A tas scutej co colvaj dꞌa ebꞌ mebꞌaꞌ
6
Tzeyil val e bꞌa,
man̈toc an̈ej dꞌa yichan̈ ebꞌ anima vachꞌ tzeyutej e bꞌa.
Tato ichan̈ej chiꞌ tzeyutej e bꞌa,
malaj spac ol e cha dꞌa co Mam ayecꞌ dꞌa satchaan̈.
2 Yuj chiꞌ,
ayic tzex colvaj dꞌa ebꞌ mebꞌaꞌ,
malajocabꞌ bꞌaj tzeyalaꞌ,
yujto a ebꞌ chabꞌ sat syacꞌ ebꞌ yojtaquejel masanil anima,
icha chiꞌ scꞌulej ebꞌ dꞌa yoltac spatil sculto ebꞌ yedꞌ dꞌa yol calle yic slaj yal ebꞌ anima to vachꞌ ebꞌ.
Val yel sval dꞌayex,
toxo ix scha spac jun svachꞌil ebꞌ chiꞌ.
Toxon malaj jabꞌoc spac ol scha ebꞌ dꞌa Dios.
3 A exxo pax tic,
a tzex colvaj dꞌa ebꞌ mebꞌaꞌ,
mocabꞌ eyal dꞌa junocxo mach,
vachꞌchom eyamigo val,
man̈ eyal yabꞌi.
4 Cꞌubꞌeltacn̈ej tzex colvaj dꞌa ebꞌ mebꞌaꞌ chiꞌ.
Vachꞌchom cꞌubꞌeltac tzex colvaj dꞌa ebꞌ,
a co Mam Dios tzꞌilani.
Yuj chiꞌ,
aꞌ ol acꞌan spac dꞌayex.
Yalnaccan Jesús, chajtil scutej co bꞌa co lesalvi
5 Ayic tzex lesalvi,
mocabꞌ ex lesalvoc ichoc ebꞌ chabꞌsat.
Yujto a ebꞌ chiꞌ,
sgana ebꞌ ton̈ej sqꞌue lin̈an slesalvi dꞌa yoltac spatil culto yedꞌ bꞌaj scha sbꞌa calle dꞌa esquina,
yic slaj yal ebꞌ anima to vachꞌ ebꞌ.
Val yel sval dꞌayex,
toxo ix scha spac svachꞌil ebꞌ chiꞌ.
Toxon malaj jabꞌoc spac ol scha ebꞌ dꞌa Dios.
6 A exxo tic,
ayic tzex lesalvi,
tze macchejoch e bꞌa dꞌa yol e pat.
Slajvi chiꞌ,
dꞌa cꞌubꞌeltac tzeyacꞌ e lesal dꞌa co Mam Dios.
Vachꞌchom dꞌa cꞌubꞌeltac tzeyacꞌ e lesal dꞌay,
aꞌ ol abꞌanoc,
ol yacꞌan spac dꞌayex.
7 Ayic tzex lesalvi,
mantoc ton̈ej tzex comon loloni,
icha syutej sbꞌa ebꞌ man̈ ojtannacoc Dios.
A ebꞌ chiꞌ,
yujn̈ej to najat syutej yoc slesal ebꞌ,
syabꞌan Dios snaan ebꞌ.
8 Yuj chiꞌ,
man̈ lajanoc tzeyutej e lesalvi yedꞌ ebꞌ,
yujto yojtacxo co Mam Dios tas tzꞌoch eyuuj ayic mantzac e cꞌan dꞌay.
9 Yuj chiꞌ icha tic tzeyutej e lesalvi:
Ach co Mam,
ay ach ecꞌ dꞌa satchaan̈.
Nivanocabꞌ yelcꞌoch a bꞌi.
10 Ach ochocabꞌ yajalil dꞌa tic.
Cꞌanabꞌajaxocabꞌ tas tza nibꞌej dꞌa sat luum tic,
icha tzach cꞌanabꞌajax dꞌa satchaan̈.
11 Acꞌ tas sco va dꞌa cꞌu tic.
12 Acꞌ lajvoc co mul yujto a on̈ tic scacꞌ nivancꞌolal ebꞌ tzꞌoch smul dꞌayon̈.
13 Man̈ on̈ a cha montajbꞌat dꞌa chucal.
Tzon̈ a colanel dꞌa yol scꞌabꞌ vin̈ chuc.
Yujto masanil tiempo Yajal achn̈ej.
Te nivan a poder.
Te nivan elcꞌochi.
Amén.
14 A ex tic,
tato tzeyacꞌ nivancꞌolal ebꞌ tzꞌoch smul dꞌayex,
axo co Mam ayecꞌ dꞌa satchaan̈ ol acꞌan lajvoc e mul.
15 Palta tato max eyacꞌ nivancꞌolal ebꞌ tzꞌoch smul dꞌayex,
axo co Mam Dios max acꞌan pax lajvoc e mul.
A tas tzꞌaj coch dꞌa tzecꞌojcꞌolal
16 Ayic tzex och dꞌa tzecꞌojcꞌolal,
man̈ lajanoc tzeyutej e bꞌa yedꞌ ebꞌ chabꞌ sat.
Yujto a ebꞌ chiꞌ,
ejmeltac syutej sat ebꞌ,
yic syil ebꞌ anima to ayoch ebꞌ dꞌa tzecꞌojcꞌolal.
Val yel sval dꞌayex,
toxo ix scha spac jun stzecꞌojcꞌolal ebꞌ chiꞌ.
Toxon malaj spac ol scha ebꞌ dꞌa Dios.
17 A exxo pax tic,
ayic tzex och tzecꞌojcꞌolal,
tze bꞌiquel e sat,
tze jixbꞌan e jolom,
18 yic vachꞌ malaj mach snaani tato ayex och dꞌa tzecꞌojcꞌolal.
Tato icha chiꞌ,
an̈ej dꞌa yichan̈ co Mam Dios ayex och dꞌa tzecꞌojcꞌolal.
Vachꞌchom cꞌubꞌeltac tzex ochi,
ol yilaꞌ,
aꞌ ol acꞌanxi spac dꞌayex.
A co bꞌeyumal dꞌa satchaan̈
19 Man̈ e mol e bꞌeyumal dꞌa yolyibꞌan̈qꞌuinal tic.
A juntzan̈ chiꞌ,
tzꞌoch ijaxoc,
scꞌabꞌati,
tzꞌoch ebꞌ elcꞌum dꞌay.
20 Más vachꞌ dꞌa satchaan̈ tze mol e bꞌeyumal.
Yujto a jun e bꞌeyumal dꞌa satchaan̈ chiꞌ,
max ochlaj ijaxoc,
max cꞌalaj.
Max ochpaxlaj ebꞌ elcꞌum dꞌay.
21 Yujto a bꞌaj sco molbꞌej co bꞌeyumal chiꞌ,
ataꞌ scacꞌbꞌat co pensar.
A scandilal co nivanil
22 A yol co sat,
icha junoc candil,
icha chiꞌ yaj dꞌa co nivanil tic.
Yuj chiꞌ tato junn̈ej bꞌaj ayoch co sat,
saquilqꞌuinal caji,
vachꞌ scutej co bꞌa yedꞌ co nivanil.
23 Palta tato ayex chꞌocchꞌoc bꞌaj tzeyacꞌoch e sat,
tzex can dꞌa qꞌuicꞌalqꞌuinal yuuj.
A jun saquilqꞌuinal ayoch dꞌayex,
tato smeltzajoch qꞌuicꞌalqꞌuinalil dꞌayex,
ol ex can dꞌa qꞌuicꞌalqꞌuinal sicꞌlabꞌil.
A Dios yedꞌ qꞌuen tumin
(Lc 16.13)
24 Malaj junoc on̈ syal cacꞌan servil chavan̈oc patrón,
yujto ay junoc ol co patiquejeli,
axo junocxo,
ol co xajanej.
Ay jun bꞌaj ol cacꞌoch co pensar,
axo junocxo malaj jabꞌoc yelcꞌoch dꞌa co sat.
Yuj chiꞌ max yal-laj cacꞌan servil Dios,
scacꞌanpax och co pensar dꞌa qꞌuen tumin.
A Dios tzꞌilan ebꞌ yuninal
25 Sval dꞌayex,
man̈ ex och ilcꞌolal yuj tas ol icꞌan yecꞌ tiempo eyuuj,
yuj tas tze vaꞌa yedꞌ pax tas tzꞌaj e pichchaji.
A Dios tzꞌacꞌan co qꞌuinal,
ocxom tas sco vaꞌa,
¿tom man̈ ol yacꞌaꞌ?
A ix acꞌan co nivanil,
¿tom man̈ ol yacꞌ pax co pichul?
26 Tzeyilnabꞌ nocꞌ much tzꞌecꞌ jen̈en̈oc dꞌa satchaan̈.
Malaj tas syavej nocꞌ.
Max jachꞌvilaj nocꞌ.
Malaj pax tas smol nocꞌ.
Palta a co Mam Dios ay dꞌa satchaan̈ tzꞌacꞌan svael nocꞌ.
Inatax tzꞌacꞌji svael nocꞌ,
oc exxom a ex tic,
más nivan eyelcꞌoch dꞌa yichan̈ nocꞌ.
27 ¿Tom ay junoc ex syal eyacꞌanoch nan̈alocxo vara e teel vachꞌchom tzex och ilcꞌolal?
28 An̈ejtonaꞌ,
¿tas yuj tze naubꞌtan̈ej yuj e pichul?
Tzeyilnabꞌ sqꞌuibꞌ juntzan̈ an̈ xumac.
A juntzan̈ chiꞌ max munlajlaj.
Max chꞌalvilaj.
29 Palta sval dꞌayex,
a yecꞌnac vin̈aj rey Salomón,
vachꞌchom man̈ jantacoc svachꞌil yilji vin̈ yedꞌ spichul,
palta maj tzacꞌvanlaj svachꞌil yilji vin̈ icha juntzan̈ an̈ xumac chiꞌ.
30 A juntzan̈ an̈ chiꞌ,
ton̈ej ayecꞌ an̈ ticnaic,
axo qꞌuicꞌan tzꞌoch an̈ scꞌacꞌaloc horno.
Vachꞌchom icha chiꞌ an̈,
palta a Dios tzꞌacꞌan svachꞌil yilji an̈.
Yuj chiꞌ,
ol yacꞌpax e pichul.
Palta inai,
teveln̈ej tzeyacꞌoch Dios dꞌa e cꞌool.
31 Yuj chiꞌ man̈ ex och ilcꞌolal.
Man̈ eyalaꞌ:
¿Tas ol co vaꞌa?
¿Bꞌaj ol cot co pichul?
man̈ xe chioc.
32 Yujto a ebꞌ man̈ ojtannacoc Dios,
syacꞌoch spensar ebꞌ sayanecꞌ juntzan̈ chiꞌ.
Palta a co Mam ayecꞌ dꞌa satchaan̈,
a ojtannac to ay tzꞌoch juntzan̈ chiꞌ cuuj.
33 Yuj chiꞌ,
tzeyacꞌ eyip eyacꞌanoch e bꞌa dꞌa yol scꞌabꞌ Dios.
Tojoln̈ej tzeyutej e bꞌeybꞌal,
icha sgana.
Tato icha chiꞌ,
ol yacꞌ juntzan̈ chiꞌ dꞌayex smasanil.
34 Yuj chiꞌ,
man̈ ex och ilcꞌolal yuj tas eyaj qꞌuicꞌan.
Yujto man̈ eyojtacoc tas tzex icꞌan qꞌuicꞌan chiꞌ,
mocabꞌ e naubꞌtan̈ej yuuj.
Cꞌocbꞌiln̈ejocabꞌ sco na tas tzon̈ aj dꞌa junjun cꞌu.