16
Svalcan juntzan̈ tic dꞌayex,
yic man̈ ol ex somchajeloc.
2 Yujto ol laj ex pechjielta yuj ebꞌ quetisraelal dꞌa yol spatil culto.
Ay jun tiempoal ol javoc,
yalxon̈ej mach ol ex milanoc,
a snaan ebꞌ to pavor syacꞌ ebꞌ dꞌa Dios.
3 Icha chiꞌ ol yutoc sbꞌa ebꞌ,
yujto man̈ yojtacoc in Mam ebꞌ,
man̈ in yojtacoc pax ebꞌ.
4 Svalcan juntzan̈ tic dꞌayex,
yic vachꞌ ayic ol ja jun tiempoal chiꞌ,
ol e nacoti to valnacxocan dꞌayex.
Maj val-laj juntzan̈ tic dꞌayex dꞌa yic yalan̈,
yujto ayinto ecꞌ eyedꞌ taꞌ.
A yopisio Yespíritu Dios
5 Axo ticnaic,
ol in pax dꞌa jun checjinac in coti.
Palta malaj junoc ex tze cꞌanbꞌej dꞌayin bꞌajtil ol in cꞌochoc.
Más enseñanza sobre el Espíritu Santo (Juan 16.5-33)
6 Ton̈ej tzex te och ilcꞌolal yuj juntzan̈ svalcan tic dꞌayex.
7 Val yel sval dꞌayex,
te vachꞌ eyicoꞌ yujto ol in paxoc.
Tato man̈ ol in paxoc,
man̈ ol javoclaj jun dꞌin̈an scolvaj chiꞌ eyedꞌoc.
Palta ayic ol in paxoc,
ol in checancot dꞌayex.
8 Axo ol javoc,
aꞌ ol acꞌan yojtaquejel ebꞌ yic yolyibꞌan̈qꞌuinal tic to ay smul ebꞌ.
An̈ejaꞌ ol acꞌan yojtaquejel ebꞌ to vachꞌn̈ej ix vutej in bꞌa.
Ol yacꞌan yojtaquejel ebꞌ to ol chꞌolbꞌitaj tas yaj ebꞌ yuj Dios.
9 Ol schꞌoxan dꞌa ebꞌ to ay smul ebꞌ,
yujto max in yacꞌoch ebꞌ dꞌa scꞌool.
10 Aꞌ ol acꞌan yojtaquejel ebꞌ to vachꞌn̈ej ix vutej in bꞌa,
yujto ol in pax bꞌaj ay co Mam Dios,
bꞌaj man̈xo ol yal-laj in eyilani.
11 Ol schꞌoxan dꞌa ebꞌ to ol chꞌolbꞌitaj yaj ebꞌ yuj Dios,
yujto toxo ix chꞌolbꞌitaj yaj vin̈ yajal yolyibꞌan̈qꞌuinal tic.
12 Tzijtumto tas in gana sval dꞌayex,
palta maxto techaj eyabꞌan ticnaic.
13 Ato val ol ja Espíritu yel syalaꞌ,
ato taꞌ ol acꞌjoc nachajel eyuuj masanil tas yel.
Man̈ ol lolonlaj dꞌa yol yicoꞌ,
a jantacn̈ej tas ol aljoc dꞌay,
an̈ej ol yalaꞌ.
Ol laj yalan juntzan̈ tastac toto ol ujoc.
14 Yuuj ol checlajeloc to nivan velcꞌochi.
Jantacn̈ej tas ol val dꞌay,
aꞌ ol alan pax dꞌayex.
15 Jantacn̈ej tas ay dꞌa co Mam Dios,
vicn̈ej yaji.
Yuj chiꞌ ix valaꞌ to a tas ol val dꞌa Espíritu chiꞌ,
aꞌ ol yal dꞌayex.
Stzalajcꞌolal ebꞌ scꞌaybꞌum Jesús
16 Junxon̈ej rato ol in eyilaꞌ,
slajvi chiꞌ,
man̈xo ol in eyil-laj.
Ol ecꞌ junocxo rato,
ol in eyilanxi,
yujto ol in paxqꞌue bꞌaj ay in Mam,
xchi Jesús dꞌa ebꞌ.
17 Ix lajvi yalan jun chiꞌ,
ay jayvan̈ ebꞌ scꞌaybꞌum ix laj alani:
—¿Tas syalelcꞌoch jun syal tic dꞌayon̈?
To ix yalaꞌ:
Junxon̈ej rato ol in eyilaꞌ,
slajvi chiꞌ,
man̈xo ol in eyil-laj.
Ol ecꞌ junocxo rato,
ol in eyilanxi,
xchi.
Ix yalanpaxi:
Yujto ol in paxqꞌue bꞌaj ay in Mam,
xchi dꞌayon̈.
18 A jun “junxon̈ej rato” syal tic,
¿tastaxlaj syalelcꞌochi?
Man̈ jabꞌoc snachajel cuuj tas syalaꞌ,
xchi ebꞌ.
19 Axo Jesús,
yojtacxo to sgana ebꞌ scꞌanbꞌej dꞌay tas syalelcꞌoch jun ix yal chiꞌ,
yuj chiꞌ ix yalanxi dꞌa ebꞌ:
—Toxo ix val dꞌayex:
Junxon̈ej rato ol in eyilaꞌ,
slajvi chiꞌ,
man̈xo ol in eyil-laj.
Palta ol ecꞌ junocxo rato,
ol in eyilanxi,
xin chi dꞌayex.
¿Tom yuj juntzan̈ sval tic tze cꞌanbꞌan eyabꞌ dꞌayex junjun ex?
20 Val yel sval dꞌayex,
ol ex cusoc,
ol ex ocꞌoc.
Axo ebꞌ yic yolyibꞌan̈qꞌuinal tic,
ol laj qꞌue chan̈ ebꞌ.
A ex tic,
ol ex cusoc,
palta ol meltzajxoc och e cuscꞌolal chiꞌ dꞌa tzalajcꞌolal.
21 Qꞌuinaloc ay junoc ix ix van yalji yuneꞌ,
scus ix,
yujto ayoch ix dꞌa syaelal,
palta ayic toxo ix aj yuneꞌ ix chiꞌ,
maxtzac snacotlaj syaelal ix chiꞌ,
toxon̈ej ste tzalaj ix,
yujto ix aj jun unin chiꞌ dꞌa yolyibꞌan̈qꞌuinal tic.
22 Icha jun ix chiꞌ,
icha chiꞌ ol ex ajoc.
Ol ex cus ton ticnaic,
palta ato yic ol in eyilanxi ol ex tzalajoc.
Axo jun e tzalajcꞌolal chiꞌ,
malaj junoc mach ol yal yicꞌanecꞌ dꞌayex.
23 A dꞌa jun cꞌual chiꞌ man̈xa tas ol e cꞌanbꞌej dꞌayin.
Val yel sval dꞌayex,
masanil tas ol e cꞌan dꞌa co Mam Dios dꞌa in bꞌi,
ol yacꞌ dꞌayex.
24 A ticnaic,
mantalaj tas tze cꞌan dꞌa Dios dꞌa in bꞌi.
Cꞌanec,
ol e chaa,
ol acꞌjoc dꞌayex yic ol tzꞌacvoc e tzalajcꞌolal.
Cannac yolyibꞌan̈qꞌuinal tic dꞌa yalan̈ yuj Jesús
25 Qꞌuexan̈ ix vutej valan juntzan̈ lolonel tic dꞌayex.
Palta ay jun tiempoal ol javoc,
man̈xo ichoc taꞌ ol aj valan dꞌayex,
yujto tojolxon̈ej ol vutoc valan yabꞌixal in Mam dꞌayex.
26 Ayic ol ja jun cꞌual chiꞌ,
ato taꞌ ol e cꞌan tas tze nibꞌej dꞌa in bꞌi.
Max val-laj dꞌayex tato a in ol in cꞌan tas dꞌa in Mam eyuuj.
27 Xajan ex yuj in Mam chiꞌ,
yujto xajan in eyuuj,
ix eyacꞌoch dꞌa e cꞌool to a dꞌay cotnac in.
28 Yel toni a dꞌay cotnac in,
in javi dꞌa yolyibꞌan̈qꞌuinal tic.
A ticnaic,
ol vactejcani,
axo in paxqꞌue dꞌa in Mam chiꞌ,
xchi dꞌa ebꞌ.
29 Axo ebꞌ scꞌaybꞌum chiꞌ ix alan dꞌay:
—A ticnaic te tojolxo tzutej alan dꞌayon̈.
Man̈xo qꞌuexan̈oc tzutej alan icha dꞌa junel.
30 A ticnaic,
snachajel cuuj to ojtacn̈ej masanil tasi.
Man̈ yovaliloc tzato co cꞌanbꞌej dꞌayach ayic tzalan dꞌayon̈.
Yuj chiꞌ scacꞌoch dꞌa co cꞌool to a dꞌa Dios cotnac ach,
xchi ebꞌ dꞌay.
31 Yuj chiꞌ ix yalxi dꞌa ebꞌ:
—¿Tzam in eyacꞌoch dꞌa e cꞌool ticnaic?
32 Palta vanxo sja stiempoal ol ex saclemcanbꞌatoc.
Ol laj ex bꞌat elelal junjun ex.
Ol in eyactejcan in chꞌocoj,
palta man̈ in chꞌocojoc ol in canoc,
ayecꞌ in Mam vedꞌoc.
33 Ix val masanil juntzan̈ tic dꞌayex,
yic vachꞌ juncꞌolalxo ol ex aj vuuj.
A dꞌa yolyibꞌan̈qꞌuinal tic,
ol eyabꞌ ton syail.
Palta tecꞌan tzeyutej e bꞌa,
yujto a ebꞌ yic yolyibꞌan̈qꞌuinal tic,
toxo ix can ebꞌ dꞌa yalan̈ vuuj,
xchi Jesús dꞌa ebꞌ.