A yabꞌixal jun ix ajmul ix
8
Axo Jesús ix bꞌat dꞌa tzalan Olivo.
2 Vanxo sacbꞌi,
ix cꞌochxi dꞌa yol yamaqꞌuil templo chiꞌ.
Ayic ix cꞌoch taꞌ,
masanil ebꞌ anima ix cꞌoch yedꞌoc.
Ix em cꞌojan,
ix scꞌaybꞌan ebꞌ.
Jesús perdona a mujer condenada (Juan 8.2-11)
3 Axo ebꞌ vin̈ cꞌaybꞌum dꞌa ley Moisés yedꞌ ebꞌ vin̈ fariseo ix icꞌancot jun ix ix dꞌa Jesús,
ix yamchaj ix yuj ebꞌ vin̈ ayic van smulan ix.
Ix acꞌjioch ix yuj ebꞌ vin̈ dꞌa yichan̈ Jesús yedꞌ ebꞌ ayecꞌ yedꞌoc.
4 Ix yalan ebꞌ vin̈ dꞌay:
—Ach co cꞌaybꞌumal,
a jun ix ix tic,
van smulan ix ayic ix yamchaj ix cuuj.
5 A ley Moisés tzꞌalani,
tato ay junoc ix ix scꞌulan icha tic,
yovalil sjulqꞌuenajcham ix.
Xal ach,
¿tas xa chi?
xchi ebꞌ vin̈ dꞌay.
6 Palta ton̈ej stzꞌac scꞌanbꞌej ebꞌ vin̈,
yic syil ebꞌ vin̈ tas syal Jesús chiꞌ,
yujto sgana ebꞌ vin̈ yacꞌanoch dꞌa yibꞌan̈.
Palta ton̈ej ix em n̈ojan,
van stzꞌibꞌan yedꞌ yiximal scꞌabꞌ dꞌa sat luum.
7 Ix scꞌanbꞌanxi ebꞌ vin̈ dꞌay:
—¿Tas xa chi yuj jun tic jun?
xchi ebꞌ vin̈ dꞌay.
Yuj chiꞌ ix qꞌue qꞌuelan,
ix yalan dꞌa ebꞌ vin̈:
—Tato ay junoc ex malaj jabꞌoc e mul,
bꞌabꞌlaj julejecoch qꞌuen dꞌa ix,
xchi dꞌa ebꞌ vin̈.
8 Ix lajvi yalan juntzan̈ chiꞌ,
ix emxi n̈ojan,
ix stzꞌibꞌanxiem juntzan̈xo tas dꞌa sat luum chiꞌ.
9 Ayic ix yabꞌan jun tic ebꞌ vin̈,
ix laj snaan sbꞌa junjun ebꞌ vin̈,
ayn̈ej smul ebꞌ vin̈.
Yuj chiꞌ junjunal ix laj bꞌat ebꞌ vin̈.
A ebꞌ vin̈ ichamtac vinac ix bꞌabꞌlaj bꞌati,
axo ebꞌ vin̈ quelemtac,
tzacꞌanto ix laj bꞌat ebꞌ vin̈.
Axon̈ej Jesús ix can schꞌocoj bꞌaj lin̈anecꞌ jun ix ix chiꞌ.
10 Ix lajvi chiꞌ,
ix qꞌue qꞌuelan Jesús chiꞌ,
ix yilani schꞌocojxon̈ej ix ayeqꞌui.
Yuj chiꞌ ix yalan dꞌa ix:
—Ach ix,
¿bꞌaj ay ebꞌ vin̈ van yacꞌanoch chiꞌ dꞌa ibꞌan̈?
¿Tom malaj junoc ebꞌ vin̈ tzꞌacꞌanoch dꞌa ibꞌan̈?
xchi dꞌa ix.
11 —Maay Mamin,
man̈xalaj ebꞌ vin̈,
xchi ix.
—An̈ejtonaꞌ in,
malaj tas svacꞌoch dꞌa ibꞌan̈.
Yuj chiꞌ ixic.
Man̈xo ach mulan junelxo,
xchi Jesús chiꞌ dꞌa ix.]
A Jesús tzꞌacꞌan saquilqꞌuinal dꞌa ebꞌ anima
12 Ix yalanxi Jesús dꞌa ebꞌ anima:
—A in tic,
icha saquilqꞌuinal vaj dꞌa ebꞌ anima dꞌa yolyibꞌan̈qꞌuinal tic.
A mach tzꞌoch tzacꞌan vuuj,
ol vacꞌ saquilqꞌuinal dꞌay.
Yuj jun saquilqꞌuinal chiꞌ,
ol scha sqꞌuinal dꞌa juneln̈ej.
Man̈xo ol bꞌeyecꞌ dꞌa qꞌuicꞌalqꞌuinal,
xchi Jesús.
Jesús es la luz del mundo (Juan 8.12-30)
13 Axo ebꞌ vin̈ fariseo ix alan dꞌay:
—A ach tic,
yoln̈ej ic tzalaꞌ to ay opisio.
Yuj chiꞌ malaj yelcꞌoch jabꞌ ic tzal chiꞌ,
xchi ebꞌ vin̈ dꞌay.
14 Ix yalanxi dꞌa ebꞌ vin̈:
—Vachꞌchom munil svalaꞌ to ay vopisio,
palta toton yel svalaꞌ,
yujto a in tic vojtac bꞌaj cotnac in.
An̈ejtonaꞌ,
vojtac bꞌajtil ol in cꞌochxoc.
A exxo tic,
man̈ eyojtacoc bꞌaj cotnac in,
an̈ejtonaꞌ man̈ eyojtacoc bꞌaj ol in cꞌochpaxoc.
15 A ex tic,
ton̈ej tze comon chꞌolbꞌitej yaj junoc anima dꞌa elan̈chamel.
Xal in,
malaj mach tzin chꞌolbꞌitej yaji.
16 Palta qꞌuinaloc tato a in tzin chꞌolbꞌitej yaj junoc anima,
tojoln̈ej svutej in chꞌolbꞌitan yaji.
Yujto man̈oc inn̈ej tzin chꞌolbꞌitej yaji,
yujto a in Mam checjinac in coti,
a schꞌolbꞌitan pax vedꞌoc.
17 A jun ley aycan dꞌayon̈,
a tzꞌalani:
Tato ay chavan̈oc testigo lajan syutej yalani,
yovalil sco cha cabꞌ tas syal ebꞌ.
18 Palta ina ay chavan̈ testigo tzꞌalan vuuj.
A in ton tic testigo in.
Testigo pax in Mam vedꞌoc,
aton checjinac in coti,
xchi dꞌa ebꞌ vin̈.
19 —Palta ¿bꞌajtil ay a Mam chiꞌ?
xchi ebꞌ vin̈ dꞌay.
Yuj chiꞌ ix yalanpax dꞌa ebꞌ vin̈:
—A ex tic,
man̈ eyojtacoc mach in.
Man̈ eyojtacoc pax in Mam chiꞌ.
Octom tzin eyojtaquejeli mach in,
yic ol eyojtaquej pax in Mam chiꞌ,
xchi dꞌa ebꞌ vin̈.
20 A dꞌa yol yamaqꞌuil templo dꞌa slacꞌanil jun chalabꞌ ofrenda,
ataꞌ ix yal juntzan̈ chiꞌ Jesús.
Ataꞌ ix cꞌaybꞌaj ebꞌ anima yuuj.
Malaj junoc mach ix yamani,
yujto manto cꞌoch stiempoal schami.
21 Ix yalan Jesús dꞌa ebꞌ vin̈:
—A in tic ol in bꞌatoc.
A exxo tic ol in e sayeqꞌui,
palta a dꞌa scal e mul ol ex chamoc.
Man̈ ol yal e comon cꞌoch bꞌaj ol in cꞌoch chiꞌ,
xchi dꞌa ebꞌ vin̈.
22 Yuj chiꞌ,
ix laj yal ebꞌ vin̈ aj Judea chiꞌ:
—Tecan ol smilcham sbꞌa vin̈,
yuj chiꞌ ix yal vin̈ to max yal co cꞌoch bꞌaj ol cꞌoch vin̈ chiꞌ,
xchi ebꞌ vin̈.
23 Ix yalanxi dꞌa ebꞌ vin̈:
—A ex tic,
aj sat luum ex,
yujto yic ex yolyibꞌan̈qꞌuinal tic.
Xal in tic,
man̈ in yicoc yolyibꞌan̈qꞌuinal tic,
yujto aj satchaan̈ in.
24 Yuj chiꞌ sval dꞌayex,
dꞌa scal e mul ol ex chamoc.
Tato max eyacꞌoch dꞌa e cꞌool to A In Ton Tic,*
a dꞌa scal e mul ol ex chamoc,
xchi.
25 —¿Mach ach jun?
xchi ebꞌ vin̈ dꞌay.
Palta ina valnacxo dꞌayex dꞌa yalan̈taxo,
mach in.
26 Tzijtumto tas ol val eyuuj yedꞌ ex in chꞌolbꞌitani.
A jun checjinac in coti,
te yel syalaꞌ.
A tas yalnaccan dꞌayin,
an̈ej chiꞌ sval dꞌayex a ex ayex dꞌa yolyibꞌan̈qꞌuinal tic,
xchi dꞌa ebꞌ vin̈.
27 Palta max nachajel yuj ebꞌ vin̈ tato a co Mam Dios van yalani.
28 Yuj chiꞌ ix yalanxi dꞌa ebꞌ vin̈:
—Ato yic ol in e dꞌun̈bꞌanqꞌue a in Acꞌbꞌil in cot yuj Dios voch animail tic,
ato taꞌ ol nachajel eyuuj to A In Toni.
Ataꞌ ol nachajel eyuuj to malaj tas munil tzin cꞌulej in chꞌocoj.
An̈ej juntzan̈ cꞌaybꞌubꞌal yalnac in Mam dꞌayin,
an̈ej svalaꞌ.
29 A Dios in checancoti,
ay paxoch vedꞌoc.
Max in yactejcan in chꞌocoj,
yujto an̈ej tas snibꞌej tzin cꞌulej dꞌa masanil tiempo,
xchi dꞌa ebꞌ vin̈.
30 Ayic ix yalan juntzan̈ chiꞌ Jesús,
tzijtum ebꞌ ix acꞌanoch scꞌool dꞌay.
Ol ex el dꞌa libre yuj jun lolonel yel
31 Axo ix yalan Jesús dꞌa ebꞌ israel ix acꞌanoch dꞌa scꞌool:
—Tato masanil tiempo tzeyacꞌoch e pensar dꞌa in lolonel,
yelton val in cꞌaybꞌum ex.
Jesús se enfrenta a falsos discípulos (Juan 8.31-59)
32 Tato icha chiꞌ,
ol eyojtaquejel slolonel Dios te yel.
Yuj jun lolonel yel chiꞌ,
ol ex el dꞌa libre,
xchi Jesús dꞌa ebꞌ.
33 Palta ix yalanxi ebꞌ dꞌay:
—A on̈ tic yin̈til on̈ pax Abraham edꞌoc.
Malaj juneloc ix on̈ och schecabꞌoc junoc anima.
¿Tas yuj tzalaꞌ to ol on̈ el dꞌa libre?
xchi ebꞌ.
34 Val yel sval dꞌayex,
a mach an̈ejaꞌ scꞌulan chucal,
checabꞌ yaj dꞌa chucal chiꞌ.
35 Qꞌuinaloc ay junoc schecabꞌ junoc anima ticnaic,
max yal scajnaj yedꞌ jun anima chiꞌ dꞌa juneln̈ej.
Palta a junoc yuninal jun anima chiꞌ,
val yel yuninal yaj dꞌa juneln̈ej.
36 Yuj chiꞌ tato a in tzex vaqꞌuel dꞌa libre,
val yel libre tzex ajcani,
yujto yuninal in Dios.
37 A in tic,
vojtacxo to yin̈til ex can vin̈aj Abraham chiꞌ vedꞌoc.
Palta ina e gana tzin e milchamoc yujto a tas svalaꞌ malaj tzꞌoch dꞌayex.
38 A tas vilnac dꞌa in Mam,
a sval dꞌayex.
A exxo tic,
chꞌoc jun e mam van e cꞌanabꞌajan tas syal dꞌayex,
xchi Jesús dꞌa ebꞌ.
39 Palta a vin̈aj Abraham chiꞌ co mam yaj vin̈,
xchi ebꞌ dꞌay.
—Octom val yel yin̈til ex vin̈,
tato icha chiꞌ,
tzam e cꞌanabꞌajej icha scꞌulejnac vin̈.
40 A juntzan̈ tas yel yalnaccan Dios dꞌayin,
an̈ej sval dꞌayex.
Palta ina e gana tzin e milchamoc.
Man̈ ichoctaꞌ ix yutej sbꞌa vin̈aj Abraham chiꞌ.
41 A ex tic,
a tas scꞌulej jun e mam tze cꞌanabꞌajej,
xchi Jesús dꞌa ebꞌ.
—Palta a on̈ tic,
man̈ on̈ mitzꞌuninoclaj.
Junn̈ej co Mam,
aton Dios,
xchi ebꞌ dꞌay.
42 —Octom yel to yuninal ex Dios chiꞌ.
Tato icha chiꞌ tzam in e xajanej,
yujto a in tic dꞌa Dios cotnac in,
in ja dꞌa tic.
Man̈ yoloc vic in javi,
yujto a Dios checjinac in coti.
43 ¿Tas yuj max nachajel eyuuj tas sval dꞌayex?
Tecan malaj e gana tze cha eyabꞌ tas sval tic.
44 A ex tic,
a jun e mam,
aton vin̈ diablo.
Yuj chiꞌ,
an̈ej dꞌa vin̈ tzeyacꞌoch e pensar.
An̈ej tas snibꞌej vin̈ tze cꞌulej.
Yictax ix bꞌoji yolyibꞌan̈qꞌuinal tic,
milumcham anima vin̈.
Malaj yelcꞌoch jabꞌoc tas yel dꞌa vin̈,
yujto an̈ej es sgana vin̈.
Ayic syesan vin̈,
dꞌa spensar vin̈ scoti,
yujto esalvum vin̈.
A dꞌa vin̈ pitzvinaccot es chiꞌ.
45 A inxo tic,
yujto a juntzan̈ tas te yel sval dꞌayex,
yuj chiꞌ max e cha eyabꞌi.
46 ¿Mach junoc ex syal e chꞌoxanel jabꞌoc in mul?
Te yel juntzan̈ tas sval dꞌayex tic.
Yuj chiꞌ,
¿tas yuj max e cha eyabꞌi?
47 A ebꞌ yic Dios,
syacꞌoch schiquin ebꞌ dꞌa slolonel.
Palta a exxo tic,
man̈ ex yicoc Dios,
yuj chiꞌ max yal e cꞌol tzeyacꞌoch e chiquin dꞌay,
xchi Jesús dꞌa ebꞌ vin̈.
Ayic manto alji vin̈aj Abraham, aytaxon ecꞌ Jesús
48 Ix yalanpax ebꞌ vin̈ aj Judea chiꞌ dꞌay:
—Tecan yel scalaꞌ to aj Samaria ach,
tecan to ayoch junoc enemigo dꞌayach,
xchi ebꞌ dꞌay.
49 —Maay,
malaj junoc enemigo ayoch dꞌayin.
Van in cꞌanabꞌajan tas syal in Mam.
Palta a ex tic,
ton̈ej tzex bꞌuchvaj dꞌayin.
50 A in tic,
malaj in gana ay velcꞌochi.
Palta ay junxo tzꞌalani to ay velcꞌoch dꞌa sat.
A jun chi schꞌolbꞌitani mach yel syalaꞌ.
51 Val yel sval dꞌayex,
a ebꞌ scꞌanabꞌajan tas svalaꞌ,
malaj bꞌaqꞌuin̈ ol cham ebꞌ,
xchi dꞌa ebꞌ vin̈.
52 —A ticnaic scojtaquejeli to ayoch enemigo dꞌayach.
A vin̈aj Abraham yedꞌ jantacn̈ej ebꞌ schecabꞌ Dios dꞌa pecaꞌ,
chamnacxo ebꞌ smasanil.
A achxo tic tzalaꞌ:
Tato ay mach scꞌanabꞌajan tas svalaꞌ,
malaj bꞌaqꞌuin̈ ol chamoc,
nivanoc xa chi.
53 ¿Tom ecꞌto elcꞌoch dꞌa yichan̈ vin̈ co mam quicham aj Abraham chiꞌ?
Ina chamnac vin̈,
chamnacxo pax ebꞌ schecabꞌ Dios chiꞌ,
¿mach ach a naan ticnaic?
xchi ebꞌ vin̈ dꞌay.
54 Yuj chiꞌ ix yalxi dꞌa ebꞌ vin̈:
—Tato munil svicꞌchaan̈ in bꞌa,
malaj velcꞌochi.
Palta a in Mam tzꞌalani to ay velcꞌochi.
A in Mam chiꞌ tzeyaloch e Diosaloc,
55 palta nivanoc tzeyal icha chiꞌ,
yujto man̈ eyojtacoc Dios chiꞌ.
A in tic,
vojtac sicꞌlabꞌil.
Qꞌuinaloc svalaꞌ to man̈ vojtacoc,
svesej icha ex tic.
Palta yel vojtac,
yujto a tas syalaꞌ,
a tzin cꞌanabꞌajejn̈ej.
56 A vin̈ co mam quicham aj Abraham chiꞌ,
tzalajnac vin̈ yujto aljinac dꞌa vin̈ to ol yil vin̈ in javi.
Ix yilan vin̈,
yuj chiꞌ ix te tzalaj vin̈,
xchi dꞌa ebꞌ vin̈.
57 —¿Tom ilnacto vin̈aj Abraham chiꞌ?*
Ina manto ach cꞌoch dꞌa 50 abꞌil,
xchi ebꞌ vin̈ dꞌay.
58 —Val yel sval dꞌayex,
ayic manto alji vin̈aj Abraham chiꞌ,
ayintaxoneqꞌui,
xchi Jesús chiꞌ dꞌa ebꞌ vin̈.
59 Ix laj sicꞌanqꞌue qꞌuen qꞌueen ebꞌ vin̈ yic sjulanoch qꞌuen ebꞌ vin̈ dꞌay.
Ix scꞌubꞌanel sbꞌa dꞌa ebꞌ vin̈,
ix elta dꞌa yamaqꞌuil templo chiꞌ.
Ix ecꞌbꞌat dꞌa scal ebꞌ vin̈,
ix bꞌati.