A Jesús ix bꞌicanel yoc ebꞌ scꞌaybꞌum
13
Qꞌuicꞌanocxo tzꞌoch sqꞌuin̈ ebꞌ israel yic snajicoti tas aj yelnaccot ebꞌ smam yicham ebꞌ dꞌa Egipto,
yojtacxo pax Jesús to toxo sja stiempoal yactancan jun yolyibꞌan̈qꞌuinal tic,
axo sqꞌuex chiꞌ dꞌa co Mam Dios.
A ebꞌ yicxo ay dꞌa yolyibꞌan̈qꞌuinal tic,
ix xajanejn̈ej ebꞌ.
Ix xajanejn̈ej pax ebꞌ masanto dꞌa slajvubꞌ.
2-4 Axo vin̈aj Judas yuninal vin̈aj Simón aj Queriot,
toxo ix och vin̈ diablo dꞌa vin̈,
yic vachꞌ a vin̈ tzꞌacꞌanoch Jesús dꞌa yol scꞌabꞌ ebꞌ ayoch ajcꞌolal dꞌay.
Palta yojtac Jesús to a dꞌa Dios cotnac,
ataꞌ ol cꞌochxoc.
Yojtac to a co Mam Dios acꞌjinacoch masanil tas dꞌa yol scꞌabꞌ.
Ayic van sva yedꞌ ebꞌ scꞌaybꞌum,
ix qꞌue lin̈an,
ix squichanel jun col spichul,
ix stzecꞌanoch jun cꞌapac toalla dꞌa snan̈al.
Jesús lava los pies de los discipulos (Juan 13.1-17)
5 Ix lajvi chiꞌ ix secanem a aꞌ dꞌa yol jun palangana,
ix och ijan sbꞌicanel yoc ebꞌ scꞌaybꞌum chiꞌ.*
Axo yedꞌ cꞌapac toalla chiꞌ ix suc tacjoc yoc ebꞌ chiꞌ.
6 Axo ijan ix sbꞌicanel yoc vin̈aj Simón Pedro,
ix yalan vin̈ dꞌay:
—Mamin,
¿tom ijan tza bꞌiquel voc tic a naani?
xchi vin̈.
7 —A ticnaic,
maxto nachajel uuj tas van in cꞌulan tic.
Cꞌojancꞌolalto ol nachajel uuj,
xchi Jesús chiꞌ dꞌa vin̈.
8 —Maay,
man̈ val jabꞌoc ol vacꞌ voc tic a bꞌiqueli,
xchi vin̈aj Pedro chiꞌ.
—Tato max acꞌ in bꞌiquel jun,
malaj alan ic vedꞌoc,
xchi Jesús dꞌa vin̈.
9 —Tato icha chiꞌ an Mamin,
man̈ocn̈ej voc tic tza bꞌiqueli.
Bꞌiquel in cꞌabꞌ,
tza bꞌacanpaxel in jolom,
xchi vin̈aj Pedro chiꞌ.
10 Palta ix yalanxi Jesús:
—Qꞌuinaloc ay junoc mach toto sbꞌiquel sbꞌa,
man̈ yovaliloc sbꞌicchaj snivanil smasanil.
An̈ej yoc sbꞌicchaji,
yujto sacto snivanil.
A ex tic icha junoc mach bꞌicbꞌilxo,
icha chiꞌ eyaji,
yujto toxo ix tojolbꞌi e pensar.
Palta man̈ e masaniloc ix tojolbꞌi e pensar,
xchi Jesús.
11 Yojtacxo mach jun ol acꞌanoch dꞌa yol scꞌabꞌ chamel,
yuj chiꞌ ix yalaꞌ:
Man̈ e masaniloc ix tojolbꞌi e pensar,
xchi.
12 Ix lajvi sbꞌican yoc ebꞌ chiꞌ,
ix yacꞌanxioch scꞌapac.
Ix emxi cꞌojan yedꞌ ebꞌ.
Ix yalanxi:
—¿Tzam nachajel eyuuj tas yuj icha tic tzex vutej?
13 A ex tic,
tzin eyal e cꞌaybꞌumoc,
eyajaloc.
Yel ton tzeyalaꞌ.
14 Cꞌaybꞌum in dꞌayex.
Yajal vaj dꞌayex.
Palta ina ix in bꞌiquel eyoc tic.
Yuj chiꞌ smoj icha chiꞌ tzeyutej e bꞌa junjun ex.
15 Ix in chꞌox jun tic dꞌayex,
yic vachꞌ icha tzex vutej tic,
icha chiꞌ ol eyutoc e bꞌa junjun ex.
16 Val yel sval dꞌayex,
malaj junoc checabꞌ ecꞌal dꞌa yichan̈ spatrón.
Icha pax chiꞌ ebꞌ checabꞌ,
malaj junoc ebꞌ ecꞌal dꞌa yichan̈ jun schecan chiꞌ.
17 Tato snachajel juntzan̈ tic eyuuj,
tze cꞌanabꞌajani,
te vachꞌ eyicoꞌ.
18 Man̈ eyujoc e masanil sval jun tic,
yujto vojtacxo tas eyaj a ex sicꞌbꞌil exxo el vuuj.
Palta yovalil ol elcꞌoch tas tzꞌibꞌabꞌilcan dꞌa Slolonel Dios bꞌaj syalcan icha tic:
A vin̈ sva vedꞌoc,
a vin̈ smeltzajoch ajcꞌolal dꞌayin,
xchi.
Jesús predice la traición (Juan 13.18-38)
19 Ayocto svalancan juntzan̈ tic dꞌayex,
yic vachꞌ ayic ol ja dꞌa vibꞌan̈ chiꞌ,
ol eyacꞌoch dꞌa e cꞌool to a in ton Cristo in.
20 Val yel sval dꞌayex,
a mach schaan ebꞌ in checabꞌ,
syalelcꞌochi a in tzin scha ebꞌ.
A ebꞌ tzin chaan chiꞌ,
scha pax jun checjinac in cot ebꞌ,
xchi Jesús.
Yalnac Jesús mach ol acꞌanoch dꞌa yol scꞌabꞌ chamel
21 Ix lajvi yalan juntzan̈ chiꞌ Jesús,
ix te och ilcꞌolal,
ix yalani:
—Val yel sval dꞌayex,
a dꞌa e cal tic ay jun vin̈ ol in acꞌanoch dꞌa yol scꞌabꞌ chamel,
xchi dꞌa ebꞌ vin̈.
22 Axo ebꞌ vin̈ scꞌaybꞌum chiꞌ,
ix och qꞌueljabꞌ ebꞌ vin̈ dꞌay junjun,
yujto man̈ yojtacoc ebꞌ vin̈ mach jun syal chiꞌ.
23 Ayic van sva ebꞌ,
a vin̈ scꞌaybꞌum Jesús te xajanabꞌil yuuj,
a dꞌa stzꞌey ayecꞌ vin̈.
24 Axo vin̈aj Simón Pedro ix acꞌan yechel dꞌa vin̈,
yuj chiꞌ tope scꞌanbꞌej vin̈ dꞌa Jesús machtaxlaj jun syal chiꞌ.
25 Yuj chiꞌ ix svachꞌ nitzanoch sbꞌa vin̈ dꞌa stzꞌey Jesús.
Ix scꞌanbꞌan vin̈ dꞌay:
—Mamin,
¿mach jun tzal chiꞌ?
xchi vin̈.
26 —Ol in labꞌejem jabꞌ ixim pan tic dꞌa scal yal vinagre,
axo jun vin̈ bꞌaj ol vacꞌaꞌ,
aton jun vin̈ chiꞌ,
xchi Jesús dꞌa vin̈.
Ix lajvin̈ej yalan jun chiꞌ,
ix slabꞌanem jabꞌ ixim pan chiꞌ dꞌa scal vinagre chiꞌ,
ix yacꞌan dꞌa vin̈aj Judas yuninal vin̈aj Simón aj Queriot.
27 Ix lajvi schaan jabꞌ ixim pan chiꞌ vin̈,
ix vachꞌ och vin̈ Satanás dꞌa vin̈,
ix yalan Jesús dꞌa vin̈:
—A tas nabꞌil uuj,
cꞌulej dꞌa elan̈chamel,
xchi dꞌa vin̈.
28 Axo ebꞌ vin̈ ayoch yedꞌ dꞌa teꞌ mexa chiꞌ,
malaj junoc ebꞌ vin̈ ix nachajel yuuj tas yuj icha chiꞌ ix yal dꞌa vin̈.
29 A vin̈aj Judas chiꞌ,
sicꞌum tumin yaj vin̈,
yuj chiꞌ ay ebꞌ ix naani to syal Jesús chiꞌ dꞌa vin̈ yuj tas sman vin̈ yuj qꞌuin̈ chiꞌ,
mato a jabꞌoc tumin chiꞌ bꞌat yacꞌ vin̈ dꞌa ebꞌ mebꞌaꞌ.
30 Axo vin̈aj Judas chiꞌ,
ix lajvin̈ej svaanbꞌat jun pan chiꞌ vin̈,
ix elta vin̈ dꞌa scal ebꞌ.
Toxo ix qꞌuicꞌbꞌi.
Jun acꞌ checnabꞌil
31 Ix lajvi yelta vin̈aj Judas chiꞌ,
ix yalan Jesús:
—A ticnaic,
ol checlajel snivanil velcꞌoch a in Acꞌbꞌil in cot yuj Dios voch animail tic.
Ol in chꞌoxpaxel snivanil yelcꞌoch Dios.
32 Tato ol in chꞌoxel snivanil yelcꞌochi,
axo ol chꞌoxanpaxel snivanil velcꞌoch dꞌa elan̈chamel.
33 Ex xajanabꞌil vuuj,
quenxon̈ej tiempo ayinecꞌ eyedꞌoc.
Ol in e sayeqꞌui,
palta manto ol yal-laj e cꞌoch bꞌaj ol in cꞌoch chiꞌ,
icha vutejnac valancan dꞌa ebꞌ aj Judea.
34 Ay junxo acꞌ checnabꞌil ol valcan dꞌayex ticnaic,
to slaj e xajanej e bꞌa junjun ex.
Icha tzex vutej ex in xajanan tic,
icha chiꞌ tzeyutej e xajanan e bꞌa.
35 Tato tze xajanej e bꞌa junjun ex,
ol yojtaquejel ebꞌ anima smasanil to yel in cꞌaybꞌum ex,
xchi Jesús dꞌa ebꞌ.
Yalnac Jesús to ol yiqꞌuel vin̈aj Pedro dꞌa yibꞌan̈
36 Axo vin̈aj Simón Pedro ix cꞌanbꞌan dꞌay:
—Mamin,
¿bꞌajvaltil ol ach cꞌoch jun?
xchi vin̈.
—A bꞌaj ol in cꞌoch chiꞌ,
man̈ ol yal-laj a cꞌoch vedꞌ ticnaic.
Cꞌojancꞌolalto ol ach cꞌoch vedꞌ taꞌ,
xchi Jesús dꞌa vin̈.
37 —Palta Mamin,
¿tas yuj max yal in bꞌat edꞌ ticnaic jun?
In bꞌecnacxo cham in bꞌa uuj,
xchi vin̈aj Pedro chiꞌ dꞌay.
38 —A...
¿tom yel tza bꞌec a bꞌa a cham vuuj?
Val yel sval dꞌayach,
ayic manto ocꞌ nocꞌ caxlan̈ dꞌa jun acꞌval tic,
oxel ol iqꞌuel dꞌa ibꞌan̈ to man̈ in ojtacoc,
xchi Jesús dꞌa vin̈.