Bꞌoxinac scꞌool vin̈ sicbꞌinaquel yuj Jesús
9
Axo Jesús ix ochxi dꞌa yol teꞌ barco.
Ix bꞌatxi dꞌa junxo scꞌaxepal aꞌ.
Ix cꞌochxi dꞌa schon̈abꞌ.
2 Ataꞌ ay jun vin̈ sicbꞌinac eli,
ix icꞌjibꞌat vin̈ dꞌa sat svaynubꞌ yuj juntzan̈ ebꞌ vin̈ vinac dꞌa Jesús.
Axo ix yilan Jesús to ix yacꞌoch ebꞌ dꞌa scꞌool.
Yuj chiꞌ ix yalan dꞌa vin̈ sicbꞌinac el chiꞌ:
—Ach vetanimail,
tecꞌtecꞌ tzutej a bꞌa.
Ix acꞌjican lajvoc a mul,
xchi dꞌa vin̈.
3 Ataꞌ ayecꞌ jayvan̈ ebꞌ vin̈ cꞌaybꞌum dꞌa ley Moisés,
ix snaan ebꞌ vin̈:
A jun vin̈ tic,
ton̈ej sbꞌuchvaj vin̈ dꞌa Dios,
xchi ebꞌ vin̈.
4 Axo Jesús yojtacxo tas sna ebꞌ vin̈,
yuj chiꞌ ix yal dꞌa ebꞌ vin̈:
—¿Tas yuj tze na juntzan̈ malaj svachꞌil tic?
5 ¿Bꞌaja junoc secojtac calan tze naꞌa?
¿A a mul toxo ix acꞌji lajvoc,
xco chama,
ma:
Qꞌuean̈ vaan,
bꞌeyan̈,
mato xco chi?
6 A ticnaic jun,
ol in chꞌox dꞌayex to a in Acꞌbꞌil in cot yuj Dios voch animail tic,
ay vopisio vacꞌan lajvoc smul ebꞌ ay dꞌa yolyibꞌan̈qꞌuinal tic,
xchi dꞌa ebꞌ vin̈.
Ix lajvi chiꞌ,
ix yalan dꞌa vin̈ sicbꞌinaquel chiꞌ:
—Qꞌuean̈ vaan.
Icꞌchaan̈ a vaynubꞌ.
Paxan̈ dꞌa a pat,
xchi dꞌa vin̈.
7 Dꞌa jun rato chiꞌ,
ix qꞌue vaan vin̈,
ix pax vin̈ dꞌa spat.
8 Ayic ix yilan jun chiꞌ ebꞌ anima,
ix te sat scꞌool ebꞌ.
Ix laj yalan vachꞌ lolonel ebꞌ dꞌa Dios yujto te nivan spoder Jesús ix schꞌox dꞌa ebꞌ anima.
Ix avtaj vin̈aj Mateo yuj Jesús
9 Ix bꞌatxi Jesús.
Ayic van sbꞌeyi,
ix yilani ayecꞌ jun vin̈ scuch Mateo,
cꞌojanem vin̈ bꞌaj stequel alcabar.
—Ochan̈ in cꞌaybꞌumoc,
xchi Jesús dꞌa vin̈.
Dꞌa jun rato chiꞌ ix qꞌue vaan vin̈,
ix och tzacꞌan vin̈ yuj Jesús.
10 Ix lajvi chiꞌ,
ix icꞌjibꞌat Jesús yuj vin̈ vael dꞌa spat.
Axo yic van sva yedꞌ ebꞌ scꞌaybꞌum,
an̈ejtonaꞌ tzijtum ebꞌ tecumel alcabar yedꞌ juntzan̈xo ebꞌ te chuc sbꞌeybꞌal ix va yedꞌ ebꞌ.
11 Axo ix yilan jun chiꞌ ebꞌ vin̈ fariseo.
Ix yalan ebꞌ vin̈ dꞌa ebꞌ scꞌaybꞌum Jesús:
—A jun e Cꞌaybꞌumal tic,
¿tas yuj junn̈ej sva yedꞌ ebꞌ tecumel alcabar yedꞌ juntzan̈xo ebꞌ malaj svachꞌil sbꞌeybꞌal tic?
xchi ebꞌ vin̈.
12 Ayic ix yabꞌan jun chiꞌ Jesús,
ix yalan dꞌa ebꞌ vin̈:
—A ebꞌ vachꞌ scꞌool,
malaj tzꞌoch vin̈ an̈tum yuj ebꞌ.
An̈ej ebꞌ penaay,
ay tzꞌoch vin̈ yuuj.
13 Ixiquec an,
ojtaquejequel tas syalelcꞌoch jun yalnaccan Dios dꞌa Slolonel Tzꞌibꞌabꞌilcani,
a ix yalan icha tic:
In gana tzꞌocꞌ e cꞌool dꞌa ebꞌ eyetanimail.
Man̈ocn̈ej juntzan̈ silabꞌ sn̈usji chiꞌ in gana,
xchi.
Man̈ yujoc vavtan ebꞌ toxon vachꞌ sbꞌeybꞌal snaani,
in javi.
Palta in javi vavtejcot ebꞌ toxonton ojtannac to malaj svachꞌil sbꞌeybꞌal,
xchi Jesús dꞌa ebꞌ vin̈.
A sbꞌeybꞌal ebꞌ fariseo yedꞌ scꞌaybꞌubꞌal Jesús
14 A junel ix cꞌoch ebꞌ scꞌaybꞌum vin̈aj Juan,
aton vin̈ tzꞌacꞌan bautizar bꞌaj ayecꞌ Jesús.
Ix scꞌanbꞌan ebꞌ dꞌay:
—¿Tas yuj max och ebꞌ a cꞌaybꞌum tic dꞌa tzecꞌojcꞌolal?
A on̈ tic,
scacꞌ val och co bꞌa dꞌa tzecꞌojcꞌolal.
Icha pax chiꞌ syutej sbꞌa ebꞌ fariseo,
xchi ebꞌ dꞌay.
15 Yuj chiꞌ ix yalan Jesús dꞌa ebꞌ:
—Qꞌuinaloc ay junoc qꞌuin̈ nupnajel.
A ebꞌ avtabꞌil sbꞌat taꞌ,
¿tom syal yoch ebꞌ dꞌa tzecꞌojcꞌolal ayic ayto ecꞌ vin̈ van yoch yetbꞌeyum chiꞌ yedꞌ ebꞌ?
Palta ato ol ja stiempoal man̈xo ayoquecꞌ vin̈ yedꞌ ebꞌ,
ato taꞌ ol och ebꞌ dꞌa tzecꞌojcꞌolal.
16 Malaj mach tzꞌacꞌanoch junoc acꞌ cꞌapac manto jucꞌji juneloc snipuloc junoc cꞌa pichul.
Yujto a jun acꞌ cꞌapac chiꞌ,
tzꞌutzꞌi,
svachꞌ tocꞌji n̈icꞌchaj jun cꞌa pichul chiꞌ yuuj.
17 Ol val junxo chꞌoxnabꞌil:
Max yal-laj yacꞌchajem vino manto sipji dꞌa yol junoc cꞌa tzꞌum yedꞌtal* vino.
Tato icha chiꞌ,
sn̈icꞌchaj jun tzꞌuum chiꞌ yuj jun vino chiꞌ,
tzꞌixtax schabꞌil macan̈.
Yuj chiꞌ,
a dꞌa yol junoc acꞌ tzꞌuum tzeyaqꞌuem vino manto sipji,
yic vachꞌ ol aj schabꞌil.
A ix yisil vin̈aj Jairo yedꞌ jun ix ix penaay
18 Ayic van yalan juntzan̈ chiꞌ Jesús,
ix cꞌoch jun vin̈ sat yaj dꞌa spatil sculto ebꞌ,
ix em cuman vin̈ dꞌa yichan̈ Jesús,
ix yalan vin̈:
—A jun ix visil,
toxomlaj ix cham ix naic.
Palta con̈ vedꞌoc.
In gana bꞌat aqꞌuecꞌ a cꞌabꞌ dꞌa yibꞌan̈ ix,
yic ol pitzvocxi ix,
xchi vin̈.
19 Yuj chiꞌ ix qꞌue vaan Jesús.
Ix bꞌat yedꞌ vin̈.
Ix bꞌat pax ebꞌ scꞌaybꞌum yedꞌoc.
20 Axo dꞌa scal ebꞌ anima van sbꞌat yedꞌoc,
ay jun ix ix penaay.
Slajchavilxo abꞌil penaay ix yuj yel jun aꞌ dꞌa snivanil ix.
Yuj chiꞌ ix cꞌoch ix dꞌa spatic Jesús.
Ix yamji stiꞌ spichul yuj ix.
21 Yujto ix sna ix:
Ton̈ejocabꞌ tzin yamlej stiꞌ spichul,
sbꞌoxican in cꞌool,
xchi ix.
22 Yuj chiꞌ ix meltzajbꞌat qꞌuelan Jesús dꞌa ix,
ix yalan dꞌa ix:
—Ach ix,
tecꞌtecꞌ tzutej a bꞌa.
Tzach bꞌoxican vuuj,
yujto in acꞌoch dꞌa a cꞌool,
xchi dꞌa ix.
Dꞌa jun rato chiꞌ ix bꞌoxican ix.
23 Axo yic ix cꞌoch Jesús dꞌa spat vin̈ yajal chiꞌ,
ix yilani van spuꞌan sflauta ebꞌ ay syamcꞌabꞌ yic bꞌit.
Axo masanil ebꞌ anima,
toxon̈ej vejanchaan̈ ebꞌ oqꞌuel.
24 Yuj chiꞌ ix yalan Jesús dꞌa ebꞌ:
—Elan̈ec dꞌa tic.
A ix tic,
man̈ chamnacoclaj ix.
Ton̈ej svay ix,
xchi dꞌa ebꞌ.
Palta ton̈ej ix tzetzaj Jesús chiꞌ yuj ebꞌ.
25 Axo yic ix lajvi yelta ebꞌ anima chiꞌ,
ix ochcꞌoch bꞌaj ay ix cobꞌes chiꞌ.
Ix yamji scꞌabꞌ ix yuuj,
ix qꞌue vaan ix bꞌian.
26 A dꞌa smasanil jun lugar chiꞌ,
masanil ebꞌ anima ix abꞌan tas ix uji chiꞌ.
Ix jacvi sat chavan̈ ebꞌ vin̈ max uji yilani
27 Ayic van sbꞌatxi Jesús dꞌa yol bꞌe,
ix och tzacꞌan chavan̈ ebꞌ vin̈ max uji yilan yuuj,
ix syamanoch ebꞌ vin̈ yalan icha tic:
—Ach yin̈tilal vin̈aj David,
¿tom max ocꞌ a cꞌool dꞌayon̈?
xchi ebꞌ vin̈ dꞌay.
28 Axo yic ix och dꞌa yol pat,
ix cꞌoch ebꞌ vin̈ dꞌay.
Yuj chiꞌ ix yalan dꞌa ebꞌ vin̈:
—¿Tzam eyacꞌoch dꞌa e cꞌool to syal in bꞌoan tas e gana?
xchi dꞌa ebꞌ vin̈.
—Iꞌ,
scacꞌoch Mamin,
xchi ebꞌ vin̈ dꞌay.
29 Yuj chiꞌ ix maslaj sat ebꞌ vin̈ yuuj.
Ix yalan dꞌa ebꞌ vin̈:
—Icha tzeyutej eyacꞌanoch dꞌa e cꞌool tic,
icha chiꞌ ol aj e bꞌoxi,
xchi dꞌa ebꞌ vin̈.
30 Icha chiꞌ ix aj sjacvi sat ebꞌ vin̈ chiꞌ.
Tzaxo uji yilan ebꞌ vin̈.
Yuj chiꞌ,
ix cham val yalan Jesús chiꞌ dꞌa ebꞌ vin̈:
—Ayta bꞌaj tzeyal jun tic,
xchi dꞌa ebꞌ vin̈.
31 Palta axo yic ix bꞌat ebꞌ vin̈,
ix yalan ebꞌ vin̈ dꞌa masanil lugar.
Ix lolonxi jun vin̈ max ujitaxon sloloni
32 Vanto spax ebꞌ vin̈ chiꞌ,
ix quetzjicot junxo vin̈ dꞌa Jesús.
A jun vin̈ chiꞌ max ujilaj slolon vin̈,
yujto ayoch jun enemigo dꞌa vin̈.
33 Axo yic ix el jun enemigo chiꞌ dꞌa vin̈ yuj Jesús,
ix och ijan vin̈ sloloni.
Yuj chiꞌ ix te sat scꞌool ebꞌ anima ayecꞌ taꞌ,
ix yalan ebꞌ:
—A dꞌa co cal a on̈ aj Israel on̈ tic,
manta bꞌaj squil junoc icha jun tic,
xchi ebꞌ.
34 Palta axo ebꞌ vin̈ fariseo ix alani:
—A jun vin̈ tic,
syal ton yicꞌanel ebꞌ enemigo chiꞌ vin̈,
yujto a jun yajal yaj dꞌa ebꞌ enemigo chiꞌ,
a ayoch yedꞌ vin̈,
xchi ebꞌ vin̈.
Ix ocꞌ scꞌool Jesús dꞌa ebꞌ anima
35 Axo Jesús ix laj ecꞌ dꞌa juntzan̈ chon̈abꞌ yedꞌ dꞌa juntzan̈ aldea.
Ix ecꞌ scꞌaybꞌej ebꞌ anima dꞌa yoltac spatil culto.
Ix yalanel vachꞌ abꞌix,
chajtil tzꞌaj yoch ebꞌ dꞌa yol scꞌabꞌ Dios.
Yaln̈ej tas juntzan̈ yaelal tzꞌicꞌan ebꞌ yedꞌ tas ilyail,
ix laj bꞌoxi scꞌool ebꞌ.
36 Ayic ix och qꞌuelan dꞌa ebꞌ anima chiꞌ,
ix ocꞌ scꞌool dꞌa ebꞌ,
yujto ix yilaꞌ to lajan ebꞌ icha juntzan̈ nocꞌ calnel malaj stan̈vumal,
te ayoch ebꞌ dꞌa syaelal,
te cusnac ebꞌ.
37 Yuj chiꞌ ix yalan dꞌa ebꞌ scꞌaybꞌum: