A yabꞌixal vin̈ tzicumbꞌat in̈at trigo
13
Dꞌa jun cꞌual chiꞌ,
ix elta Jesús dꞌa yol pat.
Ix bꞌat em cꞌojan dꞌa stiꞌ aꞌ n̈ajabꞌ.
2 Tzijtum anima ix cꞌoch bꞌaj ayecꞌ chiꞌ.
Yuj chiꞌ,
ix och dꞌa yol jun barco.
Ataꞌ ix em cꞌojan.
Axo ebꞌ anima chiꞌ ix can ebꞌ dꞌa stiꞌ aꞌ.
3 Tzijtum juntzan̈ abꞌix ix yal dꞌa ebꞌ.
Ix yalan icha tic:
—Ay jun vin̈ ix bꞌat tzicojcanbꞌat in̈at trigo.
4 Ayic van stzicanbꞌat ixim vin̈,
ay ixim ix emcan dꞌa yol bꞌe.
Axo nocꞌ much ix lojanqꞌue ixim.
5 Ay juntzan̈xo ixim ix emcan dꞌa yibꞌan̈tac qꞌuen sam qꞌueen,
bꞌaj jabꞌn̈ej slumal.
Elan̈chamel ix ja ixim,
yujto quenn̈ej slumal.
6 Palta axo yic ix el yoc cꞌu,
elan̈chamel ix tacjiel ixim,
yujto malaj val schꞌan̈al yibꞌ ixim.
7 Ay juntzan̈xo ixim ix emcan dꞌa scaltac an̈ an̈cꞌultac.
Axo ix te qꞌuibꞌ juntzan̈ an̈ an̈cꞌultac chiꞌ,
ix satel ixim in̈at chiꞌ dꞌa scal an̈.
8 Ay pax juntzan̈xo ixim ix emcan bꞌaj yax sat luum.
A juntzan̈ ixim chiꞌ,
ix satan ixim.
Ay ixim ix yacꞌ sat dꞌa cien.
Ay ixim ix yacꞌ sat dꞌa 60.
Ay ixim ix yacꞌ sat dꞌa 30.
9 A juntzan̈ tzeyabꞌ tic,
naec val sicꞌlabꞌil,
xchi Jesús chiꞌ dꞌa ebꞌ.
Max nachajel slolonel Dios yuj ebꞌ anima
10 Axo ebꞌ scꞌaybꞌum Jesús ix cꞌoch dꞌa stzꞌey.
Ix scꞌanbꞌan ebꞌ dꞌay:
—¿Tas yuj an̈ej juntzan̈ abꞌix schꞌoxanel cꞌaybꞌubꞌal tzal dꞌa ebꞌ?
xchi ebꞌ dꞌay.
11 Yuj chiꞌ ix yalan dꞌa ebꞌ:
—An̈ej dꞌayex schꞌox co Mam Dios juntzan̈ tas mantalaj mach ojtannac,
yic snachajel eyuuj tas tzꞌaj eyoch dꞌa yol scꞌabꞌ.
Palta axo dꞌa juntzan̈xo ebꞌ quetanimail,
max schꞌoxlaj.
12 Yujto a mach snibꞌej snachajel yuuj,
ayto tas ol vachꞌ nachajel yuuj.
Axo ebꞌ malaj sgana snachajel juntzan̈ tic yuuj,
ol icꞌjoc ecꞌ dꞌa ebꞌ.
13 Yuj chiꞌ,
an̈ej juntzan̈ abꞌix schꞌoxanel cꞌaybꞌubꞌal sval dꞌa ebꞌ.
Yujto vachꞌchom syil junoc tas ebꞌ,
scanxi ebꞌ dꞌa ichn̈ej taꞌ.
Ichato malaj tas syil ebꞌ.
An̈ejtonaꞌ,
vachꞌchom syabꞌ ebꞌ,
palta max nachajel-laj yuj ebꞌ.
14 Yuj ebꞌ anima chiꞌ,
icha tic ix aj yelcꞌoch tas yalnaccan vin̈aj Isaías ayic yalannaccan vin̈ icha tic:
Val yel ol yabꞌ ebꞌ,
palta man̈ ol nachajel-laj yuj ebꞌ.
Val yel ol yil ebꞌ,
palta man̈ ol nachaj paxel-laj yuj ebꞌ.
15 Yujto a ebꞌ anima tic,
toxo ix pitbꞌiel ebꞌ.
Ichato macan schiquin ebꞌ,
ichato smutzꞌ sat ebꞌ,
yic vachꞌ max uji yilan ebꞌ,
max yabꞌ pax ebꞌ yedꞌ schiquin.
Yuj chiꞌ max nachajel-laj yuj ebꞌ.
Max sqꞌuex jabꞌoc spensar ebꞌ,
max colchaj ebꞌ vuuj,
xchi Dios dꞌa Slolonel Tzꞌibꞌabꞌilcani.
16 Palta a ex tic,
vachꞌ eyicoꞌ,
jacan e sat eyilani,
jacan pax e chiquin eyabꞌani.
17 Val yel sval dꞌayex,
tzijtum ebꞌ schecabꞌ Dios dꞌa pecaꞌ yedꞌ juntzan̈xo ebꞌ te tojol sbꞌeybꞌal,
sgana ebꞌ yilnac juntzan̈ tzeyil tic,
palta maj yil-laj ebꞌ.
Sgana ebꞌ yabꞌnac juntzan̈ tzeyabꞌ tic,
palta maj yabꞌlaj ebꞌ.
A tas syalelcꞌoch yabꞌixal vin̈ tzicumbꞌat trigo
18 Aqꞌuec och e chiquin dꞌayin.
Ol val dꞌayex tas syalelcꞌoch yabꞌixal vin̈ tzicumbꞌat in̈at trigo.
19 A juntzan̈ in̈at ix emcan dꞌa yol bꞌe,
syalelcꞌochi,
ay ebꞌ anima tzꞌabꞌan slolonel Dios,
chajtil tzꞌaj yoch ebꞌ dꞌa yol scꞌabꞌ,
palta max nachajel-laj yuj ebꞌ.
Axo vin̈ diablo scꞌoch dꞌa ebꞌ,
syicꞌanel slolonel Dios chiꞌ vin̈ dꞌa spensar ebꞌ.
20 Axo juntzan̈xo in̈at ix emcan dꞌa yibꞌan̈ qꞌuen qꞌueen,
syalelcꞌochi,
ay juntzan̈xo anima tzꞌabꞌan slolonel Dios.
Nivanoc sqꞌuechaan̈ ebꞌ schaani.
21 Palta malaj stecꞌanil ebꞌ.
Axo yic sja junoc yaelal,
mato tzꞌacꞌjioch dꞌa yibꞌan̈ ebꞌ yuj slolonel Dios,
elan̈chamel sjuvixiel spensar ebꞌ.
22 Axo juntzan̈xo in̈at ix emcan dꞌa caltac an̈cꞌultac,
syalelcꞌochi,
ay juntzan̈xo ebꞌ tzꞌabꞌan slolonel Dios,
palta te ilcꞌolaln̈ej yaj ebꞌ yuj juntzan̈ yic yolyibꞌan̈qꞌuinal tic.
Syacꞌan musansatil sbꞌa ebꞌ yuj sbꞌeyumal.
Yuj juntzan̈ chiꞌ,
sjuviel ebꞌ dꞌa slolonel Dios.
Lajan tzꞌaj ebꞌ icha ixim trigo malaj sat syacꞌaꞌ.
23 Palta axo juntzan̈ in̈at ix emcan bꞌaj ay syaxil sat luum,
syalelcꞌochi,
ay juntzan̈xo ebꞌ tzꞌabꞌan slolonel Dios,
snachajel yuj ebꞌ.
A ebꞌ chiꞌ,
lajan ebꞌ icha juntzan̈ in̈at nivan sat syacꞌaꞌ.
Ay ebꞌ lajan icha juntzan̈ in̈at syacꞌ sat dꞌa cien.
Ay pax ebꞌ icha juntzan̈ syacꞌ sat dꞌa 60 yedꞌ dꞌa 30,
xchi Jesús.
A yabꞌixal an̈ avalan̈ ay dꞌa scal ixim trigo
24 Ix yalan junxo abꞌix tic Jesús dꞌa ebꞌ scꞌaybꞌum:
—Ol val dꞌayex chajtil tzꞌaj yoch ebꞌ anima dꞌa yol scꞌabꞌ Dios aj satchaan̈.
Lajan icha junoc vin̈ ix tzicanem yin̈at trigo te vachꞌ dꞌa sat sluum.
25 Axo dꞌacꞌvalil,
vaynac vin̈,
ix cꞌoch jun vin̈ ajcꞌool dꞌa sluum vin̈ chiꞌ.
Ix stzicanem juntzan̈ in̈at avalan̈ dꞌa scal strigo vin̈ chiꞌ.
26 Axo yic vanxo spoj ixim trigo chiꞌ,
ix checlaji to ay an̈ avalan̈ dꞌa scal ixim.
27 Yuj chiꞌ,
axo ebꞌ schecabꞌ vin̈ aj luum chiꞌ xidꞌ alan dꞌay:
Mamin,
a juntzan̈ in̈at a tzicnaquem dꞌa jun a luum chiꞌ,
te vachꞌ,
palta ¿bꞌaj am ix cot juntzan̈ an̈ avalan̈ ix pacꞌ dꞌa scal?
xchi ebꞌ dꞌa vin̈.
28 Tecan a junoc vajcꞌool xidꞌ tzicanem juntzan̈ chiꞌ dꞌa scal ixim,
xchi vin̈ dꞌa ebꞌ.
¿Ay am a gana bꞌat co toqꞌuel juntzan̈ an̈ avalan̈ chiꞌ?
xchi ebꞌ dꞌa vin̈.
29 Maay,
yujto ayic ol e tocꞌanel juntzan̈ an̈ avalan̈ chiꞌ,
ol el pax ixim trigo chiꞌ yedꞌoc.
30 Canocabꞌn̈ej icha chiꞌ masanto ol jochchaj ixim trigo chiꞌ.
Ato taꞌ ol val dꞌa ebꞌ in majan,
ol stocꞌanel juntzan̈ an̈ avalan̈ chiꞌ ebꞌ.
Ol stzecꞌan ebꞌ manojail,
ol sn̈usantzꞌa ebꞌ.
Ol lajvoc chiꞌ,
ol sjochanel ixim trigo chiꞌ ebꞌ bꞌian,
ol smolbꞌancan ixim ebꞌ dꞌa yol spatil,
xchi vin̈ dꞌa ebꞌ schecabꞌ chiꞌ,
xchi Jesús.
A yabꞌixal sat an̈ mostaza
31 Ix lajvi chiꞌ,
ix yalanpax junxo abꞌix tic Jesús:
—Ol val dꞌayex chajtil tzꞌaj sqꞌuibꞌ sbꞌisul ebꞌ anima yoch dꞌa yol scꞌabꞌ Dios aj satchaan̈.
A sbꞌisul ebꞌ chiꞌ,
lajan icha junoc in̈at mostaza syavej junoc vin̈ dꞌa sat sluum.
32 A juntzan̈ in̈at chiꞌ,
yelxo te cotac dꞌa yichan̈ masanil juntzan̈xo in̈at.
Palta axo sqꞌuibꞌi,
más nivac tzꞌaj dꞌa yichan̈ juntzan̈xo an̈ scavej dꞌa junjun abꞌil.
Lajan tzꞌaj icha juntzan̈ te teꞌ.
Axo nocꞌ much,
scꞌoch nocꞌ dꞌa scꞌabꞌ,
sbꞌoan soꞌ nocꞌ taꞌ,
xchi Jesús.
A yabꞌixal yich pan
33 Ix yalanpax junxo abꞌix tic Jesús dꞌa ebꞌ:
—Ol valxi dꞌayex chajtil tzꞌaj sqꞌuibꞌ sbꞌisul ebꞌ anima yoch dꞌa yol scꞌabꞌ Dios aj satchaan̈.
Lajan icha jabꞌ yich pan syacꞌoch junoc ix ix dꞌa scal oxeoc echlabꞌ harina.
Masanil ixim harina chiꞌ sipji yuuj,
xchi Jesús.
Abꞌixn̈ej juntzan̈ yalnac Jesús dꞌa ebꞌ anima
34 Ayic ix yalanel Jesús dꞌa scal ebꞌ anima chiꞌ,
an̈ej juntzan̈ abꞌix ajaltac snachajeli,
a ix yal dꞌa ebꞌ.
An̈ej juntzan̈ abꞌix chiꞌ ix yacꞌlabꞌej ayic ix yalanel dꞌa ebꞌ.
35 Icha chiꞌ ix aj yelcꞌoch tas tzꞌibꞌabꞌilcan dꞌa pecaꞌ yuj jun schecabꞌ Dios ayic ix yalani:
A juntzan̈ abꞌix ajaltac snachajeli,
a ol val dꞌa ebꞌ anima.
Ol val juntzan̈ tas malaj mach ojtannac yictax ix bꞌojican yolyibꞌan̈qꞌuinal tic yuj Dios,
xchi dꞌa Slolonel Tzꞌibꞌabꞌilcani.
A tas syalelcꞌoch yabꞌixal an̈ avalan̈
36 Axo Jesús,
ix tacꞌlancan sbꞌa yedꞌ ebꞌ anima chiꞌ,
ix ochxi dꞌa yol pat.
Ix och pax ebꞌ scꞌaybꞌum yedꞌoc.
Ix yalan ebꞌ dꞌay:
—A yabꞌixal an̈ avalan̈ ix al chiꞌ,
al dꞌayon̈ tas val syalelcꞌochi,
xchi ebꞌ dꞌay.
37 Yuj chiꞌ ix yalan dꞌa ebꞌ:
—A jun tzicumbꞌat in̈at trigo te vachꞌ,
syalelcꞌochi,
a in Acꞌbꞌil in cot yuj Dios voch animail tic.
38 Axo jun luum chiꞌ,
syalelcꞌochi,
aton yolyibꞌan̈qꞌuinal tic.
A juntzan̈ in̈at vachꞌ chiꞌ,
aton ebꞌ ayoch dꞌa yol scꞌabꞌ Dios.
Axo juntzan̈ an̈ avalan̈ chiꞌ,
aton ebꞌ yic vin̈ diablo.
39 A jun yajcꞌool vin̈ aj luum chiꞌ,
aton vin̈ diablo chiꞌ.
A jun tiempoal ol jochchajel ixim trigo chiꞌ,
syalelcꞌochi,
aton yic ol lajvoquecꞌ yolyibꞌan̈qꞌuinal tic.
Axo ebꞌ jochum trigo chiꞌ,
aton ebꞌ ángel.
40 Icha stocꞌjiel juntzan̈ an̈ avalan̈ chiꞌ sn̈usjitzꞌaoc,
icha chiꞌ ol aj ebꞌ anima ayic ol lajvoquecꞌ yolyibꞌan̈qꞌuinal tic.
41 A in Acꞌbꞌil in cot yuj Dios voch animail tic,
ol in checcot ebꞌ vángel.
Ol laj smolbꞌan juntzan̈ ebꞌ tzꞌacꞌan juvoquel spensar ebꞌ yetanimail yedꞌ juntzan̈xo ebꞌ chuc scꞌulej.
Ol laj icꞌjoc el ebꞌ bꞌaj ol in och Yajalil.
42 Axo syumchajcanbꞌat ebꞌ dꞌa yol jun icha horno bꞌaj ayoch cꞌacꞌ.
Ol laj ocꞌ ebꞌ taꞌ.
Ol siqꞌuicꞌoc ebꞌ yoqꞌui.
43 Axo ebꞌ tojol sbꞌeybꞌal,
icha val yilji cꞌu,
icha chiꞌ ol aj yilji ebꞌ dꞌa yol scꞌabꞌ co Mam Dios.
A val juntzan̈ tzeyabꞌ tic,
naec val sicꞌlabꞌil.
A yabꞌixal jun tas cꞌubꞌabꞌil dꞌa yol luum
44 A bꞌaj tzꞌoch ebꞌ anima dꞌa yol scꞌabꞌ Dios aj satchaan̈,
lajan icha junoc tas te vachꞌ,
te caro stojol,
cꞌubꞌanel dꞌa yol luum.
Ayic tzꞌilchaj yuj junoc vin̈ vinac,
dꞌa jun rato chiꞌ svachꞌ mucancan vin̈ junelxo.
Ste tzalaj vin̈ yuuj.
Yuj chiꞌ schon̈el vin̈ masanil tas ay dꞌay,
yic smanan jun luum chiꞌ vin̈ yicoc.
A yabꞌixal jun qꞌuen ton̈ perla sbꞌi
45 A bꞌaj tzꞌoch ebꞌ anima dꞌa yol scꞌabꞌ Dios aj satchaan̈,
lajan icha junoc manvajum tzecꞌ sayan juntzan̈ qꞌuen ton̈ te caro stojol,
perla sbꞌi.
46 Tato ay junoc te vachꞌ tzꞌilchaj yuuj,
te caro stojol,
schon̈el masanil tas ay dꞌay,
smanan jun perla chiꞌ yicoc.
A yabꞌixal jun chimpa yamlabꞌ chay
47 Ol val junxo abꞌix tic dꞌayex chajtil tzꞌaj yoch ebꞌ anima dꞌa yol scꞌabꞌ Dios aj satchaan̈.
Lajan icha junoc chimpa yamlabꞌ chay tzꞌacꞌjiem yol aꞌ,
tzijtum macan̈il nocꞌ chay tzꞌochcan dꞌa yol chꞌan̈.
48 Axo yic sbꞌudꞌji chꞌan̈,
syicꞌanqꞌueta chꞌan̈ ebꞌ yamum chay chiꞌ,
syicꞌanel ebꞌ dꞌa stiꞌ aꞌ.
Ataꞌ tzꞌem cꞌojan ebꞌ,
sicꞌanel nocꞌ vachꞌ ebꞌ,
smolbꞌan nocꞌ ebꞌ dꞌa yol junoc xuuc.
Axo nocꞌ schucal,
syumcanel nocꞌ ebꞌ.
49 Icha chiꞌ ol aj ebꞌ anima,
ayic ol lajvoquecꞌ yolyibꞌan̈qꞌuinal tic,
ol cot ebꞌ ángel ul yiqꞌuel ebꞌ chuc dꞌa scal ebꞌ vachꞌ.
50 Axo syumjicanbꞌat ebꞌ chiꞌ dꞌa yol jun icha horno bꞌaj ayoch cꞌacꞌ.
Ol te ocꞌ ebꞌ taꞌ.
Ol siqꞌuicꞌoc ebꞌ yoqꞌui,
xchi Jesús.
A yopisio ebꞌ scꞌaybꞌum Jesús
51 Ix lajvi chiꞌ ix scꞌanbꞌan Jesús dꞌa ebꞌ scꞌaybꞌum:
—¿Tzam nachajel juntzan̈ tic smasanil eyuuj?
xchi dꞌa ebꞌ.
—Snachajel cuuj Mamin,
xchi ebꞌ dꞌay.
52 —A ex tic,
cꞌaybꞌabꞌil exxo,
chajtil tzꞌaj yoch ebꞌ anima dꞌa yol scꞌabꞌ Dios aj satchaan̈.
Yuj chiꞌ,
syal eyacꞌan cꞌaybꞌaj juntzan̈ acꞌ cꞌaybꞌubꞌal yedꞌ juntzan̈ ojtacabꞌilxo,
xchi dꞌa ebꞌ.
Ayecꞌ Jesús dꞌa Nazaret
53 A ix lajvi yalan juntzan̈ abꞌix chiꞌ Jesús,
ix elxi dꞌa jun lugar chiꞌ.
54 Ix cꞌochxi dꞌa schon̈abꞌ.
Ix och dꞌa yol spatil culto.
Ataꞌ ix scꞌaybꞌej ebꞌ anima.
A ebꞌ anima chiꞌ ton̈ej ix sat scꞌool ebꞌ yuuj.
Ix laj yalan ebꞌ:
—¿Bꞌaj am ix scꞌaybꞌej sjelanil jun vin̈ tic?
¿Tas syutej vin̈ sbꞌoan juntzan̈ milagro tic?
55 A jun vin̈ tic,
yuninal vin̈ vin̈ n̈icum teꞌ.
Axo ix snun vin̈,
aton ix María.
Cojtac pax ebꞌ yucꞌtac vin̈,
aton vin̈aj Jacobo,
vin̈aj José,
vin̈aj Simón yedꞌ vin̈aj Judas.
56 An̈ejtonaꞌ pax ebꞌ ix yanabꞌ vin̈,
ayecꞌ ebꞌ ix dꞌa co cal.
Yuj chiꞌ,
¿bꞌaj am ix yicꞌ jun sjelanil vin̈ tic?
xchi ebꞌ.
57 Yuj chiꞌ,
ton̈ej ix somchajel spensar ebꞌ yuuj.
Palta ix yalan Jesús chiꞌ dꞌa ebꞌ:
—A ebꞌ schecabꞌ Dios,
ay yelcꞌoch ebꞌ dꞌa yichan̈ ebꞌ anima smasanil.
Palta axo dꞌa yichan̈ ebꞌ yetchon̈abꞌ ebꞌ yedꞌ dꞌa yichan̈ ebꞌ jun yaj yedꞌ ebꞌ dꞌa yol spat,
malaj yelcꞌoch ebꞌ,
xchi Jesús.
58 Jayen̈ej milagro ix sbꞌo dꞌa jun lugar chiꞌ,
yujto max yacꞌochlaj ebꞌ dꞌa scꞌool.