2 Ix yilani ayecꞌ chabꞌ yunetac barco dꞌa stiꞌ aꞌ,

malaj mach ayoch dꞌa yool,

yujto ix elta juntzan̈ ebꞌ yamum chay dꞌa yol teꞌ,

van sjucꞌanel schimpa ebꞌ,

yic syamlabꞌ chay chiꞌ.

3 Yuj chiꞌ ix och Jesús dꞌa yol jun teꞌ barco chiꞌ,

aton teꞌ yic vin̈aj Simón.

Ix yalan dꞌa vin̈ to snitzoch jabꞌoc teꞌ vin̈ dꞌa yol aꞌ.

Ix lajvi chiꞌ ix em cꞌojan dꞌa yol teꞌ,

ix och ijan scꞌaybꞌan ebꞌ anima chiꞌ dꞌa stiꞌ aꞌ.

4 Ix lajvi scꞌaybꞌan ebꞌ,

ix yalanpax dꞌa vin̈aj Simón chiꞌ:

—Coyec yedꞌ teꞌ e barco tic bꞌaj te jul aꞌ,

ataꞌ ol eyaqꞌuem e chimpa,

xchi Jesús chiꞌ.

5 —Ach co Cꞌaybꞌumal,

jun acꞌval ix cacꞌlej co yaman nocꞌ qꞌuiqꞌui,

malaj val junoc nocꞌ ix quicꞌaꞌ.

Palta yujn̈ej to a ach tzalaꞌ,

ol bꞌat caqꞌuem co chimpa tic junelxo,

xchi vin̈aj Simón chiꞌ dꞌay.

6 Axo yic ix yacꞌanem ebꞌ,

man̈xo jantacoc nocꞌ ix yamchaji.

A schimpa ebꞌ chiꞌ ijan ix n̈icꞌchajbꞌati.

7 Ix sbꞌechcꞌabꞌancot juntzan̈xo ebꞌ yetbꞌeyum ebꞌ dꞌa junxo barco yic tzꞌoch ebꞌ yedꞌ ebꞌ.

Ix javi ebꞌ,

ix bꞌudꞌji chabꞌ teꞌ barco chiꞌ.

Ijan ix bꞌat teꞌ dꞌa yol aꞌ yuj yalil nocꞌ.

8 Axo ix yilan jun chiꞌ vin̈aj Simón Pedro chiꞌ,

ix em cuman vin̈ dꞌa yichan̈ Jesús,

ix yalan vin̈ dꞌay:

—Mamin,

ma max ach el dꞌa in tzꞌey,

yujto a in tic,

te chuc in,

xchi vin̈.

9 Icha chiꞌ ix yutej vin̈ yalani,

yujto ix te sat scꞌol vin̈ yedꞌ juntzan̈xo ebꞌ yetbꞌeyum yuj juntzan̈ nocꞌ tzijtumal chay ix syam ebꞌ chiꞌ.

10 An̈ejtonaꞌ vin̈aj Jacobo yedꞌ vin̈aj Juan,

aton ebꞌ vin̈ yuninal vin̈aj Zebedeo,

ix te sat scꞌol ebꞌ vin̈.

Yetyamum chayil sbꞌa ebꞌ vin̈ yedꞌ vin̈aj Simón chiꞌ.

Ix yalan Jesús dꞌa vin̈aj Simón chiꞌ:

—Man̈ ach xivoc.

Icha tzutej a yaman nocꞌ chay tic,

icha chiꞌ ol utoc icꞌancot ebꞌ anima dꞌayin,

xchi dꞌa vin̈.

11 Axo ix elcꞌoch juntzan̈ barco chiꞌ dꞌa stiꞌ aꞌ,

ix yactancan juntzan̈ syamcꞌabꞌ ebꞌ chiꞌ,

ix och tzacꞌan ebꞌ yuj Jesús.

12 A junel ayecꞌ Jesús dꞌa jun chon̈abꞌ,

ix cꞌoch jun vin̈ dꞌay,

ayqꞌue yabꞌil lepra dꞌa snivanil vin̈ smasanil.

A ix yilanoch Jesús chiꞌ vin̈,

ix em cumnaj vin̈,

ix em n̈ojnaj vin̈ dꞌa sat luum,

ix yalan vin̈ dꞌay:

—Mamin,

ta syal a cꞌool tzin a bꞌoxicani,

xchi vin̈.

13 Axo Jesús ix yamlan vin̈,

ix yalani:

—In gana sbꞌoxican a cꞌool,

xchi dꞌa vin̈.

Ayic ix yalan Jesús icha chiꞌ,

ix el jun yabꞌil chiꞌ dꞌa vin̈.

14 Ix lajvi chiꞌ,

ix cham val yalan dꞌa vin̈:

—Ayta bꞌaj tzal jun tic.

Palta ixic,

bꞌat chꞌox a bꞌa dꞌa vin̈ sacerdote.

Bꞌat acꞌan jun silabꞌ dꞌa Dios,

icha yalnaccan vin̈aj Moisés,

yic tzꞌilji to ach bꞌoxi,

xchi Jesús chiꞌ dꞌa vin̈.

15 A yabꞌixal Jesús chiꞌ,

ix pucaxn̈ej dꞌa scal ebꞌ anima.

Tzijtum ebꞌ ix smolbꞌej sbꞌa yic syabꞌ ebꞌ tas syalaꞌ,

yic sbꞌoxican scꞌol ebꞌ yuuj.

16 Ix yiqꞌuel sbꞌa dꞌa scal ebꞌ,

ix bꞌat lesal bꞌaj malaj ebꞌ anima.

17 Dꞌa jun cꞌu van scꞌaybꞌan ebꞌ anima Jesús,

cꞌojcꞌumbꞌa juntzan̈ ebꞌ fariseo yedꞌ pax ebꞌ cꞌaybꞌum dꞌa ley Moisés.

A dꞌa junjun chon̈abꞌ dꞌa yol yic Galilea yedꞌ dꞌa yol yic Judea ix laj cot ebꞌ.

Ay pax ebꞌ ix cot dꞌa Jerusalén.

Axo Jesús ix checlajel spoder Dios dꞌay,

ayic ix yacꞌan bꞌoxoc scꞌol ebꞌ penaay.

18 Ichato chiꞌ ix cꞌoch juntzan̈ ebꞌ vin̈,

bꞌachbꞌil jun vin̈ sicbꞌinaquel yuj ebꞌ vin̈ yedꞌ svaynubꞌ.

Sgana ebꞌ vin̈ tzꞌoch dꞌa yol pat syacꞌanoch ebꞌ vin̈ dꞌa yichan̈ Jesús.

19 Palta maj ilchajlaj yuj ebꞌ vin̈ bꞌaj tzꞌochi yujto te vitzꞌan yuj ebꞌ anima.

Yuj chiꞌ ix qꞌue ebꞌ vin̈ dꞌa span̈anil yibꞌan̈ jun pat chiꞌ,

ix yolan yibꞌan̈ pat chiꞌ ebꞌ vin̈,

ix yacꞌanemta vin̈ penaay chiꞌ ebꞌ vin̈ yedꞌ svaynubꞌ dꞌa scal ebꞌ anima dꞌa yichan̈ Jesús chiꞌ.

20 Axo ix yilan Jesús chiꞌ to ix yacꞌoch scꞌool ebꞌ vin̈ dꞌay,

yuj chiꞌ ix yalan dꞌa vin̈ penaay chiꞌ:

—Ach anima,

toxo ix acꞌji lajvoc a mul,

xchi dꞌa vin̈.

21 Yuj chiꞌ,

axo ebꞌ cꞌaybꞌum dꞌa ley Moisés yedꞌ ebꞌ fariseo,

ix och ijan ebꞌ snaubꞌtan̈ani:

¿Tas yaj jun vin̈ tic?

Van sbꞌuchvaj vin̈ dꞌa Dios.

Malaj junoc mach syal yacꞌan lajvoc mul,

an̈ej Dios,

xchi ebꞌ dꞌa spensar.

22 Palta a Jesús yojtacxo tas van snaan ebꞌ chiꞌ,

yuj chiꞌ ix yalan dꞌa ebꞌ:

—¿Tas yuj tze naubꞌtan̈ej jun tic?

23 ¿Tas junoc secojtac calan tze naꞌa?

¿A a mul toxo ix acꞌji lajvoc,

xco chama,

ma:

Qꞌuean̈ vaan,

bꞌeyan̈,

mato xco chi?

24 A ticnaic,

ol in chꞌox dꞌayex to a in Acꞌbꞌil in cot yuj Dios voch animail tic,

ay vopisio vacꞌan lajvoc smul ebꞌ anima ay dꞌa yolyibꞌan̈qꞌuinal tic.

Ix yalan Jesús dꞌa vin̈ sicbꞌinaquel chiꞌ:

—A in tic sval dꞌayach,

qꞌuean̈ vaan,

icꞌchaan̈ a vaynubꞌ tic,

ixic dꞌa a pat,

xchi dꞌa vin̈.

25 Dꞌa jun rato chiꞌ,

ix qꞌue vaan vin̈ sicbꞌinaquel chiꞌ dꞌa yichan̈ ebꞌ.

Ix yicꞌanchaan̈ svaynubꞌ vin̈ bꞌaj jichan ecꞌ chiꞌ.

Ix pax vin̈ dꞌa spat,

ix yalan vachꞌ lolonel vin̈ dꞌa Dios.

26 Ix laj och qꞌuelan ebꞌ smasanil ix laj yalan vachꞌ lolonel ebꞌ dꞌa Dios,

ix te sat scꞌol ebꞌ,

yuj chiꞌ ix laj yal ebꞌ:

—Ix te sat co cꞌool quilan juntzan̈ tic,

xchi ebꞌ.

27 Ix lajvi chiꞌ,

ix elta Jesús,

ix yilan jun vin̈ tecumel alcabar scuchan Leví,^*

cꞌojanecꞌ vin̈ bꞌaj stequel alcabar chiꞌ.

Ix yalan Jesús dꞌa vin̈:

—Ochan̈ in cꞌaybꞌumoc,

xchi.

28 Ix qꞌue vaan vin̈,

ix yactancan smasanil,

ix och vin̈ scꞌaybꞌumoc Jesús chiꞌ.

29 Ichato chiꞌ,

ix och jun nivan vael dꞌa spat vin̈ yic sva Jesús yedꞌoc.

Tzijtum ebꞌ vin̈ tecumel alcabar yedꞌ juntzan̈xo ebꞌ anima ix och yedꞌ ebꞌ dꞌa mexa.

30 Axo ebꞌ vin̈ fariseo yedꞌ ebꞌ vin̈ cꞌaybꞌum dꞌa ley Moisés chiꞌ,

ix och ijan ebꞌ vin̈ yalan dꞌa ebꞌ scꞌaybꞌum Jesús chiꞌ icha tic:

—¿Tas yuj tzex vaꞌi,

tzeyucꞌan aꞌ yedꞌ juntzan̈ ebꞌ vin̈ tecumel alcabar tic yedꞌ ebꞌ chuc sbꞌeybꞌal tic?

xchi ebꞌ vin̈ dꞌa ebꞌ.

31 Yuj chiꞌ,

ix yal Jesús dꞌa ebꞌ vin̈:

—Qꞌuinaloc ay junoc vin̈ an̈tum ticnaic.

A ebꞌ vachꞌ scꞌool,

¿tom ay tzꞌoch vin̈ yuj ebꞌ?

An̈ej ebꞌ penaay ay tzꞌoch vin̈ yuuj.

32 Man̈ yujoc vavtan ebꞌ toxon vachꞌ sbꞌeybꞌal snaani,

in javi.

Palta yuj vavtan ebꞌ yojtac to chuc sbꞌeybꞌal,

yic vachꞌ sna sbꞌa ebꞌ yuj smul,

xchi dꞌa ebꞌ vin̈.

33 Ix lajvi chiꞌ,

ix yalan ebꞌ vin̈ dꞌa Jesús:

—A ebꞌ scꞌaybꞌum vin̈aj Juan,

vin̈ tzꞌacꞌan bautizar yedꞌ ebꞌ scꞌaybꞌum ebꞌ vin̈ fariseo,

tzijtum el tzꞌoch ebꞌ dꞌa tzecꞌojcꞌolal,

slesalvi ebꞌ.

Palta axo ebꞌ a cꞌaybꞌum tic,

¿tas yuj an̈ej vael syacꞌ ebꞌ?

xchi ebꞌ vin̈ dꞌay.

34 Ix yalan Jesús dꞌa ebꞌ vin̈:

—Qꞌuinaloc ay junoc nupnajel,

¿tom syal eyacꞌanoch ebꞌ avtabꞌil dꞌa nupnajel chiꞌ dꞌa tzecꞌojcꞌolal yacbꞌan aytoecꞌ vin̈ van yoch yetbꞌeyum chiꞌ yedꞌ ebꞌ?

35 Palta ol ja scꞌual ol icꞌjoc el vin̈ dꞌa scal ebꞌ,

ichato chiꞌ ol och ebꞌ dꞌa tzecꞌojcꞌolal,

xchi dꞌa ebꞌ vin̈.

36 Ix lajvi chiꞌ,

ix yalanxi junxo abꞌix tic dꞌa ebꞌ vin̈:

—Malaj junoc on̈ ay junoc acꞌ pichul sco n̈iqꞌuelta jabꞌoc,

scacꞌanoch snipuloc junoc cꞌa pichul.

Tato icha chiꞌ scutej,

tzꞌixtaxel jun acꞌto chiꞌ.

An̈ejtonaꞌ,

tzꞌixtax pax el jun cꞌa pichul chiꞌ yuj jun acꞌto chiꞌ.

37 Ol val junxo chꞌoxnabꞌil:

Max yal-laj yacꞌchajem vino manto sipji dꞌa yol junoc nocꞌ cꞌa tzꞌum yedꞌtal vino,^*

tato icha chiꞌ,

sn̈icꞌchaj jun tzꞌuum chiꞌ yuj vino chiꞌ,

tzꞌixtax scha macan̈il.

38 Yuj chiꞌ,

a dꞌa yol nocꞌ acꞌ tzꞌuum tzeyaqꞌuem vino manto sipji,

icha chiꞌ vachꞌ ol can schabꞌil.

39 An̈ejtonaꞌ,

tato ay ebꞌ an̈ejaꞌ tzato ucꞌan pecaꞌ vino,

axo jun vino toto sbꞌoi,

malaj yelcꞌoch dꞌa sat ebꞌ.

Syalan ebꞌ:

A jun pecaꞌ vino tic,

más vachꞌ,

xchi ebꞌ,

xchi Jesús.