A yabꞌixal teꞌ uva yedꞌ teꞌ scꞌabꞌ
15
Ix yalanpax Jesús dꞌa ebꞌ scꞌaybꞌum:
—A in tzin schꞌox jun teꞌ nunal uva vachꞌ.*
Axo jun tzꞌaqꞌuenan teꞌ,
a in Mam schꞌoxoꞌ.
2 Tato ay teꞌ scꞌabꞌ max satani,
axo ol tzepanel teꞌ.
Tato ay teꞌ scꞌabꞌ vachꞌ satani,
axo ol aqꞌuenan teꞌ yic tzijtum sat teꞌ syacꞌaꞌ.
Icha syutej yaqꞌuenan teꞌ chiꞌ,
icha chiꞌ ol yutoc in Mam ebꞌ syacꞌoch spensar dꞌayin.
La vid y las ramas (Juan 15.1-17)
3 A exxo tic,
toxo ix bꞌo e pensar yuj juntzan̈ in cꞌaybꞌubꞌal ix val dꞌayex.
4 Ochan̈ec cajan dꞌayin,
a inxo ol in ochpax cajan dꞌayex.
Icha junoc teꞌ scꞌabꞌ tzꞌelta jecnaj dꞌa snunal maxtzac satanlaj,
icha chiꞌ ol ex ajoc tato man̈ ex ayococh dꞌayin.
5 A in tic,
icha snunal teꞌ uva vaji.
A exxo tic,
icha teꞌ scꞌabꞌ eyaji.
Tato junn̈ej eyaj vedꞌoc,
junn̈ej pax vaj eyedꞌoc,
icha junoc teꞌ scꞌabꞌ tzijtum sat syacꞌaꞌ,
icha chiꞌ ol ex ajoc.
Palta malaj jabꞌoc tas syal eyuj e chꞌocoj.
6 Qꞌuinaloc ay ebꞌ man̈ ayococh dꞌayin,
lajan ol aj ebꞌ icha junoc teꞌ scꞌabꞌ stzepjiel dꞌa snunal,
stacji.
Slajvi chiꞌ,
smolbꞌaji,
sn̈usjitzꞌaoc.
7 Tato junn̈ej eyaj vedꞌoc,
tato tzeyacꞌn̈ejoch e pensar dꞌa in lolonel,
cꞌanec tas tze nibꞌej ol acꞌjoc dꞌayex.
8 Tato nivan tas vachꞌ scheclajel dꞌa e bꞌeybꞌal,
ol aljoc in Mam vachꞌil eyuuj.
Ichaton chiꞌ ol eyutoc e chꞌoxaneli to in cꞌaybꞌum ex.
9 Icha ix yutej in Mam in xajanani,
icha pax chiꞌ tzex vutej ex in xajanani.
Yuj chiꞌ tzin e cꞌanabꞌajejn̈ej,
yic vachꞌ ol eyabꞌi to xajanexn̈ej vuuj.
10 Tato tze cꞌanabꞌajej juntzan̈ in checnabꞌil,
ol eyabꞌi to xajanexn̈ej vuuj,
yujto icha chiꞌ vaj yedꞌ in Mam.
A in tic tzin cꞌanabꞌajej juntzan̈ schecnabꞌil in Mam chiꞌ,
yuj chiꞌ svabꞌi to xajan inn̈ej yuuj.
11 Svalcan juntzan̈ tic dꞌayex yic vachꞌ icha tzin tzalaji,
icha pax chiꞌ ol ex tzalajoc,
yuj chiꞌ tzꞌacan ol aj e tzalajcꞌolal.
12 A ticnaic ay jun in checnabꞌil ol valcan dꞌayex to tze xajanej e bꞌa junjun ex icha svutej ex in xajanani.
13 Tato ay junoc mach syacꞌcham sbꞌa yuj ebꞌ yamigo,
syalelcꞌochi to tzꞌecꞌ val dꞌa yibꞌan̈ xajanan ebꞌ yamigo chiꞌ.
14 A ex tic,
tato tze cꞌanabꞌajej juntzan̈ in checnabꞌil tic,
val yel vamigo ex toni.
15 A ticnaic sval dꞌayex,
man̈ ton̈ejoc in checabꞌ eyaji,
yujto a junoc checabꞌ,
man̈ yojtacoc tas sna spatrón.
Palta a ticnaic vamigo ex,
yujto a jantacn̈ej tas yalnaccan in Mam dꞌayin,
ix valxican dꞌayex.
16 Man̈oquexlaj ix in e sayeqꞌui,
palta a in ix ex in siqꞌuelta,
yic vachꞌ tze cꞌulej tas tzin nibꞌej.
A tas tze cꞌulej chiꞌ,
ol cann̈ej dꞌa juneln̈ej.
Yuj chiꞌ a jantacn̈ej tas tze cꞌan dꞌa co Mam Dios dꞌa in bꞌi,
ol yacꞌn̈ej dꞌayex.
17 Aton jun in checnabꞌil tic svalcan dꞌayex,
to slaj e xajanej e bꞌa junjun ex.
A schichoncꞌolal ebꞌ yic yolyibꞌan̈qꞌuinal
18 Tato ay ebꞌ yic yolyibꞌan̈qꞌuinal tic tzꞌoch ajcꞌolal dꞌayex,
naeccoti to a dꞌayin sbꞌabꞌlajoch ebꞌ ajcꞌolal.
Jesús advierte sobre la persecución (Juan 15.18–16.4)
19 Qꞌuinaloc yic ex yolyibꞌan̈qꞌuinal tic yedꞌ ebꞌ,
tecan xajanex yuj ebꞌ.
Palta man̈xo ex yicoc yolyibꞌan̈qꞌuinal tic,
yujto toxo ex in sicꞌcanelta dꞌa scal ebꞌ.
Yuj chiꞌ tzꞌoch ebꞌ ajcꞌolal dꞌayex,
yujto man̈xo eyetbꞌeyumoc e bꞌa yedꞌ ebꞌ.
20 Tze na val cot jun lolonel ix val tic dꞌayex:
Malaj junoc checabꞌ ecꞌal yelcꞌoch dꞌa yichan̈ spatrón,
xin chi dꞌayex.
Icha yutejnac ebꞌ yacꞌanoch in yaelal,
icha pax chiꞌ ol yutoc ebꞌ yacꞌanoch eyaelal.
Tato ix scꞌanabꞌajej in cꞌaybꞌubꞌal ebꞌ,
ol scꞌanabꞌajej pax eyic ebꞌ.
21 Ol laj yacꞌoch yaelal ebꞌ dꞌa eyibꞌan̈ vuuj,
yujto man̈ yojtacoclaj ebꞌ mach checjinac in coti.
22 Qꞌuinaloc max ul val dꞌa ebꞌ,
malaj am smul ebꞌ.
Palta a ticnaic,
man̈xa bꞌaj vachꞌ scolan sbꞌa ebꞌ yuj smul.
23 A ebꞌ tzꞌoch ajcꞌolal dꞌayin,
tzꞌochpax ebꞌ ajcꞌolal dꞌa in Mam.
24 A juntzan̈ satubꞌtac ix laj in chꞌox dꞌa scal ebꞌ,
malaj junocxo mach syal yuuj icha chiꞌ.
Qꞌuinaloc malaj juntzan̈ satubꞌtac chiꞌ ix in chꞌoxoꞌ,
malaj am smul ebꞌ.
Axo ticnaic,
vachꞌchom ix yil juntzan̈ chiꞌ ebꞌ,
palta an̈ejaꞌ ayoch ebꞌ ajcꞌolal dꞌayin,
ajcꞌool pax ebꞌ dꞌa in Mam.
25 Palta icha tic ix aj yelcꞌoch juntzan̈ tic,
yic tzꞌelcꞌoch tas tzꞌibꞌyajcan dꞌa ley bꞌaj nivanoc syacꞌoch spensar ebꞌ.
Aton jun tzꞌalan icha tic:
Nabꞌan̈ej scomon och ebꞌ ajcꞌolal dꞌayin,
xchi dꞌa Slolonel Dios Tzꞌibꞌabꞌilcani.