Yabꞌixal jun teꞌ macteꞌ calnel
10
Qꞌuinaloc ay junoc teꞌ macteꞌ calnel ticnaic,
ta ay junoc vin̈ tzꞌoch dꞌa yol teꞌ,
palta tato man̈oc dꞌa stiꞌ teꞌ tzꞌoch vin̈,
val yel elcꞌum vin̈ syal chiꞌ.
2 Axo vin̈ tzꞌoch dꞌa stiꞌ teꞌ smacteꞌ nocꞌ calnel chiꞌ,
aton vin̈ chiꞌ stan̈vumal nocꞌ.
Jesús el buen pastor (Juan 10.1-21)
3 Axo vin̈ svaymitan nocꞌ calnel chiꞌ,
a vin̈ sjacan teꞌ macteꞌ chiꞌ dꞌa vin̈ stan̈vumal nocꞌ chiꞌ.
Axo nocꞌ calnel chiꞌ,
cꞌaynac nocꞌ yedꞌ vin̈ stan̈vumal chiꞌ.
Yojtac sbꞌi junjun nocꞌ vin̈.
A vin̈ sjacanelta nocꞌ.*
4 Slajvi sjacanelta nocꞌ scalnel vin̈ chiꞌ,
sbꞌabꞌlaj vin̈ yuj nocꞌ,
tzꞌoch tzacꞌan nocꞌ yuj vin̈,
yujto cꞌaynac nocꞌ yedꞌ vin̈.
5 Palta qꞌuinaloc ay junoc vin̈ man̈ cꞌaynacoc nocꞌ yedꞌoc,
ton̈ej tzꞌel lemnaj nocꞌ dꞌa vin̈,
yujto man̈ ojtacabꞌiloc sjaj vin̈ yuj nocꞌ,
xchi Jesús dꞌa ebꞌ vin̈ fariseo chiꞌ.
6 A jun chꞌoxnabꞌil ix yal Jesús chiꞌ,
maj nachajel-laj yuj ebꞌ vin̈ tas syalelcꞌochi.
Lajan Jesús yedꞌ junoc tan̈vum calnel te vachꞌ
7 Ix yalanxi Jesús dꞌa ebꞌ vin̈:
—Val yel sval dꞌayex,
icha yaj stiꞌ teꞌ smacteꞌ nocꞌ calnel,
icha chiꞌ vaji.
8 Ay ebꞌ ix bꞌabꞌlaj ja dꞌayex ayic manto in javoc,
nivanoc yalnacoch sbꞌa ebꞌ colvajumal.
Icha junoc elcꞌum tzꞌoch dꞌa teꞌ macteꞌ,
icha chiꞌ yaj ebꞌ smasanil.
Palta axo ebꞌ yic Dios,
max yacꞌoch spensar ebꞌ dꞌa ebꞌ.
9 A in tic,
lajan in yedꞌ stiꞌ teꞌ macteꞌ chiꞌ.
A ebꞌ tzꞌoch dꞌayin,
ol colchaj ebꞌ.
Icha nocꞌ calnel tzꞌoch dꞌa yol smacteꞌ,
tzꞌelxita nocꞌ,
sbꞌat va nocꞌ,
icha chiꞌ yaj ebꞌ.
10 Ay ebꞌ icha junoc elcꞌum sjavi,
syelcꞌal milan nocꞌ calnel chiꞌ ebꞌ.
Palta a in tic,
ix in ja vacꞌ sqꞌuinal ebꞌ dꞌa juneln̈ej,
yic vachꞌ te nivan svachꞌcꞌolal Dios ol scha ebꞌ.
11 A in tic,
lajan in yedꞌ junoc tan̈vum calnel te vachꞌ.
A junoc tan̈vum calnel vachꞌ chiꞌ,
sbꞌec sbꞌa scham yuj nocꞌ scalnel chiꞌ.
12 Ay bꞌaj ton̈ej stupji junoc vin̈ stan̈van nocꞌ calnel,
man̈ toxonoc tan̈vum calnel vin̈,
man̈ yicoc nocꞌ vin̈.
Tato scꞌoch nocꞌ oques dꞌa nocꞌ,
syactejcan nocꞌ calnel chiꞌ vin̈ schꞌocoj,
sbꞌat vin̈ elelal,
yujto man̈ yicoc nocꞌ vin̈.
Axo nocꞌ oques chiꞌ sja jucnajoc,
schianbꞌat nocꞌ calnel chiꞌ,
saclemcanbꞌat nocꞌ.
13 Tzꞌel lemnaj vin̈,
yujto majan yaj vin̈,
yujto man̈ yicoc nocꞌ vin̈,
malaj tzꞌoch nocꞌ dꞌa vin̈.
14-15 A in tic,
lajan in yedꞌ junoc tan̈vum calnel te vachꞌ.
A ebꞌ vicoꞌ,
ichato in calnel yaj ebꞌ.
A in Mam yojtac in.
An̈ejtonaꞌ in,
vojtac pax in Mam chiꞌ.
Icha vojtac in bꞌa yedꞌ in Mam chiꞌ,
icha pax chiꞌ vojtac in bꞌa yedꞌ ebꞌ vic chiꞌ.
Bꞌecan in vacꞌan cham in bꞌa yuj ebꞌ.
16 Ay pax juntzan̈xo ebꞌ ol in acꞌanoch dꞌa scꞌool,
palta man̈ quetisraeloclaj ebꞌ.
Yovalil ol in molbꞌejcot ebꞌ.
A ebꞌ chiꞌ,
ol in scꞌanabꞌajej ebꞌ.
Junn̈ej ol aj ebꞌ smasanil,
a in ol in tan̈vej ebꞌ.
17 Xajan in yuj in Mam,
yujto bꞌecan in cꞌool in chami yic ol in pitzvocxi.
18 A in tic,
bꞌecan in cꞌol in chami,
yujto icha chiꞌ in gana.
Malaj mach tzꞌicꞌanecꞌ in qꞌuinal tic.
A in svalaꞌ to tzin chami,
an̈ejtonaꞌ in svalaꞌ to tzin pitzvixi,
yujto icha chiꞌ yaj yalancan jun schecnabꞌil in Mam dꞌayin,
xchi Jesús dꞌa ebꞌ vin̈.
19 Ayic ix yalan juntzan̈ tic,
ix laj spojan sbꞌa ebꞌ aj Judea chiꞌ junelxo yuj tas ix yal chiꞌ.
20 Ay nan̈al ebꞌ ix alani:
—¿Tas yuj tzeyacꞌoch e chiquin dꞌa tas syal jun vin̈ tic?
Ina ayoch jun enemigo dꞌa vin̈,
yuj chiꞌ aycot dꞌa sjolom vin̈,
xchi ebꞌ.
21 Palta ay nan̈alxo ebꞌ ix alani:
—Tato ayoch junoc enemigo dꞌa vin̈,
¿tom syal yalan vin̈ icha chiꞌ?
A junoc enemigo,
¿tom syal sbꞌoan sat junoc mach max yaltaxon yilani?
xchi ebꞌ.
Ebꞌ aj Judea ix paticanel Jesús
22 A dꞌa jun tiempoal ix uji jun tic,
aton dꞌa stiempoal siic,
stiempoal pax yoch sqꞌuin̈al stemplo Dios dꞌa Jerusalén.
Jesús acusado de blasfemia (Juan 10.22-42)
23 Axo Jesús van sbꞌeyecꞌ dꞌa jun stentail stiꞌ yamaqꞌuil templo chiꞌ scuch yic Salomón.
24 Axo ebꞌ aj Judea ayecꞌ taꞌ,
ix och oyan ebꞌ dꞌa spatic Jesús.
Ix yalan ebꞌ:
—¿Bꞌaqꞌuin̈to ol al sjichanil dꞌayon̈?
Tato yel Cristo ach,
al dꞌayon̈ ticnaic,
xchi ebꞌ dꞌay.
25 Yuj chiꞌ ix tacꞌvi dꞌa ebꞌ:
—Ina toxo ix val dꞌayex,
palta max in eyacꞌoch dꞌa e cꞌool.
A juntzan̈ satubꞌtac tzin chꞌoxoꞌ,
yujn̈ej spoder in Mam tzin chꞌoxoꞌ.
Yujn̈ej juntzan̈ chiꞌ scheclaji mach in.
26 Palta a ex tic,
max in eyacꞌoch dꞌa e cꞌool,
yujto man̈ ex vicoc icha valnac dꞌayex junel.
27 A ebꞌ vicoꞌ,
syacꞌoch schiquin ebꞌ dꞌayin.
A inxo tic,
vojtac ebꞌ.
Icha nocꞌ calnel tzꞌoch tzacꞌan yuj stan̈vumal,
icha chiꞌ tzꞌajoch tzacꞌan ebꞌ vuuj.
28 A in svacꞌ sqꞌuinal ebꞌ dꞌa juneln̈ej.
Yuj chiꞌ,
man̈xa bꞌaqꞌuin̈ ol satel ebꞌ.
Malaj mach syal yicꞌanel ebꞌ dꞌa yol in cꞌabꞌ.
29 A in Mam,
te nivan yelcꞌoch dꞌa yichan̈ smasanil.
A ix acꞌan ebꞌ dꞌayin.
Malaj mach syal yicꞌanel ebꞌ dꞌa yol scꞌabꞌ in Mam chiꞌ.
30 A in tic,
lajan in yedꞌ co Mam Dios,
yujto junn̈ej vaj yedꞌoc,
xchi Jesús dꞌa ebꞌ.
31 Ix laj sicꞌanchaan̈ qꞌuen qꞌueen ebꞌ yic sjulancham ebꞌ yalani.
32 Palta ix yalanxi Jesús dꞌa ebꞌ:
—Tzijtum tas vachꞌ ix in cꞌulej dꞌa e cal yuj spoder in Mam.
¿Tas yuj junoc ijan tzin e julchamoc?
xchi dꞌa ebꞌ.
33 —Man̈ yujoc junoc vachꞌ ix a cꞌulej tzach co julchamoc,
palta yujn̈ej to tzach bꞌuchvaj dꞌa Dios.
A ach tic anima achn̈ej,
palta ina tzaloch a bꞌa Diosal,
xchi ebꞌ.
34 Yuj chiꞌ ix yalanxi dꞌa ebꞌ:
—A dꞌa chꞌan̈ ley aycan dꞌayon̈ tzꞌibꞌabꞌilcani to a Dios alannac:
Junjun ex,
dios ex,*
xchi dꞌa ley chiꞌ.
35 Cojtac to a tas tzꞌibꞌabꞌilcan dꞌa Slolonel Dios chiꞌ,
max yal sco maqꞌueqꞌui.
A ebꞌ abꞌannac slolonel chiꞌ,
alchajnac ebꞌ diosal.
36 Ocxom in tic,
a Dios sicꞌjinac in eli,
ix in schecancot dꞌa yolyibꞌan̈qꞌuinal tic.
Yuj chiꞌ,
¿tas yuj tzeyalaꞌ to tzin bꞌuchvaj dꞌa Dios,
ayic ix valani to Yuninal in Dios?
37 Tato max in cꞌulej icha tas scꞌulej in Mam chiꞌ,
man̈ in eyacꞌoch dꞌa e cꞌool.
38 Palta a in tic,
yel van in cꞌulan icha scꞌulej in Mam chiꞌ.
Yuj chiꞌ,
vachꞌchom max eyacꞌoch dꞌa e cꞌool tas svalaꞌ,
palta aqꞌuec in och dꞌa e cꞌool yuj juntzan̈ tzin cꞌulej tic,
yic ol nachajel eyuuj to ayoch co Mam Dios dꞌayin,
ayin pax och dꞌay,
xchi Jesús chiꞌ dꞌa ebꞌ.
39 Yuj chiꞌ ix yacꞌlej ebꞌ syaman junelxo,
palta ix scol sbꞌa dꞌa ebꞌ.