Ix lesalvi Jesús yuj ebꞌ scꞌaybꞌum
17
Ix lajvi yalan juntzan̈ chiꞌ Jesús,
ix qꞌue qꞌuelan dꞌa satchaan̈,
ix yalani:
—Mamin,
toxo ix ja stiempoal a chꞌoxaneli to nivan velcꞌoch a in Uninal in tic,
yic ol in chꞌoxpaxel snivanil elcꞌochi.
2 Yujto a ach acꞌnac vopisio dꞌa yibꞌan̈ masanil ebꞌ anima yic vachꞌ svacꞌ sqꞌuinal jantacn̈ej ebꞌ ix acꞌ dꞌayin.
Jesús ora por sus seguidores (Juan 17.1-26)
3 A jun qꞌuinal dꞌa juneln̈ej tic,
syalelcꞌochi to tzach yojtaquejel ebꞌ anima to a achn̈ejton Dios ach dꞌa val yel yedꞌ pax in yojtacanel ebꞌ a in Jesucristo checbꞌil in cot uuj tic.
4 Ayic ayinecꞌ dꞌa yolyibꞌan̈qꞌuinal tic,
ix in chꞌoxoꞌ to te nivan elcꞌochi.
A jun munlajel acꞌbꞌilcan tic dꞌayin uuj,
toxo ix yicꞌ sbꞌa.
5 Ayic manto bꞌo jun yolyibꞌan̈qꞌuinal tic,
ayinecꞌ edꞌ bꞌaj ay co vachꞌil.
Axo ticnaic Mamin,
cha in paxqꞌue edꞌ bꞌaj ay co vachꞌil chiꞌ ichataxon vaj edꞌoc.
6 A ebꞌ ix a siqꞌuelta dꞌa yolyibꞌan̈qꞌuinal tic,
ix acꞌ ebꞌ dꞌayin,
ix in chꞌox dꞌa ebꞌ tas nabꞌil uuj.
A ebꞌ ix acꞌ dꞌayin,
toxonton ic ebꞌ.
Ix laj scꞌanabꞌajej a lolonel ebꞌ.
7 A ticnaic,
a jantacn̈ej tas acꞌnac dꞌayin,
yojtac ebꞌ to a dꞌayach cotnac.
8 A a lolonel acꞌnac dꞌayin,
ix laj val dꞌa ebꞌ.
Ix schaan yabꞌ ebꞌ,
yuj chiꞌ yojtac ebꞌ to yel dꞌayach cotnac in.
Syacꞌoch ebꞌ dꞌa scꞌool to a ach a checnac in coti.
9 Tzin lesalvi yuj ebꞌ ix acꞌ dꞌayin,
yujto icxo ebꞌ.
Axo ebꞌ yic yolyibꞌan̈qꞌuinal tic,
max in lesalvilaj yuj ebꞌ.
10 Jantacn̈ej ebꞌ vicoꞌ,
icxo pax yaj ebꞌ.
An̈ejtonaꞌ ebꞌ icoꞌ,
vicxo pax ebꞌ edꞌoc.
Aton ebꞌ tic schꞌoxaneli to te nivan velcꞌochi.
11 Jabꞌxon̈ej tiempo ayinecꞌ dꞌa yolyibꞌan̈qꞌuinal tic,
axo in paxqꞌue chiꞌ edꞌoc.
Axo pax ebꞌ tic jun,
ol to can ebꞌ dꞌa yolyibꞌan̈qꞌuinal tic.
Mamin,
te tojol achn̈ej.
A ebꞌ ix acꞌ dꞌayin,
tza tan̈vej ebꞌ yedꞌ a poder,
aton jun ix acꞌ dꞌayin,
yic junxon̈ej tzꞌaj ebꞌ icha vaj edꞌoc.
12 Ayic ayinecꞌ yedꞌ ebꞌ dꞌa yolyibꞌan̈qꞌuinal tic,
ix in tan̈vej ebꞌ yedꞌ a poder chiꞌ.
A ebꞌ ix acꞌ dꞌayin,
ix in tan̈vej ebꞌ yic malaj tzꞌicꞌan ebꞌ,
malaj junoc ebꞌ ix sateli,
an̈ej jun dꞌin̈antaxon sateli yic tzꞌelcꞌoch tas tzꞌibꞌabꞌilcan dꞌa a lolonel.
13 A ticnaic jun,
ol in paxixqꞌue dꞌayach.
Yacbꞌan ayinto ecꞌ jabꞌocxo dꞌa yolyibꞌan̈qꞌuinal tic,
svalancan juntzan̈ tic yic vachꞌ ol tzalaj ebꞌ icha in tzalaj tic.
14 Toxo ix laj valcanel a lolonel dꞌa ebꞌ.
Palta a ebꞌ yic yolyibꞌan̈qꞌuinal tic tzꞌoch ebꞌ ajcꞌolal dꞌa ebꞌ,
yujto man̈xo yicoc yolyibꞌan̈qꞌuinal ebꞌ yedꞌ ebꞌ.
Icha in tic,
man̈ in yicoc yolyibꞌan̈qꞌuinal tic.
15 Mantoc svalaꞌ to elan̈chamel tziqꞌuel ebꞌ dꞌa tic.
Palta tzin cꞌan dꞌayach to tza tan̈vej ebꞌ,
yic malaj ebꞌ tzꞌixtaxel yuj vin̈ chuc chiꞌ.
16 A in tic,
man̈ in yicoc yolyibꞌan̈qꞌuinal tic.
An̈ejtonaꞌ icha chiꞌ ebꞌ,
man̈ yicoc yolyibꞌan̈qꞌuinal tic ebꞌ.
17 A ach tza tojolbꞌitej spensar ebꞌ yedꞌ a lolonel te yel.
18 Icha ix utej in a checancot dꞌa scal ebꞌ anima tic,
icha chiꞌ svutej in checanpaxbꞌat ebꞌ dꞌa scal ebꞌ anima chiꞌ.
19 Yuj svachꞌiloc ebꞌ yuj chiꞌ svacꞌ in bꞌa dꞌayach,
yic vachꞌ tzꞌoch ebꞌ icoc dꞌa val yel.
20 Man̈ yujocn̈ej ebꞌ tzin lesalvi.
Tzin lesalvi pax yuj ebꞌ toto ol in acꞌanoch dꞌa scꞌool yuj tastac ol yal ebꞌ in checabꞌ tic.
21 Tzin cꞌan dꞌayach yic junxon̈ej ol aj spensar ebꞌ smasanil.
Mamin,
junn̈ej vaj edꞌoc,
junn̈ej pax aj vedꞌoc.
Ichoc val caji,
ichocabꞌ ta tzꞌaj pax ebꞌ,
junn̈ejocabꞌ tzꞌaj ebꞌ quedꞌoc.
Tato icha chiꞌ,
axo ebꞌ anima dꞌa yolyibꞌan̈qꞌuinal tic,
ol yacꞌoch ebꞌ dꞌa scꞌool to a ach a checnac in coti.
22 A snivanil velcꞌoch ix acꞌaꞌ,
a ix vacꞌpax dꞌa ebꞌ,
yic junxon̈ej tzꞌaj spensar ebꞌ icha vaj edꞌoc.
23 A in ayin och dꞌa ebꞌ,
a achxo ayach och dꞌayin,
yic vachꞌ junxon̈ej ol aj spensar ebꞌ.
Yuj chiꞌ ol nachajel yuj ebꞌ yic yolyibꞌan̈qꞌuinal tic to a ach a checnac in coti.
Ol nachajel yuj ebꞌ to icha tzutej in a xajanani,
icha pax chiꞌ tzutej a xajanan ebꞌ quicxo.
24 Mamin,
a ebꞌ tzacꞌ dꞌayin,
in gana ol aj ebꞌ vedꞌ bꞌaj ol in cꞌochoc,
yic ol yil in vachꞌil ebꞌ acꞌbꞌil dꞌayin uuj,
yujto xajanintaxon uuj atax yic mantzac bꞌo jun yolyibꞌan̈qꞌuinal tic.
25 Mamin,
tojol a pensar,
a ebꞌ yic yolyibꞌan̈qꞌuinal tic,
man̈ ach yojtacoc ebꞌ.
Xal in tic,
vojtac ach.
Axo ebꞌ tic,
yojtacxo ebꞌ to a ach a checnac in coti.
26 A in ix vacꞌ yojtaquejel ebꞌ tas aji.
An̈ejtonaꞌ ol in vachꞌ aqꞌuej yojtaquejxiel ebꞌ,
yic vachꞌ icha tzutej in a xajanani,
icha pax chiꞌ tzutej a xajanan ebꞌ.
A inxo ol in och cajan dꞌa ebꞌ dꞌa juneln̈ej,
xchi Jesús dꞌa co Mam Dios.