A jun vin̈ ayoch enemigo dꞌay dꞌa Gerasa
5
Ix cꞌoch Jesús yedꞌ ebꞌ scꞌaybꞌum dꞌa junxo scꞌaxepal aꞌ n̈ajabꞌ chiꞌ dꞌa Gerasa.
Marcos 5.1-20
2 Ayic van yelta Jesús dꞌa yol teꞌ barco chiꞌ,
ix cot jun vin̈ bꞌaj smucchaj ebꞌ chamnac,
ix cꞌoch vin̈ dꞌay.
A jun vin̈ chiꞌ,
ayoch enemigo dꞌa vin̈.
3 An̈ej bꞌaj mucan ebꞌ chamnac,
an̈ej taꞌ cajan vin̈.
Malaj junoc mach syal stzecꞌan vin̈,
vachꞌchom yedꞌ qꞌuen cadena.
4 Yujto tzijtum elxo stzecꞌchaj vin̈ yedꞌ qꞌuen dꞌa sjaj yoc yedꞌ dꞌa scꞌabꞌ,
palta dꞌa juntac el sdꞌin̈chajbꞌat qꞌueen yuj vin̈.
Malaj junoc mach stzacꞌvan syaman vin̈.
5 Masanil tiempo,
dꞌacꞌvalil yedꞌ dꞌa cꞌualil,
ton̈ej sbꞌeyecꞌ vin̈ dꞌa jolomtac vitz,
yedꞌ bꞌaj smucchaj ebꞌ chamnac.
Tzꞌavaj vin̈.
Ste maqꞌuej lajvoc sbꞌa vin̈ dꞌa juntzan̈ qꞌuen qꞌueen.
6 Najatto ix yilbꞌat Jesús chiꞌ vin̈,
ix spilan yip vin̈ scot dꞌay.
Cꞌaxel yem cuman vin̈ dꞌa yichan̈ scꞌochi.
7-8 Yuj chiꞌ ix yalan Jesús:
—Ach enemigo,
elan̈ dꞌa vin̈,
xchi.
Ix lajvi chiꞌ,
ix te qꞌue yav vin̈ yalani:
—¿Tas alan ic dꞌayin,
ach Jesús?
A ach tic,
Yuninal ach Dios,
jun te Nivan Yelcꞌochi.
Tzin tevi val dꞌayach dꞌa yichan̈ Dios,
man̈ in ixtej,
xchi vin̈ dꞌay.
9 Ix lajvi chiꞌ,
ix scꞌanbꞌan Jesús dꞌa vin̈:
—¿Tas a bꞌi?
xchi dꞌa vin̈.
—Legión in bꞌi,
yujto tzijtum co bꞌeyi,
xchi vin̈.
10 Ix och ijan vin̈ stevi dꞌa Jesús,
yic max checjiel ebꞌ enemigo chiꞌ dꞌa jun lugar chiꞌ.
11 Ay juntzan̈ nocꞌ chitam van sva dꞌa stzꞌey jun tzalan chiꞌ.
12 Yuj chiꞌ ix tevioch masanil ebꞌ enemigo chiꞌ dꞌa Jesús:
—Checon̈canbꞌat dꞌa scal nocꞌ chitam chiꞌ,
yic a dꞌa nocꞌ ol on̈ ochcanoc,
xchi ebꞌ.
13 Axo Jesús ix chaanbꞌat ebꞌ dꞌa nocꞌ.
Yuj chiꞌ ix el ebꞌ dꞌa vin̈,
axo dꞌa nocꞌ chitam chiꞌ ix bꞌat ochxican ebꞌ.
Ay am chabꞌoc mil nocꞌ.
Ix laj syumanbꞌat sbꞌa nocꞌ smasanil dꞌa sattac vitz.
Ix laj bꞌat nocꞌ dꞌa yol aꞌ n̈ajabꞌ chiꞌ.
Ix laj sjicꞌ aꞌ nocꞌ,
ix cham nocꞌ.
14 Axo ebꞌ stan̈vumal nocꞌ ix te xiv ebꞌ.
Ix laj bꞌat ebꞌ elelal.
Ix laj ecꞌ ebꞌ yalcanel yabꞌixal jun chiꞌ dꞌa chon̈abꞌ yedꞌ bꞌaj najat yajbꞌati.
Yuj chiꞌ,
ix laj cꞌoch ebꞌ anima yilaꞌ tas jun ix uji chiꞌ.
15 Axo ix cꞌoch ebꞌ bꞌaj ayecꞌ Jesús,
ix yilan ebꞌ to a vin̈ bꞌaj ix el ebꞌ enemigo chiꞌ,
cꞌojanecꞌ vin̈ taꞌ.
Ayxo och spichul vin̈,
te vachꞌxo scꞌol vin̈.
Yuj chiꞌ,
ix te xiv ebꞌ.
16 A ebꞌ ix ilan tas ix scꞌulej Jesús chiꞌ,
a ebꞌ ix alan dꞌa juntzan̈xo ebꞌ vanto scꞌochi.
Ix laj yalan ebꞌ tas ix aj yel ebꞌ enemigo chiꞌ yedꞌ tas ix aj pax nocꞌ chitam chiꞌ.
17 Yuj chiꞌ,
ix tevi ebꞌ anima chiꞌ dꞌa Jesús,
yic tzꞌel dꞌa yol slugar ebꞌ chiꞌ.
18 Ayic ix ochxi Jesús dꞌa yol barco,
axo vin̈ bꞌaj ix el ebꞌ enemigo chiꞌ,
ix scꞌan pavor vin̈ dꞌa Jesús yic vachꞌ sbꞌatcan vin̈ yedꞌoc.
19 Palta ix yalan dꞌa vin̈:
—Paxan̈ dꞌa a pat,
bꞌaj ay a mam yedꞌ ebꞌ ucꞌtac.
Tzalan icha tic dꞌa ebꞌ:
Nivan tas ix sbꞌo Dios Cajal dꞌayin.
Ix te ocꞌ scꞌool dꞌayin,
xa chi,
xchi Jesús dꞌa vin̈.
20 Yuj chiꞌ,
ix bꞌat vin̈.
Ix ecꞌ pax vin̈ dꞌa juntzan̈xo chon̈abꞌ dꞌa yol yic Decápolis.
Ix laj yalanel vin̈ jantac tas ix sbꞌo Jesús dꞌay.
Yuj chiꞌ ix te sat scꞌol ebꞌ smasanil.
A ix yisil vin̈aj Jairo yedꞌ junxo ix penaay
21 Ix lajvi chiꞌ,
ix ecꞌxi Jesús dꞌa aꞌ n̈ajabꞌ bꞌaj ix coti.
Axo yic ix cꞌochxi dꞌa stiꞌ aꞌ chiꞌ,
tzijtum anima ix smolbꞌej sbꞌa.
Marcos 5.21-43
22 Ix cꞌoch jun vin̈ yajal yaj dꞌa spatil culto,
scuch Jairo.
Ayic ix yilan Jesús vin̈,
ix em cuman vin̈ dꞌa yichan̈.
23 Ix te tevi vin̈ dꞌay,
ix yalan vin̈:
—Toxo val scham jun ix visil.
Con̈ vedꞌoc,
bꞌat aqꞌuecꞌ a cꞌabꞌ dꞌa yibꞌan̈ ix,
yic ol bꞌoxoc scꞌool ix yic man̈ ol cham ix,
xchi vin̈ dꞌay.
24 Yuj chiꞌ ix bꞌat Jesús yedꞌ vin̈.
Tzijtum pax anima ix bꞌat yedꞌoc,
ix ste vitzꞌej sbꞌa ebꞌ.
25 Palta ay junxo ix,
ayxo slajchavil abꞌil syamanoch yel jun aꞌ dꞌa snivanil ix.
26 Tzijtum ebꞌ an̈tum bꞌaj ix bꞌat yixtej sbꞌa ix.
Masanil tastac ay dꞌa ix,
ix schon̈el ix yuj stupan ebꞌ.
Palta maj bꞌoxilaj ix yuj ebꞌ,
masn̈ej ix te nivtaj ix.
27 Palta ix yabꞌan yabꞌixal Jesús ix.
Yuj chiꞌ ix cꞌoch ix dꞌa spatic dꞌa scal ebꞌ anima.
Ix syaman stiꞌ spichul Jesús chiꞌ ix,
28 yujto ix snaꞌ ix:
Ton̈ejocabꞌ tzin yam jabꞌoc stiꞌ spichul,
tzin bꞌoxicani,
xchi ix.
29 Dꞌa jun rato chiꞌ,
ix och vaan jun syaelal ix chiꞌ.
Ix yabꞌan ix sbꞌoxi scꞌool yuj jun syaelal chiꞌ.
30 Axo Jesús yojtac to ay mach ix bꞌoxi scꞌool yuj spoder.
Yuj chiꞌ,
ix meltzajbꞌat qꞌuelan dꞌa ebꞌ anima chiꞌ,
ix scꞌanbꞌan dꞌa ebꞌ:
—¿Mach jun ix yaman in pichul tic?
xchi dꞌa ebꞌ.
31 Axo ebꞌ scꞌaybꞌum ix alan dꞌay:
—Ina te vitzꞌan yaj bꞌaj ayach ecꞌ dꞌa scal ebꞌ anima tic,
slajvi chiꞌ tza cꞌanbꞌani:
¿Mach jun in yamani?
xa chi,
xchi ebꞌ dꞌay.
32 Palta ix ecꞌ qꞌueleloc dꞌa scal ebꞌ anima sayani mach jun ix yaman chiꞌ.
33 Axo ix ix chiꞌ,
ix te ibꞌxiqꞌue ix yuj xivelal.
Yujto yojtacxo ix to ix bꞌoxi scꞌool ix yuuj.
Yuj chiꞌ,
ix cꞌoch ix dꞌay.
Ix em cuman ix dꞌa yichan̈.
Yelcꞌolal ix yal ix smasanil dꞌa yel.
34 Yuj chiꞌ ix yal Jesús chiꞌ dꞌa ix:
—Ach ix,
yujto in acꞌoch dꞌa a cꞌool,
yuj chiꞌ ach bꞌoxi.
Paxan̈ dꞌa tzalajcꞌolal.
Tic ach bꞌoxi dꞌa jun a yaelal tic,
xchi dꞌa ix.
35 Ayic van yalan Jesús,
ay juntzan̈ ebꞌ vin̈ ix cot dꞌa spat vin̈ yajal yaj dꞌa spatil culto chiꞌ.
Ix yalan ebꞌ vin̈ dꞌa vin̈aj Jairo chiꞌ:
—A jun ix isil chiꞌ,
toxo ix cham ix.
Nabꞌaxon̈ej tza tzuntzej co Cꞌaybꞌumal tic yic bꞌat yilani,
xchi ebꞌ vin̈ dꞌa vin̈.
36 Palta ayic ix yabꞌan Jesús chiꞌ tas ix yal ebꞌ vin̈,
ix yalan dꞌa vin̈:
—Man̈ a na jun chiꞌ.
Acꞌ val och Dios dꞌa a cꞌool,
xchi.
37 Ix lajvi chiꞌ,
malaj ebꞌ anima ix schabꞌat yedꞌoc.
An̈ej vin̈aj Pedro,
vin̈aj Jacobo yedꞌ vin̈aj Juan yucꞌtac vin̈aj Jacobo chiꞌ ix schabꞌat yedꞌoc.
38 Axo ix cꞌoch ebꞌ dꞌa spat vin̈ yajal chiꞌ,
ix yilani,
vejanchaan̈ ebꞌ oqꞌuel.
Man̈ jantacoc yel yav ebꞌ.
39 Yuj chiꞌ,
ix och dꞌa yol pat chiꞌ,
ix yalan dꞌa ebꞌ:
—¿Tas yuj tzex te oqꞌui?
A ix unin tic,
man̈ chamnacoclaj ix,
ton̈ej svay ix,
xchi dꞌa ebꞌ.
40 Palta ton̈ej ix tzevaj ebꞌ.
Axo ix lajvi yelta ebꞌ anima chiꞌ yuuj,
ix yicꞌanoch smam snun ix,
yedꞌ ebꞌ ajun yedꞌoc.
Ix ochcꞌoch ebꞌ bꞌaj ayecꞌ ix unin chiꞌ.
41 Ix syaman scꞌabꞌ ix,
ix yalan dꞌa ix:
—Talita cumi,
xchi.
Syalelcꞌochi:
Ach ix unin,
a in sval dꞌayach,
qꞌuean̈ vaan,
xchi.
42 Dꞌa jun rato chiꞌ,
ix qꞌue van ix,
ix bꞌey ix.
Slajchavilxo abꞌil ix.
Axo ebꞌ anima ayecꞌ taꞌ,
ix te sat scꞌool ebꞌ.
43 Palta ix cham val yalan Jesús dꞌa ebꞌ:
—Ayta bꞌaj tzeyalel jun tic.
Aqꞌuec va ix unin tic,
xchi dꞌa ebꞌ.