A yabꞌixal vin̈ tzicumbꞌat in̈at trigo
4
Ayic ix syamanxi och Jesús scꞌaybꞌan ebꞌ anima dꞌa stiꞌ aꞌ n̈ajabꞌ,
tzijtum anima ix smolbꞌej sbꞌa.
Yuj chiꞌ,
ix och dꞌa yol jun barco ayecꞌ dꞌa stiꞌ aꞌ,
ix em cꞌojan.
Axo ebꞌ anima chiꞌ,
ix can ebꞌ smasanil dꞌa stiꞌ aꞌ.
Marcos 4.1-20
3 —Abꞌec.
Ay jun vin̈ ix bꞌat tzicojbꞌat in̈at trigo.
4 Ayic van stzicanbꞌat vin̈,
ay ixim ix emcan dꞌa yoltac bꞌe.
Axo nocꞌ much ix ecꞌ lojanqꞌue ixim.
5 Ay pax juntzan̈xo ixim ix emcan dꞌa yibꞌan̈tac qꞌuen samqꞌueen,
bꞌaj jabꞌn̈ej slumal.
Elan̈chamel ix javi ixim,
yujto jabꞌn̈ej slumal.
6 Palta axo ix el yoc cꞌu,
elan̈chamel ix tacjiel ixim,
yujto malaj val schꞌan̈al yibꞌ ixim.
7 Ay pax juntzan̈xo ixim ix emcan dꞌa caltac an̈cꞌultac.
Axo ix te qꞌuibꞌ juntzan̈ an̈cꞌultac chiꞌ,
ton̈ej ix satel juntzan̈ in̈at chiꞌ dꞌa scal an̈.
Yuj chiꞌ majxo yacꞌlaj sat.
8 Palta ay juntzan̈xo ix emcan bꞌaj yax sat luum.
A juntzan̈ chiꞌ ix javi,
ix qꞌuibꞌi,
ix aj sjolom.
Ay ix yacꞌ sat dꞌa 30.
Ay ix yacꞌ dꞌa 60.
Ay ix yacꞌ dꞌa jun ciento.
9 A juntzan̈ tzeyabꞌ tic,
naec val sicꞌlabꞌil,
xchi Jesús dꞌa ebꞌ.
A yopisio juntzan̈ abꞌix schꞌoxanel cꞌaybꞌubꞌal
10 Ayic man̈xalaj ebꞌ anima chiꞌ ayecꞌ yedꞌ Jesús,
axo ebꞌ scꞌaybꞌum slajchavan̈il yedꞌ ebꞌ ayecꞌ dꞌa stzꞌey,
ix scꞌanbꞌej ebꞌ dꞌay:
—¿Tas yuj abꞌixn̈ej tzꞌaj a cꞌaybꞌan ebꞌ anima?
xchi ebꞌ.
11 Yuj chiꞌ,
ix yalan dꞌa ebꞌ:
—An̈ej dꞌayex schꞌox Dios juntzan̈ tas manta mach ojtannac,
yic vachꞌ snachajel eyuuj chajtil tzꞌaj eyoch dꞌa yol scꞌabꞌ.
Palta axo dꞌa ebꞌ anima smasanil,
an̈ej juntzan̈ abꞌix schꞌoxanel cꞌaybꞌubꞌal svalaꞌ,
12 yic man̈ ol nachajel yuj ebꞌ.
Vachꞌchom syil junoc tas ebꞌ,
scanxin̈ej ebꞌ ichn̈ej taꞌ.
Ichato malaj tas syil ebꞌ.
An̈ejtonaꞌ,
vachꞌchom syabꞌ ebꞌ,
palta max nachajel jabꞌoc yuj ebꞌ.
Yuj chiꞌ,
max sqꞌuex spensar ebꞌ,
max acꞌji lajvoc smul ebꞌ yuj Dios.
A tas syalelcꞌoch yabꞌixal vin̈ tzicumbꞌat in̈at trigo
13 —Tato man̈ eyojtacoc tas syalelcꞌoch jun abꞌix ix val tic,
¿tas ol eyutoc eyojtacanel juntzan̈xo abꞌix smasanil?
14 A vin̈ tzicumbꞌat in̈at trigo chiꞌ,
syalelcꞌochi,
aton ebꞌ tzꞌalanel slolonel Dios.
15 A juntzan̈ in̈at ix emcan dꞌa yoltac bꞌe chiꞌ,
syalelcꞌochi,
a ebꞌ ix abꞌan slolonel Dios.
Palta axo yic slajvi yabꞌan ebꞌ,
scꞌoch vin̈ Satanás,
syicꞌanel slolonel Dios vin̈ dꞌa ebꞌ.
16 Axo juntzan̈ in̈at ix emcan dꞌa yibꞌan̈ qꞌuen qꞌueen,
syalelcꞌochi,
ay juntzan̈xo anima tzꞌabꞌan slolonel Dios,
te tzalajcꞌolal scha ebꞌ.
17 Palta malaj jabꞌoc stecꞌanil ebꞌ,
icha junoc te teꞌ malaj schꞌan̈al yibꞌ.
Axo yic sja junoc yaelal,
mato tzꞌacꞌjioch dꞌa yibꞌan̈ ebꞌ yuj slolonel Dios,
jun rato sjuviel spensar ebꞌ.
18 Axo juntzan̈xo in̈at ix emcan dꞌa caltac an̈cꞌultac,
syalelcꞌochi,
ay juntzan̈xo ebꞌ tzꞌabꞌan slolonel Dios.
19 Palta an̈ej yic yolyibꞌan̈qꞌuinal tic sna ebꞌ.
Sjuviel spensar ebꞌ yujto snibꞌejoch sbꞌa ebꞌ bꞌeyumal.
Tzijtum juntzan̈ tas snibꞌejoch ebꞌ.
Yuj chiꞌ,
sjuviel ebꞌ dꞌa slolonel Dios.
Lajan tzꞌaj ebꞌ icha juntzan̈ in̈at malaj jabꞌoc sat syacꞌaꞌ.
20 Palta axo juntzan̈xo in̈at ix emcan bꞌaj yax sat luum,
syalelcꞌochi,
ay juntzan̈xo ebꞌ tzꞌabꞌan slolonel Dios,
syacꞌval och ebꞌ dꞌa scꞌool.
A ebꞌ chiꞌ,
lajan ebꞌ icha juntzan̈ in̈at syacꞌ sat dꞌa 30.
Ay pax ebꞌ lajan icha juntzan̈ syacꞌ sat dꞌa 60,
yedꞌ dꞌa jun ciento,
xchi Jesús.
A masanil tas cꞌubꞌeltac yaji ol checlajelta
21 Ix yalanxi Jesús:
—Ayic sco tzꞌicanoch co candil,
¿tom a dꞌa yalan̈ junoc cajón,
ma dꞌa yalan̈ junoc chꞌat scacꞌcani?
A dꞌa yibꞌan̈ junoc tas chaan̈,
ataꞌ scacꞌqꞌuei,
yic vachꞌ syacꞌ yoc dꞌa yol co pat.
Marcos 4.21-41
22 Icha pax chiꞌ jantac tas cꞌubꞌabꞌileli,
ol checlajoc.
Yedꞌ jantacn̈ej tas cꞌubꞌeltac yaji,
ol checlajel smasanil.
23 A juntzan̈ van eyabꞌan tic,
naec val sicꞌlabꞌil.
24 Aqꞌuec val och e chiquin dꞌa tas van eyabꞌani,
yujto icha tzeyutej eyacꞌanoch e chiquin,
icha chiꞌ ol yutoc Dios yacꞌanpax nachajel eyuuj.
Ayto pax tas ol vachꞌ acꞌjoc nachajel eyuuj.
25 Yujto a mach sgana snachajel yuuj,
ol vachꞌ acꞌjoc nachajel yuj ebꞌ.
Axo ebꞌ malaj sgana snachajel yuuj,
a jabꞌoc tas ijan snachajel yuj ebꞌ,
ol vachꞌ icꞌjoc ecꞌ dꞌa ebꞌ,
xchi Jesús.
A yabꞌixal juntzan̈ in̈at sqꞌuibꞌi
26 —Ol val dꞌayex chajtil tzꞌaj yoch ebꞌ anima dꞌa yol scꞌabꞌ Dios.
Lajan icha junoc vin̈ stzicbꞌat yin̈at dꞌa sat junoc sluum.
27 Slajvi chiꞌ,
svay vin̈ junjun acꞌval,
sqꞌuex van vin̈ dꞌa junjun cꞌu.
Axo pax juntzan̈ in̈at chiꞌ sqꞌueuli,
sqꞌuibꞌi.
Palta man̈ yojtacoc vin̈ tas tzꞌaj sqꞌuibꞌi,
28 yujto yujn̈ej syaxil sat luum sqꞌuibꞌi.
Bꞌabꞌel sqꞌueul xiil.
Slajvi chiꞌ,
sqꞌueul sjolom,
tzꞌoch sat.
29 Ayic scꞌanbꞌi,
sjochchaji,
yujto scꞌoch stiempoal yeli.
A yabꞌixal sat an̈ mostaza
30 ¿Chajtil tzꞌaj sqꞌuibꞌ sbꞌisul ebꞌ anima yoch dꞌa yol scꞌabꞌ Dios tze naꞌa?
Ol val jun abꞌix tic eyabꞌi,
chajtil tzꞌaj sqꞌuibꞌ sbꞌisul ebꞌ.
31 A ebꞌ chiꞌ,
lajan ebꞌ icha juntzan̈ in̈at mostaza tzꞌavchaj dꞌa junoc luum.
A juntzan̈ in̈at chiꞌ,
yelxo te cotac dꞌa yichan̈ masanil juntzan̈xo in̈at dꞌa yolyibꞌan̈qꞌuinal tic.
32 Palta ayic toxo ix avchaji,
sqꞌuibꞌi,
ecꞌto tzꞌaj dꞌa yichan̈ masanil juntzan̈xo itaj scavej dꞌa junjun abꞌil.
Te nivac tzꞌaj scꞌabꞌ,
syal sbꞌoan soꞌ nocꞌ much dꞌa yen̈ul,
xchi Jesús dꞌa ebꞌ.
Abꞌixn̈ej yalnac Jesús dꞌa ebꞌ anima
33 Tzijtum juntzan̈ abꞌix icha jun tic ix yal Jesús dꞌa ebꞌ ayic ix yalanel slolonel.
An̈ej juntzan̈ tas snachajel yuj ebꞌ,
ix yaleli.
34 An̈ej juntzan̈ abꞌix chiꞌ ix yacꞌlabꞌej a ix yalanel dꞌa ebꞌ anima.
Axo yic ayecꞌ schꞌocoj yedꞌ ebꞌ scꞌaybꞌum,
ix laj yal dꞌa ebꞌ tastac syalelcꞌoch masanil juntzan̈ chiꞌ.
Ix numcꞌaj icꞌ yedꞌ aꞌ n̈ajabꞌ yuj Jesús
35 An̈ejaꞌ dꞌa jun cꞌu chiꞌ ayic van sqꞌuicꞌbꞌi,
ix yalan Jesús dꞌa ebꞌ scꞌaybꞌum:
—Coyec dꞌa junxo scꞌaxepal aꞌ chiꞌ,
xchi.
36 Yuj chiꞌ ix yactejcan juntzan̈ ebꞌ anima ayecꞌ dꞌa stiꞌ aꞌ n̈ajabꞌ chiꞌ.
Ix och ebꞌ dꞌa yol teꞌ barco dꞌa bꞌajtaxon ayoch Jesús chiꞌ,
ix bꞌat ebꞌ.
Ix bꞌat pax juntzan̈xo barco yedꞌ ebꞌ.
37 Palta ix javi jun icꞌ te ov dꞌa yibꞌan̈ aꞌ.
Ix och chulnaj aꞌ dꞌa yol teꞌ barco chiꞌ.
Ix macꞌjioch aꞌ dꞌa yol teꞌ yuj icꞌ chiꞌ.
Ijan ix bꞌat teꞌ dꞌa yich aꞌ.
38 Axo Jesús vaynac dꞌa yichelcꞌoch teꞌ barco chiꞌ,
ayoch scꞌan̈ jolom.
Yuj chiꞌ,
ix pitzjiel svayan̈ yuj ebꞌ.
—Mamin,
¿tom max a na jabꞌoc to van co bꞌat dꞌa yich aꞌ?
xchi ebꞌ dꞌay.
39 Yuj chiꞌ ix qꞌue vaan,
ix cachji jun icꞌ chiꞌ yuuj yedꞌ aꞌ n̈ajabꞌ chiꞌ:
—Ochan̈ vaan.
Numan tzach aji,
xchi.
Ichato chiꞌ bꞌian,
ix och vaan jun icꞌ chiꞌ,
ix numcꞌaji.
40 Ix lajvi chiꞌ,
ix yalan dꞌa ebꞌ scꞌaybꞌum chiꞌ:
—¿Tas yuj tzex te xivi?
¿Tas yuj maxto eyacꞌoch Dios dꞌa e cꞌool?
xchi dꞌa ebꞌ.
41 Axo ebꞌ,
ton̈ej ix te sat scꞌool ebꞌ yuuj.
Ix laj yalan ebꞌ:
—¿Tas yaj jun vin̈ tic?
Ina scꞌanabꞌajax vin̈ yuj icꞌ yedꞌ aꞌ n̈ajabꞌ tic,
xchi ebꞌ.