyuuj dꞌa Galilea,
xchi dꞌa ebꞌ.
33 Axo vin̈aj Pedro ix alan dꞌay:
—Vachꞌchom ol somchajcanel spensar ebꞌ dꞌayach,
palta a in tic,
malaj bꞌaqꞌuin̈ ol in somchajeloc,
xchi vin̈.
34 —Val yel sval dꞌayach,
a dꞌa jun acꞌval tic,
ayic manto ocꞌ nocꞌ caxlan̈,
oxel ol iqꞌuel dꞌa ibꞌan̈ ol alani to man̈ in ojtacoc,
xchi Jesús dꞌa vin̈.
35 —Vachꞌchom ol in miljoccham edꞌoc,
palta man̈ ol valaꞌ to man̈ ach vojtacoc,
xchi vin̈aj Pedro chiꞌ dꞌay.
An̈ejtonaꞌ icha chiꞌ ix laj yal ebꞌ scꞌaybꞌum chiꞌ smasanil.
Lesalvinac Jesús dꞌa Getsemaní
36 Ix lajvi chiꞌ,
ix cꞌoch Jesús yedꞌ ebꞌ scꞌaybꞌum dꞌa Getsemaní.
Ataꞌ ix yal dꞌa ebꞌ:
—Canan̈ec dꞌa tic.
Ol bꞌat in lesalvoc dꞌa chiꞌ,
xchi dꞌa ebꞌ.
37 Ix lajvi chiꞌ,
ix yicꞌanbꞌat vin̈aj Pedro yedꞌ chavan̈ ebꞌ yuninal vin̈aj Zebedeo yedꞌoc.
Ix och ijan Jesús scusi,
ix och ilcꞌolal.
38 Yuj chiꞌ ix yalan dꞌa ebꞌ:
—Tzin te cusi,
ijan val tzin cham yuj cuselal.
Canan̈ec dꞌa tic.
Pitzanocabꞌ ex vedꞌoc,
xchi Jesús dꞌa ebꞌ.
39 Ix lajvi chiꞌ,
ix snitzanbꞌat sbꞌa,
ix em cuman ix emcꞌoch snan̈al sat dꞌa sat luum.
Ix lesalvi icha tic:
—Mamin,
tato syalaꞌ,
iqꞌuecꞌ jun yaelal tic dꞌa vibꞌan̈.
Palta mocabꞌ ichoc in gana a in tic,
palta ichocabꞌ val a gana,
xchi.
40 Ix lajvi chiꞌ,
ix cꞌoch dꞌa ebꞌ vin̈ oxvan̈ chiꞌ,
palta ix yilani,
vaynac ebꞌ vin̈.
Yuj chiꞌ ix yalan dꞌa vin̈aj Pedro:
—¿Tom max yal pitzan ex junoc hora vedꞌoc?
41 Aqꞌuec el e vayan̈.
Lesalvan̈ec,
yic man̈ ol ex telvoc ayic tzex montajbꞌat dꞌa chucal.
A co pensar,
tecꞌan toni,
palta axo co nivanil,
malaj yip,
xchi dꞌa ebꞌ.
42 Ix lajvi chiꞌ,
ix bꞌatxi lesal,
ix yalan icha tic:
—Mamin,
tato max yal yecꞌ jun yaelal tic dꞌa vibꞌan̈,
elocabꞌcꞌoch tas nabꞌil uuj,
xchi.
43 Axo ix cꞌochxi junelxo,
ix yilani an̈ejaꞌ vaynac ebꞌ scꞌaybꞌum chiꞌ,
yujto max techaj vayan̈ yuj ebꞌ.
44 Yuj chiꞌ ix canxi ebꞌ yuuj.
Ix bꞌat lesalvixi dꞌa yoxelal.
Ix yalanxi icha ix yutej yalan dꞌa sbꞌabꞌelal.
45 Axo ix cꞌochxi dꞌa ebꞌ scꞌaybꞌum chiꞌ,
ix yalan dꞌa ebꞌ:
—¿Tom an̈ejaꞌ vaynac ex?
¿Tom ton̈ej tzeyicꞌ eyip?
A ticnaic,
a in Acꞌbꞌil in cot yuj Dios voch animail tic,
ix cꞌoch yorail vacꞌjioch dꞌa yol scꞌabꞌ ebꞌ vin̈ chuc.
46 Qꞌuean̈ec vaan,
coyec,
yujto lacꞌanxo ayecꞌ vin̈ ol in acꞌanoch dꞌa yol scꞌabꞌ ebꞌ ajcꞌool,
xchi dꞌa ebꞌ vin̈.
Yamchajnac Jesús
47 Vanto yalani,
ix javi vin̈aj Judas.
A vin̈ chiꞌ nivanoc ayoch stzꞌacubꞌoc ebꞌ uxluchvan̈ schecabꞌ Jesús chiꞌ.
Tzijtum anima ix cꞌoch yedꞌ vin̈.
Yedꞌnac yespada ebꞌ yedꞌ te teꞌ.
A ebꞌ vin̈ sat sacerdote yedꞌ ebꞌ vin̈ ichamtac vinac ay yopisio dꞌa scal ebꞌ israel chiꞌ ix checancot ebꞌ.
48 A vin̈aj Judas chiꞌ,
vin̈ ol acꞌanoch Jesús dꞌa yol scꞌabꞌ ebꞌ,
toxo ix slajtiej sbꞌa vin̈ yedꞌ ebꞌ.
Ix yalan vin̈ icha tic:
—A vin̈ ol in tzꞌubꞌelta stiꞌ,
aton vin̈ chiꞌ tzeyamaꞌ,
xchi vin̈ dꞌa ebꞌ.
49 Yuj chiꞌ,
elan̈chamel ix cꞌoch vin̈ dꞌa Jesús.
Ix yalan vin̈ dꞌay:
—Buenas noches,
ach in Cꞌaybꞌumal,
xchi vin̈ dꞌay.
Ix lajvi chiꞌ,
ix stzꞌubꞌanelta stiꞌ vin̈.
50 —Ach vamigo,
cꞌulej tas tzul a cꞌuloc chiꞌ dꞌa tic,
xchi dꞌa vin̈.
Ix lajvi chiꞌ,
ix cꞌoch umnaj ebꞌ vin̈ dꞌay.
Ix syaman ebꞌ vin̈.
Ix stzecꞌan ebꞌ vin̈.
51 Palta ay jun vin̈ scꞌaybꞌum Jesús chiꞌ ix icꞌanqꞌueta qꞌuen yespada.
Ix stzepanel schiquin jun vin̈ schecabꞌ vin̈ sat sacerdote.
52 Yuj chiꞌ ix yalan Jesús dꞌa vin̈ scꞌaybꞌum chiꞌ:
—Acꞌxiem qꞌuen espada chiꞌ dꞌa yol yatut,
yujto a ebꞌ tzꞌacꞌan oval yedꞌ qꞌuen espada,
ol champax ebꞌ yuj qꞌueen.
53 ¿Tom man̈ ojtacoc,
tato in gana tzin cꞌancot dꞌa Dios,
aton in Mam,
ecꞌto dꞌa 72 mil* ebꞌ ángel ol yacꞌcot in scol dꞌa elan̈chamel?
54 Palta tato ol in cꞌancoti,
man̈ ol elcꞌochlaj tas tzꞌibꞌyajcan dꞌa Slolonel Dios,
yujto tzꞌibꞌyajcani to yovalil icha tic ol in ajoc,
xchi Jesús.
55 Ix lajvi chiꞌ,
ix yalanpax dꞌa ebꞌ vin̈ ix cꞌoch chiꞌ:
—¿Tom yajal in dꞌa scal ebꞌ tzꞌacꞌan oval yedꞌ ebꞌ yajal tzeyilaꞌ,
yuj chiꞌ eyedꞌ eyespada yedꞌ e teꞌ,
tzex ja in eyamaꞌ?
Junjun cꞌu tzex in cꞌaybꞌan dꞌa yol yamaqꞌuil stemplo Dios,
palta maj in eyam taꞌ.
56 Palta icha ton tic ol aj yelcꞌoch tas tzꞌibꞌyajcan yuj ebꞌ schecabꞌ Dios dꞌa Slolonel,
xchi dꞌa ebꞌ vin̈.
Ix actajcan yuj ebꞌ scꞌaybꞌum chiꞌ schꞌocoj.
Ix bꞌat ebꞌ elelal smasanil.
Cꞌochnac Jesús dꞌa yichan̈ ebꞌ vin̈ sat yajal
57 A ebꞌ vin̈ ix yaman Jesús,
ix yicꞌbꞌat ebꞌ vin̈ dꞌa vin̈aj Caifás,
aton vin̈ sat sacerdote.
Ataꞌ ix smolbꞌej sbꞌa ebꞌ cꞌaybꞌum dꞌa ley Moisés yedꞌ ebꞌ vin̈ ichamtac vinac ay yopisio.
58 Axo vin̈aj Pedro,
najat tzacꞌanto sbꞌat vin̈ yuuj.
Ix ochcꞌoch vin̈ dꞌa yamaqꞌuil spat vin̈ sat yaj dꞌa ebꞌ vin̈ chiꞌ.
Ix em cꞌojan vin̈ yedꞌ ebꞌ vin̈ polencía,
yic syilan vin̈ tas ol ajoc.
59 Axo ebꞌ vin̈ sat sacerdote,
ebꞌ vin̈ ichamtac vinac yedꞌ masanil ebꞌ vin̈ sat yajal,
ix say juntzan̈ vinac ebꞌ vin̈,
yic syacꞌoch es ebꞌ dꞌa yibꞌan̈ Jesús chiꞌ yic tzꞌoch chamel dꞌa yibꞌan̈.
60 Man̈ jantacoc ebꞌ ix cꞌochi.
Ix yacꞌanoch juntzan̈ es ebꞌ dꞌa yibꞌan̈.
Palta malaj junoc ebꞌ ix elcꞌoch tas ix yalaꞌ.
Cꞌojancꞌolal to ix qꞌue van chavan̈xo vinac chiꞌ,
ix yacꞌan val och es ebꞌ dꞌa yibꞌan̈.
61 Ix yalan ebꞌ:
—Ix cabꞌ yalani:
A in tic,
syal in satanel stemplo Dios,
axo dꞌa schabꞌjial tzin bꞌoanxiqꞌuei,
xchi,
xchi ebꞌ.
62 Axo vin̈ sat sacerdote,
ix qꞌue vaan,
ix yalan vin̈ dꞌa Jesús:
—¿Tom max ach tacꞌvi jabꞌoc?
¿Tom max abꞌ juntzan̈ syacꞌoch ebꞌ vin̈ tic dꞌa ibꞌan̈?
xchi vin̈ dꞌay.
63 Axo Jesús tzꞌinn̈ej xchi.
Yuj chiꞌ ix yalanxi vin̈ dꞌay:
—Al dꞌayon̈,
tato Cristo ach,
tato Yuninal ach Dios.
Yovalil tzal dꞌa sat Dios pitzan,
tato yel tzalaꞌ,
xchi vin̈ dꞌay.
64 —A in ton tic,
icha tzal chiꞌ.
Svalanpax dꞌayex,
a in Acꞌbꞌil in cot yuj Dios voch animail tic,
ol in eyilaꞌ,
cꞌojan in em dꞌa svachꞌ cꞌabꞌ Dios,
aton Jun nivan spoder.
Ol eyilpax vemul dꞌa scal asun dꞌa satchaan̈,
xchi Jesús dꞌa vin̈.
65 Ayic ix yabꞌan juntzan̈ chiꞌ vin̈ sat sacerdote chiꞌ,
ix sn̈icꞌchitan spichul vin̈ scot yoval.
Ix yalan vin̈ dꞌa ebꞌ yetyajalil chiꞌ:
—A jun vin̈ tic sbꞌuchvaj vin̈ dꞌa Dios.
¿Tasto tzꞌoch testigo sco sayaꞌ?
Toxo ix cabꞌ sbꞌuchvaj vin̈.
66 ¿Tas xe chi yuj vin̈ ticnaic?
xchi vin̈.
—Ix och smul vin̈.
Smoj scham vin̈,
xchi ebꞌ vin̈.
67 Ix lajvi chiꞌ,
ix tzubꞌaj sat Jesús chiꞌ yuj ebꞌ.
Ix dꞌobꞌjibꞌat stiꞌ,
ay pax ebꞌ ix tzꞌitanbꞌat sat.
68 Ix yalan ebꞌ dꞌay:
—A ach nivanoc tzach alnax Cristoal tic,
alaꞌ mach tzach macꞌani,
xchi ebꞌ dꞌay.
Yicꞌnaquel vin̈aj Pedro dꞌa yibꞌan̈
69 Axo vin̈aj Pedro,
cꞌojanecꞌ vin̈ dꞌa yamaqꞌuil jun pat chiꞌ.
Ix cꞌoch jun ix criada dꞌa vin̈.
—A ach tic,
etbꞌeyum a bꞌa yedꞌ Jesús aj Nazaret tic,
xchi ix dꞌa vin̈.
70 Palta ix yiqꞌuel vin̈ dꞌa yibꞌan̈ dꞌa yichan̈ ebꞌ smasanil:
—A jun tzal tic,
man̈ vojtacoclaj,
xchi vin̈ dꞌa ix.
71 Axo yic ix elta vin̈aj Pedro chiꞌ dꞌa stiꞌ spuertail amacꞌ,
ix ilji vin̈ yuj junxo ix.
—Aton jun vin̈ tic,
yetbꞌeyum sbꞌa yedꞌ Jesús aj Nazaret tic,
xchi ix.
72 Palta ix yicꞌanxiel vin̈ dꞌa yibꞌan̈.
Ix slocan sbꞌi Dios vin̈:
—Man̈ vojtacoclaj jun vin̈ tic,
xchi vin̈ dꞌa ebꞌ.
73 Junanto rato chiꞌ,
ix cꞌoch ebꞌ aytaxon ecꞌ taꞌ dꞌa vin̈aj Pedro chiꞌ,
ix yalan ebꞌ dꞌa vin̈:
—Val yel,
etbꞌeyum a bꞌa yedꞌ ebꞌ scꞌaybꞌum Jesús tic,
yujto lajan a lolon yedꞌ ebꞌ scabꞌi,
xchi ebꞌ.
74 Yuj chiꞌ,
ix scꞌanancot yoval scꞌool Dios vin̈ dꞌa yibꞌan̈.
Ix slocan sbꞌi Dios vin̈:
—A jun vin̈ tic,
man̈ vojtacoclaj vin̈,
xchi vin̈ dꞌa ebꞌ.