Yujn̈ej Jesús tzon̈ cꞌoch bꞌaj ay Dios
14
Ix yalanxi Jesús dꞌa ebꞌ scꞌaybꞌum:
—Man̈ eyacꞌ somchaj e cꞌool.
Tzeyacꞌoch Dios dꞌa e cꞌool,
tzin eyacꞌanpaxoch dꞌa e cꞌool.
2 A bꞌaj ay in Mam,
man̈ jantacoc cajnubꞌ ay.
Qꞌuinaloc tato malaj,
tas am gana sval dꞌayex to tzin bꞌat in bꞌo eyedꞌtal bꞌaj ol ex cꞌochoc.
El único camino a Dios (Juan 14.1-14)
3 Ol lajvoc in bꞌoan eyedꞌtal chiꞌ taꞌ,
ol in jax junelxo.
Axo ul ex vicꞌan chiꞌ vedꞌoc,
yic vachꞌ a bꞌaj ayinecꞌ chiꞌ,
ataꞌ ol ex aj vedꞌoc.
4 A ex tic eyojtacxo bꞌaj ol in cꞌochoc.
Eyojtac pax jun bꞌe bꞌaj ol in bꞌatoc,
xchi dꞌa ebꞌ.
5 Axo vin̈aj Tomás ix alan dꞌay:
—Palta Mamin,
man̈ cojtacoc bꞌajtil tzach bꞌat chiꞌ.
Yuj chiꞌ,
¿tas ol cutoc cojtacanel jun bꞌe chiꞌ?
xchi vin̈.
6 Ix yalan Jesús dꞌa vin̈:
—A jun bꞌe sval tic,
a in toni.
A inn̈ej syal ex vicꞌanbꞌat bꞌaj ay co Mam Dios.
Yeln̈ej svalaꞌ.
Acꞌum in qꞌuinal.
7 Yujto a ex tic eyojtac inxo,
yuj chiꞌ ol eyojtaquejpaxel in Mam.
A ticnaic,
eyojtacxo in Mam chiꞌ,
yujto toxo ix eyilaꞌ,
xchi dꞌa ebꞌ.
8 Axo vin̈aj Felipe ix alan dꞌay:
—Mamin,
chꞌox a Mam chiꞌ quilaꞌ.
Cꞌocbꞌiln̈ej chiꞌ,
xchi vin̈.
9 Yuj chiꞌ ix yalanxi Jesús dꞌa vin̈:
—Felipe,
ina pecatax ayinecꞌ eyedꞌoc,
¿tom manto in ojtacoc?
A ebꞌ tzin ilani,
syalelcꞌochi van yilan in Mam ebꞌ.
Yuj chiꞌ,
¿tas yuj tzato al dꞌayin:
Chꞌox a Mam chiꞌ quilaꞌ,
xa chi?
10 ¿Tom max acꞌoch dꞌa a cꞌool to ayin och dꞌa in Mam,
ay pax och dꞌayin?
A tas sval dꞌayex,
man̈ yoloc vic svalaꞌ,
palta aꞌ ayoch dꞌayin,
a van smunlaj vedꞌoc.
11 Aqꞌuecoch dꞌa e cꞌool to junn̈ej vaj yedꞌ in Mam chiꞌ,
junn̈ej pax yaj vedꞌoc.
Tato max in eyacꞌoch dꞌa e cꞌool yuj tas sval tic,
aqꞌuec in och dꞌa e cꞌool yuj juntzan̈ satubꞌtac tzin chꞌoxoꞌ.
12 Val yel sval dꞌayex,
a mach tzin acꞌanoch dꞌa scꞌool,
ol sbꞌo juntzan̈ munlajel tzin bꞌo tic.
Ayto juntzan̈xo ecꞌalto ol sbꞌo dꞌa yichan̈ juntzan̈ tzin bꞌo tic,
yujto ol in paxqꞌue bꞌaj ay in Mam chiꞌ.
13 Yaln̈ej tas ol e cꞌan dꞌa Dios dꞌa in bꞌi,
ol acꞌjoc dꞌayex.
Icha pax chiꞌ ol vutej a in Yuninal in Dios tic,
yic vachꞌ ol checlajelta to te nivan yelcꞌoch co Mam Dios.
14 Yaln̈ej tas ol e cꞌan dꞌa Dios dꞌa in bꞌi,
ol acꞌjoc dꞌayex.
Yalnaccan Jesús to ol scheccot Espíritu Santo
15 Tato tzin e xajanej,
cꞌanabꞌajejec in checnabꞌil.
Jesús habla del Espíritu Santo (Juan 14.15-31)
16 A in tic,
ol in cꞌan dꞌa co Mam,
axo ol acꞌancot junxo ol colvaj eyedꞌoc,
aton Yespíritu te yel syalaꞌ.
A ol can eyedꞌ dꞌa masanil tiempo.
17 A ebꞌ yic yolyibꞌan̈qꞌuinal tic,
max yal-laj schaan ebꞌ,
yujto max yil-laj ebꞌ,
man̈ ojtacabꞌiloc yuj ebꞌ.
A exxo tic,
eyojtacxo Yespíritu chiꞌ,
yujto aytaxon ecꞌ eyedꞌoc.
A ol ochcan cajan dꞌayex dꞌa juneln̈ej.
18 A in tic,
man̈ ol ex vactejcanlaj e chꞌocoj,
ol in jax dꞌayex junelxo.
19 Quenxon̈ej tiempoal,
man̈xo ol in yil-laj ebꞌ man̈ vicoc dꞌa yolyibꞌan̈qꞌuinal tic.
A exxo pax tic,
ol in eyilaꞌ.
Yujto pitzan inn̈ej,
pitzan ex pax dꞌa juneln̈ej.
20 A dꞌa jun cꞌual yic ol ochcan Espíritu dꞌayex,
ato taꞌ ol nachajel eyuuj to ayin och dꞌa in Mam.
Axo snachajel chiꞌ eyuuj to ayex och dꞌayin,
ayin pax och dꞌayex.
21 A ebꞌ syacꞌoch spensar dꞌa in checnabꞌil,
scꞌanabꞌajan ebꞌ,
aton ebꞌ chiꞌ xajan in yuuj.
A ebꞌ tzin xajanani,
xajan pax ebꞌ yuj in Mam.
A in ol in xajanej ebꞌ,
ol in chꞌox in bꞌa dꞌa ebꞌ,
xchi Jesús.
22 Ay junxo scꞌaybꞌum vin̈ scuch Judas,
man̈oclaj vin̈ aj Queriot,
a vin̈ ix alani:
—Mamin,
¿tas yuj axon̈ej dꞌayon̈ ol a chꞌox a bꞌa?
¿Tas yuj man̈xo ol a chꞌox a bꞌa dꞌa ebꞌ yic yolyibꞌan̈qꞌuinal tic?
xchi vin̈ dꞌa Jesús.
23 Yuj chiꞌ ix yalxi Jesús chiꞌ:
—A ebꞌ xajan in yuuj,
scꞌanabꞌajej pax in lolonel ebꞌ.
Yuj chiꞌ axo in Mam ol xajanan ebꞌ.
A in yedꞌ in Mam chiꞌ ol on̈ ochcan cajan dꞌa ebꞌ.
24 Axo ebꞌ max in xajanani,
max scꞌanabꞌajej paxlaj ebꞌ tas svalaꞌ.
A juntzan̈ lolonel sval tic dꞌayex,
man̈ vicoc,
yic in Mam checjinac in coti.
25 Svalcan juntzan̈ tic dꞌayex yacbꞌan ayinto ecꞌ eyedꞌoc.
26 A co Mam Dios ol checancot Yespíritu dꞌayex in qꞌuexuloc.
Aꞌ ol colvaj eyedꞌoc,
ol ex scꞌaybꞌan dꞌa masanil tastac.
Ol yec e nacot jantacn̈ej tas valnacxocan dꞌayex.
27 A ticnaic,
svacꞌcan in juncꞌolal dꞌayex.
A in juncꞌolal svacꞌcan dꞌayex tic,
man̈ lajanoc icha juncꞌolal syacꞌ ebꞌ yic yolyibꞌan̈qꞌuinal tic.
Man̈ eyacꞌ somchajel e cꞌool,
man̈ ex xivoc.
28 Toxo ix val eyabꞌi to ol in paxoc,
palta ol in jax dꞌayex.
Tato yel tzin e xajanej,
tzex tzalaji,
yujto ol in pax dꞌa co Mam,
yujto ecꞌalto dꞌa vichan̈.
29 Ayocto svalancan juntzan̈ tic dꞌayex,
yic vachꞌ ayic ol ujoc jun sval tic,
ol in e vachꞌ aqꞌuejoch dꞌa e cꞌool.
30 Man̈xo nivanoc tas sval dꞌayex,
yujto vanxo sja vin̈ yajal yolyibꞌan̈qꞌuinal tic.
A vin̈ chiꞌ,
malaj yalan yic vin̈ dꞌayin.
31 Palta tzin cꞌanabꞌajej checnabꞌil ix yacꞌ co Mam Dios dꞌayin,
yic vachꞌ ol nachajel yuj ebꞌ yic yolyibꞌan̈qꞌuinal tic to xajan vuuj.
Axo ticnaic,
qꞌuean̈ec vaan,
coyec,
xchi Jesús.