A schamel vin̈aj Lázaro
11
Ay jun vin̈ dꞌa chon̈abꞌ Betania scuchan Lázaro,
te penaay vin̈.
Ataꞌ pax cajan chavan̈ ebꞌ ix yanabꞌ vin̈,
jun ix scuch María,
axo junxo ix,
Marta sbꞌi ix.
2 A ix María chiꞌ sucjinaquecꞌ jun yal sucꞌuqꞌui sjabꞌ dꞌa yoc Jesús Cajal,
axo yedꞌ xil sjolom ix sucnac tacjoc.
Ix penaayax vin̈aj Lázaro chiꞌ.
Jesús resucita a Lázaro (Juan 11.1-57)
—Mamin,
a vin̈ te xajan uuj,
penaay vin̈,
xchicot ebꞌ ix.
4 Ayic ix yabꞌan Jesús tas ix yalcot ebꞌ ix chiꞌ,
ix yalan icha tic:
—A jun ilya chiꞌ,
man̈ ol chamlaj vin̈ yuuj dꞌa juneln̈ej.
Ix yamchaj vin̈ yuj jun yabꞌil chiꞌ yic ol schꞌox Dios to te nivan yelcꞌochi,
yic scheclajpaxeli to te nivan velcꞌoch a in Yuninal in Dios tic,
xchi Jesús.
5 Te xajan vin̈aj Lázaro chiꞌ,
ix María yedꞌ ix Marta yuj Jesús chiꞌ.
6 Ayic ix yabꞌan Jesús chiꞌ to te penaay vin̈,
maj bꞌatlaj dꞌa elan̈chamel.
Chabꞌto cꞌual ix can bꞌaj ayecꞌ chiꞌ.
7 Axo yic ix cꞌoch scꞌual sbꞌat chiꞌ jun,
ix yalan dꞌa ebꞌ scꞌaybꞌum:
—Coyec dꞌa yol yic Judea junelxo,
xchi dꞌa ebꞌ.
8 Ix yalan ebꞌ dꞌay:
—Ach co Cꞌaybꞌumal,
ina ijan sjulnac ach cham ebꞌ aj Judea chiꞌ jun,
¿tom tzach bꞌatxi?
xchi ebꞌ.
9 Ix yalanxi dꞌa ebꞌ:
—Cojtac to lajchaveꞌ hora tzꞌecꞌ dꞌa junjun cꞌu.
Tato tzon̈ bꞌeyecꞌ dꞌa cꞌualil,
man̈ comonoc tzon̈ telvi,
yujto sacqꞌuinal.
10 Palta a ebꞌ sbꞌeyecꞌ dꞌacꞌvalil,
scomon telvi ebꞌ,
yujto malaj saquilqꞌuinal dꞌa ebꞌ,
xchi Jesús.
11 Ix lajvi yalan jun chiꞌ,
ix yalanpax yuj vin̈aj Lázaro:
—A vin̈ co vachꞌ cꞌool chiꞌ,
ton̈ej svay vin̈.
Palta ol bꞌat in pitzel svayan̈ vin̈,
xchi dꞌa ebꞌ.
12 —Mamin,
tato ton̈ej svay vin̈,
tecan ol bꞌoxoc scꞌol vin̈,
xchi ebꞌ scꞌaybꞌum chiꞌ dꞌay.
13 Ayic ix yalan Jesús to svay vin̈aj Lázaro chiꞌ,
syalelcꞌochi to chamnacxo vin̈.
Palta a snaan ebꞌ ton̈ej svay vin̈.
14 Yuj chiꞌ,
tojol ix yutej yalan dꞌa ebꞌ:
—Toxo ix cham vin̈.
15 A ticnaic tzin tzalaji,
yujto man̈ in ayoquecꞌ taꞌ ix cham vin̈,
yic ol in eyacꞌoch dꞌa e cꞌool.
Yuj chiꞌ coyec bꞌat quilec,
xchi dꞌa ebꞌ.
16 Axo vin̈aj Tomás,
jun vin̈ tzꞌalji Tioxal,
ix yal vin̈ dꞌa ebꞌ yetcꞌaybꞌumal chiꞌ:
—Coyec,
bꞌat caqꞌueccham co bꞌa yedꞌoc,
xchi vin̈.
A Jesús tzꞌacꞌan qꞌuinal dꞌa juneln̈ej
17 Axo yic ix cꞌoch ebꞌ,
ix yabꞌan ebꞌ to oxjitax ix mucchaj vin̈aj Lázaro chiꞌ.
18 A chon̈abꞌ Betania bꞌaj ay vin̈ chiꞌ,
dꞌa slacꞌanil Jerusalén ay.
Ay am nan̈aloc legua scal.
19 Yuj chiꞌ,
tzijtum ebꞌ israel aj Jerusalén chiꞌ xidꞌ nivanan scꞌool ix María yedꞌ ix Marta yuj vin̈ snulej ebꞌ ix,
ix cham chiꞌ.
20 Ayic ix yabꞌan ix Marta to van scꞌoch Jesús,
ix ja ix schaꞌa.
Axo ix María aycan ix dꞌa yol pat.
21 Ix yalan ix Marta chiꞌ dꞌa Jesús icha tic:
—Mamin,
ayocach ecꞌlaj dꞌa tic ayic ix cham vin̈ in nulej chiꞌ,
tecan maj chamlaj vin̈.
22 Palta a ticnaic,
vojtac yaln̈ej tas ol a cꞌan dꞌa Dios,
Aꞌ ol acꞌan dꞌayach,
xchi ix dꞌay.
23 —A vin̈ a nulej chiꞌ ol pitzvocxi vin̈,
xchi Jesús chiꞌ dꞌa ix.
24 —Yel toni,
vojtac to ol pitzvocxi vin̈,
palta ato dꞌa slajvubꞌ cꞌual ayic ol pitzvocxi ebꞌ chamnac,
xchi ix dꞌay.
25 —A in tic,
svacꞌ pitzvocxi ebꞌ chamnac,
aj qꞌuinal in.
A mach tzin acꞌanoch dꞌa scꞌool,
vachꞌchom ol chamoc,
palta ol pitzvocxi.
26 A mach pitzanto tzin yacꞌanoch dꞌa scꞌool,
man̈xa bꞌaqꞌuin̈ ol chamoc.
¿Tzam acꞌoch jun tic dꞌa a cꞌool?
xchi Jesús dꞌa ix.
27 —Iꞌ...
Mamin,
svacꞌoch dꞌa in cꞌool to Cristo ach,
Yuninal ach Dios.
A ach tic tan̈vabꞌil a ja dꞌa yolyibꞌan̈qꞌuinal tic,
xchi ix dꞌay.
Ix ocꞌ Jesús yuj vin̈aj Lázaro
28 Ix lajvi yalan jun chiꞌ ix Marta chiꞌ,
ix pax ix.
Ix bꞌat ix yavtejcot ix María ix snulej chiꞌ.
Ix sajanoch ix dꞌa schiquin ix dꞌa elcꞌaltac:
—Ix ja co Cꞌaybꞌumal,
tzach yavtej,
xchi ix.
29 Ayic ix yabꞌan jun chiꞌ ix María chiꞌ,
ix qꞌue jucnaj ix.
Ix bꞌat ix bꞌaj ayecꞌ Jesús chiꞌ,
30 yujto manto och dꞌa yol jun chon̈abꞌ chiꞌ.
An̈ejaꞌ ayecꞌ bꞌaj xidꞌ scha ix Marta chiꞌ.
31 Palta ay ebꞌ aj Judea ayecꞌ yedꞌ ix dꞌa yol spat chiꞌ.
Ayecꞌ ebꞌ snivanej scꞌol ix.
Axo ix yilan ebꞌ,
ix qꞌue jucnaj ix,
ix bꞌat lemnaj ix,
tzacꞌanxon̈ej ix bꞌat ebꞌ yuj ix,
yujto a snaan ebꞌ to sbꞌat ocꞌ ix bꞌaj mucan vin̈ snulej chiꞌ.
32 Ayic ix cꞌoch ix bꞌaj aycan Jesús chiꞌ,
ix em cumnaj ix dꞌa yichan̈,
ix yalan ix dꞌay:
—Mamin,
ayocach ecꞌlaj dꞌa tic a ix cham vin̈ in nulej chiꞌ,
tecan maj chamlaj vin̈,
xchi ix.
33 Ayic ix yilan Jesús to tzꞌocꞌ ix,
tzꞌocꞌ pax ebꞌ aj Judea ix cꞌoch yedꞌ ix,
ix te cusqꞌue yedꞌ ebꞌ.
34 Ix scꞌanbꞌan dꞌa ebꞌ ix:
—¿Bꞌajtil ix e muquem vin̈?
xchi dꞌa ebꞌ ix.
—Mamin,
coyec bꞌat quilecnabꞌi,
xchi ebꞌ ix.
—Te xajan vin̈ yuuj,
xchi ebꞌ.
37 Ay pax ebꞌ ix laj alani:
—A Jesús tic,
aꞌ bꞌojinacxi sat jun vin̈ max yaltaxon yilani.
¿Tom maj yal ix colvaj dꞌa vin̈aj Lázaro tic,
yic vachꞌ maj chamlaj vin̈?
xchi ebꞌ.
Pitzvinacxi vin̈aj Lázaro
38 Te cusnac Jesús ayic ix cꞌoch bꞌaj mucan vin̈aj Lázaro chiꞌ.
A dꞌa yol jun qꞌuen qꞌueen joybꞌilel yool,
ataꞌ ayoch snivanil vin̈.
Aypaxoch jun qꞌuen qꞌueen smaculoc stiꞌ qꞌueen.
39 —Iqꞌuequel qꞌuen smacul tic,
xchi Jesús.
Axo ix Marta ix alan dꞌay:
—Mamin,
oxjitax cham vin̈,
ayxomlaj sjabꞌ vin̈ ticnaic,
xchi ix.
40 Toxo ix val dꞌayach,
tato tzin acꞌoch dꞌa a cꞌool,
ol il spoder Dios,
xchi dꞌa ix.
41 Ichato chiꞌ ix yicꞌanel qꞌuen smacul chiꞌ ebꞌ bꞌaj ayoch snivanil vin̈ chiꞌ.
Ix qꞌue qꞌuelan Jesús dꞌa satchaan̈,
ix yalani:
—Mamin,
svacꞌ yuj diosal dꞌayach yujto ix abꞌ tas svalaꞌ.
42 Vojtactaxoni,
masanil tiempo tzabꞌ tas svalaꞌ.
Palta yuj ebꞌ anima tic sval juntzan̈ tic dꞌayach,
yic vachꞌ ol yacꞌoch ebꞌ dꞌa scꞌool to a ach a checnac in coti,
xchi Jesús.
43 Ix lajvi yalan juntzan̈ chiꞌ,
te chaan̈ ix yalaꞌ:
—Lázaro,
elan̈coti,
xchi.
44 Axo vin̈ chamnac chiꞌ,
ix elta vin̈,
bꞌacꞌbꞌil yoc vin̈ yedꞌ scꞌabꞌ dꞌa jun cꞌapac,
bꞌacꞌbꞌil pax snan̈al sat vin̈ yedꞌ junxo cꞌapac.
Ix yalanxi Jesús:
—Xuyequel juntzan̈ cꞌapac ayoch tic dꞌa vin̈,*
tzeyactanel vin̈,
xchi.
Saynac modo ebꞌ vin̈ yajal tas tzꞌaj scham Jesús
45 Axo ebꞌ aj Judea ajun yedꞌ ix María chiꞌ,
ayic ix yilan ebꞌ tas ix scꞌulej Jesús chiꞌ,
tzijtum ebꞌ ix acꞌanoch dꞌa scꞌool.
46 Palta ay juntzan̈xo ebꞌ ix bꞌat alan yabꞌ ebꞌ vin̈ fariseo tas ix yutej sbꞌa Jesús chiꞌ.
47 Axo ebꞌ vin̈ fariseo chiꞌ yedꞌ ebꞌ vin̈ sat sacerdote,
ix slajtiej sbꞌa ebꞌ vin̈ yedꞌ ebꞌ vin̈ sat yajal.
Ix laj yalan ebꞌ vin̈ icha tic:
—¿Tas scutejec vin̈ tze naꞌa?
Yujto tzijtum val juntzan̈ satubꞌtac schꞌox vin̈.
48 Tato ton̈ej squiloch vin̈ ticnaic,
masanil ebꞌ quetchon̈abꞌ ol acꞌanoch vin̈ dꞌa scꞌool.
Axo ebꞌ vin̈ yajal dꞌa Roma ol ul smacꞌpoj jun stemplo Dios tic ebꞌ vin̈,
ol ul on̈ satanel ebꞌ vin̈ co masanil,
xchi ebꞌ vin̈.
49 Palta ay jun vin̈ scuchan Caifás,
aton vin̈ sat sacerdote dꞌa jun abꞌil chiꞌ.
A vin̈ ix alan dꞌa ebꞌ vin̈:
—A ex tic,
malaj jabꞌoc e pensar.
50 Max nachajel jabꞌoc eyuuj,
más vachꞌ dꞌayon̈ tato scham jun vin̈ chiꞌ sqꞌuexuloc ebꞌ anima smasanil.
Tato icha chiꞌ,
man̈ ol on̈ satel co masanil,
xchi vin̈.
51 A vin̈aj Caifás chiꞌ,
man̈oc dꞌa yol yic vin̈ ix yal jun chiꞌ,
palta yujto sat sacerdote yaj vin̈ dꞌa jun abꞌil chiꞌ,
yuj chiꞌ a Dios ix acꞌan yal vin̈ to ol cham Jesús sqꞌuexuloc ebꞌ israel smasanil.
52 A schamel chiꞌ,
man̈ yujocn̈ej ebꞌ israel chiꞌ,
palta yuj pax smolbꞌanxi ebꞌ yuninal Dios sacleminac yajcanbꞌati,
yic junxon̈ej tzꞌaj ebꞌ.
53 Yuj chiꞌ,
atax dꞌa jun cꞌu chiꞌ ix och ijan ebꞌ vin̈ snaan tas ol yutoc smilancham Jesús.
54 Yuj chiꞌ maxtzac ecꞌ Jesús dꞌa scal ebꞌ aj Judea chiꞌ.
Ix el dꞌa jun lugar chiꞌ.
Ix bꞌat dꞌa jun chon̈abꞌ scuchan Efraín ay dꞌa stiꞌ jun lum taquin̈ luum.
Ataꞌ ix can yedꞌ ebꞌ scꞌaybꞌum.
55 Ayic van sja stiempoal jun qꞌuin̈ tzꞌochi yic snaancot ebꞌ israel tas aj yelnaccot ebꞌ smam yicham ebꞌ dꞌa Egipto,
tzijtum val ebꞌ najat ix laj coti,
ix laj cꞌoch ebꞌ dꞌa Jerusalén.
Ayic manto yamchajoch jun qꞌuin̈ chiꞌ,
ix cꞌoch ebꞌ taꞌ yic sbꞌo sbꞌa ebꞌ icha yalan ley.
56 Ayic ayecꞌ ebꞌ taꞌ,
tzijtum val ebꞌ ix ecꞌ sayanecꞌ Jesús,
axo dꞌa yamaqꞌuil templo ix laj yal ebꞌ:
—¿Tas tze naꞌa?
¿Ol am ja Jesús dꞌa qꞌuin̈ tic,
mato maay?
xchi ebꞌ.
57 Axo ebꞌ vin̈ fariseo yedꞌ ebꞌ vin̈ sat sacerdote ix acꞌanelta jun abꞌix tzꞌalan icha tic:
Tato ay bꞌaj tzeyil Jesús,
tzul eyal dꞌayon̈,
xchi ebꞌ vin̈.
Icha chiꞌ ix yutej ebꞌ vin̈ yalani,
yujto snibꞌej ebꞌ vin̈ syacꞌoch Jesús dꞌa preso.