—Ach co cꞌaybꞌumal,

¿tas am yuj max yal yilan jun vin̈ tic yictax yaljubꞌal?

¿tom yuj smul smam snun vin̈,

mato yuj smul vin̈?

xchi ebꞌ dꞌa Jesús.

3 Ix yalan Jesús chiꞌ dꞌa ebꞌ:

—A jun vin̈ tic,

man̈ yujoc smul smam snun vin̈,

man̈ yujoc pax smul vin̈ icha chiꞌ yajcani.

Yujto snibꞌej Dios schꞌox tas satubꞌtac yuj vin̈,

yuj chiꞌ icha tic yaj vin̈.

4 Yovalil tzin bꞌo smunlajel Dios,

aton checjinac in coti,

yacbꞌan ayto cꞌu,

yujto ayic toxo ix bꞌat cꞌu,

man̈xalaj mach syal smunlaji.

5 Ayic ayin to ecꞌ dꞌa yolyibꞌan̈qꞌuinal tic,

icha saquilqꞌuinal vaj dꞌa ebꞌ anima,

xchi Jesús chiꞌ.

6 Ix lajvi yalan juntzan̈ chiꞌ,

ix tzubꞌanem dꞌa sat luum.

Ix och jabꞌ lum socꞌomal yuj stzubꞌ chiꞌ.

Ix sucanoch lum dꞌa yol sat vin̈ max yal yilan chiꞌ.

7 Ix lajvi chiꞌ,

ix yalan dꞌa vin̈:

—Ixic,

bꞌat bꞌiquel dꞌa jun bꞌaj molbꞌabꞌil a aꞌ scuch Siloé,

xchi dꞌa vin̈.

(Siloé syalelcꞌochi,

Acꞌbꞌilcoti.)

Ix bꞌat sbꞌicanel vin̈,

axo ix meltzaj vin̈,

tzaxo yal yilan vin̈.

8 Axo ix yilan ebꞌ ay dꞌa spatic schiquin spat vin̈ yedꞌ juntzan̈xo ebꞌ tzꞌilantaxon scꞌanan stumin vin̈,

ix laj yalan ebꞌ:

—¿Tom man̈oc jun vin̈ tic tzꞌem cꞌojan cꞌanoj tumin?

xchi ebꞌ.

9 —A vin̈ jun,

xchi juntzan̈ ebꞌ.

Palta ay juntzan̈xo ebꞌ ix alani:

—Maay.

A jun vin̈ tic,

ton̈ej lajan yilji vin̈ yedꞌ jun vin̈ max yal yilan chiꞌ,

xchi ebꞌ.

Palta axo vin̈ ix alani:

—A in toni,

xchi vin̈.

10 —¿Tas ix aj sbꞌo ilan jun?

xchi ebꞌ dꞌa vin̈.

11 —A jun vin̈ scuchan Jesús ix bꞌoan jabꞌ lum socꞌom,

ix sucanoch vin̈ dꞌa yol in sat tic.

Ix lajvi chiꞌ ix yalan vin̈ dꞌayin:

Ixic,

bꞌiquel a sat dꞌa a aꞌ scuch Siloé,

xchi vin̈ dꞌayin.

Ix bꞌat in bꞌicaneli.

Icha chiꞌ ix aj sbꞌo vilani,

xchi vin̈.

12 —¿Bꞌajtil ayecꞌ vin̈ ticnaic?

xchi ebꞌ vin̈.

—Ma chequel,

xchi vin̈.

13 Ix lajvi chiꞌ,

ix icꞌjibꞌat vin̈ dꞌa yichan̈ ebꞌ vin̈ fariseo.

14 A dꞌa scꞌual icꞌoj ip,

ataꞌ ix bꞌo yilan vin̈ yuj Jesús yedꞌ lum socꞌom ix sbꞌo chiꞌ.

15 Yuj chiꞌ ix scꞌanbꞌan ebꞌ vin̈ fariseo chiꞌ dꞌa vin̈:

—¿Tas val ix aj sbꞌo ilani?

xchi ebꞌ vin̈.

—A Jesús ix bꞌoani.

Ix sucoch jabꞌ lum socꞌom dꞌa yol in sat tic.

Ix lajvi chiꞌ,

ix in schecanbꞌat in bꞌiqueli.

Yuj chiꞌ vachꞌxo vilan ticnaic,

xchi vin̈.

16 Yuj chiꞌ ay jayvan̈ ebꞌ vin̈ ix alan dꞌa vin̈:

—A jun vin̈ chiꞌ,

man̈ yicoclaj Dios yaj vin̈,

yujto max scꞌanabꞌajej scꞌual icꞌoj ip vin̈,

xchi ebꞌ vin̈.

Palta ix laj yalan juntzan̈xo ebꞌ vin̈:

—Tato chuc vin̈,

¿tom syal schꞌoxan juntzan̈ satubꞌtac vin̈?

xchi ebꞌ vin̈.

Yuj chiꞌ chapoj ix aj ebꞌ vin̈.

17 Yuj chiꞌ ix scꞌanbꞌan ebꞌ vin̈ dꞌa jun vin̈ ix bꞌo yilan chiꞌ:

—A achxo tic,

¿tas tzutej a naan yuj vin̈ ix bꞌoan a sat tic?

xchi ebꞌ dꞌa vin̈.

—A in tic tzin naꞌa to schecabꞌ Dios yaj vin̈,

xchi vin̈.

18 Palta axo ebꞌ vin̈ aj Judea chiꞌ,

max schalaj yabꞌ ebꞌ vin̈,

tato toto ix bꞌo yilan vin̈.

A snaan ebꞌ vin̈ to toxonton vachꞌ yilan vin̈.

Yuj chiꞌ ix avtaj smam snun vin̈.

19 Ix cꞌanbꞌaj dꞌa ebꞌ:

—¿Eyuneꞌ am jun vin̈ tic?

Palta to tzeyalaꞌ to max yaltaxon yilan vin̈.

Tato icha chiꞌ,

¿tas val ix aj sbꞌo yilan vin̈?

xchi ebꞌ dꞌa smam snun vin̈ chiꞌ.

20 —A jun vin̈ tic,

quic vin̈.

Toxonton max yal yilan vin̈.

21 Palta man̈ cojtacoc,

tas am ix aj sbꞌo yilan vin̈.

Man̈ cojtacoc,

mach am ix bꞌoan sat vin̈ tic.

Ina ayxo sqꞌuinal vin̈.

¿Tas yuj man̈oc dꞌa vin̈ tze cꞌanbꞌej eyabꞌi?

A vin̈ syal yalan dꞌayex,

tas ix aj sbꞌo sat vin̈ chiꞌ,

xchi ebꞌ.

22 Icha chiꞌ ix yutej ebꞌ yalani,

yujto xiv ebꞌ yalan yuj ebꞌ vin̈ yajal dꞌa scal ebꞌ aj Judea chiꞌ.

Yujto toxo ix yal ebꞌ vin̈ yajal chiꞌ:

Tato ay ebꞌ ol alanoc to a Jesús aton Cristo,

ol co pechel ebꞌ dꞌa yoltac spatil culto,

xchi ebꞌ vin̈.

23 Yuj chiꞌ,

an̈ej jabꞌ tic ix yal smam snun vin̈:

Ina ayxo sqꞌuinal vin̈.

¿Tas yuj man̈oc dꞌa vin̈ tze cꞌanbꞌej eyabꞌi?

xchin̈ej ebꞌ.

24 Ix lajvi chiꞌ,

ix avtajxicot vin̈,

ix yalan ebꞌ dꞌa vin̈:

—Val yel tzach lolon dꞌa yichan̈ Dios.

Yujto cojtac a on̈ tic to te chuc jun vin̈ ix bꞌoan a sat tzal chiꞌ,

xchi ebꞌ vin̈.

25 —A in tic,

man̈ vojtacoc tato chuc vin̈,

mato maay.

Max yal-laj valani.

An̈ej tas vojtac:

A dꞌa yalan̈taxo,

max yal vilani,

palta a ticnaic tzaxo vilaꞌ,

xchi vin̈.

26 —Palta ¿tas val ix ach yutej vin̈?

¿Chajvaltil ix yutej vin̈ sbꞌoan a sat tic?

xchi ebꞌ vin̈ dꞌa vin̈.

27 —Toxo ix valaꞌ,

palta max e cha eyabꞌ dꞌayin.

¿Tas yuj e gana tze cꞌanbꞌej eyabꞌ dꞌayin junelxo?

¿Tom e gana tzex och pax scꞌaybꞌumoc vin̈?

xchi vin̈ dꞌa ebꞌ vin̈ aj Judea chiꞌ.

28 Ayic ix yabꞌan juntzan̈ chiꞌ ebꞌ vin̈,

ix te bꞌuchji vin̈ yuj ebꞌ vin̈.

Ix yalan ebꞌ vin̈:

—A ach tic,

scꞌaybꞌum ach ton jun vin̈ chiꞌ.

Xal on̈ tic,

scꞌaybꞌum on̈ Moisés.

29 Cojtac to yalnaccan slolonel Dios dꞌa vin̈aj Moisés chiꞌ.

Palta a jun vin̈ chiꞌ,

man̈ cojtacoc mach acꞌjinac yopisio vin̈,

xchi ebꞌ vin̈.

30 —E...

¿jantac am bꞌian?

A ex tic tzeyalaꞌ to man̈ eyojtacoc mach acꞌjinac yopisio vin̈,

palta ina ix bꞌo vilan yuj vin̈.

31 Cojtac to a Dios max abꞌan slesal ebꞌ chuc scꞌulej.

An̈ej ebꞌ syal sbꞌa dꞌay,

ebꞌ scꞌanabꞌajan tas syalaꞌ,

an̈ej yic ebꞌ syabꞌi.

32 Manta bꞌaj scabꞌ sbꞌo sat junoc max yaltaxon yilani.

33 Qꞌuinaloc man̈oc Dios ix checancot Jesús chiꞌ,

tecan malaj jabꞌoc tas syal yuuj,

xchi vin̈.

34 —A ach tic,

te chuc ach yictax ach alji.

¿A achxo ijan tzon̈ a cꞌaybꞌej?

xchi ebꞌ vin̈.

Yuj chiꞌ ix spechelta vin̈ ebꞌ vin̈ dꞌa spatil culto chiꞌ.

35 Axo ix yabꞌan Jesús to ix pechjiel vin̈ ix bꞌoxi sat chiꞌ,

yuj chiꞌ ix sayjiecꞌ vin̈ yuuj.

Axo yic ix ilchaj vin̈ yuuj,

ix yalan dꞌa vin̈:

—¿Tzam acꞌoch jun Acꞌbꞌilcot yuj Dios yoch Animail dꞌa a cꞌool?

xchi dꞌa vin̈.

36 —Mamin,

al dꞌayin mach jun chiꞌ,

yic ol vacꞌoch dꞌa in cꞌool,

xchi vin̈.

37 —Toxo ix ilaꞌ.

A in ton van valan dꞌayach,

xchi dꞌa vin̈.

38 Ix lajvi yalan jun chiꞌ Jesús,

ix em cumnaj vin̈ dꞌa yichan̈.

Ix yalan vin̈ dꞌay:

—Mamin,

tzach vacꞌoch dꞌa in cꞌool,

xchi vin̈.

39 Ix yalanxi Jesús dꞌa vin̈:

—Yuj sbꞌo ebꞌ anima vuuj in ja dꞌa yolyibꞌan̈qꞌuinal tic,

yujto ay ebꞌ max yal-laj yilan yic Dios ticnaic,

palta vuuj ichato ol jacvoc sat ebꞌ.

Ay pax nan̈alxo ebꞌ ichato syal yilan yic Dios snaani,

palta a ebꞌ chiꞌ,

vuuj ichato ol juvocbꞌat sat ebꞌ,

xchi Jesús.

40 Ay jayvan̈ ebꞌ vin̈ fariseo ayecꞌ taꞌ.

Ayic ix yabꞌan jun chiꞌ ebꞌ vin̈,

ix yalan ebꞌ vin̈ dꞌa Jesús:

—¿Tom tza na to max uji quilan yic Dios?

xchi ebꞌ vin̈.

41 —Octom snachajel eyuuj to max yal eyilan yic Dios chiꞌ.

Tato icha chiꞌ,

max am can e mul dꞌa eyibꞌan̈.

Palta ina tzeyalaꞌ to syal eyilan yic Dios chiꞌ,

yuj chiꞌ ol cann̈ej e mul chiꞌ dꞌa eyibꞌan̈.